8-тӥ люкет
Инмарлэн малпанэз ӝоген быдэсмоз
1, 2. Кызьы Инмар курадӟонъёсты быдтыны дасяськиз?
ТРОС сю аръёс ӵоже пумит султэм адямиослэн но убиръёслэн кивалтэмзы адямиосты берлань кыске. Нош Инмар асьмелэн курадӟонъёсмы шоры синзэ ӧз ворса. Вань сю аръёс ӵоже со дасяськиз адямиосыз лек ужъёслэн но курадӟонъёслэн зӥбет улысьтызы мозмытыны.
2 Эдемын пумит султон дырысен Инмар аслэсьтыз кивалтэт кылдытон сярысь малпанзэ усьтыны кутскиз, кудӥз та музъемез адямиослы рай улон интылы пӧрмытоз (Кылдытонлэн кутсконэз 3:15). Берлогес Иисус, Инмарлэн валтӥсь быръем муртэз, ас дышетонъёсаз Инмарлэн вуоно кивалтэтэзлы трос саклык висъяз. Со вераз, со кивалтэт гинэ адямиослы оскон сётоз шуыса (Даниил 2:44; Матфей 6:9, 10; 12:21).
3. Кызьы Иисус музъемлэсь вуоно кивалтэтсэ нимаз, но малы?
3 Иисус Инмарлэсь вуоно кивалтэтсэ «Ин Эксэйлыкен» нимаз, малы ке шуоно со инмысен кивалтоз (Матфей 4:17). Со озьы ик нимаз сое «Инмар Эксэйлыкен», малы ке шуоно солэн Кылдытӥсез — Инмар (Лука 17:20). Трос дауръёс ӵоже Инмар адямиослы аслэсьтыз духсэ сётъяз азьпалзэ вераса гожъяны соос сярысь, кин со кивалтэт пӧлы пыроз, но со сярысь, мар кароз со кивалтэт.
Муъемлэн выль эксэез
4, 5. Кызьы Инмар возьматӥз, Иисус соин быръем Эксэй луэ шуыса?
4 Ог кык сюрс ар талэсь азьло Инмарлэн Эксейлыкезлэн вуоно Эксэез сярысь тросэз азьпалзэ веранъёс Иисус вылын быдэсмизы. Ӵапак со луиз Инмарен быръем ин кивалтэтлэн адямиосын Кивалтӥсез. Кулэмез бере, Инмар Иисусэз туж кужмо, ноку но кулӥсьтэм духовной кылдытэм карыса, инмын улон понна улӟытӥз. Сое улӟытэмлэн трос адӟисьёсыз вал (Апостолъёслэн ужъёссы 4:10; 9:1—9; Римын улӥсьёслы 1:1—4; 1 Коринфын улӥсьёслы 15:3—8).
5 Собере Иисус «Инмарлэн бур палаз пуксиз» (Еврейёслы 10:12). Отын со возьмаз со дырез, куке Инмар сое Аслаз ин Эксэйлыказ эксэйяськыны лэзёз. Озьы Псаломысь 109:1 азьпалзэ верам быдэсмиз, кытын Инмар вераз солы: «Тынэсьтыд тушмонъёстэ Тынад пыд выжыяд понытозям Мынам бур палам пук».
6. Кызьы Иисус возьматӥз, со Инмар Эксэйлыкын Эксэй луон куронъёслы тупа шуыса?
6 Куке Иисус музъем вылын вал, со возьматӥз, та ужез быдэсъян понна, курон-косонъёслы тупа шуыса. Уйылон-уллянъёс шоры учкытэк, со Инмар азьын дун-чылкыт кылёнэз бырйиз. Со ужъёсыныз Иисус возьматӥз, Шайтан пӧяськиз, куке вераз, шуг-секытъёсын пумиськыса, одӥг адями но Инмарлы оскымон уз кыльы шуыса. Иисус, дун-шектэм адями, «берпуметӥез Адам», возьматӥз, Инмар ӧз янгыша, куке дун-шектэм адямиосты кылдытӥз (1 Коринфын улӥсьёслы 15:22, 45; Матфей 4:1—11).
7, 8. Мар умойзэ Иисус музъем вылын лэсьтӥз, но мае со возьматӥз соин?
7 Кыӵе кивалтӥсь лэсьтӥз сомында умойзэ, кӧня лэсьтӥз Иисус кӧня ке ар служениез куспын? Инмарлэн святой духезлэн юрттэменыз, Иисус висисьёсты, сӧсырмемъёсты, синтэмъёсты, пельтэмъёсты но кылтэмъёсты бурмытъяз. Со кулэмъёсты гинэ но улӟытъяз! Татын, музъем вылын, со возьматӥз, мар со азьланяз быдэс музъем вылын вань адямиос понна лэсьтоз, куке Эксэй луыса лыктоз (Матфей 15:30, 31; Лука 7:11—16).
8 Иисуслэсь музъем вылын туж трос умой ужъёс лэсьтэмзэ адӟыса, солэн Иоанн дышетскисез вераз: «Трос мукетсэ но Иисус лэсьтӥз: со сярысь пыр-поч гожтоно ке, малпасько, быдэс дунне вылэ но со гожтэм книгаосты тэрытыны ӧй луысал» (Иоанн 21:25).
9. Малы шонерлыкез яратӥсь адямиос люкаськылӥзы Иисус доры?
9 Адямиосты юн яратэменыз, Иисус лякыт сюлэмо но жалясь вал. Со куанер но зӥбыса возем адямиослы юрттӥз, озьы ик адӟемпотостэм ӧз кары узыр но сиё-дано адямиосты. Шонерлыкез яратӥсь адямиос вазиськизы Иисуслэн яратонэн тырмем ӧтёнэзлы, куке со вераз: «Ваньды курадӟыса, шугадӟыса улӥсьёс, лыктэлэ Мон доры, Мон тӥледыз буйгато. Мынэсьтым зӥбетме вылады басьтэлэ но Мынэсьтым дышетске, Мон уго востэм, зӥбыт сюлмыным; соку лулдылы каньылан шедьтоды. Мынам зӥбетэ ӟеч, ныпъетэ капчи» (Матфей 11:28—30). Инмарлэсь кышкась адямиос со доры люкаськылӥзы но чидатэк возьмазы солэсь кивалтэмзэ (Иоанн 12:19).
Иисусэн ӵош кивалтӥсьёс
10, 11. Кин Иисусэн ӵош музъемен кивалтоз?
10 Кызьы адями кивалтэтъёсын кивалтӥсьлэн юрттӥсьёсыз вань, озьы ик Инмарлэн ин Эксэйлыказ но луоз. Иисус сяна, музъемен кивалтонэ озьы ик пыриськыны кулэ на мукетъёсыз но, малы ке шуоно Иисус кыл сётӥз соослы, кинэн солэн матысь кусыпъёсыз вал, соин ӵош соос эксэй луыса адямиосын кивалтозы шуыса (Иоанн 14:2, 3; Усьтӥськон 5:10; 20:6).
11 Озьыен, инмысь улонэ Иисусэн ӵош вань адямиос улӟытэмын уз луэ, быръемъёсыз гинэ. Соос пыро Инмарлэн Эксэйлыказ, кудӥз адямиосты пырак улон ӵоже бакель кароз. Озьы Иегова дауръёс ӵоже инъет дасяз кивалтэтлы, кудӥз адямиосты весяк бакель кароз.
Эрико кивалтэтлы пум вуэ
12, 13. Мар карыны Инмар Эксэйлык дась ини?
12 Ортчем дауре Инмар шонерак пыриськиз музъемлэн ужъёсаз. Кызьы вераське та брошюралэн 9-тӥ люкетаз, Библиысь азьпалзэ вераса гожтэм возьматэ, 1914-тӥ арын Христослэн кивалтэмез улсын Инмар Эксэйлык кылдытэмын вал, но али со Шайтанлэсь быдэс системазэ быдтыны дась ини. Со Эксэйлык Христослэн тушмонъёсыз пӧлын кузёяськыны дась (Псалом 109:2).
13 Со сярысь Данииллэн книгаяз 2:44 (НМ) азьло ик верамын вал ини: «Со эксэйёс дыръя [кудъёсыз вань асьме нуналъёсы] инмысь Инмар эксэйлык кылдытоз [инмын], кудӥз ноку но куашкатэмын уз луы. Со эксэйлык мукет калыклы сётэмын уз луы [адямиослы ноку но кивалтон сётэмын уз луы ни]. Со [Инмар Эксэйлык] ваньзэ со эксэйлыкъёсты куашкатоз, нош ачиз пырак сылоз».
14. Кызьы адямиос бакель каремын луозы адями кивалтэтэз быдтэм бере?
14 Куке Инмарлэсь эриксэ лыдэ басьтӥсьтэм котькыӵе кивалтэт быдтэмын луоз, соку музъем вылын Инмар Эксэйлык гинэ кивалтоз. Эксэйлык инмысен кивалтэ бере, адямиос солы ноку но изъян вайыны уз быгатэ. Кивалтэт луоз отын, кытын со азьло вал — инмын, Инмарлэн ки улаз. Инмар кивалтэт быдэс музъемез эскерыса улоз бере, нокин но зэм луисьтэм религиосын яке пӧртэм философской малпанъёсын но политика теориосын пӧямын уз луы ни. Нокудӥз но таӵе ужъёс пӧлысь уз луэ ни (Матфей 7:15—23; Усьтӥськон, 17—19 люкетъёс).
[Суред, 18-тӥ бам]
Куке Иисус музъем вылын вал, со висисьёсты бурмытъяз но кулэмъёсты улӟытъяз, озьы со возьматӥз, мар лэсьтоз выль дуннеын
[Суред, 19-тӥ бам]
Инмарлэн ин Эксэйлыкез Инмарлэсь кылзӥськисьтэм вань кивалтэтъёсты быдтоз