3-ТӤ ЛЮКЕТ
Быдӟым ву тудӟон
Инмар сьӧлыклэсь кышкасьтэм дуннеез быдтэ но Ноез но солэсь семьязэ уте
АДЯМИОСЛЭН лыдзы йылэмъя, музъем вылын сьӧлык но тырбыдэстэм луон вӧлмизы. Енох гинэ азьпалзэ ивортыса вераз, вуоз нунал шуыса, куке Инмар сьӧлыклэсь кышкасьтэм адямиосты быдтоз. Озьы ке но, лек ужъёс озьы ик йылӥзы. Куд-ог кылчинъёс Иеговалы пумит ӝутскизы, асьсэлэсь инмын улон интызэс кельтӥзы но, адямиос кадь кариськыса, кышномуртъёсты асьсэлы кышнолы басьтылӥзы. Сыӵе юрӟым но шонертэм кусыпъёс сэрен, туж кужмо лек ӝужыт-таза муртъёс вордӥськылӥзы. Соос музъемез лек ужъёсын но вир кисьтонэн тырмытӥзы. Инмарлы чидантэм вӧсь вал со шоры учкыны.
Енох бере улӥз одӥг адями, кудӥз сьӧлыклэсь кышкасьтэм адямиослэсь пӧртэм вал. Солэн нимыз — Ной. Со но солэн семьяез Инмар азьын шонер улыны тыршизы. Инмар лек дуннеез быдтыны но Ноез утьыны малпаз. Со Ноез ковчег, шонер сэрего туж бадӟым пыж, лэсьтыны косӥз. Быдӟым ву тудӟон дыръя Ной но солэн семьяез, озьы ик трос пӧртэм пудо-животъёс ковчегын утиськыны быгатысалзы. Ной Инмарлэсь кылзӥськиз. Трос аръёс ӵоже, ковчег лэсьтыкуз, Ной «шонерлыкез тодытӥсь» вал (2 Пётр 2:5). Ной адямиослы Ву тудӟонлэн матэктэмез сярысь вералляз, нош соос верамзэ санэ ӧз понэ. Вуиз дыр Нойлы но солэн семьяезлы ковчеге пырыны но пудо-животъёсты сьӧразы басьтыны. Инмар соос бере ӧсэз пытсаз но, туж зол зорыны кутскиз.
Ньыльдон нунал но ньыльдон уй куазь зориз, быдэс музъем ву улэ кыльытозь. Сьӧлыклэсь кышкасьтэмъёс быризы. Кӧня ке толэзь ортчыса, ву кошкиз но, ковчег гурезь йылэ дугдӥз. Дыр ортчыса, ваньзы ковчегысь потӥзы. Отын соос быдэс ар улӥзы. Утиськемзы понна тау карыса, Ной Иеговалы курбон сётӥз. Инмар курбонзэ басьтӥз но оскытӥз Ноез но солэсь семьязэ, со ноку но музъем вылысь ваньзэ улэпсэ ву тудӟонын уз быдты ни шуыса. Аслэсьтыз буйгатӥсь кыл сётонзэ тодэ ваён понна, Иегова, адӟиськись тодмет карыса, пилем вылын вуюись сётӥз.
Ву тудӟон бере Инмар адямиослы выль курон-косонъёс сётӥз. Со пудо-животъёслэсь сӥльзэс сиыны лэзиз, нош вирзэс сиыны ӧз лэзьы. Озьы ик Инмар Ной выжыысь потэмъёсты музъем вылэ пӧртэм интыосы улыны интыяськыны косӥз, озьы ке но куд-огъёсыз соос пӧлысь ӧз кылзӥське. Нимродлэн кивалтэмез улсын огазеяськыса, адямиос Вавилон карын туж бадӟым каланча-башня пуктыны кутскизы. Соос, музъем вылэ вӧлмоно шуыса, Инмарлэсь курон-косонзэ валаса вылысь тӥязы. Пумит ӝутскемъёслэсь малпанзэс сӧрон понна, Инмар соослэсь кылзэс сураз но, соос пӧртэм кылъёсын вераськыны кутскизы. Ог-огзэс валатэк, соос каланча-башняез пуктэмысь дугдӥзы но музъем вылэ пазьгиськизы.
Пыкиськемын: Улон-вылон, 6—11-тӥ люкетъёс; Иуда 14, 15.