Кызьы Библия эскеронэз тунсыкогес но пайдаёгес кароно

Иисус Навин Законэз лыдӟе; Иерихонлэн борддоръёсыз куашкало, нош Раавлэн коркаез сылэ; Иисус Навин вӧсяськыса киоссэ вылӥе ӝутэ

ИИСУС НАВИНЛЫ израиль калыкез Сӥзем музъеме пыртоно вал. Со уж капчи ӧй вал. Но Иегова оскытӥз Иисусэз, солэн ваньмыз пӧрмоз шуыса, но косӥз сое юн сылыны но кышкасьтэм луыны. Озьы ик со косӥз Иисусэз солэсь Законзэ уй но нунал лыдӟыны, мар отын гожтэмын, ваньзэ сое быдэсъяса улыны. Солы луыса Иисус азинлыко луыны но визьмо ужпумъёс кутыны быгатысал (Иис. Н. 1:7, 8).

Ми «секыт дыръёсы» улӥськомы но озьы ик бадӟым шуг-секытъёсын пумиськиськомы (2 Тим. 3:1). Соосты вормон понна, милемлы санэ пононо Иеговалэсь Иисус Навинлы сётэм косонзэ. Милемлы кулэ Библиез ялан лыдӟыны но солэсь визь-кенешъёссэ улонамы пыртыны. Соку ми визьмо ужпумъёс кутыны быгатомы.

Куд-огъёсызлы Библиез дышетон тунсыко уг поты яке, сое эскерон понна, трос кужым пононо луэ. Озьы ке но со туж кулэ луись ужпум. Библиез эскерон тунсыко но пайдаё мед луоз шуыса, уже кутэ «Пайдаё визь-кенешъёс» рамкаез.

Псаломъёсты гожъясь гожтӥз: «Кузё-Инмарлэн косонъёсыз шонересь, сюлэмез шулдырто» (Пс. 18:9). Инмарлэсь Кылзэ эскерон но со вылын малпаськон тӥледлы бадӟым шумпотон вайыны быгатоз. Отысь тӥ трос пайдаё малпанъёсты шедьтоды.

Зэм, тӥледлы, Иисус Навинлы сямен, Инмарлэсь калыксэ нуоно ӧвӧл, но тӥляд асьтэлэн шуг-секытъёсты вань. Соин ик Иисус Навинлэсь адӟем каре: Инмарлэсь Кылзэ дышетэ но басьтэм тодон-валандэс улонады пыртэ. Соку тӥ но азинлыко луоды.

ПАЙДАЁ ВИЗЬ-КЕНЕШЪЁС

Эскерон азяды вӧсяське. Библиын Ваньмызлэсь Кужмо Инмарлэн малпанъёсыз гожтэмын, кудъёсыз милемлы пайда вайыны быгато. Соин ик, Библиез эскерыкуды, куре Иеговаез юрттыны тӥледлы лыдӟемдэс валаны, сое тодады возьыны но улонады пыртыны (Езд. 7:10).
Асьтэлы юанъёс сётъялэ. Библиез но со вылэ пыкиськем публикациосты лыдӟыкуды, юалэ асьтэлэсь: «Мае мон та люкетысь Иегова сярысь тодыны быгатӥсько? Кызьы лыдӟеме Библилэн валтӥсь темаеныз герӟаськемын? Кызьы та малпанъёсты мукетъёсызлы юрттон вылысь кутоно?»
Малпаське. Лыдӟыкуды, лыдӟемды вылын малпаськон понна, дугдылэ. Таӵе юанъёс вылын малпаське: «Кыӵе шӧдонъёсы мынам кылдо, та люкетэз лыдӟыса? Малы мынам сыӵе шӧдонъёсы кылдо? Кызьы лыдӟеме герӟаськемын соин, мар ортчиз ини, мар али улонам яке мар азьланяз луыны быгатоз? Кызьы Библиысь та возетъёсты но визь-кенешъёсты уже кутыны луоз?» (Иов 23:5; Пс. 48:4). Тырше валаны, малы Иегова аслэсьтыз калыксэ со яке та ужъёслэсь палэнскыны косӥз но кыӵе бервылъёсын соос пумиськысалзы, солэсь ӧй кылзӥськысалзы ке (К. Зак. 32:28, 29).
Син азяды пуктэ. Кылсярысь, тырше син азяды пуктыны, кызьы Иосифлэн агайёсыз сое измаил калыклэн пиосызлы вузало (Ул.-выл. 37:18—28). Тырше асьтэды адӟыны со югдурын. Мае тӥ адӟиськоды но кылӥськоды? Кыӵе зынъёс отын? Пуктэ асьтэды отын верам адямиос интые. Мар сярысь соос малпасько? Мае шӧдо? Син азяды пуктыны тыршиды ке, эскеронды тросгес пайда ваёз.
Эскерон понна тӥрлыкъёсты уже кутэ. Соослы луыса Библиез эскеронды тунсыкогес луоз. Тодэ, кызьы уже кутоно печатлам яке электрон пособиосты, кудъёсыз вань удмурт но ӟуч кылъёсын. Тӥледлы юрттэт кулэ ке, эн возьдаське мукетъёссэ курыны тӥледлы юрттыны. Кылсярысь, «Возьмаськон башнялэн онлайн-библиотекаез» яке «Иеговалэн Адӟись-Ивортӥсьёсызлэн публикациоссыя эскерыны юрттэт» (ӟуч) юрттоз тӥледлы тодыны, мар верамын вал милям публикациосамы пӧртэм темаосъя, яке юрттозы шедьтыны, кызьы валэктэмын вал Библиысь со яке та кылбуръёс. Озьы ик уже кутэ «Инмарлэн Кылыз мутусъёсын но схемаосын» брошюраез (ӟуч). Отысь тӥ трос пайдаёзэ шедьтоды. Кылсярысь, отын вань мутусъёс, дырез возьматӥсь таблицаос. Со сяна, отысь тӥ тодыны быгатоды арбериослэн быдӟалазы, секталазы, дунзы сярысь но мукетсэ.
Валтӥсь малпанъёссэ вакчияк вералэ. Со юрттоз тӥледлы лыдӟемдэс тодады возьыны. Нош эшшо умойгес луоз, тӥ лыдӟемдэс мукетъёсызлы верады ке. Оло нош, куд-ог лыдӟем малпанъёс тӥледлы ужан-тыршонады юрттозы. Озьы со тӥляд йырады гинэ уз кыльы, нош мукетъёсызлы но пайда ваёз.