«Зэмлыкез дунэн басьты но ноку но эн вуза сое»

1, 2. а) Мар ми понна самой дуноез луэ? б) Кыӵе зэмлыкъёс милемлы дуно пото но малы? (Учке статья кутсконысь суредэз.)

МАР тӥ понна самой дуноез луэ? Ми Иеговалэн Адӟись-Ивортӥсьёсыз бере, милемлы тужгес но дуно пото соин кусыпъёсмы. Ми соосты номырин но ум воштэ. Озьы ик, милемлы туж дуно потэ Библиысь зэмлык, малы ке шуоно солы луыса ми инмысь Атаенымы эшъяськимы (Кол. 1:9, 10).

² Малпалэ гинэ, макем трос тодон-валан сётэ милемлы аслаз Кылыз, Библия, пыр Быдӟым Визьнодась! Со валэктэ, мае возьматэ солэн нимыз, но усьтэ милемлы аслэсьтыз паймымон сямъёссэ. Со вера, милемыз юн яратэменыз, со аслэсьтыз яратоно Пизэ ми понна сётӥз шуыса. Со сяна, Иегова усьтэ милемлы Мессия Эксэйлык сярысь зэмлыкез но вера, зырӟем христианъёслы инмын улыны оскиськон сётэ шуыса, нош «мукет ыжъёслы» — рай музъем вылын улыны (Иоанн 10:16). Со дышетэ милемыз, кызьы улоно. Ми туж дунъяськомы со зэмлыкъёсты, малы ке шуоно соос юртто милемлы Кылдытӥсьмылы матэгес кариськыны. Со сяна, соослы луыса милям улонмы юнме уг ортчы.

3. Мае уг возьмато «зэмлыкез дунэн басьты» кылъёс?

³ Иегова — шырыт сямо Инмар. Со трос умойзэ лэсьтэ соослы, кинъёс зэмлыкез утчало. Ми понна со аслэсьтыз яратоно Пизэ но сётӥз. Инмар уг возьма, зэмлык понна ми коньдон тыромы шуыса. Кылсярысь, одӥг пол Симон нимо пиосмурт, мукет адямиослы святой дух сётъяны кужымез коньдонэн басьтыны малпаса, апостол Пётрлы коньдон ӵектӥз. Пётр валэктӥз солы, со янгыша шуыса, но вераз: «Тынад азвесед асэныд ӵош быроно мед луоз,— Инмарлэсь кузьымзэ тон уксёен басьтыны малпад уго!» (Ап. уж. 8:18—20). Соку мае возьмато Библиысь «зэмлыкез дунэн басьты» кылъёс?

МАЕ ВОЗЬМАТО «ЗЭМЛЫКЕЗ ДУНЭН БАСЬТЫ» КЫЛЪЁС?

4. Мае ми тодомы зэмлык сярысь та статьяысь?

⁴ Мадёнъёсын 23:23 (ВД) верамын: «Зэмлыкез дунэн басьты но ноку но эн вуза сое, озьы ик визьлыкез но, дышетсконэз но, визь-нодэз но». Инмарлэн Кылысьтыз зэмлыкез шедьтон понна, туж тыршоно луэ. Зэмлык понна ми котьмармес сётыны дась луыны кулэ. Мадёнъёс книга верамъя, ми зэмлыкез «дунэн басьтӥмы» ке, яке тодӥмы ке, милемлы сое «вузаны», яке кельтыны, уг яра. Ойдолэ эскеромы, мае возьмато «зэмлыкез дунэн басьты» кылъёс но кыӵе дун милемлы куддыръя со понна тыроно луэ. Сое тодыса, зэмлык милемлы эшшо но дуногес потоз но милям юн мылкыдмы луоз котьку со бордын возиськыны. Ми валаломы, малы Иеговалэсь зэмлык котьмалэсь дуно.

5, 6. а) Кызьы зэмлыкез басьтыны луэ, со понна дун тырытэк? Вералэ пример. б) Кыӵе пайда вае милемлы зэмлык?

⁵ Куддыръя, мае ке дунтэк басьтон понна, озьы ик кужым пононо луэ. Мадёнъёсысь 23:23 «дунэн басьтыны» шуыса берыктэм еврей кылэз «басьтыны» шуыса но берыктыны луэ. Кыкез ик та кылъёс возьмато, мае ке милемлы дуно луисьсэ басьтэммы потэ ке, со понна кужым поныны яке мае ке мукетсэ сётыны дась луоно шуыса. Зэмлыкез «дунэн басьтонэз» таӵе пример вылын вераны луоз. Кылсярысь, тӥ кылӥды, базарын банан дунтэк сётъяло шуыса. Тӥ номыр но ӧд каре ке, соос асьсэос тӥляд ӝӧк вылады вуозы-а? Уз. Тӥледлы мыноно базаре но ваёно со бананъёсты. Соос понна дун тыроно ӧвӧл ке но, тӥледлы кужым пононо, соос ӝӧк вылады мед вуозы шуыса. Озьы ик зэмлыкен но. Со понна милемлы дун тыроно ӧвӧл ке но, зэмлыкез басьтон понна, милемлы тыршоно.

⁶ Лыдӟе Исаиялэсь 55:1—3. Исаия пыр верам Иеговалэн кылъёсыз юртто милемлы умойгес валаны «зэмлыкез дунэн басьты» кылъёсты. Та кылбуръёсын Иегова аслэсьтыз кылъёссэ вуэн, йӧлын но винаен ӵошатэ. Юзмыт дун ву сямен, Инмарлэн кылъёсыз милемыз юзмато. Йӧл сямен, кудӥз туж кулэ, пинал мед будоз шуыса, соос милемыз юнгес каро но Иеговаен кусыпъёсмес юнмато. Озьы ик, Иеговалэн кылъёсыз вина кадь. Малы? Библия вера, вина адямиез шулдыртэ шуыса (Пс. 103:15). Соин «вина... басьтэлэ» кылъёсын Иеговалэн аслэсьтыз ужась-тыршисьёссэ оскытэмез потэ вал, солэн кылъёсызлэсь кылзӥськыса улон соослы шумпотон ваёз шуыса (Пс. 18:9). Та чебер ӵошатон возьматэ, кыӵе пайда ми басьтӥськомы, Инмарлэсь зэмлыксэ тодӥськомы но соя улӥськомы ке. Вераны луоз, милям тыршеммы — со дун, кудзэ ми зэмлык понна тыриськомы. Озьыен, ойдолэ вераськомы со сярысь, кыӵе дун куд-огмылы тыроно луиз зэмлык понна.

МАЕ ТӤ СЁТӤДЫ, ЗЭМЛЫКЕЗ ДУНЭН БАСЬТОН ПОННА?

7, 8. а) Малы, зэмлыкез дунэн басьтон понна, дырмес сётоно? б) Мае сётӥз одӥг дышетскись ныл зэмлык понна но кытчы со вуттӥз?

⁷ Дыр. Таӵе дун тыре котькудӥз, кин зэмлыкез дунэн басьтэ. Эксэйлык сярысь иворез кылзон понна, нош собере Библиез но со вылэ пыкиськем публикациосты ялан лыдӟон понна, Библиез эскерон понна, кенешлэн пумиськонъёсызлы дасяськон но отчы ветлон понна, дыр кулэ. Соин ик Библия дырез юнме быдтонлэсь алэ. (Лыдӟе Ефесъёслы 5:15, 16.) Кӧня дыр кулэ, Библиысь валтӥсь зэмлыкъёсты умой валан понна? Пӧртэм адямилы пӧртэм дыр кулэ луоз. Иеговалэн визьлыкез, солэн сюресъёсыз но ужъёсыз сярысь дугдытэк тодыны луэ (Рим. 11:33). Нырысетӥяз «Возьмаськон башняын» зэмлык «ненег сяськаен» ӵошатэмын вал. Статьяын верамын: «Зэмлыклэсь одӥг сяськазэ шедьтыса, эн буйгатске. Одӥгез гинэ тырмыт луысал ке, мукетъёсыз ӧй луысалзы ни. Ялан бичалэ, утчалэ». Аслэсьтыд юаны луоз: «Макем трос мон тодӥ ини Иегова сярысь?» Пырак дауръёс ӵоже ми Иегова сярысь мае ке выльзэ тодомы. Нош али милемлы дырмес юнме быдтоно ӧвӧл, быгатэммыя зэмлыкез умойгес валаны тыршоно. Эскеромы одӥг ныллэсь примерзэ, кудӥз зэмлыкез утчаз.

⁸ Япониысь Марикоa нимо егит ныл Нью-Йорке (США) дышетскыны лыктӥз. Одӥг пол со пионер луыса ужась-тыршись сузэренымы тодматскиз, кудӥз, коркась корка ветлыса, ӟеч иворез вера вал. Марико мукет религиын вал ини ке но, со сузэренымы Библиез дышетыны кутскиз. Солы туж кельше вал Библиысь зэмлыкез тодыны, соин ик со куриз сузэрез арняяз кык пол соин Библиез дышетыны. Марико дышетске но нуналаз кӧня ке дыр ужа вал ке но, со соку ик кенешлэн пумиськонъёсаз ветлыны кутскиз. Со сяна, Библиез дышетонлы тросгес дыр висъян понна, Марико шутэтсконлы ӧжытгес дырзэ висъяны кутскиз. Солы луыса со Инмарен кусыпъёссэ ӝог юнматӥз. Ар но ӧз ортчы, со пылатӥськиз. Нош эшшо ӝыны ар ортчыса, 2006-тӥ арын, со пионер луыса ужаны-тыршыны кутскиз. Али ке но со пионер на.

9, 10. а) Кызьы милям ваньбур шоры учконмы воштӥське зэмлыкез тодэммы бере? б) Малэсь куштӥськиз одӥг егит кышномурт но мар со вера со сярысь?

⁹ Ваньбур. Куддыръя, зэмлыкез дунэн басьтон понна, бадӟым уждунэн ужлэсь яке та дуннеын азинлыко луонлэсь куштӥськоно луэ. Куке Иисус чорыгасьёсты, Пётрез но Андреез, «адями кутылӥсь» луыны ӧтиз, соос «калтонъёссэс куштӥзы» (Матф. 4:18—20). Зэм, туннэ тросэз соос пӧлысь, кинъёс зэмлыкез тодыны кутско, ужзэс куштыса кельтыны уг быгато, малы ке шуоно, Библия верамъя, соослы семьязы сярысь сюлмаськоно (1 Тим. 5:8). Озьы ке но тросэзлы соослы ваньбур шоры учконзэс воштоно но шонер ужпум кутоно, мар улоназы нырысетӥ интыын луоз. Иисус валамон вераз: «Музъем вылэ асьтэлы ваньбур эн люкалэ... Асьтэлы ваньбур Инме люкалэ» (Матф. 6:19, 20). Ӵапак озьы лэсьтӥз одӥг егит кышномурт.

¹⁰ Мария школае мынэмезлэсь азьло ик гольфен шудыны кутскиз. Та удысын со туж азинлыко луиз, но университетын дышетскон понна солы стипендия сётӥзы. Мария гольфез туж яратэ вал. Солэн потэ вал азьланяз но гольфен шудэмез но со понна трос коньдон басьтэмез. Собере Мария Библиез дышетыны кутскиз. Солы туж кельше вал Библиысь зэмлыкъёсты тодыны, соин ик со соосты улоназ пыртыны кутскиз. Со вера: «Макем тросгес мон Библиысь возетъёсты улонам пыртыны кутски, малпанъёсме но ужъёсме воштыса, сокем шудогес мон луи». Мария валаз, Инмарен кусыпъёссэ юнматыны но со дыре ик узыр луыны солы секыт луоз шуыса (Матф. 6:24). Зэмлык понна со куштӥськиз солэсь, малы улонзэ сӥземез потэ вал,— тодмо гольфен шудӥсь луыны но узырмыны. Зэмлыкез дунэн басьтыса, Мария пионер луиз, но табере, солэн кылъёсызъя, со туж шудо но солэн улонэз юнме уг ортчы.

11. Кызьы Библиысь зэмлыкъя улыны кутэм ужпуммы эшъёсын но ӵыжы-выжыосын кусыпъёсмы вылын шӧдӥськыны быгатэ?

¹¹ Эшъёс но ӵыжы-выжыос. Библиысь зэмлыкъя улыны кутэм ужпуммы эшъёсын но ӵыжы-выжыосын кусыпъёсмы вылын шӧдӥськыны быгатэ. Малы? Иисус аслаз дышетскисьёсыз сярысь вӧсяськиз: «Аслад зэмлыкеныд соосты дун-чылкыт кар: Тынад кылыд — зэмлык» (Иоанн 17:17). «Соосты дун-чылкыт кар» кылъёс озьы ик «соосты висъя» шуэмез возьматыны быгато. Зэмлыкез тодыса, ми та дуннелэсь висъяськиськомы, малы ке шуоно солэн эсэпъёсызъя ум улӥське ни, нош Библиысь возетъёсъя улӥськомы. Милям учконъёсмы воштӥсько, соин ик адямиос ми шоры мукет сямен учкыны кутско. Ми асьмеды эшъёсынымы но ӵыжы-выжыосынымы лякыт возьыны тыршиськомы ке но, соос ми дорысь палэнтӥськыны быгато яке выль осконмылы пумит но луыны. Со милемыз паймытыны кулэ ӧвӧл. Иисус вераз: «Адямилэн тушмонъёсыз — семья пушказ» (Матф. 10:36). Но Иисус озьы ик оскытӥз милемыз, зэмлыкез дунэн басьтӥмы ке, сётэммылэсь тросгес басьтомы шуыса. (Лыдӟе Марклэсь 10:28—30.)

12. Кыӵе дун тыриз одӥг вын-агаймы зэмлык понна?

¹² Аарон нимо еврей пиосмурт оске вал, Инмарлэсь нимзэ шара вераны уг яра шуыса. Сое пичи дырысеныз ик озьы дышетӥзы. Но солэн зэмлыкез тодэмез потэ вал. Одӥг пол одӥг Адӟись-Ивортӥсь возьматӥз солы, Инмарлэн нимаз ньыль еврей согласной букваос вӧзы гласной букваос ватсад ке, Инмарлэсь нимзэ тазьы лыдӟыны луоз шуыса: «Иегова». Аарон туж шумпотӥз! Тодэмзэ раввинъёслы веран понна, со шумпотыса сӥнагогае лыктӥз. Со малпа вал, Инмарлэн нимыз сярысь зэмлыкез тодыса, соос но шумпотозы шуыса. Но малпамез ӧз быдэсмы. Раввинъёс солэн бамаз сялӟизы но сӥнагогаысь уллязы. Ааронлэн семьяеныз но кусыпъёсыз сӧриськизы. Озьы ке но со киоссэ ӧз лэзьы но Библиез дышетэмысь ӧз дугды. Со вань улытозяз Иеговалы кышкатэк ужаз-тыршиз. Аарон сямен ик, ми но зэмлык понна котькыӵе дун тырыны дась, нимо-дано луонэз-а, ӵыжы-выжыосынымы кусыпъёсмес-а.

13, 14. Зэмлыкез дунэн басьтон понна, кыӵе воштӥськонъёс лэсьтыны кулэ? Вералэ пример.

¹³ Кырсь малпанъёс но ужъёс. Зэмлыклэн сюрес вылаз султон но Библиысь вылӥ эсэпъёсъя улон понна, учконъёсыз но улонэз воштоно. Тани мар гожтӥз Пётр сыӵе воштӥськонъёс сярысь: «Кылзӥськись нылпиос кадесь луэлэ, мугордылэн кулэ каронъёсызлы кузёяськыны эн сётӥське. Соос тӥ пушкын уло вал, куке тӥ утиськон сярысь номыр но уд на тодӥське вал. ...Тӥ асьтэос но быдэс улон-вылонады дун-сьӧлыктэмесь луэлэ» (1 Пётр 1:14, 15). Сьӧлыклэсь кышкатэк улон пӧлы выем Коринф карын улӥсьёслы, зэмлыкез дунэн басьтон понна, улонзэс быдэсак воштоно вал (1 Кор. 6:9—11). Озьы ик туннэ но, зэмлыкез дунэн басьтон понна, трос адямиослы Инмарлы ярасьтэм улонзылэсь быдэсак куштӥськоно. Пётр христианъёслы гожтӥз на: «Тырмоз ни, уго ортчемзэ улондэс язычникъёслэн улонэнызы улӥды: юрӟым, кырсь ужъёслы, куронъёслы сётӥськыса, (пиосмуртлы пиосмуртэн кӧлан, пудо вылэ тубан, кырсь малпанъёс), вина юыса, трос сиыса но юыса, сульдэръёслы йыбыртъяса» (1 Пётр 4:3).

¹⁴ Тани Девиннлэн но Джасминлэн примерзы. Трос аръёс ӵоже соос юыса улӥзы. Девинн умой бухгалтер вал ке но, юонэз яратэменыз, одӥг ужын но кемалы ӧз ӝега. Джасмин кышноез туж лек сямо но соку ик пӧсекъяны кутскись вал. Одӥг пол юэм дыръяз, сюрес вылтӥ мыныкуз, со кык Адӟись-Ивортӥсьёсты пумитаз. Со миссионеръёс вал. Соос Джасминлы Библиез дышетыны ӵектӥзы. Нош куке вуоно арняе миссионеръёс Джасмин но Девинн доры лыктӥзы, соосыз юэмын вал. Соос уг но малпало вал, миссионеръёс соослы сыӵе саклык висъялозы шуыса. Вуонояз пумиськыкузы, ваньмыз мукет сямен вал. Кутсконысеныз ик Джасмин но Девинн тыршыса Библиез дышетӥзы но тодэмзэс улоназы пыртӥзы. Куинь толэзь куспын соос юэмысь дугдӥзы, нош берлогес гожтӥськизы. Сыӵе воштӥськонъёс гуртысьтызы адямиослэн син шоразы йӧтытэк ӧз кыле. Тросэзлэн соос пӧлысь Библиез дышетэмзы потӥз.

15. Кыӵе дун тыро куд-огъёсыз зэмлык понна но малы?

¹⁵ Инмарлы ярасьтэм сям-йылолъёс. Инмарлы ярасьтэм сям-йылолъёслэсь куштӥськон куд-огъёсыз понна туж бадӟым дун луэ, кудзэ соос тыро зэмлык понна. Кин ке но капчиен соглаш кариське соин, малы дышетэ Библия сям-йылолъёс пумысен, но ӝоген куштӥське соослэсь. Нош кин ке но дась ӧвӧл сыӵе воштӥськонъёс лэсьтыны, малы ке шуоно со кышка ӵыжы-выжыосызлэсь, ӵош ужасьёсызлэсь но эшъёсызлэсь. Семьяын югдур секыт луыны быгатэ, тужгес но соку, куке вераськон мынэ кулэм ӵыжы-выжыосыз буре ваён сямъёс сярысь (К. Зак. 14:1). Кулэ луись воштӥськонъёс лэсьтыны милемлы юрттыны быгатэ мукет христианъёслэн примерзы. Тодамы ваёмы, мар каризы нырысетӥ даурын куд-огез Ефесын улӥсьёс.

16. Мар каризы куд-огез Ефесын улӥсьёс, зэмлыкез дунэн басьтон понна?

¹⁶ Ефес кар тунаськон-пелляськонэн тодмо вал. Кыӵе дун тыризы алигес христиан мурт луэмъёс зэмлык понна, кудъёсыз нырысь тунаськонэн выризы, нош собере валазы, со Инмарлы уг яра шуыса? Библиын верамын: «Нош тунаськонэн вырисьёс пӧлысь тросэз книгаоссэс люкаса, вань калык азьын сутӥзы. Книгаослэсь дунзэ ӵотазы: витьтон сюрс драхма тыр луэм. Таӵе кужымен вӧлмыны, йылыны кутскиз Кузё-Инмарлэн кылыз» (Ап. уж. 19:19, 20). Оскымон христианъёс дуно книгаоссэс сутӥзы, но Иегова соосты бакель кариз.

17. а) Кыӵе дун ми тыримы зэмлык понна? б) Мар сярысь вераськомы мукетаз статьяын?

¹⁷ Зэмлык понна кыӵе дун тӥ тыриды? Зэмлыклэсь «сяськаоссэ» бичан понна, ваньмы асьмеос дырмес сётӥмы. Кин ке но зэмлык понна бадӟым уждунэн ужлэсь куштӥськиз, нош кинлэн ке но эшъёсыныз но ӵыжы-выжыосыныз кусыпъёсыз воштӥськизы. Тросэз учконъёссэс но улонзэс воштӥзы яке Инмарлы ярасьтэм сям-йылолъёслэсь куштӥськизы. Но кыӵе гинэ дун ми зэмлык понна медам тыре, ми тодӥськомы: ми ноку но ум жалялэ. Зэмлыклы луыса, ми самой дунозэ басьтӥськомы — Инмарен эшъяськонэз. Малпаськыса со сярысь, кыӵе бакель каронъёс вае милемлы зэмлыкез тодон, ми ум валаське, кызьы сое куд-огез вузало, яке кельто. Малы озьы луыны быгатэ но мар кароно, сыӵе бадӟым янгыш медам лэсьтэ шуыса? Со сярысь вераськомы мукетаз статьяын.