Зэмлык бордын улэ

1. Малы милемлы кельше вераськыны со сярысь, кызьы ми зэмлыкен тодматскимы?

«КЫЗЬЫ тон зэмлыкен тодматскид?» Вын-агайёсын но сузэр-апайёсын тодматскыкумы, ми та сярысь трос пол вераськимы, дыр, ини. Милемлы кельше кылзыны, кызьы мукетъёсыз Иеговаен тодматскизы но сое яратӥзы, озьы ик милемлы асьмелы но кельше вераны, малы зэмлык милемлы дуно потэ (Рим. 1:11). Сыӵе вераськонъёс тодамы вайыто, макем зол ми яратӥмы зэмлыкез, куке соин тодматскимы. Со сяна, сыӵе вераськонъёс мылкыдмес ӝуто азьланяз но зэмлык бордын улыны. Соку ми Иеговалы ярамон луомы. Со милемыз бакель кароз (3 Иоанн 4).

2. Мае ми эскеромы та статьяын?

² Нырысь ойдолэ эскеромы куд-ог мугъёсты, малы ми зэмлыкез яратӥськомы. Собере ми тодомы, кызьы уж вылын возьматоно, ми сое дунъяськомы шуыса. Сыӵе эскеронлы луыса милям эшшо но золгес потоз Иеговалы тау кареммы, со милемыз ас дораз вайиз шуыса (Иоанн 6:44). Озьы ик милям эшшо но золгес мылкыдмы ӝутскоз мукетъёсызлы ӟеч иворез вераны.

МАЛЫ МИ ЗЭМЛЫКЕЗ ЯРАТӤСЬКОМЫ

3. Кыӵе валтӥсез муг, малы ми зэмлыкез яратӥськомы?

³ Милям вань трос мугъёсмы зэмлыкез яратыны. Валтӥсез муг — ми яратӥськомы Иегова Инмарез, кудӥз бордысь зэмлык потэ. Библиез эскерыса, ми тодӥмы, со ваньмызлэсь кужмо Кылдытӥсь шуыса. Озьы ик ми тодӥмы, со инмысь яратӥсь Атаймы шуыса, кудӥз ми сярысь сюлмаське (1 Пётр 5:7). Иегова — «адямиез яратӥсь, гажась-жалясь, кема чидась, туж гажась-жалясь, зэмлыко Инмар» (Пот. 34:6). Со шонерлыкез яратэ (Ис. 61:8). Милесьтым курадӟонъёсмес адӟыса, Инмарлы вӧсь луэ. Соин ик солэн туж потэ тупатэм дыре адямиослэсь курадӟонъёссэс быдтэмез (Иер. 29:11). Ми туж возьмаськомы со дырез! Паймонэз ӧвӧл, ми Иеговаез туж яратӥськомы шуыса.

4, 5. Малы апостол Павел вуоноезлы осконэз ӵошатӥз якорен?

⁴ Малы эшшо ми зэмлыкез яратӥськомы? Со милемлы трос умойзэ сётэ. Кылсярысь, Библиысь зэмлык пӧлы вуоноезлы оскон пыре. Апостол Павел возьматӥз, макем со кулэ луэ. Оскиськон сярысь Павел гожтӥз: «Со лул понна якорь выллем оскиськымон, юн луэ» (Евр. 6:19). Якорь юрттэ корабльлы одӥг интыяз сылыны. Солы луыса со бадӟым изъёс борды уг пазьгиськы. Ӵапак озьы ик Библия вылэ пыкиськем оскиськон юрттэ милемлы бадӟым шуг-секытъёслы сётскытэк улыны.

⁵ Якорь сярысь гожтыкуз, апостол Павел вераз зырӟем христианъёслэн инмын улыны осконзы сярысь. Солэсь кылъёссэ герӟаны луэ Инмарлэн со ужась-тыршисьёсыныз но, кудъёсыз оско рай музъем вылын пырак улыны (Иоанн 3:16). Вуоноезлы оскон милемлы валаны юрттэ, малы ми улӥськомы.

6, 7. Кызьы вуоно улон сярысь зэмлыкез тодон Ивон сузэрлы юрттӥз?

⁶ Тани Ивон нимо сузэрлэн учырез. Пичи дыръяз со зэмлыкез ӧз тоды но кулонлэсь туж кышказ. Одӥг книгаысь со лыдӟиз кылъёсты, кудъёсыз собере солэн йыраз бергазы: «Вуоз нунал, куке ӵуказе уз луы». Ивон тодаз вае: «Собере мон уйбыт изьытэк потӥ. Вуоноез сярысь малпанъёс нокызьы но йырысьтым ӧз потэ. Мон малпай: „Адями малы ке но улэ ук. Малы мон вордӥськи?“ Мынам кулэме уг поты вал».

⁷ Берлогес, куке Ивон быдэ вуэмын ӧй вал на, со Иеговалэн Адӟись-Ивортӥсьёсыныз тодматскиз. Ивон азьланьтэ: «Табере мынам осконэ вань рай музъем вылын пырак дауръёс ӵоже улыны». Кызьы зэмлыкез тодон сузэрмылы юрттӥз? Со вера: «Табере мон уйёсы изьыны быгатӥсько. Вуоноез сярысь яке кулон сярысь малпанъёс монэ уг сюлмаськыто ини». Ивонлы зэмлык туж дуно потэ. Солы туж кельше вуоноезлы оскон сярысь мукетъёсызлы вераны (1 Тим. 4:16).

8, 9. а) Макем дуно потӥз шедьтэм узырлык Иисуслэн мадёнысьтыз одӥг адямилы? б) Макем дуно потэ зэмлык тӥледлы?

⁸ Мар эшшо пыре на Библиысь зэмлык пӧлы? Отчы пыре Инмарлэн Эксэйлыкез сярысь шумпотон ивор. Эксэйлык сярысь зэмлыкез Иисус ӵошатӥз ватэм узырлыкен. Со шуиз: «Ин Эксэйлык бусые ватэм узырлыклы укша. Сое адями шедьтэм но ватэм. Шумпотэменыз мыныса, маиз вань, ваньзэ вузам но со бусыез аслыз басьтэм» (Матф. 13:44). Учке, та адями узырлыкез юри утчамтэ. Но куке со сое шедьтэм, «мыныса, маиз вань, ваньзэ вузам» но сое басьтэм. Малы? Со тодӥз, та узырлык туж дуно шуыса. Со вал трослы дуногес солэсь, мае со сётӥз, та узырлыкез басьтон понна.

⁹ Ми оскиськомы, тӥледлы но зэмлык туж дуно потэ шуыса. Шумпотонэз, кудзэ вае Иеговалы ужан-тыршон, ӵошатыны ик уг луы соин, мае ӵектэ та дунне. Озьы ик милям вань осконмы Эксэйлыклэн кивалтэмез улсын пырак дауръёс ӵоже улыны. Со сяна, ми Иеговалэн матысь эшъёсыз луимы. Нош со котьмалэсь дуно! «Котьмар ласянь... [Инмарлы] тэрытскыса» улон милемлы самой бадӟым шумпотон вае (Кол. 1:10).

10, 11. Мар Майкл агайлэсь мылкыдзэ ӝутӥз быдэсак воштӥськыны?

¹⁰ Иеговаез шумпоттон понна, ми пӧлысь тросэз бадӟым воштӥськонъёс лэсьтӥзы. Кин ке но умой ужзэ кельтӥз. Кин ке но узырмыны тыршемысь дугдӥз. Нош кин ке но, Иегова сярысь тодыса, чылкак мукет адями луиз. Ӵапак озьы ик луиз Майкл агаен но. Егит дыръяз со каратэен выре вал. Со вера: «Мон данъяськи, туж кужмо вал шуыса. Куддыръя мон малпай: монэ нокин вормыны уз быгаты». Но куке Майкл Библиен тодматскыны кутскиз, со тодӥз, кызьы Иегова лек ужъёс шоры учке (Пс. 10:5). Тани кызьы Майкл тодаз вае семьяез, кудӥз соин Библиез дышетӥз: «Соос ноку ӧз вералэ, мыным каратэез кельтоно шуыса. Соос монэ Библиысь зэмлыкен гинэ тодматӥзы».

¹¹ Иегова сярысь тодон-валан басьтыса, Майкл Иеговаез золгес но золгес яратӥз. Тужгес но солэн сюлмаз пыриз, Иегова ужась-тыршисьёссэ гажа-жаля шуыса. Дыр ортчыса, Майкл валаз, солы мае ке но воштоно шуыса. Со вера: «Мон валай, тужгес но секыт мыным луоз каратэез кельтыны. Но со Иеговаез шумпоттысал. Мон тодӥ, ужан-тыршон котьмалэсь дуно шуыса». Та агайлы зэмлык туж дуно потӥз. Соин ик солэн мылкыдыз ӝутӥськиз быдэсак воштӥськыны (Иак. 1:25).

12, 13. Кызьы Библиысь зэмлык Майли сузэрлэсь улонзэ югдытӥз?

¹² Библия возьматэ, зэмлык туж дуно шуыса. Со понна зэмлыкез со ӵошатэ югдытӥсен, кудӥз пеймытын пиштэ (Пс. 118:105; Еф. 5:8). Тани Азербайджанысь Майли сузэрлэн учырез. Библиысь зэмлык солэсь улонзэ югдытӥз. Атаезлэн но анаезлэн пӧртэм осконзы вал. Майли тодаз вае: «Мон котьку оски, Инмар вань шуыса. Но мынам вал юанъёсы, кудъёсыз монэ паймыто вал. Мон нокызьы ӧй вала: „Малы Инмар адямиосты кылдытӥз но малы кин ке но быдэс улонэз ӵоже музъем вылын курадӟе, нош собере адын но пырак дауръёс ӵоже курадӟыны кулэ на?“ Куректонъёсын пумиськыку, адямиос верало вал, Инмарлы озьы кулэ шуыса. Соку мон паймисько вал: „Инмарлы кельше-а мар-а адӟыны, кызьы адямиос курадӟо?“».

¹³ Майли аслаз юанъёсызлы валэктонъёс утчаз. Кӧня ке дыр ортчыса, со Библиез дышетыны кутскиз но Иеговалэн Адӟись-Ивортӥсез луиз. Со вера: «Аслам юанъёсылы Библиысь валамон валэктонъёс шедьтыса, мон улон шоры мукет сямен учкыны кутски. Мынам сюлмы каньыл луиз». Майли сямен, ми но Иеговаез данъяськомы, со милемыз «пеймыт азьысь Аслаз паймымон югыт улаз ӧтьыса поттӥз» шуыса (1 Пётр 2:9).

14. Мар юрттоз милемлы зэмлыкез эшшо но золгес яратыны? (Озьы ик учке «Мукет ӵошатонъёс» рамкаез.)

¹⁴ Якорен, узырлыкен но югдытӥсен ӵошатонъёс тодамы вайытӥзы, зэмлык туж дуно шуыса. Та куинь примеръёс гинэ. Тӥляд эшшо но тросгес примеръёс тодады ваемды луэ, дыр. Быгатӥськоды-а тӥ, ас поннады эскерон ортчытыкуды, шедьтыны мукет мугъёсты, малы зэмлыкез яратыны кулэ? Ми сое золгес яратӥмы ке, соку эшшо но золгес тыршомы яратонмес уж вылын возьматыны.

КЫЗЬЫ МИ УЖ ВЫЛЫН ВОЗЬМАТӤСЬКОМЫ, ЗЭМЛЫКЕЗ ЯРАТӤСЬКОМЫ ШУЫСА

15. Кызьы уж вылын возьматоно, ми зэмлыкез яратӥськомы шуыса?

¹⁵ Зэмлыкез яратӥмы ке, ми ялан эскеромы Библиез но сое валэктӥсь публикациосты. Кӧня гинэ дыр ӵоже ми зэмлыкен тодмо медам луэ, ми котьку но мае ке выльзэ тодомы. Та журналлэн нырысетӥ поттэмаз тазьы гожтэмын вал: «Зэмлык ненег сяська кадь. Со будэ кыр интыын, кудӥз улон шуыса нимаське. Сое тани-тани жуг-жаг, яке пӧяськон, согоз. Зэмлыкез шедьтэмды потэ ке, уй но нунал сак луэ. [...] Потэ ке, тӥляд зэмлыкты мед луоз шуыса, някырске но сое басьтэ. Зэмлыклэсь одӥг сяськазэ шедьтыса, эн буйгатске. [...] Ялан бичалэ, утчалэ». Эскерон — капчи уж ӧвӧл, но солэн емышъёсыз туж дуно.

16. Кызьы тӥ Библиез ас поннады эскериськоды? (Мадёнъёс 2:4—6).

¹⁶ Лыдӟиськыны но эскерыны ваньмызлы уг кельшы. Но Иегова мылкыдмес ӝутэ «утчаны», «шедьтыны». Солэн потэ, ми Библиез тыршыса мед эскеромы но зэмлыкез эшшо но умойгес мед валаломы шуыса. (Лыдӟе Мадёнъёсты 2:4—6.) Таӵе тыршем котьку но бакель каронъёс вае! Кори агай, ас понназ Библиез эскерыкуз, одӥг гинэ кылбурез эскере. Со валэктэ: «Мон учкисько вань сноскаосты, валэктӥсь кылбуръёсты, сое публикациосмыя эскерисько. ...Та юрттэ мыным трос выльзэ тодыны!» Кызьы гинэ ми Библиез медам эскере, ми возьматомы, зэмлык милемлы дуно потэ шуыса, эскеронлы дырмес но кужыммес ӧм жалялэ ке (Пс. 1:1—3).

17. Мар кароно, зэмлык бордын улон понна? (Иаков 1:25).

¹⁷ Ми валаськомы, зэмлык — со дышетонъёс гинэ ӧвӧл. Басьтэм тодон-валанъёсмес улонамы пыртоно, яке зэмлык бордын улоно. Соку гинэ со милемыз шудо кароз. (Лыдӟе Иаковлэсь 1:25.) Кызьы тодоно, ми зэмлык бордын улӥськомы-а, ум-а? Кылсярысь, валаны тыршоно, мар милям умой пӧрме ини, нош мае тупатоно на. Апостол Павел гожтӥз: «Ма кемозь асьмеос вуимы-будӥмы ни, озьы ик малпаськыны но со куронъёсъя ик улыны но кулэ» (Флп. 3:16).

18. Малы туж кулэ зэмлык бордын улыны?

¹⁸ Малпалэ гинэ, макем бадӟым пайда вае зэмлык бордын улон! Соку ми асьмеос шудогес луиськомы, озьы ик Иеговаез, вын-агайёсмес но сузэр-апайёсмес шумпоттӥськомы (Мад. 27:11; 3 Иоанн 4). Зэм но, милям вань трос мугъёсмы зэмлыкез яратыны но зэмлык бордын улыны!