Егит агайёс, мар тӥледлы кароно, кенешын тӥледыз мед гажалозы шуыса?

1. Мар вераны луоз егит агайёсмы сярысь?

ЕГИТ агайёс, тӥ кенешлы туж кулэ. Тӥ пӧлысь тросэзлэн трос кужымзы вань (Мад. 20:29). Тӥляд потэ, дыр, кенешлы юрттӥсьёс луыса ужамды-тыршемды. Но тӥледлы потэ, дыр, мукетъёсызлэн малпамзыя, тӥ туж егитэсь на но кулэ луись ужъёсты быдэсъяны тӥ уд быгатӥське на шуыса. Озьы ке но, егит арлыдды шоры учкытэк, тӥ али ик ини трос лэсьтыны быгатӥськоды, кенешысь вын-агайёс но сузэр-апайёс тӥледлы мед оскозы но тӥледыз мед гажалозы шуыса.

2. Мае ми эскеромы та статьяын?

² Та статьяын ми вераськомы со сярысь, маин пумиськоно луиз Давид эксэй. Озьы ик ми вакчияк эскеромы Аса но Иосафат эксэйёслэсь учыръёссэс. Ми малпаськомы, кыӵе шуг-секытъёсын пумиськизы Иеговалэн та ужась-тыршисьёсыз, мар соос каризы шуг-секытъёсын пумиськыкузы но малы соослэсь дышетскыны быгато егит агайёс.

ДЫШЕТСКЕ ДАВИД ЭКСЭЙЛЭСЬ

3. Кызьы егит агайёс мукет христианъёслы юрттыны быгато?

³ Давидлэн егит дырысеныз ик юн осконэз вал. Со сяна, со будэтӥз сыӵе быгатонлыкъёссэ, кудъёсызлы луыса мукетъёсызлы юрттыны быгатӥз. Кылсярысь, со крезен умой шудыны дышиз. Берлогес та быгатонлыкезлы луыса со юрттӥз Саул эксэйлы, кудӥз Инмарен пуктэмын вал (1 Экс. 16:16, 23). Егит агайёс, нош вань-а тӥляд кыӵе ке быгатонлыкты, кудӥзлы луыса тӥ кенешысь мукет вын-агайёслы но сузэр-апайёслы юрттыны быгатысалды? Тросэзлэн вань. Кылсярысь, куд-ог агайёс но сузэръёс, тужгес но арлыдоосыз, шумпотысалзы, тӥ соослы юрттысалды ке ужаны планшетэн яке мукет электрон тӥрлыкен, кудӥз соослы кулэ ас понназы Библиез эскерыкузы яке кенешлэн пумиськонъёсаз. Веранэз ӧвӧл, арлыдо вын-агайёсын но сузэр-апайёсын ӵошатыса, та тӥрлыкъёсын тӥ умойгес вырыны быгатӥськоды. Соин ик тӥляд соослы юрттэмды луэ.

4. Давидлэсь кыӵе сямъёссэ егит агайёс адӟем карыны быгато? (Учке вылбамысь суредэз.)

⁴ Давидлэн улонэз возьматӥз, со кылкутӥсь но оскымон адями вал шуыса. Кылсярысь, егит дыръяз со умой быдэсъяз ужез, кудзэ солы атаез сётӥз,— со пудо возьмаз. Та уж кышкытлыкъёсын герӟаськемын вал. Берлогес Давид Сауллы вераз: «Лев яке гондыр лыктыса уллёысь ыжез нуэ ке, мон со сьӧры уйиськыса мынӥсько но, со вылэ урдскыса, ымысьтыз ыжме таласько» (1 Экс. 17:34, 35). Давид вала вал, пудоез сярысь сюлмаськоно шуыса. Соин ик со соосты сьӧсь пӧйшуръёслэсь кышкатэк утьылӥз. Егит агайёс Давидлэсь адӟем карозы, соослы сётэм ужъёсты тыршыса быдэсъязы ке.

5. Мар тужгес но кулэез луэ егит агайёс понна, Псалтирез 24:14 лыдэ басьтоно ке?

⁵ Егит Давидлэн Иеговаен матысь кусыпъёсыз вал. Кышкасьтэм луонэн яке крезен шудыны быгатонлыкен ӵошатыса, со трослы кулэгес. Иегова Давидлы Инмар гинэ ӧй вал, со солэн Эшез, матысь Эшез вал. (Лыдӟе Псалтирез 24:14.) Егит агайёс, тӥ понна тужгес но кулэез — Инмысь Атаеныды кусыпъёстэс юнматыны. Тӥ озьы лэсьтӥськоды ке, соку кенешын тӥледлы кулэ луись ужъёс оскозы.

6. Кызьы учкизы Давид шоры куд-ог адямиос?

⁶ Куд-ог адямиос Давид шоры умоен ӧз учке. Кылсярысь, куке со Голиафен ожмаськыны мылкыд кариз, Саул эксэй сое дугдытыны турттӥз. Со вераз: «Тон уго укыр егит на» (1 Экс. 17:31—33). Нош солэсь азьвыл Давидлэн бадӟымез агаез сое янгыше уськытӥз, со кылкутӥсьтэм адями шуыса (1 Экс. 17:26—30). Но Иегова ӧз малпа, Давид укыр егит но солы оскыны уг луы шуыса. Со умой тодӥз та егит пиез. Давид Иегова эшез вылэ оскиськиз но, Голиафез вормыны быгатӥз (1 Экс. 17:45, 48—51).

7. Малы тӥ дышетскыны быгатӥськоды Давидлэсь?

⁷ Малы тӥ дышетскыны быгатӥськоды Давидлэсь? Нырысетӥез, чидась луэ. Соослы, кинъёс тӥледыз пичи дырысеныды ик тодо, дыр кулэ луоз, вылды, валан понна, тӥ будӥды ини шуыса. Тодады возе: Иегова вылтусты шоры уг учкы. Со адӟе, кыӵе сямъёсты тӥляд вань но кыӵе ужъёсты быдэсъяны тӥ быгатӥськоды (1 Экс. 16:7). Кыкетӥез, Инмарен кусыпъёстэс юнматэ. Иеговалэн кылдытэмъёсыз сярысь мур малпаськыса, Давид соин кусыпъёссэ юнматыны быгатӥз. Солы луыса со Кылдытӥсь сярысь туж троссэ тодӥз (Пс. 8:4, 5; 138:14; Рим. 1:20). Куинетӥез, Иеговалэсь тырмыт кужым куре. Мар кароно, Иеговалэн Адӟись-Ивортӥсез луэмды понна ӵош дышетскисьёсты серем каро ке? Иеговалы вӧсяськыса юрттэт куре шуг-секыттэс чиданы. Уже кутэ визь-кенешъёсты, кудъёссэ шедьтыны луэ солэн Кылысьтыз, Библия вылэ пыкиськыса гожтэм публикациосысь, интернет-статьяосысь но видеороликъёсысь. Куке тӥ адӟоды, кызьы Иегова юрттэ тӥледлы шуг-секытты пыр потыны, соку тӥляд солы осконды юнмалоз. Тӥ Иегова вылэ оскиськыса улӥды ке, тае мукетъёсыз но адӟозы. Соку соос тӥледлы оскыны кутскозы.

8, 9. Мар юрттӥз Давидлы чидаса возьманы эксэй луон дырзэ но малы солэсь дышетскыны быгато егит агайёс?

⁸ Эскеромы на эшшо одӥг шуг-секытэз, кудӥныз пумиськиз Давид. Со Израильын эксэй луыны зырӟемын вал, но эксэй луытозяз, солы трос аръёс возьмано луиз (1 Экс. 16:13; 2 Экс. 2:3, 4). Мар юрттӥз Давидлы чидаса возьманы вань та дыр ӵоже? Со киоссэ ӧз лэзьы, нош лэсьтӥз ваньзэ, мае быгатӥз. Давид филистим музъеме пегӟоно луиз ке но, со азьло сямен ик Израильлэн тушмонъёсыныз ожмаськиз. Озьы со Иуда музъемез утиз (1 Экс. 27:1—12).

⁹ Малы тӥ дышетскыны быгатӥськоды Давидлэсь? Лэсьтэ ваньзэ, мае быгатӥськоды, Иеговалы но вын-агайёслы ужан-тыршон понна. Эскеромы Рикардоb агайлэсь учырзэ. Егит дырысеныз ик солэн потэ вал пионер луэмез. Нош тӧроос малпазы, со дась ӧвӧл на шуыса. Рикардо соос вылэ йыркуръяськыса но куатаськыса ӧз улы. Со интые, со ужпум кутӥз тросгес тодытыны. Рикардо вера: «Али мон валасько, мыным быгатонлыкъёсме будэтыны кулэ на вал шуыса. Мон тырши выльысь лыктыны соос доры, кинъёс ӧжыт ке но зэмлыкен тунсыкъяськизы. Соос доры лыктон понна, мон тырши умой дасяськыны. Одӥг адямиен мон Библиез дышетыны но кутски. Нош быгатонлыкъёсы будэмъя, тодытыкум мон сокем ӧй сюлмаськы ини». Али Рикардо быгатыса ужа-тырше пионер но кенешлы юрттӥсь луыса.

10. Мар кариз Давид кулэ луись ужпум кутон азяз?

¹⁰ Нош табере эскеромы Давидлэн улонысьтыз учырез, куке со но солэн адямиосыз Сауллэсь филистим музъеме пегӟоно луизы. Одӥг пол соос семьяоссэс кельтӥзы но ожмаськыны мынӥзы. Соос ӧвӧл дыръя, тушмонъёссы улон интыоссы вылэ урдскизы но семьяоссэс сьӧразы нуизы. Давид малпаны быгатысал: со туж быгатӥсь ожмаськись бере, со ачиз но быгатоз семьяоссэс мозмытыны. Но Давид ужпум кутӥз Иеговалэсь визь-кенеш курыны. Авиафар священник пыр со Иеговалэсь юаз: «Мыным уйиськоно-а, ӧвӧл-а та уллё сьӧры?» Иегова солы вераз: «Уйиськы — сутод, сутӥд ке, талалод» (1 Экс. 30:7—10). Малы тӥледыз дышетыны быгатэ та учыр?

11. Мар кароно ужпум кутэмлэсь азьло?

¹¹ Ужпум кутэмлэсь азьло мукетъёсыныз кенеше. Вераське анай-атаеныды. Визь-кенеш куре быгатӥсь тӧроослэсь. Иегова та агайёслы оске бере, тӥ но соослы оскыны быгатӥськоды. Инмар тӧроосты «адямиослы саламъёс-кузьымъёс» шуыса лыдъя (Еф. 4:8). Тӥ соослэсь оскемзэс адӟем кариды ке но визь-кенешъёссэс лыдэ басьтӥды ке, соку шонер ужпум кутыны быгатоды. Нош табере ойдолэ эскеромы Аса эксэйлэсь учырзэ.

ДЫШЕТСКЕ АСА ЭКСЭЙЛЭСЬ

12. Кыӵе сямо вал Аса эксэй, кивалтыны кутскыкуз?

¹² Егит дыръяз Аса зӥбыт-востэм но кышкасьтэм вал. Кылсярысь, куке со Авия атаез интые эксэй луиз, со тыршиз сульдэръёслы-идолъёслы йыбыртъянэз быдтыны. Озьы ик со «иудей калыкез атайёссылэсь Инмарзэс Кузё-Инмарез сӥлы карыса улыны косӥз, Солэсь законъёссэ, курон-косонъёссэ быдэсъяса улыны косӥз» (2 Пар. 14:1—7). Нош куке Иуда вылэ урдскиз миллион ожгарчиосыныз эфиоп пи Зарай, Аса визьмо луэмзэ возьматӥз, Иеговалэсь юрттэт курыса. Со вераз: «Кузё-Инмаре! Кужмоослы но, кужымтэмъёслы но Тон юрттӥськыны уд быгатӥськы шат? Инмармы Кузё-Инмар, юртты ук милемлы: уго ми Тыныд оскиськиськомы». Асалэн та кылъёсысьтыз адӟиське: со юн оскиз, Иегова сое но солэсь калыксэ утьыны быгатэ шуыса. Аса инмысь Атаез вылэ оскиськиз но, «Кузё-Инмар эфиоп ожгарчиосты погыртӥз» (2 Пар. 14:8—12).

13. Мар берлогес луиз Асаен но малы?

¹³ Тӥ соглаш луоды, дыр, Аса туж секыт югдуре сюриз, куке со вылэ миллион ожгарчиос урдскизы. Иегова вылэ оскиськыса, Аса тушмонъёссэ вормиз. Но жаляса верано луэ, мукет учырын, куке югдур сокем кышкыт ӧй вал, Аса Иегова вылэ ӧз оскиськы. Соку Иуда вылэ Израильысь Вааса эксэй урдскиз. Иегова вылэ оскиськем интые, Аса Сириялэн эксэезлэсь юрттэт куриз. Солэн кутэм ужпумез туж кышкыт бервылъёсы вуттӥз: со дырысен Аса вылэ ялан тушмонъёсыз урдскылӥзы. Ананий пророкез пыр Иегова Асалы валэктӥз, малы озьы луиз: «Тон Сириялэн эксэез вылэ оскиськид, аслад Инмаред Кузё-Инмар вылэ ӧд оскиськы» (2 Пар. 16:7, 9; 3 Экс. 15:32). Малы со тӥледыз дышетэ?

14. Кызьы возьматоно, ми Иегова вылэ оскиськиськомы шуыса, но кызьы соку ми шоры мукетъёсыз учкозы, 1 Тимофейлы 4:12 лыдэ басьтоно ке?

¹⁴ Азьланяз но зӥбыт-востэмесь луэ но Иегова вылэ оскиське. Пылатӥськыса тӥ возьматӥды, Инмарлы юн оскиськоды шуыса. Но туж кулэ азьланяз но Иегова вылэ оскиськыны. Валамон, бадӟым ужпумъёс кутыкумы, милемлы Инмарлэн юрттэтэз кулэ шуыса. Нош мар вераны луоз мукет учыръёс сярысь? Туж кулэ Иегова вылэ оскиськыны, куке ми бырйиськомы, кылсярысь, кызьы шутэтсконо, кытын ужано но кыӵе ужпум кутоно. Асьтэлэн визьды вылэ эн оскиське. Со интые, утчалэ Библиысь возетъёсты, кудъёссэ уже кутыны луэ тӥляд югдуръёсады (Мад. 3:5, 6). Собере соосты улонады пыртэ. Соку тӥ Иеговаез шумпоттоды, озьы ик кенешысь вын-агайёс но, сузэр-апайёс но тӥледыз гажалозы. (Лыдӟе 1 Тимофейлы 4:12.)

ДЫШЕТСКЕ ИОСАФАТ ЭКСЭЙЛЭСЬ

15. Кыӵе янгышъёс лэсьтӥз Иосафат эксэй, 2 Паралипоменонэз 18:1—3 но 19:2 лыдэ басьтыса?

¹⁵ Зэм но, ваньмы ми тырбыдэстэмесь, озьы ик тӥ но, егит агайёс. Соин ик дырын-дырын тӥ янгышалоды. Озьы ке но со тӥледлы медаз люкеты Иеговалы ужан-тыршонын лэсьтыны ваньзэ, мае быгатӥськоды. Малпаськомы Иосафат эксэйлэн учырез сярысь. Солэн вал трос умой сямъёсыз. Кивалтыны кутскыкуз, «со утчаз атаезлэсь Инмарзэ, Солэн курон-косонъёсызъя улӥз». Со сяна, со «ас дорысьтыз кузёйыръёсты... Иудей городъёсы калыкез дышетыны ыстӥз» (2 Пар. 17:4, 7). Нош куддыръя Иосафат шонертэм ужпумъёс кутылӥз. Одӥгез сыӵе ужпумез понна Ананий пророк пыр Иегова Иосафатэз судъяз. (Лыдӟе 2 Паралипоменонэз 18:1—3; 19:2.) Малы тӥледыз дышетыны быгатэ Иосафатлэн учырез?

16. Малы дышетэ тӥледыз Радживлэн учырез?

¹⁶ Кылзӥське визь-кенешъёслэсь, кудъёссэ тӥледлы сёто, но соосты улонады пыртэ. Тросэзлы егит пиослы сямен ик, тӥледлы Иеговалы ужан-тыршонэз улонады нырысетӥ интые пуктыны секыт ке, мылкыдды медаз куашка! Ойдолэ эскеромы Раджив нимо егит агайлэсь учырзэ. Егит дыръяз солэн улоназ нокыӵе ужпумъёсыз ӧй вал. Со вера: «Тросэзлы егит пиослы кадь ик, мыным кельше вал шутэтскыны но спортэн вырыны. Нош кенешлэн пумиськонъёсыз но ужан-тыршон тунсыко уг пото вал». Шумпотыса вераны луэ, одӥг тӧро тае адӟиз но лякытэн соин вераськиз. Раджив тодаз вае: «Со юрттӥз мыным малпаськыны 1 Тимофейлы 4:8 возет вылын». Раджив тӧролэсь зӥбыт-востэмен кылзӥськиз но малпаськиз, мар солэн улоназ тужгес но валтӥсез луэ. Со валэктэ: «Мон ужпум кутӥ, Иеговалы ужан-тыршон улонам нырысетӥ интыын луоз шуыса». Кытчы со вуттӥз? Раджив вера: «Со тӧроен вераськеммы бере кӧня ке аръёс ортчыса, мон кенешлы юрттӥсь луыса ужаны-тыршыны кутски».

ИНМЫСЬ АТАЙ ТӤЛЕДЫН МЕД ДАНЪЯСЬКОЗ

17. Кызьы кенешысь вын-агайёс но сузэр-апайёс учко егит агайёс шоры?

¹⁷ Кенешысь вын-агайёс но сузэр-апайёс дунъяло тӥледыз, егит агайёс, малы ке шуоно тӥ соосын ӵош огкылысь Иеговалы ужаськоды-тыршиськоды (Соф. 3:9). Соослы кельше, тӥледлы сётэм ужъёсты тӥ ӟырдыт мылкыдын быдэсъяськоды шуыса. Тӥ соослы туж дуно потӥськоды! (1 Иоанн 2:14).

18. Кызьы Иегова учке егит ужась-тыршисьёсыз шоры, Мадёнъёсты 27:11 лыдэ басьтыса?

¹⁸ Егит агайёс, ноку эн вунэтэ, Иегова тӥледыз яратэ но тӥледлы оске шуыса. Со азьло ик вераз, берпум нуналъёсы солэн туж трос егит ужась-тыршисьёсыз луозы шуыса (Пс. 109:1—3, ВД). Со тодэ: тӥ сое яратӥськоды но ужан-тыршонын лэсьтэмды потэ ваньзэ, мае быгатӥськоды. Мукетъёсыз шоры но, асьтэос шоры но чидаса учке. Янгышакуды уже кутэ визь-кенешъёсты, кудъёссэ тӥледлы сёто, но соосты улонады пыртэ. Лыдъялэ соосты Иеговалэн визь-кенешъёсыныз (Евр. 12:6). Тыршыса быдэсъялэ вань ужъёсты, кудъёссэ тӥледлы сёто. Нош тужгес но валтӥсез — улэ озьы, инмысь Атайды тӥледын мед данъяськоз шуыса. (Лыдӟе Мадёнъёсты 27:11.)