Мар со сыӵе Инмарлэн Эксэйлыкез?

1. Кыӵе тодмо вӧсяськонэз ми эскеромы?

БЫДЭС дуннеысь трос миллион адямиос «Инмысь Атаймы» вӧсяськонэз тодо. Та вӧсяськонэз вераса, Иисус дышетскисьёсызлы возьматӥз, мар сярысь вӧсяськоно. Ойдолэ сое пыр-почгес эскеромы но тодомы, малы солы саклык висъяно.

2. Кыӵе куинь куронъёс сярысь вераз Иисус, куке милемыз вӧсяськыны дышетӥз?

² Иисус вераз: «Тӥ тазьы вӧсяськелэ: Инмысь Атаймы! Тынад нимыд дано мед луоз; Тынад Эксэйлыкед мед лыктоз; Тынад эрикедъя мед луоз музъем вылын но инмын кадь ик». (Лыдӟе Матфейлэсь 6:9—13.) Малы Иисуслэн потэ вал, ми та куинь куронъёсты вӧсяськонъёсамы мед пыртомы шуыса? (Учке 20-тӥ ватсам валэктонэз.)

3. Мае милемлы тодоно Инмарлэн Эксэйлыкез сярысь?

³ Ми тодӥмы ини, Инмарлэн нимыз Иегова шуыса, но эскеримы, кыӵе солэн малпанэз адямиос но музъем пумысен. Нош мар верамез потэ вал Иисуслэн та кылъёсын: «Тынад Эксэйлыкед мед лыктоз»? Ойдолэ эскеромы, мар со сыӵе Инмарлэн Эксэйлыкез, мар со кароз но кызьы со Инмарлэсь нимзэ чылкытатоз.

МАР СО СЫӴЕ ИНМАРЛЭН ЭКСЭЙЛЫКЕЗ?

4. Мар со сыӵе Инмарлэн Эксэйлыкез но кин отын Эксэй?

⁴ Иегова инмын кивалтэт кылдытӥз но Иисусэз Эксэй кариз. Библиын со кивалтэт Инмарлэн Эксэйлыкез шуыса нимамын. Нош Иисус сярысь верамын: «Со — кузёослэн Кузё-Инмарзы, эксэйёслэн Эксэйзы» (Усьтӥськон 17:14). Иисус котькыӵе кивалтӥсьлэсь тросгес умой ужъёс лэсьтыны быгатэ. Вань кивалтӥсьёсты ӵош басьтыса, Иисус соослэсь ваньзылэсь кужмогес.

5. Кытысен кивалтэ Инмарлэн Эксэйлыкез? Маин со кивалтоз?

⁵ Улӟемез бере ньыльдон нунал ортчыса, Иисус берен инме тубиз. Кӧня ке дыр ортчем бере Иегова сое аслаз Эксэйлыказ Эксэе пуктӥз (Апостолъёслэн ужъёссы 2:33). Инмарлэн Эксэйлыкез музъемен инмысен кивалтоз (Усьтӥськон 11:15). Тӥни малы со кивалтэт озьы ик «Ин Эксэйлык» шуыса нимамын (2 Тимофейлы 4:18).

6, 7. Малы Иисус котькыӵе кивалтӥсьлэсь умойгес?

⁶ Библиын верамын, Иисус котькыӵе кивалтӥсьлэсь умойгес шуыса, малы ке шуоно «со вылын кулонлэн кужымез ӧвӧл ини» (Римъёслы 6:9). Музъем вылысь вань кивалтӥсьёс куло, нош Иисус ноку но уз кулы. Ваньмыз, мае Иисус адямиос понна лэсьтоз, пумтэм вапумъёсы пайда ваёз.

⁷ Библиысь азьпалзэ ивортон вера, Иисус шонерлыко но жаляны быгатӥсь эксэй шуыса. Отын гожтэмын: «Со вылын Кузё-Инмарлэн Духез улоз, бадӟым визьлыклэн но валанлэн духсы, визь-нодлэн но юнлыклэн духсы, тодон-валанлэн но Инмар азьын кышкаса улонлэн духсы; Кузё-Инмарлэн гажанэз Со бордын пачылмыса улоз. Аслаз синъёсыныз адӟыса гинэ, Со судить уз кары, пельёсыныз кылыса гинэ, Со ужъёсты уз быдэсъя. Куанеръёсты шонерлыко судить кароз» (Исаия 11:2—4). Потысал-а, тӥляд но сыӵе кивалтӥсьты мед луоз шуыса?

8. Кытысь ми тодӥськомы, Иисус огназ уз кивалты шуыса?

⁸ Инмар куд-ог адямиосты бырйиз, соос Иисусэн ӵош инмын мед кивалтозы шуыса. Кылсярысь, тани мар гожтӥз апостол Павел Тимофейлы: «Чидамы ке, Соин валче эксэйын пукомы но» (2 Тимофейлы 2:12). Кӧня адями Иисусэн ӵош кивалтоз?

9. Кӧня адями Иисусэн ӵош кивалтоз? Ку Инмар соосты бырйыны кутскиз?

⁹ Кызьы ми тодӥмы 7-тӥ люкетысь, Иисусэн ӵош 144 000 эксэйёс кивалтозы. Кинъёс со? Апостол Иоанн валэктэ: «Ыжпи [Иисус] кытчы гинэ уг мыны, соос ялан Со бӧрсьы мыно. ...Соос адямиос пӧлысь нырысь вордскем пиос кадь басьтэмын». (Лыдӟе Усьтӥськонэз 14:1, 4.) Озьыен, со эксэйёс — со 144 000 Инмарлы оскымон христианъёс, кудъёссэ Инмар Иисусэн ӵош музъемен кивалтыны пуктӥз (Усьтӥськон 20:4, 6). Иегова соосты нырысетӥ даурысен бырйыны кутскиз.

10. Кызьы Иеговалэн яратэмез адӟиське, адямиосын Иисус но 144 000-ёс кивалтозы шуыса?

¹⁰ Христосэн ӵош кивалтыны Иегова адямиосты бырйиз. Со возьматэ, Иегова ми сярысь сюлмаське шуыса. Иисус умой кивалтӥсь луоз, малы ке шуоно со вала милемыз но тодэ, мае чидано луэ адями но мар со сыӵе курадӟон. Апостол Павел гожтӥз, Иисус «лябӟыса улон дыръямы асьмеды жалясь луэ» но «асьмеос сямен ик визь сынаськонъёс пыр потэмын» шуыса (Еврейёслы 4:15; 5:8). Сю ньыльдон ньыль сюрс пӧлы пырисьёс но тодо, мар со сыӵе тырбыдэстэм луон но висён. Соин ик оскыны луэ, Иисус но соин ӵош кивалтӥсьёс милемыз валало шуыса но тодо, кыӵе шуг-секытъёсын ми пумиськиськомы.

МАР КАРОЗ ИНМАРЛЭН ЭКСЭЙЛЫКЕЗ ВУОНОЯЗ?

11. Малы Иисус вӧсяськыны дышетӥз, инмын Инмарлэн эрикезъя мед луоз шуыса?

¹¹ Иисус дышетскисьёссэ вӧсяськыны дышетӥз, инмын Инмарлэн эрикезъя мед луоз шуыса. Малы? Кызьы ми тодӥмы 3-тӥ люкетысь, Шайтан Дьявол Иеговалы пумит султӥз. Инмар Шайтанлы но со пала пырем кылчинъёслы, яке периослы, огдырлы инмын улыны лэзиз. Соин ик вераны уг луы вал, Инмарлэн инмысь вань кылдытэмъёсыз солэсь эриксэ быдэсъяло шуыса. Та книгалэн 10-тӥ люкетысьтыз ми тросгес тодомы Шайтан сярысь но периос сярысь.

12. Кыӵе кык кулэ луись учыр сярысь верамын Усьтӥськонын 12:10?

¹² Библиын верамын, ӝоген Инмар Эксэйлыкын Эксэй луэмез бере Иисус Шайтанлы пумит ожмаськыны кутскиз шуыса. (Лыдӟе Усьтӥськонэз 12:7—10.) Дасэтӥ кылбурын кык кулэ луись учыр сярысь гожтэмын. Нырысетӥез — Инмарлэн Эксэйлыкез кивалтыны кутске но отын Иисус Христос Эксэй луэ. Кыкетӥез — Шайтанэз инмысь музъем вылэ сэрпалто. Кызьы ми азьланяз тодомы, ваньмыз со быдэсмиз ини.

13. Кызьы инмын югдур воштӥськиз, куке отысь Шайтан сэрпалтэмын вал?

¹³ Библиын гожтэмын: «Инъёс, Инмын вань улӥсьёс, шулдыръяське!» (Усьтӥськон 12:12). Макем шумпотӥзы Инмарлы оскымон кылчинъёс, куке Шайтан но солэн периосыз инмысь сэрпалтэмын вал! Табере инмын ваньмыз тупаса но огкылысь уло, малы ке шуоно отын ваньмыз Инмарлэсь эриксэ быдэсъяло.

14. Кыӵе югдур кылдӥз музъем вылын Шайтанэз инмысь сэрпалтэм бере?

¹⁴ Нош музъем вылын али чылкак мукет югдур. Адямиос туж курадӟо, малы ке шуоно Шайтан «туж бадӟым йыркурен» улэ — «со тодэ уго, солы ӧжыт дыр кылемын ни шуыса» (Усьтӥськон 12:12). Шайтанэз инмысь сэрпалтӥзы, но со тодэ, ӝоген со быдтэмын луоз шуыса. Со вожомемын. Со лэсьтэ ваньзэ, музъем вылын трос курадӟонъёс но шуг-секытъёс мед луозы шуыса.

15. Кыӵе малпанэз Инмарлэн музъем пумысен?

¹⁵ Инмарлэн музъем пумысен малпанэз ӧз воштӥськы. Солэн азьвыл сямен ик потэ, музъем рай мед луоз но со вылын пырак дауръёс ӵоже тырбыдэс адямиос мед улозы шуыса (Псалтирь 36:29). Кызьы Инмарлэн Эксэйлыкез Инмарлэсь эриксэ быдэстоз?

16, 17. Мар верамын Инмарлэн Эксэйлыкез сярысь Данииллэн 2:44?

¹⁶ Даниил пророклэн книгаяз гожтэмын: «Со эксэйлыкъёс улон вакытэ Инмысь Инмар ноку но, пумтэм вапумъёсы куашкасьтэм эксэйлык ӝутоз, со эксэйлык мукет калыклы сётэмын уз луы; со вань эксэйлыкъёсты пазьгоз, куашкатоз, нош ачиз пумтэм вапумъёс ӵоже сылоз» (Даниил 2:44). Мае ми тодӥськомы Инмарлэн Эксэйлыкез сярысь та азьпалзэ ивортонысь?

¹⁷ Нырысетӥез: Эксэйлык кивалтыны кутске «со эксэйлыкъёс улон вакытэ». Со возьматэ, куке Инмарлэн Эксэйлыкез кивалтыны кутскоз, со вакытэ музъем вылын адями кивалтӥсьёс кивалтозы на шуыса. Кыкетӥез: Инмарлэн Эксэйлыкез пумтэм вапумъёс ӵоже кивалтоз но нокыӵе мукет кивалтэтэн воштэмын уз луы. Но куинетӥез: Инмарлэн Эксэйлыкез но музъем вылысь мукет кивалтӥсьёс куспын ожмаськон потоз. Инмарлэн Эксэйлыкез та ожмаськонын вормисе потоз, но музъем вылын одӥг гинэ кивалтэт луоз — самой умой кивалтэт.

18. Кызьы нимаське ожмаськон, кудӥз луоз дунне вылысь вань кивалтӥсьёс но Инмарлэн Эксэйлыкез куспын?

¹⁸ Мар луоз та дуннеысь кивалтӥсьёс но Инмарлэн Эксэйлыкез куспын ожмаськон кутскон азьын ик? Библиын верамын, периос «быдэс дунне вылысь музъем выл эксэйёсты» пӧялозы, «соосты Дунне Кутӥсь Инмарлэн быдӟым нуналаз ожмаськонэ люкан понна». Дунне вылысь вань кивалтӥсьёс Инмарлэн Эксэйлыкезлы пумит ожмаськыны потозы, но Инмарлэн Эксэйлыкез соосты вормоз. Со ожмаськон Армагеддон шуыса нимаське (Усьтӥськон 16:14, 16; учке 10-тӥ ватсам валэктонэз).

19, 20. Малы милемлы Инмарлэн Эксэйлыкез кулэ?

¹⁹ Малы милемлы Инмарлэн Эксэйлыкез кулэ? Куинь мугъёс вань, малы со кулэ. Нырысетӥез — сьӧлыко луэмзы понна адямиос куло. Нош Инмарлэн Эксэйлыкез кивалтыны кутскиз ке, ми пумтэм вапумъёс ӵоже уломы. Иоаннлэсь 3:16 верамын: «Инмар сокем дуннеез яратӥз, Аслэсьтыз одӥг вордӥськем Пизэ сётӥз, котькудӥз но Солы оскись мурт медаз быры, солэн быронтэм улонэз мед луоз шуыса».

²⁰ Кыкетӥез — милемлы Инмарлэн Эксэйлыкез кулэ, малы ке шуоно дунне, кудаз ми улӥськомы, туж лек. Котыр вӧлмемын пӧяськон но азон-калгон. Ми асьмеос ум быгатӥське ваньзэ сое быдтыны, нош Инмар быгатэ. Со лек адямиосты Армагеддонын быдтоз. (Лыдӟе Псалтирез 36:10.) Куинетӥез — милемлы Инмарлэн Эксэйлыкез кулэ, малы ке шуоно тросэз адямиосын кылдытэм кивалтэтъёс пӧяськисесь но лекесь. Соос уг быгато адямиослэсь шуг-секытъёссэс быдтыны. Соос уг юртто адямиослы Инмарлэсь кылзӥськыны. Библиын верамын: «Адями адямиен кузёяське но солы изъян вайыса кельтэ» (Екклесиаст 8:9).

21. Кызьы Инмарлэн Эксэйлыкез Инмарлэсь эриксэ музъем вылын быдэстоз?

²¹ Армагеддон бере Инмарлэн Эксэйлыкез музъем вылын Инмарлэсь эриксэ быдэстыны кутскоз. Шайтан но периос уз луэ ни (Усьтӥськон 20:1—3). Адямиос уз но висе, уз но кулэ. Кылзӥськись адямиос рай музъем вылын пырак дауръёс ӵоже улыны быгатозы, малы ке шуоно Иисус аслэсьтыз улонзэ адямиос понна дун тыриз (Усьтӥськон 22:1—3). Озьы ик, Инмарлэн Эксэйлыкез Инмарлэсь нимзэ чылкытатоз. Со возьматэ, Инмарлэн Эксэйлыкез Инмарлэсь ӟеч нимзэ берыктоз шуыса. Соку вань адямиос Иеговаез гажалозы. (Учке 21-тӥ ватсам валэктонэз.)

КУ ИИСУС ХРИСТОС ЭКСЭЙ ЛУИЗ?

22. Кытысь ми тодӥськомы, музъем вылын улыкуз, Иисус Эксэй ӧй вал на но улӟемез бере соку ик Эксэй ӧз луы шуыса?

²² Музъем вылын улыкуз, Иисус дышетскисьёссэ вӧсяськыны дышетӥз: «Тынад Эксэйлыкед мед лыктоз». Та кылъёсысь адӟиське, со вакытэ Инмарлэн Эксэйлыкез уг кивалты на вал шуыса. Соку Инмар аслэсьтыз кивалтэтсэ ӧз кылдыты на вал, но Иисус Эксэе пуктэмын ӧй вал на. Луиз-а Иисус Эксэй, инме тубемез бере ик? Ӧз, солы кӧня ке возьмано луиз. Кытысь ми сое тодӥськомы? Со сярысь азьло ик верамын вал Псалтирьын 109:1. Отын гожтэмын, кызьы Иегова вера: «Тушмонъёстэ пыд улад понытозям, бурпалам пук». Пётр но Павел апостолъёс валэктӥзы, та азьпалзэ ивортон улӟытэм Иисус сярысь верамын вал шуыса (Апостолъёслэн ужъёссы 2:32—35; Еврейёслы 10:12, 13). Озьыен, улӟемез бере но Иисус кӧня ке возьмаз на, ку Иегова сое Эксэй кароз. Кӧня солы возьмано луиз?

23. а) Ку Иисус Инмарлэн Эксэйлыказ Эксэй луиз? б) Мае ми тодомы вуоно люкетысь?

²³ Иисус Христос Эксэй луиз 1914-тӥ арын (Псалтирь 109:2). Тунсыко луэ, 1914-тӥ арлэсь азьвылгес ик куд-ог кылзӥськись сюлэмо христианъёс, Библиысь азьпалзэ ивортонъёсты эскерыса, валазы, та ар нимысьтыз ар луыны кулэ вал шуыса. Югдур, кудӥз кылдӥз быдэс дунне вылын 1914-тӥ арысен кутскыса, возьматӥз, со христианъёс ӧз янгышалэ шуыса. Мар нырысь ик кариз Иисус, куке 1914-тӥ арын Эксэй луиз? Со Шайтанэз музъем вылэ сэрпалтӥз. Табере, кызьы верамын Усьтӥськонын 12:12, Шайтанлы «ӧжыт дыр кылемын ни». Библиын со дыр «берпум аръёс» шуыса нимамын. Вуоно люкетысь ми эшшо но умойгес адӟомы на, ми ӵапак со вакытэ улӥськомы шуыса. (Учке 22-тӥ ватсам валэктонэз.)