Лыдэ басьтоды-а тӥ сое, мар гожтэмын вал?

1, 2. Малы ми эскеромы Иудаысь ньыль эксэйёслэсь примеръёссэс?

ПУКТЭ син азяды таӵе югдурез: тӥ мынӥськоды сюрес кузя но адӟиськоды, кызьы азьпалады мынӥсь адями волегӟе но усе. Тӥ но со интые вуиды ке, туж чакласькыса отӥ ортчоды, дыр. Мукетъёсызлэн янгышъёссы вылын малпаськимы ке, со утёз милемыз со выллем янгышъёслэсь. Кылсярысь, ми тросэзлы дышетскыны быгатӥськомы, малпаськыса со адямиослэн янгышъёссы вылын, кудъёсыз сярысь гожтэмын Библиын.

² Иудаысь ньыль эксэйёс, кудъёсызлэсь примеръёссэс эскеримы кылемаз статьяын, вань сюлмынызы Иеговалы ужазы-тыршизы. Озьы ке но, соос секыт янгышъёс лэсьтылӥзы. Малы дышетыны быгато соослэн янгышъёссы но мар юрттоз милемлы соослэсь палэнскыны? Соослэн примеръёссы вылын малпаськыса, ми быгатомы пайда басьтыны отысь, мар азьвыл гожтэмын вал асьмемыз визьман-дышетон понна. (Лыдӟы Римъёслы 15:4.)

АДЯМИ ВИЗЬЛЫК ВЫЛЭ ОСКИСЬКОН ШУГАДӞОНЭ ВУТТЭ

3—5. а) Асалэн сюлмыз быдэсак Иеговаен вал ке но, кыӵе секыт янгыш со лэсьтӥз? б) Малы, вылды, Аса адямиос вылэ оскиськиз, куке Вааса Иудалы пумит ӝутскиз?

³ Ойдолэ нырысь вераськомы Аса сярысь но малпаськомы, кызьы Библия милям улонамы шӧдӥськыны быгатэ. Куке миллион эфиоп ожгарчиос Иудалы пумит ӝутскизы, Аса Иеговалы оскиськиз. Нош куке Израильлэн Вааса эксэез Иудаен артэ интыяськем Рама карез лэсьтыны кутскиз, Аса Иеговалы ӧз оскиськы ни (2 Пар. 16:1—3). Аса ачиз вылэ оскиськиз но Сириялэн Венадад эксэезлы кузьымъёс ыстӥз, со Ваасалы пумит мед потоз шуыса. Асалэн малпанэз быдэсмиз-а? Библиын верамын: «Вааса та сярысь кылӥз но Рама карез пуктэмысь дугдӥз, аслэсьтыз ужзэ лэсьтэмысь дугдӥз» (2 Пар. 16:5). Озьыен, нырысь учкыса, Асалэн малпанэз быдэсмиз кадь потоз.

⁴ Нош кызьы Иегова учкиз Асалэн кутэм ужпумез шоры? Иеговалы ӧз кельшы, Аса солы ӧз оскиськы шуыса, соин ик со Ананий пророкез ыстӥз, Асаез тупатон понна. (Лыдӟы 2 Паралипоменонэз 16:7—9.) Ананий солы Инмарлэсь кылъёссэ вераз: «Со понна табере тон дорын ожмаськонъёс луылозы». Вааса чигназ ке но, Аса кивалтыку, солэн калыкез трос ожъёсты чидано луиз.

⁵ Кызьы адӟимы кылем статьяысь, Инмар Асалэсь сюлэмзэ эскериз но адӟиз, со быдэсак соин вал шуыса (3 Экс. 15:14). Инмар лыдъяз, Аса солы вань сюлмыныз оскиськиз шуыса. Озьы ке но, малпаськытэк кутэм ужпумъёсыз понна, эксэй кыл кутоно луиз. Куке Вааса паласен кышкытлык кылдӥз, мар косӥз Асаез ачиз вылэ но Венадад вылэ оскиськыны, Иеговалы оскиськон интые? Оло нош со малпаз, со ожез визьмо но малпаськыса нуиз ке, со юрттоз солы вормыны? Яке со сыӵе ужпум кутӥз, умойтэм визь-кенешлэсь кылзӥськыса?

6. Малы дышетэ милемыз Асалэн примерез? Валэктэ.

⁶ Асаен луэм учыр милемыз малпаськыны косэ со сярысь, кызьы ми лэсьтӥськомы. Улонамы шуг-секытъёс кылдо ке, кудъёсыз вормыны луонтэм кадь пото, ми соку ик Иеговалэсь юрттэтсэ куриськомы. Нош мар ми кариськомы, куке пичиесь шуг-секытъёсын пумиськиськомы? Тыршиськомы-а ми соосыз вормыны ас кужмынымы? Яке ми утчаськомы Библиысь возетъёсты но соосъя лэсьтыны тыршиськомы, озьы возьматӥськомы, шуг-секытъёсты сэрттонын-пертчонын ми Инмар вылэ оскиськиськомы шуыса? Кылсярысь, тӥляд ӵыжы-выжыосты пумит луо, тӥ кенешлэн пумиськонъёсаз яке конгрессъёсы мед ветлоды шуыса. Соку куре Иеговалэсь визь-кенешсэ, мар карыны умойгес луоз та учырын? Нош тӥ ужтэк кылиды ке? Уже интыяськыкуды вералоды-а тӥ, арня вискын ортчись пумиськонъёсты тӥляд кельтылэмды уг поты шуыса? Кыӵе гинэ шуг-секытэн ми медам пумиське, кулэ кылзӥськыны псаломъёсты гожъясьлэн визь-кенешезлэсь: «Аслэсьтыд сюрестэ Кузё-Инмар кие сёт, Солы оскиськы, Со быдэстоз» (Пс. 36:5).

МАИН КЫШКЫТ УРОД АДЯМИОСЫН ЭШЪЯСЬКОН?

7, 8. Кыӵе янгышъёс лэсьтӥз Иосафат но кытчы со вуттӥз? (Учке статья кутсконысь суредэз.)

⁷ Нош табере эскеромы Асалэн Иосафат пиезлэсь примерзэ. Солэн трос умой сямъёсыз вал. Инмарлы оскиськыса, Иосафат трос ӟеч ужъёс лэсьтӥз. Озьы ке но, куддыръя со шонертэм ужпумъёс кутылӥз. Кылсярысь, со сьӧлыклэсь кышкасьтэм Ахав эксэйлэсь, кудӥз уйпал эксэйлыкын кивалтэ вал, нылзэ кен басьтӥз. Иосафат Ахавен ӵош Сириялы пумит мыныны соглаш кариськиз, Михей пророк сое алӥз ке но. Ожын Иосафатэз ӧжыт гинэ ӧз вие. Со бере со Иерусалиме берытскиз (2 Пар. 18:1—32). Отын Ииуй пророк юаз солэсь: «Кулэ вал-а тыныд сьӧлыклэсь кышкасьтэмлы юрттӥськыны, Кузё-Инмарез синазькыль карисьёсты яратыны?» (Лыдӟы 2 Паралипоменонэз 19:1—3.)

⁸ Иосафат луэм учырысь малы ке дышетскиз-а? Со озьы ик Инмарлы сюлмысь ужаз-тыршиз ке но, адӟиське, со учырысь со номырлы но ӧз дышетскы но Ииуйлэсь кылъёссэ пеляз ӧз поны шуыса. Иосафат малпаськытэк эшшо одӥг ужпум кутӥз на. Со кусып возьыны кутскиз Инмарлэн мукет тушмонэныз — Ахавлэн пиеныз, сьӧлыклэсь кышкасьтэм Охозия эксэен. Иосафат но Охозия ӵош корабльёс лэсьтыны кутскизы. Но корабльёссы пазьгиськизы, соин ик соослэн малпам ужзы ӧз быдэсмы (2 Пар. 20:35—37).

9. Мар луыны быгатоз, ми урод эшъёс бырйиськомы ке?

⁹ Малы дышетскыны быгатӥськомы Иосафатлэн примерысьтыз? Иосафат «вань сюлмыныз Кузё-Инмарез утчась» эксэй вал, кудӥз шонер ужъёсты лэсьтыса улӥз (2 Пар. 22:9). Озьы ке но, урод эшъёс быръеменыз, со шуг-секытъёсын пумиськиз. Мадёнъёсын 13:21 верамын: «Визьмо муртэн кусып возись ачиз но визьмо луоз, нош укылтэм муртэн эшъяськись ачиз но сӧриськоз». Милемлы адямиосты зэмлыкен тодматыны кулэ. Но вунэтоно ӧвӧл, Иеговалы оскисьтэм адямиосын эшъяськон милемыз шугадӟонэ вуттыны быгатэ шуыса.

10. а) Малы дышетскыны быгато Иосафатлэн примерысьтыз соос, кинъёслэн кузпалъяськемзы потэ? б) Мае милемлы тодамы возёно?

¹⁰ Малы эшшо дышетскыны быгатӥськомы на Иосафатэн луэм учырысь? Куддыръя христиан муртлы яраны кутске сыӵе адями, кудӥз Иеговаез уг яраты. Со малпаны быгатэ, христиан кенешысь тупась кузпал шедьтыны уз быгаты шуыса. Нош кинэ ке но Адӟись-Ивортӥсь луисьтэм ӵыжы-выжыосыз кузпалъяськыны косо, собере «туж бер луоз» шуыса. Со сяна, куд-ог христианъёслэн сузэрмылэн кадь ик шӧдонъёссы кылдо, кудӥз вераз: «Милям потэ кинэ ке яратэммы, но потэ, милемыз но мед яратозы шуыса. Ми озьы кылдытэмын». Соку мар меда кароно христианъёслы? Тодамы ваёмы Иосафатлэсь примерзэ. Ӵем дыръя со Инмарлэсь визь-кенешсэ утчаз (2 Пар. 18:4—6). Нош мар луиз, куке со эшъяськыны кутскиз Ахавен, кудӥз Иеговаез уг яраты вал? Иосафатлы тодаз возёно вал, Иегова учке шуыса со шоры, кинлэн сюлмыз быдэсак соин. Асьме нуналъёсы но Иеговалэн «синъёсыз быдэс дуннеез адӟо», но со дась милемлы юрттыны (2 Пар. 16:9). Со яратэ но вала милемыз. Нош оскиськоды-а тӥ, Инмар адӟе, тӥляд яратэмды но эшъяськемды потэ шуыса, но одно ик сыӵе мылпотонъёстэс быдэстоз шуыса?

ЭН ЛЭЗЕ СЮЛЭМДЫЛЫ ВЫЛТӤЯСЬКЫНЫ

11, 12. а) Кызьы тодмо луиз, мар вал Езекиялэн сюлмаз? б) Малы Иегова Езекияез простить кариз?

¹¹ Езекиялэн примерез возьматэ, милемлы сюлэммес чаклано шуыса. Одӥг пол Иегова эскериз но адӟиз, мар вал зэмзэ ик Езекиялэн сюлмаз. (Лыдӟы 2 Паралипоменонэз 32:31.) Куке Езекия кулоно кадь висьыны усиз, Инмар солы тодмет сётӥз — вужерез, кудӥз берлане берытскиз. Озьы Инмар возьматӥз, со бурмоз шуыса. Вавилонлэн эксэез Езекия эксэй доры тодмет сярысь юалляськыны, вылды, адямиосты ыстӥз (4 Экс. 20:8—13; 2 Пар. 32:24). Куке Езекияез «Инмар кельтӥз... сое эскерон... понна», со ыстэм муртъёслы «аслэсьтыз кеносъёссэ возьматӥз». Та малпаськытэк лэсьтэм ужез ваньзэ, «солэн сюлмаз маиз вань», шарае поттӥз.

¹² Библиын верамын ӧвӧл, малы Езекиялэн сюлмыз вылтӥяськыны кутскиз. Оло нош, со озьы луиз, ассир ожгарчиосты вормеменыз. Яке Инмар сое паймымон амалэн бурмытэмен. Яке узырлыкез но данлыкез трос луэмен. Котькызьы мед луоз, но, жаляса верано луэ, Езекия вылтӥяськыны кутскиз но «солы ӟечлыкъёс сётӥськем понна ӟечен пунэмзэ ӧз берыкты». Азьлогес Езекия Иеговаез тодаз вайыны куриз ке но, со солы вань сюлмыныз ужаз-тыршиз шуыса, Езекия Инмарлэсь сюлэмзэ туж вӧсь кариз. Нош берлогес, куке Езекия сюлмызлэсь вылтӥяськонзэ кысӥз, эксэй но солэн калыкез вылэ Иегова вожзэ ӧз потты ни (2 Пар. 32:25—27; Пс. 137:6).

13, 14. а) Ку Иегова милемыз кельтыны быгатэ, милемыз эскерон понна? б) Кызьы асьмеды возёно, милемыз кыӵе ке азинлыкъёсмы понна ушъяло ке?

¹³ Малы милемыз дышетыны быгатэ Езекиялэн учырез? Тодӥськомы, куке Иегова Сеннахиримез вормыны юрттӥз но Езекияез кулоно кадь висёнлэсь бурмытӥз, Езекия ӝоген вылтӥяськыны кутскиз шуыса. Быгатоз-а луыны озьы, ми кыӵе ке удысын азинлыко луимы ке, Иегова, Езекияез кадь ик, милемыз но кельтоз, милемыз эскерон понна но шарае поттон понна сое, мар милям сюлмамы? Кылсярысь, вын-агай кема но туж тыршыса речь дасяз но трос кылзӥсьёс азьын сое вераз. Речь верамез бере тросэз, со доры лыктыса, ушъяло сое. Кызьы со ассэ возёз?

¹⁴ Милемыз ушъяку, ми асьмеды шонер возёмы, кылзӥськимы ке Иисуслэн визь-кенешезлэсь: «Вань косэмез быдэстӥды ке, шуэ: „Ми номырлы ярасьтэм ляльчиос, малы ке шуоно лэсьтӥмы сое гинэ, мае кулэ вал лэсьтыны“» (Лука 17:10). Выльысь тодамы вайыны быгатомы Езекия эксэез. «Солы ӟечлыкъёс сётӥськем понна ӟечен пунэмзэ ӧз берыкты», озьы со вылтӥяськемзэ возьматӥз. Ми малпаськиськомы ке со сярысь, макем трос Инмар ми понна лэсьтӥз, милям сюлмамы инты уз луы сямъёслы, кудъёссэ Инмар адӟемпотостэм каре. Но ми Иеговаез ушъяны-данъяны быгатомы. Со сётӥз милемлы Библиез но святой духез, кудӥныз со аслаз калыкезлы юрттэ.

ЭН ВУНЭТЭ ИЕГОВАЕЗ, УЖПУМ КУТЫКУДЫ

15, 16. Малы Инмар Иосияез ӧз утьы ни но малы Иосия кулӥз?

¹⁵ Нош малы милемыз дышетыны быгатэ со, мар луиз Иосия эксэен? Иосия умой эксэй вал ке но, со янгыш лэсьтӥз, кудӥз сое кулонэ вуттӥз. (Лыдӟы 2 Паралипоменонэз 35:20—22.) Иосия Египетлэн Нехао эксэезлы пумит ожмаськыны потӥз, со вераз ке но, солэн Иосиялы пумит ожмаськемез уг поты шуыса. Библиын верамын, Нехаолэн верам кылъёсыз Инмар бордысь пото вал шуыса. Малы соку Иосия ожмаськыны потӥз? Библиын со сярысь верамын ӧвӧл.

¹⁶ Кызьы Иосия тодыны быгатысал, Нехаолэн кылъёсыз Иегова бордысь пото вал шуыса? Кылсярысь, со юаны быгатысал Иеремиялэсь, Инмарлы оскымон пророклэсь (2 Пар. 35:23, 25). Нош нокытын верамын ӧвӧл, со солэсь юаз шуыса. Со сяна, Нехао Иерусалиме уг мыны вал, со Кархемисэ ожен мынэ вал. Озьы ик, Иосиялы кулэ ӧй вал Инмарлэн нимыз пала пырыны, малы ке шуоно Нехао Иеговаез но, солэсь калыксэ но ӧз сантэма. Соин ик Иосия умойтэм лэсьтӥз, куке Нехаолы пумит ожмаськыны кутскиз. Малы со милемыз дышетэ? Ми секыт югдуре шедимы ке, милемлы малпаськоно, мар малпа Иегова та пумысен.

17. Ми шуг-секытэн пумиськимы ке, мар кароно, Иосия кадь медам янгышалэ шуыса?

¹⁷ Шуг-секытэн пумиськимы ке, милемлы малпаськоно, кыӵе возетъёс вань Библиын та шуг-секыт пумысен, но, ваньзэ рос-прос малпаса, ужпум кутоно. Куддыръя умой луоз тӧроослэсь визь-кенеш курыны. Ми малпаськомы, вылды, та югдур сярысь ми тырмыт эскерон ортчытӥмы ини но ваньзэ лыдэ басьтӥмы шуыса. Озьы ке но, Библиысь куд-ог возетъёсты ми вунэтыны быгатомы, но соос вылын малпаськыны милемлы юрттозы тӧроос. Эскеромы таӵе югдурез: сузэр умой тодэ, солы ӟеч иворез вераны кулэ шуыса (Ап. уж. 4:20). Одӥг нуналэ со ӟеч иворез вераны дасяськиз. Но солэн картэз, кудӥз Иеговалы уг йыбыртъя, куре, со дораз мед кылёз шуыса. Со вера, соос шер дыръя огазьын луо шуыса, но солэн потэ дырзэс ӵош ортчытэмез. Сузэр малпаське, дыр, Библиысь кылбуръёс вылын, кудъёсаз верамын, кылсярысь, Инмарлэсь кылзӥськоно но дышетскисьёсыз дасяно шуыса (Матф. 28:19, 20; Ап. уж. 5:29). Озьы ик, солы лыдэ басьтоно, картэзлэсь кылзӥськоно но визьмо лэсьтоно шуыса (Еф. 5:22—24; Флп. 4:5). Солэн картэз пумит луэ, со тодытон уже мед пыриськоз шуыса, яке со туннэ гинэ сое дораз кыльыны куре-а? Ми Иеговалэн ужась-тыршисьёсыз луиськомы бере, милям потэ визьмо ужпумъёс кутэммы но Иеговаез шумпоттыса улэммы.

АЗЬЛАНЯЗ НО ШУМПОТЫСА ИНМАРЛЫ ВАНЬ СЮЛМЫНЫДЫ УЖАЛЭ-ТЫРШЕ

18. Малы ми дышетскыны быгатомы, ньыль эксэйёслэн примеръёссы вылын малпаськимы ке, кудъёсыз сярысь та статьяысь лыдӟимы?

¹⁸ Ми тырбыдэстэмесь но куддыръя сыӵе ик янгышъёс лэсьтӥськомы, кыӵеоссэ лэсьтӥзы ньыль эксэйёс, кудъёсыз сярысь та статьяын гожтэмын. Ми быгатӥськомы: 1) малпаськытэк ас выламы яке мукет адямиос вылэ оскиськыны, 2) урод эшъёс бырйыны, 3) вылтӥяськыны кутскыны яке 4) ужпум кутыны, нырысь тодытэк, мар малпа Инмар со пумысен. Макем шумпотоно тодыны, Иегова милесьтым умойзэ адӟе шуыса, озьы ик, кызьы со умойзэ адӟиз со ньыль эксэйёслэсь! Со сяна Иегова тодэ, макем ӟырдыт ми сое яратӥськомы но макем милям солы, вань кужыммес поныса, ужаммы-тыршеммы потэ. Соин ик со сюлмаськиз, Библиын дышетӥсь примеръёс гожтэмын мед луозы шуыса, кудъёсыз юрттозы милемлы секыт янгышъёс лэсьтытэк улыны. Ойдолэ малпаськомы со примеръёс вылын но Иеговалы тау каромы соос понна!