Вань сюлмыныды Иеговалы ужалэ-тырше

1—3. Мае возьматэ Иеговалы «вань сюлмыныд» ужан-тыршон? Вералэ пример.

МИ ВАНЬМЫ тырбыдэстэм адямиос но куддыръя янгышаськомы. Шумпотоно тодыны, Иисус Христослэн курбонэзлы луыса, Иегова милемыз сьӧлыкъёсмы понна вӧсь уг кары шуыса. Но со понна милемлы ӧпкелёно, зӥбыт-востэм луоно но оскыса куроно, Иегова милемыз простить мед кароз шуыса (Пс. 102:10). Нош ужаммы-тыршеммы Иеговалы мед яралоз шуыса, милемлы кулэ «вань сюлмынымы» солы ужаны-тыршыны (1 Пар. 28:9). Кызьы ми, тырбыдэстэм адямиос, быгатӥськомы озьы ужаны-тыршыны?

² Та юанлы валэктон сётон понна, эскеромы Иудаысь кык эксэйёслэсь примеръёссэс — Асалэсь но Амасиялэсь. Кыкез ик та эксэйёс Иегова азьын ӟеч ужъёс лэсьтыса улӥзы, но Асалэн гинэ сюлмыз быдэсак Инмарлы оскымон вал (2 Пар. 15:16, 17; 25:1, 2; Мад. 17:3). Соос тырбыдэстэм адямиос вал, соин кыкназы ик янгышало вал. Аса Инмарлэн сюресъёсызлэсь ӧз палэнскы, малы ке шуоно со Инмарлы быдэсак оскымон вал. Нош Амасия сярысь озьы вераны уз луы. Иеговалэсь тушмонъёссэ вормемез бере со сьӧраз вайиз соослэсь инмаръёссэс но соос азьын йыбыртъяны кутскиз (2 Пар. 25:11—16).

³ Со адями, кудӥз Инмарлы «вань сюлмыныз» ужа-тырше, со быдэсак Инмарлы оскымон луэ но солэн пырак дауръёс ӵоже солы ужамез-тыршемез потэ. Библиын «сюлэм» кыл ӵем дыръя возьматэ сое, мар милям пушкамы. Отчы пыре мылкыдмы, малпанъёсмы, сямъёсмы, учконъёсмы, быгатонлыкъёсмы но ужпумъёсмы. Соин ик адями сярысь, кудӥз Иеговалы вань сюлмысьтыз ужа-тырше, луоз вераны, со мылысь-кыдысь солы ужа-тырше шуыса, чеберъяськон понна гинэ уг. Нош мар вераны луоз ми сярысь? Ми, тырбыдэстэм адямиос, Иеговалы быдэсак оскиськымон кылиськомы но солы мылысь-кыдысь ужаськомы-тыршиськомы ке, ми сярысь но вераны луоз, ми солы вань сюлмынымы ужаськомы-тыршиськомы шуыса (2 Пар. 19:9).

4. Мае ми эскеромы та статьяын?

⁴ Тодон понна, мае возьматэ Инмарлы вань сюлмын ужан-тыршон, ойдолэ малпаськомы Асалэн примерез вылын но Иудаысь мукет эксэйёслэн примеръёссы вылын — Иосафатлэн, Езекиялэн но Иосиялэн, кудъёсыз Иеговалы оскымон вал. Ваньзы соос янгышало вал ке но, Иегова соосты умоен лыдъяз. Малы Иегова лыдъяз, соос вань сюлмынызы солы ужало-тыршо вал шуыса? Кызьы асьмеос соослэсь адӟем карыны быгатӥськомы?

АСАЛЭН СЮЛМЫЗ КОТЬКУ ИЕГОВА ПАЛАН УЛӤЗ

5. Мар кариз Аса эксэй луэмез бере?

⁵ Иуда эксэйлыкын, кудӥз дас кык израиль выжыос люкиськем бере кылдӥз, Аса куинетӥез эксэй вал. Со аслэсьтыз эксэйлыксэ сульдэръёслэсь сузяз но храмын азыса-калгыса улӥсь пиосмуртъёсты улляз. Озьы ик, со, «Астарталэсь сульдэрзэ лэсьтэмез понна, аслэсьтыз анайзэ эксэй кышномурт нимез нуллонлэсь люкиз» (3 Экс. 15:11—13). Со сяна, Аса калыксэ Иеговаез «сӥлы карыса улыны косӥз, Солэсь законъёссэ, курон-косонъёссэ быдэсъяса улыны косӥз». Кызьы адӟиське, со туж тыршиз зэмос Инмарлы йыбырттонэз азинтыны (2 Пар. 14:4).

6. Мар кариз Аса солэн музъемаз эфиоп ожгарчиос вуэм бере?

⁶ Иегова Иуда музъемез бакель кариз — Аса нырысетӥ дас арзэ кивалтыку, та эксэйлыкын ожъёс ӧй вал. Собере соослы пумит потӥз Зарай, эфиоп пи. Солэн миллион ожгарчиосыз но куинь сю ожмаськон уробоосыз вал (2 Пар. 14:1, 6, 9, 10). Мар кариз Аса та секыт югдуре? Со быдэсак Иеговалы оскиськиз. (Лыдӟы 2 Паралипоменонэз 14:11.) Инмар кылӥз Асалэсь сюлмысь вӧсяськемзэ но юрттӥз солы эфиоп ожгарчиосты вормыны (2 Пар. 14:12, 13). Эксэйёс Иеговалы оскымон луымтэ дыръя но, аслэсьтыз нимзэ данъян понна, со эксэйёслы юрттыны быгатэ вал тушмонъёсыз вормыны (3 Экс. 20:13, 26—30). Нош Аса Иеговалы оскиськиз, но Иегова солэн вӧсяськемезлы ответ сётӥз. Но берлогес куд-ог учыръёсы Аса шонертэм ужпумъёс кутылӥз. Кылсярысь, одӥг пол, юрттэт курыса, со Иеговалы ӧз вазиськы, нош вазиськиз Сириялэн эксэезлы (3 Экс. 15:16—22). Озьы ке но, Библиын Аса сярысь гожтэмын: «Асалэн сюлмыз вань улон нуналъёсыз ӵоже Кузё-Инмар палан улӥз» (3 Экс. 15:14). Кызьы ми Асалэсь адӟем карыны быгатӥськомы?

7, 8. Кызьы тӥ Асалэсь адӟем карыны быгатӥськоды?

⁷ Котькуд адями аслэсьтыз сюлэмзэ эскерыны быгатэ, тодон понна, со быдэсак Инмарлы оскымон-а яке ӧвӧл-а. Юалэ асьтэлэсь: «Потэ-а мынам лэсьтэме сое, мар Инмарлы ярамон луэ? Потэ-а зэмос оскон пала кариськеме но Инмарлэн кенешезлэсь чылкытлыксэ утеме?» Малпалэ гинэ, макем кышкасьтэм луоно вал Асалы, пумит мынон понна Маахалы, кудӥз Иуда музъемын эксэй кышномурт вал! Тодмоосты пӧлын ӧвӧл, дыр, сыӵе адями, кудӥз Мааха кадь ужъёс лэсьтэ. Нош озьы ке но, куддыръя тӥледлы Аса кадь кышкасьтэм сямдэс возьматоно луоз. Кылсярысь, ӵыжы-выжыосты яке матысь эшъёсты пӧлысь кин ке сьӧлыказ, ӧз ӧпкельы но сое кенешысь поттӥзы. Дугдоды-а тӥ соин вераськемысь? Мар карыны косысал тӥледыз сюлэмды?

⁸ Аса сямен ик тӥ но возьматыны быгатӥськоды, Инмарлы вань сюлмыныды ужаськоды-тыршиськоды шуыса. Инмарлы быдэсак оскиське, куке пумитъяськонэн пумиськиськоды, со чиданы луонтэм кадь потэ ке но. Кинэ ке школаын Адӟись-Ивортӥсь луэмез понна исало. Кинэ ке ӵош ужасьёсыз сереме уськыто, малы ке шуоно со, конгрессъёсы мынон понна, отпуск басьтэ яке, тросгес коньдон поттыны луонлыксэ ыштыса, туж шер уж бере кыльыса ужа. Тӥ но сыӵе югдуръёсы сюрылӥды ке, Асалэсь адӟем каре — Инмарлы вӧсяське. Кышкасьтэм луэ, Иеговалы оскиське но лэсьтэ сое, мар шонер луэ. Эн вунэтэ, Инмар Асаез юнматӥз но солы юрттӥз шуыса. Со тӥледлы но кужым сётоз.

9. Кызьы ми Иеговаез шумпоттыны быгатӥськомы, куке ми мукетъёсызлы со сярысь вераськомы?

⁹ Инмарлэн ужась-тыршисьёсыз асьсэос сярысь гинэ уг малпасько. Кылсярысь, Аса зэмос Инмарлы йыбырттонэз азинтӥз. Солэсь адӟем карыса, ми но юрттӥськомы мукет адямиослы Иеговалы ужаны-тыршыны. Веранэз ӧвӧл, Иегова туж шумпотэ, куке ми со сярысь мукетъёсызлы вераськомы, малы ке шуоно ми сое вань сюлмысьтымы яратӥськомы но милям потэ, адямиос пырак дауръёс ӵоже мед улозы шуыса.

ИОСАФАТ ИЕГОВАЕЗ УТЧАЗ

10, 11. Кызьы тӥ Иосафатлэсь адӟем карыны быгатысалды?

¹⁰ Иосафат «атаезлэн, Асалэн, сюрестӥз ветлӥз» (2 Пар. 20:31, 32). Иосафат атаез сямен ик калыклэсь мылкыдзэ ӝутӥз Иеговаез утчаны. Со Иудеялэн каръёсаз адямиосты ыстӥз, соос, «Кузё-Инмарлэн законэныз книгаез» уже кутыса, калыкез мед дышетозы шуыса (2 Пар. 17:7—10). Со сяна, со мынӥз на Израиль шуыса нимаськись уйпал эксэйлыке, Ефрем гурезё интые, отысь калыкез Иегова пала берыктон понна (2 Пар. 19:4). Иосафат «вань сюлмыныз Кузё-Инмарез утчась» эксэй вал (2 Пар. 22:9).

¹¹ Ваньмы асьмеос быгатӥськомы пыриськыны быдэс дунне вылын ортчытӥськись дышетон уже, кудӥныз кивалтэ Иеговаен. Тыршиськоды-а тӥ котькуд толэзе Библия дышетонъёс ортчытъяны но адямиослэсь сюлэмъёссэс вырӟытыны, соос но Иеговалы ужаны-тыршыны мед кутскозы шуыса? Тӥ Библия дышетон шедьтоды, вань кужымдэс поныса тыршиды ке, озьы ик оскиды ке, Инмар тӥледлы юрттоз шуыса. Вӧсяськиськоды-а тӥ со сярысь? Дась-а тӥ Библия дышетон ортчытъяны, солы ваньмон дырдэс сӥзёно луиз ке но? Иосафат Ефрем гурезё интые мынӥз, уйпал эксэйлыкысь калыклы Иегова пала берытскыны юрттон понна. Ми но, солэсь адӟем карыса, быгатӥськомы ветлыны соос доры, кинъёс тодытон уже пыриськемысь дугдӥзы. Со сяна, тӧроос тыршо ветлыны кенешысь поттэм адямиос доры, кудъёсыз сьӧлыкамысь дугдӥзы ини, вылды, соос уло ке со интыын, кытын соослэн кенешсы тодытэ.

12, 13. а) Мар кариз Иосафат секыт югдурын? б) Малы милемлы Иосафатлэсь адӟем кароно?

¹² Иосафат, Аса атаез сямен ик, Инмарлы оскымон вал соку но, куке Иуда вылэ туж трос тушмон ожгарчиос урдскыны медо вал. (Лыдӟы 2 Паралипоменонэз 20:2—4.) Иосафат кышкатскиз ке но, со «Кузё-Инмарез утчан пала берытскиз». Со Иеговалы вазиськиз но, зӥбыт-востэм сямзэ возьматыса, вераз, «милям кужыммы ӧвӧл ми вылэ урдскем трослэсь но трос калыклы пумит султыны, ми ум тодӥське, мар милемлы кароно» шуыса. Иосафат быдэсак Иеговалы оскиськиз но шуиз: «Милям синъёсмы Тон шоры учко!» (2 Пар. 20:12).

¹³ Куддыръя ми но кышкаськомы но ум тодӥське, мар карыны (2 Кор. 4:8, 9). Но эн вунэтэ, Иосафат, вань калык азьын вӧсяськыкуз, вераз, солэн но калыкезлэн кужымзы ӧвӧл шуыса (2 Пар. 20:5). Семьяослэн йыръёссы, Иосафатлэсь адӟем карыса, быгато Иеговалэсь визь-кенешсэ курыны, но озьы ик курыны, со соослы секыт югдурез вормыны кужым мед сётоз шуыса. Эн возьдаське, семьяды Иеговалэсь тэльмырыса юрттэт куремдэс кылӥз ке. Соос адӟозы, тӥ солы оскиськоды шуыса. Инмар Иосафатлы юрттӥз, со одно ик тӥледлы но юрттоз.

ЕЗЕКИЯ ЛЭСЬТӤЗ СОЕ, МАР ШОНЕР ВАЛ

14, 15. Кызьы Езекия возьматӥз, быдэсак Инмарлы оскиське шуыса?

¹⁴ Езекия эксэй Иегова борды «думиськыса улӥз», солэн атаез сульдэръёслы йыбыртъя вал ке но. «Гурезь йылъёсын вӧсяськонъёсыз со [Езекия] дугдытӥз, сульдэръёсты пыргытъяз, вӧсяськон тыпы сурдъёсты кораз, Моисейлэсь лэсьтэм ыргон кыйзэ быдтӥз», малы ке шуоно израиль пиос солы йыбыртъяны кутскизы. Езекия быдэсак Иеговалы оскымон вал — «Со бордысь ӧз усьылы, Кузё-Инмарлэсь Моисейлы сӥзьыса сётэм курон-косонъёссэ быдэсъяса улӥз» (4 Экс. 18:1—6).

¹⁵ Езекия быдэсак Иеговалы оскиськиз соку но, куке Ассириялэн, со дыре дунне вылысь валтӥсь кунлэн, ожгарчиосыз Иуда музъеме вуизы но Иерусалимез быдтонэн кышкатыны кутскизы. Ассириялэн Сеннахирим эксэез Иеговаез сантэманы но Езекияез, сётскыны косыса, кышкатыны кутскиз. Нош Езекия Иеговалы вӧсяськиз но юн оскемзэ возьматӥз, Иегова соосты утёз шуыса. (Лыдӟы Исаиялэсь 37:15—20.) Иегова Езекиялэсь вӧсяськемзэ кылӥз но кылчинэз ыстӥз, кудӥз 185 000 ассир пиосты быдтӥз (Ис. 37:36, 37).

16, 17. Кызьы тӥ Езекиялэсь адӟем карыны быгатӥськоды?

¹⁶ Кӧня ке дыр ортчыса, Езекия кулоно кадь висьыны кутскиз. Со тэльмыриз Иеговаез тодаз вайыны, кызьы со Иегова азьын шонер улӥз (Лыдӟы 4 Эксэйлыкъёслэсь 20:1—3). Библиысь ми тодӥськомы, туннэ Иегова паймымон амалэн милемыз уг эмъя но улонмес кузьгес уг кары шуыса. Озьы ке но, ми Езекия сямен, Иеговалы вӧсяськыса, вераны быгатӥськомы: «Мон Тон азьын шонер улӥ, оскиськымон сюлмын улӥ». Тӥ секыт висьыны усиды ке, оскиськоды-а тӥ, Иегова тӥледлы одно ик юрттоз шуыса? (Пс. 40:4).

¹⁷ Езекиялэн примерез милемыз малпаськыны косэ, макем кулэ палэнскыны ваньмызлэсь, мар люкетэ милемлы Иеговаен кусыпъёсмес юнматыны яке солы ужаны-тыршыны. Веранэз ӧвӧл, милям уг поты адӟем кареммы соослэсь, кинъёс тодмо адямиосты Инмар радэ пукто, социальной сетьёсын соослэсь улонзэс эскерыса. Зэм, куд-ог христианъёслы интернет юрттэ семьяенызы но матысь эшъёсынызы вераськыны. Нош та дуннеысь тросэз, сӥё-дано адямиослэн улонысьтызы иворъёссэс чакласа, туж трос дырзэс ортчыто социальной сетьёсын. Яке соос быдэс часъёсын учко соослэсь туспуктэмъёссэс но лыдӟо ваньзэ, мар соосын герӟаськемын, асьсэос соосын тодмо ӧвӧл ке но. Кышкытлык вань, христиан мурт но вань дырзэ социальной сетьёслы сӥзьыны кутскоз шуыса. Нош со нокыӵе но пайда уг вайы. Со сяна, со данъяськыны но быгатоз, трос адямиослы солэн туспуктэмез яке гожтэм кылъёсыз кельшизы шуыса, но ӝоже усьыны, адӟиз ке, кин ке но соосты учкемысь дугдӥз шуыса. Пуктэ син азяды, апостол Павел яке Акила но Прискилла асьме нуналъёсы уло шуыса. Чакласалзы-а соос социальной сетьёсын ваньзэ, мар каро адямиос, тужгес но соосыз, кудъёсыз христианъёс уг луо? Павел сярысь верамын, со вань лулыныз-сюлмыныз Инмарлэсь Кылзэ тодытӥз шуыса. Нош Прискилла но Акила адямиослы «Кузё-Инмарлэн сюресэз сярысь эшшо но шонергес валэктӥзы», вань дырзэс солы сӥзьыса (Ап. уж. 18:4, 5, 26). Луоз юаны аслэсьтыд: «Уг данъяськы-а мон кыӵе ке адямиез Инмарез кадь? Мон дырме юнме уг быдтӥськы-а?» (Лыдӟы Ефесъёслы 5:15, 16.)

ИОСИЯ ИЕГОВАЛЭСЬ КУРОН-КОСОНЪЁССЭ БЫДЭСЪЯЗ

18, 19. Кызьы тӥ Иосиялэсь адӟем карыны быгатӥськоды?

¹⁸ Езекия выжыысь Иосия эксэй но «вань сюлмысь» Иеговалэсь курон-косонъёссэ быдэсъяз (2 Пар. 34:31). Быдэ вуэмезлэсь азьло ик со «атаезлэн, Давидлэн, Инмарезлы вазиськылыны кутскиз», нош кызь арес тырмыкуз, Иудаез сульдэръёслэсь сузяны кутскиз. (Лыдӟы 2 Паралипоменонэз 34:1—3.) Иосиялэн туж потэ вал Инмарлы ярамон ужъёс лэсьтэмез. Иудалэн мукет эксэйёсыныз ӵошатыса, та удысын Иосия тросгес тыршиз. Нош куке Моисейлэсь законзэ шедьтӥзы, кудзэ ачиз Моисей гожтӥз, луоз, но сое эксэйлы лыдӟизы, Иосия валаз, Инмарлы ужан-тыршонын эшшо но тросгес тыршоно на шуыса. Со мукетъёсызлэсь но мылкыдзэс ӝутӥз Иеговалы ужаны-тыршыны. Соин ик Иосиялэн вань улон нуналъёсаз израиль пиос «Кузё-Инмарлэсь ӧз ни палэнскылэ» (2 Пар. 34:27, 33).

¹⁹ Егитъёс, егит дырысеныды ик Инмарез утчалэ, кызьы утчаз Иосия! Манассия эксэй, ӧпкелем бераз, Иосиялы Инмарлэн гажан-жалянэз сярысь вералляз, луоз. Егит пиос но нылъёс, ӵемгес вераське Инмарлы оскымон арлыдо христианъёсын, семьяяды-а яке кенешын-а, юалэ, кызьы Иегова соосты бакель кариз. Эн вунэтэ, Инмарлэсь Кылзэ лыдӟон Иосиялэсь сюлэмзэ бугыртӥз но Инмарлы тросгес тыршыны косӥз. Библиез лыдӟыса, тӥляд но мылкыдды ӝутскоз, вылды, Иеговалы тросгес лэсьтыны. Нош со тӥледыз шудогес кароз, тӥ Инмарлы матэгес кариськоды но тӥляд мукетъёсызлы но юрттэмды потоз сое шедьтыны. (Лыдӟы 2 Паралипоменонэз 34:18, 19.) Библиез дышетыса, тӥ адӟыны быгатоды, Инмарлы умойгес ужан-тыршон понна, улонысьтыды мае ке воштоно шуыса. Соку, Иосия сямен, ӝегатскытэк лэсьтэ сыӵе воштӥськонъёс!

ВАНЬ СЮЛМЫНЫДЫ ИЕГОВАЛЫ УЖАЛЭ-ТЫРШЕ

20, 21. а) Мар одӥг кадез вал ньыль эксэйёслэн, кудъёсызлэсь примеръёссэс ми эскеримы? б) Мае ми эскеромы мукетаз статьяын?

²⁰ Кельшизы-а тӥледлы Иудаысь ньыль эксэйёслэн примеръёссы, кудъёсыз Иеговалы вань сюлмынызы ужазы-тыршизы? Соос мылысь-кыдысь Инмарлэсь эриксэ быдэсъязы но вань улытозязы солы оскымон кылизы. Та эксэйёс Иеговалы оскиськизы соку но, куке тушмонъёс соослы пумит сылӥзы. Нош самой валтӥсез — соос Инмарлы ужазы-тыршизы, малы ке шуоно яратӥзы сое.

²¹ Мукет статьяысь тодомы, ваньмыз та ньыль эксэйёс янгышъёс но лэсьто вал шуыса. Нош сюлэмъёсты эскерись Инмар адӟиз соослэсь быдэсак солы оскымон луэмзэс. Ми но тырбыдэстэмесь. Нош куке Иегова милесьтым сюлэмъёсмес эскере, адӟе-а со, ми солы вань сюлмынымы ужаськомы-тыршиськомы шуыса? Ойдолэ эскеромы сое мукетаз статьяын.