Кызьы ми планъёсын ужан-тыршонлы дасяськыны быгатӥськомы

Нырысетӥ даурын вань христианъёслэн свитокъёссы ӧй вал. Озьы ке но, ужан-тыршонын соос адямиосын Гожтэмъёсъя вераськыны быгато вал (Ап 17:2, 3). Кызьы ми нырысетӥ даурысь христианъёслэсь адӟем карыны быгатӥськомы? Адямиосын Гожтэмъёсъя вераськыны азьло ик дасяськимы ке.

КЫЗЬЫ ДАСЯСЬКОНО? Котькуд планын Библиысь зэмлыкъёс вакчияк гожтэмын но кылбуръёс сётэмын. Кытысь та кылбуръёслы валэктон шедьтоно? Планъёсысь темаос но библейской кылбуръёс милям публикациосамы эскеремын вал ини. Умой луысал со статьяосты дасяськыкуды уже кутыны. Куд-ог ивортӥсьёс Библиысь кылбуръёслы валэктонъёсты йыразы возё, нош куд-огъёсыз со валэктонъёсты планъёсазы гожто. Озьы ик Библиысь кылбурез валэктӥсь пример бырйыны луоз. Тӧроос шумпотыса юрттозы тӥледлы тупась статьяос бырйыны. Планын пыр-поч валэктонъёс сётэмын ӧвӧл бере, солы, кин дышетонэз нуэ, умой дасяськоно но сётэм материалэз дышетскисен герӟано. Озьы, Библиез дышетон понна валтӥсь пособитэк но ми дышетскисьлы юрттыны быгатомы Инмарен кусыпъёссэ но осконзэ юнматыны, озьы ик шуг-секытъёслы дасяськыны.

ТОДЭ ВАЁН. Котькуд планлэн пумаз ватсаса сётэмын Библиысь кылбуръёс, кудъёссэ лыдӟыны но валэктыны кулэ. Ортчем материалэз тодэ ваён понна, умой луысал Библиысь та кылбуръёслы юанъёс азьло ик дасяны. Ватсам статьяосты уже кутӥськод ке, ортчем материалэз тодэ вайыны луоз отын сётэм юанъёсъя.

ТӤ БЫГАТОДЫ ПУКТЭМ УЖПУМДЭС БЫДЭСТЫНЫ. Апостол Павел Священной Гожтэмъёсъя вераськыны дышетскиз (Ап 17:2). Ми но озьы мед быгатомы шуыса, милемлы дасяськыны кулэ. Дасяськонлы дырдэ висъяд ке, тон одно ик ӟеч ужъёсты лэсьтыны дась луод (2Тм 3:17).