1-тӥ визь-кенеш. Дунъялэ кусыпъёстэс

МАЕ СО ВОЗЬМАТЭ

Кузпалъёс, кудъёсыз ог-огенызы кусыпъёссэс дунъяло, валало, соослэн кузпалъяськемзы вань улытозязылы шуыса. Со юрттэ соослы кышкатэк улыны. Котькудӥз соос пӧлысь оске, кузпалыз солы оскымон кылёз шуыса, улоназы шуг-секытъёсын пумиськизы ке но.

Куд-ог кузпалъёс уг люкисько, малы ке шуоно кышкало, со тодмооссылы но ӵыжы-выжыоссылы уз яра шуыса. Но умойгес луысал, соос семьязэс утьыны тыршысалзы ке, ог-огзэс яратэменызы но гажаменызы.

БИБЛИЫСЬ ВИЗЬ-КЕНЕШ: «Пиосмуртлы но аслэсьтыз кышнозэ куштыны уг яра» (1 Коринфъёслы 7:11).

«Кузпалэныд кусыпъёстэ дунъяськод ке, тон уд дыртӥськы кӧттэ ӝож карыны. Тон котьку дась простить карыны но „вождэ эн вай“ шуыны. Шуг-секытъёс кылдо ке, тон киостэ уд лэзиськы, нош тыршиськод соосты сэрттыны-пертчыны» (Майк).

МАЛЫ СО КУЛЭ

Кузпалъёс, кудъёсыз ог-огенызы кусыпъёссэс уг дунъяло, тазьы малпаны быгато: «Ми ог-огмылы ум тупаське, соин ик милемлы люкиськоно».

«Тросэз тазьы малпаса кузпалъясько: „Мар ке луиз ке, люкисько“. Нош адями кузпалъяськыкуз ик ини озьы малпа ке, со возьматэ, со карт но кышно вискысь кусыпъёсыз уг дунъя шуыса» (Джен).

МАР КАРЫНЫ ЛУОЗ

АСЬТЭДЫ ЭСКЕРЕ

Керетыкуды:

• Жаляськоды-а тӥ, та адямиен кузпалъяськиды шуыса?

• Малпаськоды-а тӥ: «Мынам мукет кузпалы луысал ке...»?

• Вераськоды-а тӥ тазьы: «Мон кошкисько тон дорысь!» яке «Шедьто аслым сое, кин монэ дунъялоз»?

Та юанъёс пӧлысь одӥгезлы ке но «бен» шуиды ке, озьыен, тӥледлы кусыпъёстэс юнматоно.

ОГ-ОГЕНЫДЫ КЕНЕШЕ

• Потэ-а тӥледлы, тӥ кусыпъёстэс азьвыл сямен уд дунъяське ни шуыса? Потэ ке, малы?

• Мар тӥ карыны быгатысалды, кусыпъёстэс юнматон понна?

ВИЗЬ-КЕНЕШЪЁС

• Ог-огдылы яратон кылъёсын вакчи гожтэтъёс гожъялэ.

• Уж дорады кузпалдылэсь туспуктэмзэ возе.

• Тӥ кузпалэныды ӵош ӧвӧл ке, жингыртэ яке гожтэ солы.

БИБЛИЫСЬ ВИЗЬ-КЕНЕШ: «Мае Инмар огазеяз, сое адями медаз люкы» (Матфей 19:6).