«Мон зэмлык сюрес кузяд ветло»

1—3. а) Кызьы милемлы зэмлык шоры учконо? Вералэ пример. (Учке статья кутсконысь суредэз.) б) Кыӵе юанъёсты ми эскеромы та статьяын?

ТУННЭ ӵем дыръя адямиос мае ке басьто но сое выльысь магазинэ берыкто. Куд-ог шаеръёсын магазинэ берен берыктэм арбериослэн лыдзы 9 процент пала вуэ. Нош интернет пыр басьтэм но берен берыктэм арбериослэн лыдзы 30 процентлэсь тросгес луыны быгатэ. Малы адямиос басьтэм арберизэс воштыны яке со понна коньдонзэс берыктыны куро? Малы ке шуоно со соослы ӧз кельшы, солэн изъянэз вал яке малпамзылы ӧз тупа.

² Басьтэм арбери понна тырем коньдонмес берен курыны быгатӥськомы ке но, дунэн басьтэм зэмлыкез милям берыктэммы, яке вузаммы, уг поты (Лыдӟе Мадёнъёсты 23:23a; 1 Тим. 2:4). Кызьы верамын вал талэсь азьло статьяын, зэмлыкез тодон понна, ми дун тыримы — асьмелэсь дырмес. Со сяна, кудмылы ке но зэмлык понна бадӟым уждунэн ужлэсь куштӥськоно луиз, кудмылэн ке но эшъёсынымы но ӵыжы-выжыосынымы кусыпъёсмы воштӥськизы, нош кудмылы ке но учконъёсмес но улонмес воштоно яке Инмарлы ярасьтэм сям-йылолъёслэсь куштӥськоно луиз. Но ваньзэ сое уд ӵошаты соин, кызьы Иегова милемыз бакель кариз.

³ Зэмлыкез тодэммы бере кылдэм шӧдонъёсмес умой возьматэ Иисуслэн вузчи сярысь мадёнэз. Со вузчи умой марӟан утча вал. Нош куке со дуно марӟанэз шедьтӥз, со «мыныса, маиз вань, ваньзэ вузам но со марӟанэз аслыз басьтэм» (Матф. 13:45, 46). Озьы ик ми но. Куке Эксэйлык сярысь зэмлыкез но Библиысь мукет зэмлыкъёсты шедьтӥмы но валамы, макем соос дуно луо, ми соку ик сётӥмы ваньзэ, мар кулэ, со зэмлыкез басьтон понна. Ми зэмлыкез дунъяськомы ке, сое ноку но ум вузалэ. Жаляса верано луэ, Инмарлэн куд-ог ужась-тыршисьёсыз зэмлыкез дунъямысь дугдӥзы, нош куд-огъёсыз вузазы но сое. Милям уг поты, милемын но озьы мед луоз шуыса. Соин ик азьланяз но «зэмлык бордын улоно», мукет кылъёсын вераса, зэмлыкез нырысетӥ интые пуктоно но соя улоно. (Лыдӟе 3 Иоаннлэсь 2—4.) Нош малы но кызьы христиан мурт зэмлыкез вузаны быгатэ? Мар кароно, сыӵе бадӟым янгыш медам лэсьтэ шуыса? Мар юрттоз милемлы азьланяз но зэмлык сюрес кузя ветлыны?

МАЛЫ НО КЫЗЬЫ КУД-ОГЕЗ ЗЭМЛЫКЕЗ ВУЗА

4. Малы Иисуслэн куд-ог дышетскисьёсыз зэмлыкез вузазы?

⁴ Нырысетӥ даурын вал сыӵе адямиос, кудъёсыз нырысь зэмлыкъя улыны кутскизы, нош собере зэмлык сюрес кузя ветлэмысь дугдӥзы. Тани одӥг пример. Иисус паймымон амалэн трос адямиосты сюдэм бере соос со сьӧры Галилей зарезьлэн мукет палаз мынӥзы. Отын Иисус вераз соослы: «Адями Пилэсь Мугорзэ ӧд ке сие, Солэсь Вирзэ ӧд ке юэ, тӥ пушкын улон уз луы». Со адямиос курыны быгатысалзы Иисусэз верамзэ валэктыны, но соос шуизы: «Кыӵе паймоно кадесь кылъёс! Кин тае кылзыны быгатоз?» Озьы «тросэз дышетскисьёсыз Со дорысь кошкизы но Соин огазьын ӧз ветлылэ ини» (Иоанн 6:53—66).

5, 6. а) Малы туннэ куд-огъёсыз зэмлык бордын улэмысь дугдӥзы? б) Кызьы христиан мурт пумен зэмлыклэсь палэнскыны быгатэ?

⁵ Жаляса верано луэ, асьме нуналъёсы но куд-ог христианъёс зэмлык бордын улэмысь дугдӥзы. Кинлы ке ӧз кельшы Библиысь кылбуръёсты выль валан. Мукетъёсызлы ӧз кельше кенешын кыл кутӥсь агайлэн кыӵе ке кылъёсыз яке ужъёсыз. Кин ке кӧтсэ ӝож кариз, солы Библия вылэ пыкиськем визь-кенеш сётэмен сэрен. Нош кин ке но зэмлыкез кельтӥз, кенешысь вын-агаен яке сузэр-апаен керетэменыз сэрен. Вань сыӵеосыз но, кинъёс зэмос йыбырттонлэсь палэнскемъёс яке милемлы пумитъяськисьёс борды итӥськизы, кудъёсыз Иеговалэн Адӟись-Ивортӥсьёсызлэсь дышетонъёссэс мыдланьто. Озьы куд-ог христианъёс валаса вылысь Иегова бордысь но кенеш бордысь палэнскизы (Евр. 3:12—14). Со христианъёс зэмлык бордысь ӧй палэнскысалзы, соослэн осконзы юн луысал ке но Иисуслы, апостол Пётр сямен, оскысалзы ке. Куке Иисус апостолъёслэсь юаз, соос но солэсь палэнскыны уг туртто-а шуыса, Пётр соку ик вераз: «Кузё-Инмаре! Кин доры милемлы мыноно? Тынад быронтэм улонлэн кылъёсыз вань» (Иоанн 6:67—69).

⁶ Куд-ог христианъёсты зэмлык бордысь пичиен-пичиен палэнэ нуэ, озьы ик, кызьы пыжез ярдурысь каллен нуэ. Оло нош, со христианъёс асьсэос но шӧдытэк кылизы, кызьы зэмлык бордысь палэнскизы. Библия милемыз чакласькыны косэ, ми «осконысь медам усе», яке милемыз палэнэ медаз нуы, шуыса (Евр. 2:1). Зэмлык бордысь пумен палэнскем адями ачиз юри уг палэнскы ке но, со лэзе, Инмарен кусыпъёсыз мед лябӟозы но мед сӧриськозы шуыса. Мар кароно, милемын но озьы медаз луы шуыса?

МАР КАРОНО, МИ ЗЭМЛЫКЕЗ МЕДАМ ВУЗАЛЭ ШУЫСА?

7. Кыӵе мылкыд юрттоз милемлы зэмлыкез вузатэк улыны?

⁷ Зэмлык сюрес кузя ветлон понна, милемлы соглаш луоно котьмаин, мар вера Иегова, но котьку солэсь кылзӥськоно. Милемлы зэмлыкез нырысетӥ интые пуктоно но Библиысь возетъёсъя улоно. Иеговалы вӧсяськыкуз, Давид эксэй шуиз: «Мон зэмлык сюрес кузяд ветло» (Пс. 85:11). Милям но сыӵе ик юн мылкыдмы луыны кулэ. Сотэк ми малпаськыны кутскомы: кулэ-а вал меда собыдӟа дун тырыны зэмлык понна, но мар кароно, тырем дунлэсь оглюкетсэ ке но берен басьтон понна. Ми валаськомы, милям правомы ӧвӧл шуыса ужпум кутыны, кудъёсыныз зэмлыкъёсын соглаш кариськыны, нош кудъёсыныз ӧвӧл. Милемлы «котькыӵе но зэмлыкын» ветлоно (Иоанн 16:13). Ойдолэ вераськомы со сярысь, кыӵе дун ми тыримы зэмлык понна. Со юрттоз милемлы сётскытэк улыны мылкыдлы зэмлык понна тырем дунлэсь оглюкетсэ ке но берыктыны (Матф. 6:19).

8. Кызьы христиан муртэ, кудӥз дырзэ визьмо уг радъя, зэмлыклэсь палэнэ нуыны быгатэ? Вералэ пример.

⁸ Дыр. Милемыз зэмлыклэсь палэнэ медам нуы шуыса, дырез шонер уже кутоно. Астэ кияд ӧд куты ке, укыр трос дыр кошкоз шутэтсконлы, яратоно ужлы, интернетысь яке телевизорысь мае ке учконлы. Асьсэос со ужъёс уродэсь ӧвӧл, но соос трос дырез быдто, кудзэ ми ас поннамы Библиез дышетонлы яке Инмарлы ужан-тыршонлы висъяськомы вал. Эскеромы Эммаb нимо сузэрлэсь примерзэ. Пичи дырысеныз ик со валъёсты туж яратӥз. Ӧжыт ке но дырыз кыле ке, со вал вылын ветлэ вал. Одӥг пол сое возьытлыкез йырйыны кутскиз, со трос дырзэ вал вылын ветлонлы сӥзе шуыса. Со умой-умой малпаськиз но, табере шутэтсконлы сокем трос дырзэ уг быдты ни. Озьы ик солы юрттӥз Кори Уэллс нимо сузэрлэн примерез, кудӥз азьло валъёс вылын родео вожвылъяськонъёсы пыриськылӥзc. Али Эмма тросгес дырзэ висъя Инмарлы ужан-тыршонлы, озьы ик христиан эшъёсызлы но ӵыжы-выжыосызлы. Солэн Иеговаен кусыпъёсыз юнмазы. Табере возьытлыкез сое уг йырйы ни, малы ке шуоно со дырзэ визьмо радъя.

9. Кызьы ваньбур люкан мылкыд улонамы валтӥсез луыны быгатоз?

⁹ Ваньбур. Зэмлык сюрес кузя ветлэммы потэ ке, лэзёно ӧвӧл, ваньбур улонамы валтӥсез мед луоз шуыса. Зэмлыкез тодэммы бере ми валамы: улонамы Инмарлы ужан-тыршон нырысетӥ интыын луыны кулэ, нош ваньбур люкан ӧвӧл. Зэмлык понна ми жалятэк куштӥськимы куд-ог арбериослэсь. Нош дыр ортчыса, ми шӧдыны кутскимы, вылды, котырысьтымы адямиос асьсэлы выль электрон тӥрлыкъёс но ваньзэ, мае басьтэмзы потэ, басьто шуыса. Оло нош, малпаны но быгатомы, мае ке ыштӥськомы шуыса. Ми шумпотэмысь дугдомы солы, мармы милям вань, но, мукетъёсыз сьӧры уйиськеменымы сэрен, Инмарлы ужан-тыршон улонамы валтӥсез уз луы ни. Озьы луиз Димасэн. Со, «туала улон даурлы синмаськыса», апостол Павелэз куштӥз но кошкиз (2 Тим. 4:10). Библиын шонерак верамын ӧвӧл, малы со кошкиз. Димас ваньбурез нырысетӥ интые пуктыны кутскиз, вылды, яке, ас мыл потонъёсыз нырысетӥ интые потэмен сэрен, Павеллы юрттӥськыны мылкыдыз быриз. Оло нош, азьвыл милям улонамы ваньбур нырысетӥ интыын вал. Соин ик, асьмеды ӧм чаклалэ ке, ваньбурез яратон сюлмысьтымы зэмлыкез яратонэз быдтыны быгатоз.

10. Кыӵе зӥбонлы сётсконо ӧвӧл, азьланяз но зэмлык сюрес кузя ветлон понна?

¹⁰ Эшъёс но ӵыжы-выжыос. Азьланяз но зэмлык сюрес кузя ветлон понна, милемлы котырысьтымы адямиослэн зӥбемзылы сётсконо ӧвӧл. Куке ми зэмлык сюрес кузя ветлыны кутскимы, милям Иеговалы оскисьтэм эшъёсынымы но ӵыжы-выжыосынымы кусыпъёсмы воштӥськизы. Кудзы ке но соос пӧлысь милемыз валазы, нош кудзы ке милемлы пумит султӥзы (1 Пётр 4:4). Ми матысь адямиосынымы асьмеды лякыт возьыны, соосын огкыл шедьтыны но гажаммес возьматыны тыршиськомы ке но, соослы ярамон луыны тыршыса, ми Инмарлы пумит ум мынэ. 1 Коринфъёслы 15:33 тодамы возьыса, ми матысь кусыпъёс тупатомы соосын гинэ, кинъёс Иеговаез ярато.

11. Мар кароно, кырсь малпанъёслэсь но ужъёслэсь палэнтӥськон понна?

¹¹ Кырсь малпанъёс но ужъёс. Зэмлык сюрес кузя ветлӥсьёс ваньзы «дун-чылкытэсь» луыны кулэ (Лыдӟе 1 Пётрлэсь 1:14—16; Ис. 35:8). Зэмлыкез тодэммы бере милемлы мармес ке но воштоно луиз, улонмы Библиысь шонерлыко куронъёслы мед тупалоз шуыса. Нош кудмылы ке но улонмес быдэсак воштытэк ӧз луы. Кызьы гинэ медам луы, но чылкыт улонэз, кудзэ вайиз зэмлыкез тодон, та сьӧлыко дуннелэн кырсезлы милям воштэммы уг поты. Мар кароно, азон-калгон сьӧлыке медам пыре шуыса? Кулэ малпаськыны со сярысь, макем бадӟым дун тыриз Иегова, милемыз дун-чылкыт карон понна: со понна кисьтэмын вал солэн Пиезлэн, Иисус Христослэн, дуно вирыз (1 Пётр 1:18, 19). Иеговалэн син азяз котьку чылкыт луон понна, милемлы тодамы возёно, макем дуно луэ Христослэн курбонэз.

12, 13. а) Малы праздникъёс шоры Иегова сямен учконо? б) Мае ми али эскеромы?

¹² Инмарлы ярасьтэм сям-йылолъёс. Милям ӵыжы-выжыосмы, ӵош ужасьёсмы но ӵош дышетскисьёсмы кужмысь курыны быгато, ми соосын ӵош Иеговалы ярасьтэм праздникъёсы но сям-йылолъёсы мед пыриськомы шуыса. Мар кароно, ми соослы медам сётске шуыса? Милемлы умой валано, малы со сям-йылолъёс Иеговалы уг ярало. Тырше эскерыны, мар верамын милям публикациосамы со сярысь, кытысь пото та дуннеын вӧлмем праздникъёс. Выльысь но выльысь тодамы вайыса, мар вера Библия со праздникъёс пумысен но малы ми соосты ум пусйиське, милям осконмы юнма, ми Инмарлы ярамон сюрестӥ мынӥськомы шуыса (Еф. 5:10). Иеговалы но солэн Кылызлы оскон юрттоз милемлы «адямиослэсь кышкаса улонэз» вормыны (Мад. 29:25).

¹³ Зэмлык сюрес кузя ми дырын-дырын гинэ ум ветлӥське. Со сюрес вылтӥ милям пырак дауръёс ӵоже мынэммы потэ. Мар юрттоз милемлы, палэнэ кожытэк, со сюрес вылтӥ мыныны? Эскеромы куинь амалъёсты.

МАР МЫЛКЫДМЕС ЮНМАТОЗ ЗЭМЛЫК СЮРЕС КУЗЯ ВЕТЛЫНЫ

14. а) Малы, Библиез ялан дышетӥмы ке, милям зэмлыкез ноку но вузаммы уз поты? б) Малы милемлы кулэ визьлык, дышетскон но визь-нод?

¹⁴ Нырысетӥез — Инмарлэн Кылысьтыз дуно зэмлыкъёсты дышетэмысь но соос вылын малпаськемысь эн дугдэ. Солы ялан дырдэс висъялэ. Озьы тӥляд зэмлык понна тау каронды будоз, но тӥляд сое ноку но вузамды уз поты. Мадёнъёсын гожтэмын, зэмлыкез сяна, милемлы «визьлыкез но, дышетсконэз но, визь-нодэз но» дунэн басьтоно шуыса (Мад. 23:23, ВД). Но зэмлыкез тодыны гинэ ӧжыт — соя улоно. Визь-нод Иеговалэн Кылысьтыз вань зэмлыкъёслэсь ог-огенызы герӟаськемзэс адӟыны юрттэ. Визьлык милесьтым мылкыдмес ӝутэ тодон-валанмес улонэ пыртыны. Нош Инмарлэн Кылысьтыз дышетсконлы луыса, ми адӟиськомы, мае милемлы воштоно. Ойдолэ котьку санэ пономы со дышетонэз — со азвесьлэсь трослы дуногес (Мад. 8:10).

15. Кызьы милемыз зэмлык уте?

¹⁵ Кыкетӥез — юн мылкыдды мед луоз нуналысь нуналэ зэмлыкъя улыны. Библиын зэмлык ожгарчилэн еэныз ӵошатэмын (Еф. 6:14). Со солэсь куссэ но пушъёссэ уте вал. Но со понна ожгарчилы езэ юн думоно вал, сотэк со пайдатэм луысал. Кызьы милемыз зэмлык уте? Ми Библиысь зэмлыкез, еэз выллем, кусъёсамы думимы ке, со милемыз шонертэм малпанъёслэсь утёз но визьмо ужпумъёс кутыны юрттоз. Нош шуг-секытъёс яке визь сынаськонъёс дыръя Библиысь зэмлык милесьтым мылкыдмес юнматоз лэсьтыны сое, мар шонер луэ. Одӥг ожгарчи но оже етэк ӧй мынысал. Озьы ик милемлы но зэмлыклэсь езэ лябӟытыны но, куштыны но уг яра. Ожгарчилэн еэз эшшо одӥг ужпумез быдэстэ на вал — со борды меч юнмато вал. Ойдолэ эскеромы, кызьы со Инмарлы ужан-тыршонэнымы герӟаськемын.

16. Малы мукет адямиосты зэмлыклы дышетон юрттэ милемлы асьмелы зэмлык сюрес кузя ветлыны?

¹⁶ Куинетӥез — тросгес дырдэс висъялэ адямиосты Библиысь зэмлыклы дышетонлы. Со юрттоз тӥледлы духовной мечез кияды юн возьыны, яке «Инмар Кылэз» быгатыса уже кутыны (Еф. 6:17). Милемлы ваньмылы дышетыны быгатонлыкъёсмес волятоно но «зэмлыклэсь кылзэ» шонер дышетоно (2 Тим. 2:15). Куке ми Библиез уже кутӥськомы, адямиослы зэмлыкез дунэн басьтыны но зэмос луисьтэм дышетонъёслэсь куштӥськыны юрттон понна, Инмарлэн кылъёсыз мургес но мургес пыӵало милям визьёсамы но сюлэмъёсамы. Со милесьтым зэмлык сюрес кузя ветлыны мылкыдмес эшшо но юнматэ.

17. Малы тӥ зэмлыкез дунъяськоды?

¹⁷ Зэмлык — со Иеговалэн дуно кузьымез. Зэмлыклы луыса ми инмысь Атаенымы матысь кусыпъёс тупатыны быгатӥськомы. Иегова милемыз тросэзлы дышетӥз ини, но со кутсконэз гинэ ай. Со кылзэ сётэ милемыз пырак дауръёс ӵоже дышетыны. Соин ик дунъялэ зэмлыкез озьы ик, кызьы тӥ дуно чебер марӟанэз дунъясалды. Ноку но сое эн вузалэ. Соку тӥ, Давид сямен, быдэстыны быгатоды Инмарлы сётэм кылдэс: «Мон зэмлык сюрес кузяд ветло» (Пс. 85:11).