Кин дышетэ тӥледыз кызьы малпаськыны?

1, 2. а) Мар вераз Иисус, куке Пётр солы ассэ жаляны визь-кенеш сётӥз? (Учке статья кутсконысь суредэз.) б) Малы Иисус озьы вераз?

ХРИСТОСЛЭН дышетскисьёсыз кылэмзылы туж паймизы. Соос возьмало вал, Иисус Израиль эксэйлыкез выльысь ӝутоз шуыса. Но тани со вера, ӝоген трос курадӟытонъёс чидалоз но кулоз шуыса. Сое кылыса, апостол Пётр шуиз: «Кузё-Инмаре, жаля Астэ! Та Тонэн медаз луы!» Иисус соку ик пумитаз вераз: «Кошкы Мон дорысь, шайтан! Тон Монэ сьӧлыке пыртӥсь, тон Инмарлы яраноез сярысь уд малпаськы ук, адямилы яраноез сярысь тон малпаськод» (Матф. 16:21—23; Ап. уж. 1:6).

² Озьы Иисус возьматӥз, Инмар но Шайтанлэн киулаз возиськись дуннеысь адямиос пӧртэм сямен малпасько шуыса (1 Иоанн 5:19). Пётрлэн кылъёсаз та дуннелэн ачиз сярысь гинэ малпаськон мылкыдыз шӧдӥськиз. Нош Иисус тодэ вал, солэн Атаез мукет сямен малпаське шуыса. Инмарлэн потэ вал, Иисус ассэ вуоно курадӟонъёслы но кулонлы мед дасялоз шуыса. Иисуслэн Пётрлы верам кылъёсыз возьматӥзы: Иисуслэн та дунне кадь малпаськемез уг поты, нош Иегова кадь малпаськемез потэ.

3. Малы та дуннелэн учконъёсызлы пумит сылыны сокем секыт?

³ Нош мар вераны луоз ми сярысь? Кызьы ми ваньмыз шоры учкиськомы — Инмар кадь яке та дунне кадь? Ми улӥськомы ини, дыр, озьы, кызьы Инмар возьма. Нош мар вераны луоз со сярысь, кызьы ми малпаськиськомы? Дышетскиськомы-а ми ваньмыз шоры Иеговалэн синмыныз учкыны но со кадь малпаськыны? Солы нимысьтыз дышетсконо. Нош та дунне кадь малпаськыны туж капчи. Малы? Малы ке шуоно котыр та дуннелэн мылкыдыз вӧлмемын (Еф. 2:2). Со сяна, солы пумитъяськыны секыт, малы ке шуоно со асьмелэн мыл потэммыя улыны косэ.

4. а) Мар луоз, ми та дуннелы лэзимы ке дышетыны милемыз кызьы малпаськыны? б) Мар сярысь вераськон мыноз та статьяын?

⁴ Та дуннелы лэзимы ке дышетыны милемыз кызьы малпаськыны, ми ас мыл потонъёсмыя улыны кутскомы но асьмелэн ужпум кутэммы потоз, мар ӟечез, нош мар уродэз луэ (Марк 7:21, 22). Тӥни малы, адямиос кадь малпаськыны дышетскем интые, туж кулэ дышетскыны Инмар кадь малпаськыны. Та статьяын валэктэмын, кызьы ваньмыз шоры Иеговалэн синмыныз учконо. Ми тодомы, малы сыӵе учкон милемыз эриктэм уз кары, нош пайда гинэ ваёз. Озьы ик, ми вераськомы со сярысь, мар кароно, та дунне милемыз медаз дышеты шуыса кызьы малпаськыны. Нош мукетаз статьяын ми эскеромы, мар кароно тодон понна, кызьы Инмар учке со яке та юанъёс шоры, но кызьы милемлы дышетсконо ваньмыз шоры Инмарлэн синмыныз учкыны.

МАЛЫ УМОЙ ЛУОЗ ДЫШЕТСКЫНЫ ИЕГОВА КАДЬ МАЛПАСЬКЫНЫ

5. Малы куд-ог адямиослэн уг поты, кин ке но соосты мед дышетоз шуыса кызьы малпаськыны?

⁵ Куд-ог адямиослы уг кельшы, куке кин ке но соосты дышетыны турттэ кызьы малпаськыны. Соос верало: «Мынам аслам йыры вань». Сыӵе адямиос вераны тыршо, дыр, соос асьсэос ужпум куто но соослэн солы правозы вань шуыса. Соослэн уг поты кинлэн ке косэмезъя улэмзы но мукет адямиосын одӥг кадь луэмзыa.

6. а) Кыӵе эрик сётӥз милемлы Иегова? б) Со эрик милемлы котьмар карыны право сётэ-а?

⁶ Но кулэ ӧвӧл куректыны, Инмар кадь малпаськыны дышетскыса, ми асьмеос ужпум кутыны ум быгатэ ни шуыса. 2 Коринфъёслы 3:17 верамын: «Кытын ке Кузё-Инмарлэн Духез вань, отын эрик». Милям эрикмы вань асьмелы бырйыны, кыӵе адями милям луэммы потэ. Котькуд адямилэн вань аслаз яратоно ужез, арбериез. Сыӵе эрик милемлы сётӥз ачиз Иегова. Но со уг возьматы, милям котьмар карыны правомы вань шуыса. (Лыдӟе 1 Пётрлэсь 2:16.) Куке милемлы валаны кулэ, мар ӟечез, нош мар уродэз луэ, Иеговалэн потэ, ми солэсь малпанзэ лыдэ мед басьтомы шуыса, кудӥз гожтэмын Библиын. Со милемыз эриктэм каре яке пайда вае?

7, 8. Малы Иегова кадь малпаськон милемыз эриктэм уг кары? Вералэ пример.

⁷ Эскеромы одӥг примерез. Анай-атайёс нылпиоссэс дышетыны тыршо вылӥ эсэпъёсъя улыны. Кылсярысь, соос дышето соосты пӧяськытэк улыны, ужез яратыны но мукетъёсыз сярысь малпаськыны. Уз луы вераны, сыӵе дышетэм нылпиосты эриктэм каре шуыса. Озьы анай-атайёс дышето нылпиоссэс, азьланяз соос шудо мед луозы шуыса. Куке нылпиос анай-атай юртысь кошкозы, соос асьсэос ужпумъёс кутыны кутскозы. Соослэн улэмзы потӥз ке озьы, кызьы анай-атайзы дышетӥз, кутэм ужпумъёссы куректон уз вае, дыр.

⁸ Иегова — яратӥсь Атай. Солэн потэ, нылпиосыз шудо мед луозы шуыса (Ис. 48:17, 18). Тӥни малы со сётӥз милемлы возетъёс, кудъёсыз юртто милемлы вылӥ эсэпъёсъя улыны но асьмеды мукет адямиосын шонер возьыны. Инмарлэн потэ, та юанъёсын милям солэн кадь малпанъёсмы мед луозы шуыса. Со милемыз эриктэм уг кары, нош луонлык сётэ дышетскыны мургес малпаськыны (Пс. 91:6; Мад. 2:1—5; Ис. 55:9). Солы луыса ми сыӵе ужпумъёс кутомы, кудъёсыз милемыз шудо карозы, но со милям асьмелэн кутэм ужпумъёсмы луозы, кинлэсь ке адӟыса кутэм ужпумъёс уз луэ (Пс. 1:2, 3). Зэм, Иегова кадь малпаськыны дышетскимы ке, со милемлы пайда ваёз.

ИЕГОВАЛЭН УЧКОНЪЁСЫЗ ВЫЛӤГЕС ТА ДУННЕЛЭН УЧКОНЪЁСЫЗЛЭСЬ

9, 10. Малы вераны луоз, Инмарлэн учконъёсыз та дуннелэн учконъёсызлэсь вылӥгес луо шуыса?

⁹ Эшшо одӥг муг, малы Инмарлэн ужась-тыршисьёсыз ваньмыз шоры Иеговалэн синмыныз учкыны тыршо,— Иеговалэн учконъёсыз та дуннелэн учконъёсызлэсь вылӥгес. Визь-кенешъёс, кудъёссэ сёто туннэ вылӥ эсэпъёсъя улон пумысен, семья но кузпалъяськон пумысен, уж но мукетыз пумысен, пумит луо Инмарлэн учконъёсызлы. Кылсярысь, ӵем дыръя та дуннеын адямиослэсь мылкыдзэс ӝуто асьсэ сярысь гинэ малпаськыса улыны но верало, азон-калгонын номыр уродэз ӧвӧл шуыса. Со сяна, куддыръя кузпалъяськем адямиослы, шудогес луон понна, ӵекто нимаз улыны яке люкиськыны, соослэн озьы улыны мугзы ӧвӧл ке но. Сыӵе визь-кенешъёс Библилы пумит луо. Нош кин ке но малпаны быгатоз: «Асьме вакытэ та дуннеысь куд-ог визь-кенешъёс, Библилэн визь-кенешъёсыз сярысь, пайдаёгес ӧвӧл-а?»

¹⁰ Иисус вераз: «Визьлыклэн нылпиосыз визьлыклэсь шонер луонзэ возьмато» (Матф. 11:19). Технология удысын адямиос бадӟым азинсконъёс лэсьтӥзы ке но, валтӥсьсэ, мар шудо луыны люкетэ, быдтыны ӧз быгатэ — ожъёсты, мукет калыкысь адямиосты адӟемпотостэм каронэз но йыружъёсты. Со сяна, та дуннеын азон-калгонэз умойтэмен уг лыдъяло. Но тросэз адямиос соглаш луо, со семьяосты куашкатэ, тазалыклы изъян вае но мукет урод бервылъёсы вуттэ шуыса. Нош мар вераны луоз Иеговалэн визь-кенешъёсыз сярысь? Христианъёслэн, кудъёсыз ваньмыз шоры Иегова сямен учко, семьяоссы трослы шудогес, тазалыксы умойгес, но соос быдэс дунне вылысь вын-агайёсынызы но сузэр-апайёсынызы тупаса уло (Ис. 2:4; Ап. уж. 10:34, 35; 1 Кор. 6:9—11). Ваньмыз со яркыт возьматэ, Инмарлэн учконъёсыз вылӥгес луо шуыса.

11. Кин дышетӥз Моисеез кызьы малпаськыны но кыӵе емышъёс со вайиз?

¹¹ Инмарлэн вашкала ужась-тыршисьёсыз валало вал, Инмарлэн учконъёсыз, адямилэн учконъёсыз сярысь, трослы вылӥгес луо шуыса. Кылсярысь, «Египетлэн вань визьнодлыкезлы Моисей дышетэмын вал» ке но, со «визьмо улон понна» Инмарлэсь юрттэтсэ куриз (Ап. уж. 7:22; Пс. 89:12). Озьы ик, со сюлворыса куриз Иеговаез: «Аслэсьтыд сюрестэ мыным усьты» (Пот. 33:13). Моисей Иеговаез лэзиз дышетыны сое кызьы малпаськыны. Соин ик солы дан сётэмын вал Инмарлэсь малпанзэ быдэстонын нимысьтыз инты басьтыны, но Моисейлэн нимыз гожтэмын соос пӧлын, кинъёслэн осконзы юн вал (Евр. 11:24—27).

12. Мар вылэ пыкиськыса Павел ужпумъёс кутылӥз?

¹² Апостол Павел визьмо, дышетскем адями вал, кудӥз тодэ вал еврей но грек кылъёсты (Ап. уж. 5:34; 21:37, 39; 22:2, 3). Озьы ке но, ужпум кутыкуз, Павел та дуннелэсь визьлыксэ кулэ ӧз кары, нош, Гожтэмъёс вылэ пыкиськыса, ужпумъёс кутылӥз. (Лыдӟе Апостолъёслэсь ужъёссэс 17:2; 1 Коринфъёслы 2:6, 7, 13.) Озьы Павел ужан-тыршонын бадӟым азинсконъёс лэсьтӥз но пырак дауръёс ӵоже улыны оскиськон басьтӥз (2 Тим. 4:8).

13. Кин ужпум кутэ дышетскыны Инмар кадь малпаськыны?

¹³ Озьыен, яркыт адӟиське, Инмарлэн учконъёсыз, та дуннелэн учконъёсыз сярысь, трослы вылӥгес луо шуыса. Иеговалэн эсэпъёсызъя улыса, ми зэмзэ ик шудо но азинлыко луиськомы. Но Иегова милемыз кужмысь уг косы со кадь малпаськыны. Нокин но — «оскиськымон, визьмо ляльчи» но, тӧроос но — уг вера милемлы, мар сярысь малпаськоно (Матф. 24:45; 2 Кор. 1:24). Дышетскыны Инмар кадь малпаськыны котькуд адями ачиз ужпум кутэ. Мар кароно со понна?

ЭН ЛЭЗЕ ТА ДУННЕЛЫ ДЫШЕТЫНЫ ТӤЛЕДЫЗ КЫЗЬЫ МАЛПАСЬКЫНЫ

14, 15. а) Мар сярысь милемлы малпаськоно, милям Иегова кадь малпаськеммы потэ ке? б) Римъёслы 12:2 верамъя, малы милемлы чакласьконо та дуннеын вӧлмем малпанъёслэсь? Вералэ пример.

¹⁴ Римъёслы 12:2 верамын: «Туала вапумысь улонлэн куронъёсызлы тупатскыны турттыса эн улэ. Нош тӥ асьтэлэсь лулдэс-сюлэмдэс выльдэ-воштэ, тодыны мед быгатоды: мае тӥлесьтыд Инмар возьма, кыӵе уж Солы ӟеч, ярамон, дун-шектэм луэ». Та кылъёс возьмато: зэмлыкез тодэммылэсь азьло котькин милемыз мед дышетоз кызьы малпаськыны, ми быгатӥськомы асьмелэсь учконъёсмес воштыны но дышетскыны Инмар кадь малпаськыны. Зэм, вераны кулэ милям учконъёсмы вылын шӧдӥськыны быгатэ со, кыӵе учконъёсыз вал анаймылэн яке атаймылэн. Со сяна, улэммыя милям асьмелэн учконъёсмы кылдо. Но соос вошъяськыны быгато. Ӵем дыръя соос вылын шӧдӥське со, мар сярысь ми малпаськиськомы. Ми малпаськимы ке, кызьы Иегова учке со яке та юанъёс шоры, со юрттоз милемлы адӟыны, Иеговалэн учконъёсыз шонересь шуыса. Соку милям со кадь малпаськеммы потоз.

¹⁵ Но милемлы лэзёно ӧвӧл, «туала вапумысь улонлэн» малпанъёсыз милемлы мед пыӵалозы шуыса. Соин ик милемлы дугдоно учкемысь, лыдӟемысь но кылзэмысь сое, мае Иегова умоен уг лыдъя. Валаны, малы со туж кулэ, таӵе пример юрттоз. Кылсярысь, кинлэн ке но тазалыксэ умоятэмез потэ, но со ужпум кутэ пайдаё сиён сиыны. Нош солы пайда ваёз-а, со озьы ик изъян вайись сиён сииз ке? Со выллем ик, ми Инмарлэн малпанъёсызлы визьмамы пыӵаны лэзимы ке, нош со дыре ик та дуннеын вӧлмем малпанъёсын йырмес тырмытӥмы ке, со милемлы пайда уз вайы, дыр.

16. Малэсь асьмеды утёно?

¹⁶ Нош та дуннеын вӧлмем малпанъёслэсь быдэсак палэнскыны луоз-а? Уз, малы ке шуоно ми «та дуннеысь кошкыны» ум быгатӥське. Озьы-а, тазьы-а, дуннеысь кыӵе ке малпанъёс милям йырамы пыӵало (1 Кор. 5:9, 10). Ӟеч иворез веракумы но ми пумитаськомы адямиосты, кудъёсызлэн учконъёссы шонертэм. Сыӵе учконъёсты ми кылзытэк ум быгатӥське, но кулэ ӧвӧл соосын тунсыкъяськыны но соосты сюлмамы пыртыны. Ойдолэ Иисуслэсь адӟем каромы но кышкатэк палэнтомы вань учконъёсты, кудъёссэ Шайтан вӧлмытэ, но луон дыръяз ум лэзе та дуннелы дышетыны милемыз кызьы малпаськыны. (Лыдӟе Мадёнъёсты 4:23.)

17. Кыӵе учыръёсы палэнскыны луэ та дуннелэн малпанъёсызлэсь?

¹⁷ Кылсярысь, эшъёсты туж чакласькыса быръёно. Библия вера, ми матысь эшъяськимы ке соосын, кинъёс Иеговалы уг йыбыртъяло, милемлы соослэн малпанъёссы пыӵаны быгатозы (Мад. 13:21; 1 Кор. 15:12, 32, 33). Со сяна, шутэтскон амалэз бырйыку но, туж сак луоно. Ми палэнскимы ке шутэтскон амалъёслэсь, кудъёсаз верало, ваньмыз эволюцилы луыса кылдӥз шуыса, кытын лек ужъёсты но азон-калгонэз умоен возьмато, милям визьёсамы уз пыӵалэ «Инмарез тодонлы пумит султэм» малпанъёс (2 Кор. 10:5).

18, 19. а) Малы сак луоно, куке та дуннелэсь малпанъёссэ соку ик тодманы уг луы? б) Кыӵе юанъёс аслыд сётоно но малы?

¹⁸ Куддыръя та дуннелэсь малпанъёссэ соку ик тодманы уг луы. Соин ик туж кулэ дышетскыны соосты тодманы. Кылсярысь, иворъёсты озьы вераны быгато, политикъёслэн со яке та малпанъёссы адямиос пӧлын мед вӧлмозы шуыса. Нош нимо-дано адямиос сярысь веранъёсын шӧдӥськыны быгатэ та дуннелэн малпанэз со пумысен, мае адямиос зэмос азинлыкен лыдъяло. Куд-ог фильмъёсын но книгаосын таӵе мылкыд шӧдӥське: «Самой валтӥсез — мон но мынам семьяе». Со умой но шонер кадь потоз. Но со Библилы пумит луэ, малы ке шуоно отын верамын, ми асьмеос но семьяосмы зэмзэ ик шудо луомы шуыса, ваньмызлэсь трос Иеговаез яратыса гинэ (Матф. 22:36—39). Куд-ог нылпи книгаосты, фильмъёсты но мультфильмъёсты оглом басьтыса, отын номыр уродэз ӧвӧл кадь, но мургес учконо ке, куддыръя отын дышето, азон-калгонын номыр уродэз ӧвӧл шуыса.

¹⁹ Но ваньмыз со уг вера, табере милемлы котькыӵе шутэтскон амаллэсь палэнсконо шуыса. Аслэсьтыд юаны кулэ: «Та дуннелэн малпанъёсыз соку ик уг адӟисько ке но, быгатӥсько-а мон соосты тодманы? Чакласько-а мон сое, мае учко яке лыдӟо мынам нылпиосы, озьы ик мон ачим но? Юрттӥсько-а мон нылпиосылы дышетскыны ваньмыз шоры Иеговалэн синмыныз учкыны, соос та дуннелэсь малпанъёссэ капчиен палэнтыны мед быгатозы шуыса?» Ми адӟимы ке, макем пӧртэм луо Инмарлэн малпанъёсыз та дуннелэн малпанъёсызлэсь, ми ум лэзе урод малпанъёслы милемлы пыӵаны.

КИН ДЫШЕТЭ ТӤЛЕДЫЗ КЫЗЬЫ МАЛПАСЬКЫНЫ?

20. Кытысь адӟиське, кин дышетэ милемыз кызьы малпаськыны — Инмар яке та дунне?

²⁰ Эн вунэтэ: милемыз кызьы малпаськыны дышетэ яке Иегова, яке дунне, кудӥныз Шайтан кивалтэ. Кинэ ми кылзӥськомы, со ик дышетэ милемыз кызьы малпаськыны. Ми та дуннелэн учконъёсыныз соглаш луимы ке, соку милемлы пыӵалозы дуннелэн малпанъёсыз, но ми кутскомы улыны озьы, кызьы уло тросэз адямиос, сьӧлыко мыл потонъёсмес быдэсъяса. Тӥни малы туж кулэ чакланы, маин ми визьёсмес тырмытӥськомы.

21. Мар сярысь вераськон мыноз мукетаз статьяын?

²¹ Кызьы верамын вал ини, милям Иегова кадь малпаськеммы потэ ке, та дуннеын вӧлмем малпанъёслэсь палэнсконо. Со сяна, тодыны тыршоно, кызьы Инмар учке со яке та юан шоры. Та сярысь вераськон мыноз мукетаз статьяын.