Гажалэ соосты, кинъёс гажамон луо

1. Малы куд-ог адямиос гажамон луо? Кыӵе юанъёсты ми эскеромы?

МИ КИНЭ КЕ НО данъяськомы ке, со возьматэ, ми сое гажаськомы шуыса. Со, кинэ гажало, ас ужъёсыныз возьматӥз, сое вань, мар понна гажаны шуыса, яке со кыӵе ке нимысьтыз инты басьтэ. Соин сэрен юанъёс кылдыны быгато: кинэ милемлы гажано но малы?

2, 3. а) Малы Иегова гинэ нимысьтыз сӥё-дано карымон луэ? (Учке статья кутсконысь суредэз.) б) Кинэ возьматэ Усьтӥськонысь 5:13 Ыжпи но малы со сӥё-дано карымон луэ?

² Кызьы адӟиське Усьтӥськонысь 5:13, «престол вылын Пукись» но «Ыжпи», гажамон но сӥё-дано карымон луо. Усьтӥськон книгалэн 4-тӥ люкетаз верамын одӥгез муг, малы Иегова сӥё-дано карымон луэ. Кылчинъёс Иеговаез, «пумтэм вапумъёсы Улӥсез», огкылысь данъяло: «Тон, Кузё-Инмаре, данлыкез, сӥ-данэз, кужымез басьтыны ярась, уго Тон ваньзэ кылдытӥд, ваньмыз Тынад эрикедъя улэ-вылэ, кылдытэмын» (Усьт. 4:9—11).

³ Ыжпи — со Иисус Христос. Со «Инмарлэн Ыжпиез, Со Ас вылаз дуннелэсь сьӧлыксэ басьтэ» (Иоанн 1:29). Библиын верамын, со вань эксэйёслэсь, кудъёсыз музъем вылын кивалтӥзы, быдӟым луэ шуыса. Иисус сярысь гожтэмын: «Эксэйёс пӧлысь Эксэй, кузёос пӧлысь Кузё-Инмар. Солэн огназлэн гинэ пумтэм вапумъёсы улонэз вань, Со пырыны луонтэм югыт пӧлын улэ, адямиос пӧлысь Сое нокин но ӧз адӟы, адӟыны но уг быгаты» (1 Тим. 6:14—16). Кудӥз ке эксэй яке кивалтӥсь аслаз мылкыд каремезъя сётӥз на-а улонзэ, милемыз сьӧлыкъёсмылэсь мозмытон понна? Тӥляд но мылкыдды уг ӝутскы-а трос миллион кылчинъёсын ӵош сюлмысь вераны: «Вандэм Ыжпи кужым басьтыны, узырлык, бадӟым визьлык, юнлык, сӥ-сан, данлык басьтыны ушъяны-данъяны ярамон-сылӥсь луэ»? (Усьт. 5:12).

4. Малы милемлы Иеговаез но Христосэз сӥё-дано карыны кулэ?

⁴ Ми Иеговаез но Христосэз сӥё-дано карыны кулэ. Соин герӟаськемын милям пырак дауръёс ӵоже улонмы. Со адӟиське Иисуслэн кылъёсысьтыз, кудъёсыз гожтэмын Иоаннлэн 5:22, 23: «Атай нокинэ судить но уг кары, нош быдэсак судэз Пиезлы сётӥз, кызьы Атаез сӥлы каро, озьы ик Пиез но ваньмыз сӥлы мед карозы шуыса. Кин Пиез сӥлы уг кары, со Сое ыстӥсь Атаез но сӥлы уг кары». (Лыдӟы Псалтирез 2:11, 12.)

5. Мар понна вань адямиосты гажаны луэ?

⁵ Адямиос, Инмарлы укшатыса, кылдытэмын вал (Ул.-выл. 1:27). Соин ик тросэз адямиос быгато возьматыны сыӵе сямъёсыз, кудъёсыз Инмарлэн вань. Адямиос быгато яратыны, ӟечлыко но гажась-жалясь луыны. Соос кылдытэмын возьытлыкен — быгатонлыкен валаны, мар шонер, нош мар шонертэм; мар шонерлыко, нош мар шонерлыктэм; мар ярамон, нош мар ярантэм луэ. Но вераны кулэ, куддыръя возьытлык мыдлань но вераны быгатэ (Рим. 2:14, 15). Тросэз адямиос чылкытэз но чеберез ярато, но соослэн ог-огенызы тупаса улэмзы потэ. Валало-а, уг-а, озьы соос Иеговалэсь адӟем каро, но со понна соосты гажаны луэ (Пс. 8:6).

КИНЭ ГАЖАНО НО КЫЗЬЫ СОЕ ВОЗЬМАТОНО

6, 7. Маин Иеговалэн Адӟись-Ивортӥсьёсыз мукет адямиослэсь пӧртэм луо?

⁶ Валаны кулэ, макем мур мукет адямиосты гажано но кызьы гажаммес возьматоно. Тросэзлы тырбыдэстэм адямиослы Шайтанлэн дуннеезлэн мылкыдыз паламын. Соин ик паймоно ӧвӧл, куд-ог пиосмуртъёсты но кышномуртъёсты огшоры гажам сяна, соосты Инмар интыын лыдъяло шуыса. Адямиос вылӥе пукто религия но политика удысысь азьветлӥсьёсты, спортсменъёсты, актёръёсты, кырӟасьёсты но мукет тодмо адямиосты. Кызьы егитъёс, озьы ик арлыдоос но тыршо адӟем карыны соослэсь выросъёссэс, сямъёссэс яке вылтуссэс.

⁷ Зэмос христианъёс адямиосты гажан шоры мукет сямен учко. Одӥг гинэ адями, кудӥз котьма ласянь адӟем карымон луэ,— со Иисус Христос (1 Пётр 2:21). Ми адямиосты мултэс гажасалмы ке, со Инмарлэсь сюлэмзэ вӧсь карысал. Милемлы тодамы возёно, «ваньмыз сьӧлыке пыремын, Инмарлэн данэзтэк кылемын» шуыса (Рим. 3:23). Зэмзэ ик, одӥг адями но ярамон уг луы, сое, Инмарен одӥг радэ пуктыса, нимысьтыз мед гажалозы шуыса.

8, 9. а) Кызьы Иеговалэн Адӟись-Ивортӥсьёсыз учко соос шоры, кинъёслы кивалтыны право сётэмын? б) Мае тодамы возёно, куке ми соосын валче ужаськомы?

⁸ Та дуннеын куд-ог адямиослы кивалтыны право сётэмын. Соослы чаклано, катъёс мед быдэсъяськозы шуыса, но адямиослэн кулэяськонъёссы сярысь сюлмаськоно. Со котькинлы пайда вае. Тӥни малы апостол Павел христианъёслы визь-кенеш сётӥз, учкыны соос шоры «вылӥ властьёс-кивалтӥсьёс» шоры кадь, но кылзӥськыны соослэсь. Со гожтӥз: «Кинлы мар сётонды вань, сое сётэ: кинлы тыриськон — тыриськон... кинлы сӥ-дан — сӥ-дан» (Рим. 13:1, 7).

⁹ Соин ик Иеговалэн Адӟись-Ивортӥсьёсыз сыӵе адямиосты гажало озьы, кызьы ярамон луэ соослэн шаеразы. Ми дась соосын валче ужаны, куке соос асьсэлэсь ужзэс быдэсто. Но ми гажаськомы соосты, Библиысь возетъёсты лыдэ басьтыса. Та юанын милемлы Инмарлэсь кылзӥськоно но нокин пала кариськытэк улоно. (Лыдӟы 1 Пётрлэсь 2:13—17.)

10. Кыӵе пример возьматӥзы Иеговалэн вашкала дыръёсысь ужась-тыршисьёсыз?

¹⁰ Иеговалэн ужась-тыршисьёсыз, кудъёсыз вашкала дыръя улӥзы, милемлы пример возьматӥзы, кызьы учконо соос шоры, кинъёслы кивалтыны право сётэмын. Куке Август кесарьлэн быдэс Рим кунысь калыкез гожъян сярысь косонэз потӥз, Иосиф но Мария, солэсь кылзӥськыса, Вифлееме мынӥзы, Мария ӝоген нырысетӥ пиналзэ вайыны кулэ вал ке но (Лука 2:1—5). Берлогес, куке Павелэз янгыше уськытӥзы, со, ассэ утьыны тыршыкуз, Агриппа эксэен но Фестэн, Рим кунысь Иудея ёросэн кивалтӥсен, гажаса вераськиз (Ап. уж. 25:1—12; 26:1—3).

11, 12. а) Малы ми религия удысысь азьветлӥсьёслы кызьы ке нимысьтыз амалэн гажаммес ум возьматӥське? б) Кыӵе емышъёс вайиз Австриысь одӥг Адӟись-Ивортӥсьлэн политикен гажаса вераськемез?

¹¹ Иеговалэн Адӟись-Ивортӥсьёсыз религия удысысь азьветлӥсьёсты кыӵе ке нимысьтыз амалэн уг гажало, соос сое возьмало ке но. Зэмос луисьтэм религия Инмар сярысь шонертэм вера но Библиысь дышетонъёсты мыдлань возьматэ. Соин ик ми валаськомы, религия удысысь азьветлӥсьёсты гажаммес кызьы ке нимысьтыз амалэн возьматоно ӧвӧл шуыса. Ми соосты гажаськомы озьы ик, кызьы вань мукет адямиосты гажаськомы. Кызьы тодӥськомы, музъем вылын улыкуз, Иисус религия удысысь азьветлӥсьёслэсь ужъёссэс шарае поттылӥз но соосты чеберъяськисьёс но синтэм валтӥсьёс шуыса нимаз (Матф. 23:23, 24). Но вераны кулэ, ми гажаськомы ке соосты, кинъёслы кивалтыны право сётэмын, со умой емышъёс вайыны быгатэ, куддыръя туж паймымон но.

¹² Тани мар луиз Леопольд Энглайтнерен, Австриысь Адӟись-Ивортӥсен, кудӥз тодытон уже мылысь-кыдысь пыриське вал. Нацистъёс сое поездэн Бухенвальд концлагере келязы. Соин ӵош одӥг вагонэ тупаз Генрих Глайсснер — Австриысь политик, кудӥз нацистъёслэн син азязы уродэ усиз. Мыныкузы Энглайтнер агай, Глайсснерен ас учконъёсыз сярысь гажаса вераськиз. Глайсснер сое сак кылзӥз. Кыкетӥ дунневыл ож бере та политик трос пол юрттылӥз Австриысь Адӟись-Ивортӥсьёслы. Тӥ мукет учыръёсты но тодӥськоды, дыр, куке христианъёс, Библиын сётэм визь-кенешлэсь кылзӥськыса, гажазы соосты, кинъёслы кивалтыны право сётэмын, но со туж умой емышъёс вайылӥз.

КИН ЭШШО ГАЖАМОН ЛУЭ НА

13. Кин тужгес но гажамон луэ но малы?

¹³ Веранэз ӧвӧл, милям огъя оскись вын-агайёсмы но сузэр-апайёсмы гажамон луо. Тужгес но тӧроос, кудъёсыз ми понна кыл куто. (Лыдӟы 1 Тимофейлы 5:17.) Ми гажаськомы со вын-агайёсты но ум учкиське, кыӵе калыкысь соос; вань-а соослэн дышетскемзы, ӧвӧл-а; узыр-а соос яке куанер-а. Со вын-агайёсты Библия «кузьымъёс» шуыса нима, соос пыр Инмар аслаз калыкез сярысь сюлмаське. Малпалэ кенешысь тӧроос сярысь, ёросэз чакласьёс сярысь но вын-агайёс сярысь, кудъёсыз филиаллэн комитетъёсаз но Кивалтӥсь кенешын ужало-тыршо. Нырысетӥ даурын христианъёс мур гажазы Иеговаен пуктэм вын-агайёсты. Туннэ но ми соосты озьы ик гажаськомы. Вын-агайёсмес, кудъёсыз тросэзлы тодмо луо, ми ум данъяське Инмарез кадь но соослы кызьы ке нимысьтыз амалэн гажаммес ум возьматӥське. Но ми гажаськомы соосты зӥбыт-востэм луэмзы но мылысь-кыдысь тыршемзы понна. (Лыдӟы 2 Коринфъёслы 1:24; Усьтӥськонэз 19:10.)

14, 15. Маин христиан тӧроос пӧртэм луо соослэсь, кинъёс асьсэды озьы нимало гинэ?

¹⁴ Иеговаен пуктэм вын-агайёсты зӥбыт-востэм возьмасьёсты кадь тодо. Соос уг лэзё асьсэ шоры нимо-дано адямиос шоры кадь учкыны. Озьы соос зӥбыт-востэм луэмзэс возьмато. Таин соос туж пӧртэм луо религия удысысь туала азьветлӥсьёслэсь но соослэсь, кинъёс сярысь Иисус вераз: «Ярато сиён-юонъёс дыръя азьпал радъёсын пуконэз, сӥнагогаосын азьпал радын пуконэз, калык люкаськон интыосын ӟечкыламез» (Матф. 23:6, 7).

¹⁵ Христиан кенешысь тӧроос зӥбыт-востэм мылкыдын кылзӥсько Иисуслэн таӵе кылъёсызлэсь: «Тӥ „дышетӥсь“ шуыса эн нимаське, тӥляд уго одӥг Дышетӥсьты — Христос, нош тӥ ваньды — агай-вынъёс. „Атай“ шуыса музъем вылысь нокинэ эн нималэ, тӥляд уго одӥг Атайды,— Со Инмын. „Валэктӥсь“ шуыса но эн нимаське, тӥляд уго одӥг Валэктӥсьты — Христос. Кин тӥ пӧлын бадӟым, со тӥледлы медо мед луоз: уго кин ассэ вылӥе пуктэ, со улӥе усёз, нош кин ассэ ултӥя, со вылӥе пуктэмын луоз» (Матф. 23:8—12). Соин ик паймонэз ӧвӧл, быдэс дуннеысь вын-агайёс но сузэр-апайёс кенешысьтызы тӧрооссэс сокем ярато но гажало шуыса.

16. Малы милемлы азьланяз но дышетсконо мукет адямиосты гажаны но соослы гажаммес возьматыны?

¹⁶ Куддыръя, мукет адямиосты гажаны дышетскон понна, дыр кулэ луоз. Нырысетӥ христианъёслы но солы дышетсконо вал (Ап. уж. 10:22—26; 3 Иоанн 9, 10). Веранэз ӧвӧл, одно ик кулэ тыршыны мукет адямиосты гажаны озьы, кызьы Библия дышетэ. Соку ми бакель каремын луомы.

ГАЖАМЛЭН ПАЙДАЕЗ

17. Кыӵе емышъёс вае гажаммы соосты, кинъёслы кивалтыны право сётэмын?

¹⁷ Ми гажаськомы ке соосты, кинъёслы кивалтыны право сётэмын, со умой емышъёс вайыны быгатоз, кылсярысь, соос милесьтым ӟеч иворез вераны правомес но утьыны быгатозы. Милесьтым гажаммес адӟыса, соос ӵем дыръя тодытон ужмы сярысь умоен верало. Кӧня ке ар талэсь азьло, Биргит, кудӥз Германиын пионер луыса ужа-тырше, нылыз аттестат басьтыку, школае лыктӥз. Дышетӥсьёс Биргитлы веразы, вань та аръёс ӵоже соос Адӟись-Ивортӥсьёслэсь нылпиоссэс шумпотыса дышетӥзы шуыса. Соос веразы на, Адӟись-Ивортӥсьёслэн нылпиоссы школаын ӧй дышетскысалзы ке, школаын сокем умой ӧй луысал шуыса. Биргит валэктӥз: «Ми нылпиосмес дышетӥськомы асьсэды возьыны озьы, кызьы Инмар возьма, нош со пӧлы озьы ик пыре дышетӥсьёсты гажан но». Соку одӥг дышетӥсь шуиз: «Вань нылпиос тӥляд нылпиосты кадь луысалзы ке, милям школамы рай кадь луысал». Кӧня ке арня ортчыса, мукетыз дышетӥсь Лейпциге конгрессэ ветлӥз.

18, 19. Малы кулэ тӧроосты гажаны но мае вунэтоно ӧвӧл?

¹⁸ Библиысь возетъёс юртто милемлы валаны, кызьы кенешысь тӧроосты гажано. (Лыдӟы Еврейёслы 13:7, 17.) Милемлы со вын-агайёсты ушъяны кулэ мылысь-кыдысь тыршемзы понна но кылзӥськыны соослэсь. Озьы ми юрттомы соослы азьланяз но асьсэлэсь ужзэс шумпотыса быдэсъяны. Но соосты гажаммы уг возьматы, ми кудӥзлэсь ке «тодмо» тӧролэсь адӟем каромы, со кадь выромы, дӥсяськомы но вераськомы шуыса. Озьы карысалмы ке, адямиос малпаны быгатысалзы, Христослэсь интые, ми адямилэсь адӟем кариськомы шуыса. Вунэтоно ӧвӧл: тӧроос но, асьмеос кадь ик, тырбыдэстэм адямиос.

¹⁹ Ми тӧроосты гажаськомы но соос шоры сӥё-дано муртъёс шоры кадь ум ке учкиське, озьы ми соослы юрттӥськомы. Соку тӧроослы капчигес зӥбыт-востэм луыны, мукетъёссэ асьсэлэсь вылӥегес пуктыны но соосты умойгес шуыса лыдъяны.

20. Кыӵе пайда вае милемлы мукет адямиосты гажан?

²⁰ Мукет адямиосты гажамы ке, ми асьме сярысь гинэ ум малпаське но асьмеды вылӥе ум пуктэ, куке шӧдӥмы, милемыз туж гажало шуыса. Озьы ик, со юрттоз милемлы асьмеды возьыны озьы, кызьы Иеговалэн организациез дышетэ. Нош со дышетэ милемыз, кинэ ке нимысьтыз сӥё-дано кароно ӧвӧл шуыса, оске-а со адями Инмарлы, уг-а. Озьы лэсьтӥмы ке, со визьмо луоз, малы ке шуоно со адями, кинэ ми гажаськомы, умойтэм лэсьтӥз ке но, милям осконмы уз лябӟы.

21. Кыӵе самой бадӟым пайдаез мукет адямиосты гажаммылэн?

²¹ Мукет адямиосты гажамлэн самой бадӟым пайдаез — Инмарез шумпоттон. Улыса озьы, кызьы Инмар милесьтым возьма, ми солы оскымон кылиськомы. Озьы ми солы луонлык сётӥськомы со сярысь урод кылъёс верась муртлы ответ сётыны (Мад. 27:11). Та дуннеысь тросэзлэн адямиослэн шонертэм тодон-валанзы мукет адямиосты гажан сярысь. Ми туж шумпотӥськомы, тодӥськомы шуыса, кызьы мукетъёссэ Инмарлы ярамон амалэн гажано.