«Улон но ужан-тыршон» ужан тетрадьлы малпанъёс

3—9-ТӤ КУАРУСЁН

ИНМАРЛЭН КЫЛЫСЬТЫЗ УЗЫРЛЫК | ИОАНН 1, 2

Духовной марӟанъёсты утчаськомы

(Иоанн 1:1) Кутсконаз ик Кыл вал. Кыл Инмар дорын вал. Кыл Инмар вал.

nwtsty эскерон понна материалъёс (Ин 1:1)

Кыл Грек кылын хо Ло́гос. Татын «Кыл» со титул луэ. Со выллем пуштросэн со кутӥське Ин 1:14 но Усьт 19:13. Иоанн возьматӥз, та титул Иисуслы сётэмын шуыса. Сое Кыл шуыса нимало вал, куке со музъем вылын тырбыдэс адями луыса ужаз-тыршиз, солэсь азьло но, куке со духовной кылдытэм вал. Та титулэз со али но, инме тубемез бере, нуллэ. Иисус Инмар Кыл, яке Инмарлэн Иворчиез, луыса Кылдытӥсьлэн инмысь мукет пиосызлы но адямиослы тодон-валан но курон-косонъёс сётъяз. Соин ик учыръёсын, куке Иегова адямиосын вераськиз, со соосын ачиз ӧз вераськы, вылды, нош Кылыз пыр вераськиз (Ул 16:7—11; 22:11; 31:11; Пот 3:2—5; Сд 2:1—4; 6:11, 12; 13:3).

дорын Татын прос грек кыл возьматэ, Кыл но Инмар ог-огзылы матын вал но соослэн матысь кусыпъёссы вал шуыса. Со сяна, «Кыл Инмар дорын вал» веран возьматэ, Кыл но Инмар одӥг ӧвӧл шуыса.

Кыл Инмар вал Яке «Кыл Инмарлы кельше вал». Татын Иоанн валэктэ Кыллэсь (грек кылын хо Ло́гос; учкы та кылбурлы ик Кыл эскерон понна материалэз), яке Иисус Христослэсь, кыӵе луэмзэ. Инмар Иисусэз ваньмызлэсь азьло кылдытӥз но ваньмыз со пыр кылдытэмын вал бере, Кыл, Инмарлэн мукет кылдытэмъёсыз сярысь, вылӥегес инты басьтэ. Соин ик сое «инмар; Инмарлы кельшись» шуыса ниманы луоз. Тросэз берыктӥсьёс та веранэз «Кыл Инмар вал» шуыса берыкто, Кылэз Ваньмызлэсь кужмо Инмарен одӥг радэ пуктыса. Нош Иоанн уг вера вал, Кыл — со Ваньмызлэсь кужмо Инмар шуыса. Тани куд-ог мугъёс, малы со озьы. Нырысь ик, 1-тӥ но 2-тӥ кылбуръёсын верамын, Кыл «Инмар дорын» вал шуыса. Озьы ик, лыдэ басьтоно, та кылбуръёсын тео́с грек кыл куинь пол пумиське шуыса. Нырысетӥ но куинетӥ учыръёсын со кутӥське грек кылын, кудӥз возьматэ, Ваньмызлэсь кужмо Инмар сярысь вераське шуыса, нош кыкетӥяз та кыл ӧвӧл. Тросэз тодосчиос соглаш, сое лыдэ басьтоно шуыса. Со кыл гожтэмын луысал ке, со возьматысал, Ваньмызлэсь кужмо Инмар сярысь вераське шуыса. Нош со гожтэмын ӧвӧл бере, тео́с кыл возьматэ Кыллэсь кыӵе луэмзэ. Соин ик Библилэн англи, француз но немец кылъёсы куд-ог берыктэмъёсаз та кылбур берыктэмын «Выль дуннелэн берыктэмаз» сямен. Отын Кыл «инмар», «Инмарлы кельшись» шуыса нимамын. Со соглаш луэ Иоаннлэсь Евангелизэ копт кыллэн саид но бохайр диалектъёсаз вашкала берыктэмъёслы (малпало, соос а. в. III но IV дауръёсы лэсьтэмын вал шуыса), кудъёсаз тео́с кыл Ин 1:1 нырысетӥ но кыкетӥ учыръёсын пӧртэм сямен берыктэмын. Со берыктэмъёсын верамын Кыллэн кыӵе луэмез сярысь, со Инмарлы кельше шуыса. Но соос Кылэз но Атайзэ, Ваньмызлэсь кужмо Инмарез, одӥг радэ уг пукто. Со выллем ик, Кл 2:9 верамын, «Инмар луон быдэскыныз Христос бордын» улэ шуыса. Нош 2Пт 1:4 вераське, зырӟем христианъёс гинэ но «Инмар улонлэн люкет басьтӥсьёсыз луыны» быгатозы шуыса. Со сяна, Септуагинтаын тео́с кылын ӵем дыръя берыкто эл но элохи́м еврей кылъёсты, кудъёсыз, кызьы малпало, «кужмо» луонэз возьмато. Та еврей кылъёс кутӥсько вал, Иегова, мукет инмаръёс но адямиос сярысь вераку. Соин ик, Кылэз «инмар», яке «кужмо», нимано ке, со соглаш луоз Ис 9:6 азьпалзэ ивортонлы, кытын верамын, сӥзем Мессиялы «Кужмо инмар» («Ваньмызлэсь кужмо Инмар» ӧвӧл) но солэн кивалтэтэзлэсь кылзӥськись адямиослэн «Пумтэм вапумъёслэн Атайзы» нимъёс сётозы шуыса. Та азьпалзэ ивортон быдэсмоз Атаезлэн, «Саваоф Кузё-Инмарлэн», сюлмаськон-тыршонэзлы луыса (Ис 9:7).

(Иоанн 1:29) Мукетаз нуналэ Иоанн, ас дораз лыктӥсь Иисусэз адӟыса, шуиз: «Тани Инмарлэн Ыжпиез, Со Ас вылаз дуннелэсь сьӧлыксэ басьтэ.

nwtsty эскерон понна материал (Ин 1:29)

Инмарлэн Ыжпиез Куке пылатӥськем Иисус кыр дуннеысь берытскиз, кытын Дьявол солэсь визьзэ сыназ, Иоанн Пылатӥсь сое «Инмарлэн Ыжпиез» шуыса нимаз. Та веран пумиське та кылбурын но Ин 1:36 гинэ. (Учкы «Инмарлэн Кылыз мутусъёсын но схемаосын» брошюраез (ӟуч), 4-тӥ люкет.) Иисусэз ыжпиен ӵошатон туж тупа. Кызьы адӟиське Библиысь, адямиос ыжъёсты курбонлы ваё вал, сьӧлыко луэмзэс валаса но Инмарен кусыпъёссэс тупатыны тыршыса. Со курбонъёс возьмато вал, вуонояз Иисус курбон ваёз шуыса, тырбыдэс улонзэ вань адямиос понна сётыса. «Инмарлэн Ыжпиез» веран Библиысь куд-ог кылбуръёсты тодэ вайытыны быгатэ. Иоанн Пылатӥсь Еврей Гожтэмъёсты умой тодэ вал бере, солэн кылъёсыз Инмарлэн Кылысьтыз одӥг яке тросгес учыръёс сярысь вераны быгато вал. Кылсярысь, со вераны быгатэ вал така сярысь, кудзэ Авраам Исаак пиез интые курбонлы вайиз (Ул 22:13); Пасха ыжпи сярысь, кудзэ израиль калыклы Египетысь потон азяз вандоно вал (Пот 12:1—13); яке ыжпи сярысь, кудзэ котькуд ӵукна но ӝыт Иерусалимын курбонлы вайылӥзы (Пот 29:38—42). Озьы ик, Иоанн вераны быгатэ вал Исаиялэн азьпалзэ ивортонэз сярысь, кытын верамын, со, кинэ Иегова «Мынам Ляльчие» шуыса нимаз, «ыж кадь вандыны» нуэмын луоз шуыса (Ис 52:13; 53:5, 7, 11). Коринфъёслы нырысетӥ гожтэтаз апостол Павел Иисусэз «Асьмелэн Пасха Ыжпимы» шуыса нимаз (1Кр 5:7). Апостол Пётр Христослэсь дуно вирзэ «чик шектэм-сьӧлыктэм, дун-чылкыт ыжпилэн» вирыныз ӵошатӥз (1Пт 1:19). Со сяна, Усьтӥськон книгаын данъям Иисус «Ыжпи» шуыса 25 поллэсь тросгес нимамын. (Тани куд-ог примеръёс: Усьт 5:8; 6:1; 7:9; 12:11; 13:8; 14:1; 15:3; 17:14; 19:7; 21:9; 22:1.)

10—16-ТӤ КУАРУСЁН

ИНМАРЛЭН КЫЛЫСЬТЫЗ УЗЫРЛЫК | ИОАНН 3, 4

Духовной марӟанъёсты утчаськомы

(Иоанн 3:29) Кинлэн ичименез вань, со эмеспи; нош эмеспилэн сое кылзӥськыса сылӥсь эшез, эмеспилэсь куаразэ кылыса, туж шумпотэ: тани таиз мынам шумпотонэ быдэсмиз.

nwtsty эскерон понна материал (Ин 3:29)

эмеспилэн... эшез Вашкала Израильын эмеспилэн матысь эшез сюанлы дасяськонын бадӟым инты басьтэ вал. Кузпалъяськон нуналэ сюанчиос, эмеспилэн яке солэн атаезлэн корказ лыктыса, сюан ортчыто вал. Сюан дыръя эмеспилэн эшез шумпотӥз, эмеспилэсь куаразэ кылыса, куке со выль кенэн вераськиз; со возьматэ вал, эш ужзэ быдэстӥз шуыса. Иоанн Пылатӥсь ассэ эмеспилэн эшеныз ӵошатӥз. Иисусэз та учырын эмеспиен ӵошатыны луэ, нош солэсь дышетскисьёссэ — выль кенэн. Мессиялы сюрес дасяса, Иоанн Пылатӥсь нырысетӥ дышетскисьёсты Иисус Христосэн тодматӥз (Ин 1:29, 35; 2Кр 11:2; Еф 5:22—27; Усьт 21:2, 9). Эмеспилэн эшез кадь Иоанн ужзэ быдэстӥз. Со бере Иисуслэн но дышетскисьёсызлэн ужзы бадӟымгес инты басьтӥз. Соин ик Иоанн вераз: «Солы [Христослы] будыны кулэ, нош мыным — покчиёмыны» (Ин 3:30).

(Иоанн 4:10) Иисус солы ответ сётыса шуиз: «Инмар кузьымез тон тодысалыд ке, но Кин тыныд вера: „Вай Мыным юыны“, тон ачид Солэсь курысалыд, нош Со тыныд улэп ву сётысал».

nwtsty эскерон понна материал (Ин 4:10)

улэп ву Татын кутэм грек кылъёс возьмато бызись вуэз — ошмес вуэз яке вуэз колодчаысь, кудаз ошмесъёсысь ву лыктэ. Сыӵе ву цистернаысь, музъем улын лэсьтэм ву возён интыысь, сылӥсь вулэсь пӧртэм луэ. «Улэп ву» веран озьы ик пумиське Лв 14:5, отын со возьматэ бызись вуэз. Иер 2:13 Иегова «улэп вуэн ошмес» шуыса нимамын, нош Иер 17:13 — «улэп ву сётӥсь ошмес». Татын вераське символической ву сярысь, кудӥз улон сётэ. Куке, Самария кышномуртэн вераськыкуз, Иисус улэп ву сярысь вераз, кышномурт нырысь огшоры ву сярысь малпаз, луоз, нош Иисус мукет ву сярысь вераз (Ин 4:11).

17—23-ТӤ КУАРУСЁН

ИНМАРЛЭН КЫЛЫСЬТЫЗ УЗЫРЛЫК | ИОАНН 5, 6

Духовной марӟанъёсты утчаськомы

(Иоанн 6:44) Нокинлэн но Мон доры лыктэмез уз луы, Монэ ыстӥсь Атае сое Мон доры ӧз ке вайы. Нош Мон берпум нуналэ сое улӟытыса султыто.

nwtsty эскерон понна материал (Ин 6:44)

сое Мон доры ӧз ке вайы Грек кыл, кудӥз «вайыны» шуыса берыктэмын, возьматэ чорыгасьёслэсь чорыгез калтонэн поттэмзэс (Ин 21:6, 11). Нош со уг возьматы, Инмар солы ужаны-тыршыны кужмысь косэ шуыса. Библия вера, Иегова адямиослы бырйыны эрик сётӥз шуыса. Котькудӥз ачиз быръе, ужано-тыршоно-а Инмарлы, ӧвӧл-а (КЗк 30:19, 20). Библиез но святой духез уже кутыса, Иегова ас дораз вае соосты, кинлэн сюлмыз зэмлыклы усьтэмын (Пс 10:5; Мд 21:2). Ис 54:13 гожтэм азьпалзэ ивортон, кудӥз сярысь Иисус вераз Ин 6:45, вера, Атай адямиосты сыӵе амалэн ас дораз ваёз шуыса. (Ӵошаты Ин 6:65.)

(Иоанн 6:64) Нош тӥ пӧлын вань оскисьтэмъёс но». Уго Иисус кутсконысеныз ик тодӥз, кинъёс луо оскисьтэмъёс, кин Сое кутыса сётоз.

nwtsty эскерон понна материалъёс (Ин 6:64)

Иисус... тодӥз... кин Сое кутыса сётоз Татын Иисус Искариот Иуда сярысь вераз. 12 апостолъёсты быръён азьын Иисус уйбыт Атаезлы вӧсяськиз (Лк 6:12—16). Адӟиське, нырысь Иуда Инмарлы оскымон вал шуыса. Но азьпалзэ ивортонъёсысь Иисус тодӥз, сое матысь эшез вузаса сётоз шуыса (Пс 40:10; 108:9; Ин 13:18, 19). Куке Иуда урод пала воштӥськыны кутскиз, Иисус сое соку ик адӟиз, малы ке шуоно со адямилэсь сюлэмзэ адӟыны быгатэ вал (Мф 9:4). Инмар адӟыны быгатэ, мар азьпалан луоз, но со тодӥз, Иисуслэн матысь эшез сое вузаса сётоз шуыса. Озьы ке но, шонертэм луысал малпаны, Иуда бырйыны уг быгаты вал шуыса но Инмар азьло ик малпаз, со Иисусэз вузалоз шуыса. Сыӵе малпан Инмарлэн сямъёсызлы но азьвыл лэсьтэм ужъёсызлы пумит мынысал.

кутсконысеныз ик Та кылъёс уг верало Искариот Иудалэн вордӥськемез сярысь яке со сярысь, куке Иисус, уйбыт вӧсяськыса, сое апостолэ бырйиз (Лк 6:12—16). Вераськон мынэ дыр сярысь, куке Иудалэн Иисусэз вузаны малпанъёсыз кылдӥзы. Куке Иуда со сярысь малпаськыны кутскиз, Иисус соку ик ваньзэ валаз (Ин 6:70; 13:11; ӵошаты Ин 2:24, 25; Усьт 1:1; 2:23). Кызьы адӟиське, сюлэмез шӧдтэк шорысь воштӥськонэн сэрен, Иуда вузаса сётӥсь ӧз луы. Со Иисусэз валаса вылысь, азьло ик ваньзэ малпаса вузаз. Архе́ грек кыл, кудӥз «кутскон» шуыса берыктэмын, пӧртэм пуштросэн кутӥське. Кылсярысь, 2Пт 3:4 со возьматэ дунне кылдыны кутскемез. Нош еврей луисьтэм адямиос вылэ святой духлэн васькемез сярысь Пётр вераз: «Соос вылэ Святой Дух васькиз озьы, кызьы нырысь кутсконаз ик асьмеос вылэ но Со васькиз» (Ап 11:15). Пётр ӧз вера вордӥськон нуналыз сярысь яке нунал сярысь, куке со апостол луиз. Татын со вераз а. в. 33-тӥ арысь Витьтонэтӥ Нунал сярысь — нунал, куке Иисуслэн дышетскисьёсыз вылэ нырысетӥзэ святой дух васькиз (Ап 2:1—4). Мукет примеръёсты, кыӵе пуштросэн «кутскон» кыл кутӥське, шедьтыны луэ Лк 1:2; Ин 15:27 но 1Ин 2:7.

24—30-ТӤ КУАРУСЁН

ИНМАРЛЭН КЫЛЫСЬТЫЗ УЗЫРЛЫК | ИОАНН 7, 8

Духовной марӟанъёсты утчаськомы

(Иоанн 7:8—10) Тӥ та празднике мынэ, нош Мон та празднике уг на мыны, уго Мынам дыры ӧз на вуы». ⁹ Тае соослы вераз но Ачиз Галилеяе кылиз. ¹⁰ Нош братъёсыз кошкем бере Со но празднике мынӥз, шара ӧз, ватскыса сямен мынӥз.

w07 1/2 6 б., 4 абз.

Малы пӧяськытэк улоно?

Кыӵе адӟем карон та удысын Иисус Христос возьматӥз? Одӥг пол Иисус вераськиз адямиосын, кудъёсыз солы уг оско вал, но тунсыкъяськизы, кытчы со мыныны малпа. «Татысь пот но Иудеяе мын»,— веразы соос Иисуслы. Кыӵе ответ соослы Иисус сётӥз? «Тӥ та празднике [Иерусалиме] мынэ, нош Мон та празднике уг на мыны, уго Мынам дыры ӧз на вуы». Кӧня ке дыр ортчыса, Иисус Иерусалиме празднике мынӥз ик. Малы со соослы сыӵе ответ сётӥз? Соослэн правозы ӧй вал тодыны, кытын Иисус луоз. Соин, Иисус ӧз пӧяськы ке но, со соослы ваньзэ ӧз вера, солы яке солэн дышетскисьёсызлы сокем изъян вайыны медаз быгатэ шуыса. Со пӧяськон ӧй вал, малы ке шуоно апостол Пётр Христос сярысь гожтӥз: «Со нокыӵе но сьӧлык ӧз лэсьты, Солэн кылаз-ымаз чеберъяськонэз-ӧрекчаськонэз ӧй вал» (Иоанн 7:1—13; 1 Пётр 2:22).

(Иоанн 8:58) Иисус соослы шуиз: «Зэм ик, зэм ик тӥледлы верасько: Авраам вордскемлэсь азьло Мон вал ини».

nwtsty эскерон понна материал (Ин 8:58)

Мон вал ини Лекомем иудейёслэн Иисусэз, изъёсын жугыса, виемзы потэ вал. Солэн кылъёсысьтыз соос валазы, со Авраамез адӟиз шуыса, Иисуслы, кызьы соос асьсэос веразы, «витьтон арес но» ӧй вал ке но (Ин 8:57). Соос валаны кулэ вал, Авраамлэн вордскемезлэсь азьло Иисус вал ини шуыса, малы ке шуоно адями луэмлэсь азьло со инмын кужмо кылчин вал. Куд-огъёсыз малпамъя, та кылъёс возьмато, Иисус — со Инмар шуыса. Соос верало, та кылбурысь эго́ эйми́ грек веран (кудӥз куд-ог Библиосын «Мон вань» шуыса берыктэмын) кельше шуыса солы, кызьы Пот 3:14 Септуагинтаын берыктэмын, но та кылбуръёсты огкадь берыктоно шуыса. Нош Иисуслэн кылъёсысьтыз, кудъёсыз Ин 8:54, 55 гожтэмын, адӟиське, со ассэ но Атайзэ одӥген ӧз лыдъя шуыса.