ЭСКЕРОН ПОННА 26-ТӤ СТАТЬЯ
123-ТӤ КЫРӞАН Ми кылзӥськиськом Инмарлэсь
Малы умой, куке ми мае ке но ум тодӥське
«Дунне Кутӥсь! Ми Сое мур-мур тодыны-валаны ум быгатӥське» (ИОВ 37:23).
МИ ТОДОМЫ
Ми ум тодӥське ваньзэ, мар азьланяз луоз. Но ми малпаськимы ке со сярысь, мае тодӥськомы, но Иеговалы оскимы ке, ми быгатомы шуг-секытъёс пыр потыны.
1. Кыӵе быгатонлыкъёсын кылдытӥз милемыз Иегова но малы?
ИЕГОВА милемыз кылдытӥз малпаськыны, мае ке выльзэ тодыны но визьмо ужпумъёс кутыны быгатонлыкъёсын. Мае со возьматэ? Иеговалэн потэ, ми «Инмар сярысь тодонэз» мед шедьтомы но «визьмын валаса» солы мед ужаломы-тыршомы шуыса (Мад. 2:1—5; Рим. 12:1).
2. а) Быгатӥськомы-а ми ваньзэ тодыны? (Иов 37:23, 24). (Озьы ик учке суредэз.) б) Малы валаны кулэ, ми троссэ ум тодӥське шуыса?
2 Ми дышетскыны быгатӥськомы ке но, ми ваньзэ ум тодӥське. (Лыдӟе Иов книгаез 37:23, 24.) Малпаське Иов сярысь. Куке Иегова солы трос юанъёс сётъяз, Иов валаз, троссэ уг тоды на шуыса. Инмарен вераськон Иовлы юрттӥз зӥбыт-востэм луыны но мукет сямен малпаськыны (Иов 42:3—6). Ми но валаськомы ке, троссэ ум тодӥське шуыса, со милемлы пайда вае. Со милемлы юрттэ оскыны, Иегова милемлы валэктоз шуыса ваньзэ, мар кулэ, визьмо ужпум кутон понна (Мад. 2:6).
Иов валаз, троссэ уг тоды шуыса. Милемлы но сое валано. (Учке 2-тӥ абзацез.)
3. Мае ми эскеромы та статьяын?
3 Та статьяын ми эскеромы, мае ми ум тодӥське но кыӵе шуг-секытъёс соин сэрен кылдыны быгато. Озьы ик ми адӟомы, малы умой, куке ми мае ке но ум тодӥське. Та осконмес юнматоз, Иегова, «ваньзэ тодӥсь-валась Инмар», ваньзэ, мае милемлы тодыны кулэ, милемлы усьтоз шуыса (Иов 37:16).
МИ УМ ТОДӤСЬКЕ, КУ ПУМ ВУОЗ
4. Мае ми ум тодӥське, Марклэсь 13:32 лыдэ басьтоно ке?
4 Лыдӟе Марклэсь 13:32. Ми ум тодӥське, ку та дуннелы пум вуоз. Иисус но, музъем вылын улыкуз, «со нуналэз, со часэз» уг тоды валa. Берлогес со аслаз апостолъёсызлы шуиз, Иегова ачиз ужпум кутэ шуыса, ку но мае лэсьтоно (Ап. уж. 1:6, 7). Иегова дыр пуктӥз ини, ку Шайтанлэн дунеез быдтэмын луоз. Нош ми сое тодыны ум быгатӥське.
5. Ми ум тодӥське бере, ку пум вуоз, кыӵе шуг-секытъёс соин сэрен кылдыны быгато?
5 Озьыен, ми ум тодӥське, кӧня дыр кылиз та дуннелэн пумозяз. Соин сэрен куд-огъёсызлы чидан уг тырмы яке соос ӝоже усё, тужгес но Иеговалэсь нуналзэ кемалась возьмало ини ке. Нош кинлы ке секыт чиданы семьяезлэсь яке мукет адямиослэсь мыскыл каремзэс (2 Пётр 3:3, 4). Оло нош, ми малпамъя, ми тодысалмы ке, кыӵе нуналэ но часэ пум вуоз, милемлы ваньзэ чиданы капчигес луысал.
6. Малы умой, ми ум тодӥське шуыса, ку та дуннелы пум вуоз?
6 Зэмзэ вераса, ми понна умой, Иегова милемлы ӧз вера шуыса, ку та дуннелы пум вуоз. Солы луыса милям возьматэммы луэ, ми инмысь Атаймес яратӥськомы но солы оскиськомы шуыса. Милям пырак дауръёс ӵоже Иеговалы ужаммы-тыршеммы потэ, та дуннелэн пумозяз гинэ уг поты. Соин ик ойдолэ укыр трос ум малпаське со сярысь, ку «Инмарлэн нуналыз» вуоз. Со интые ойдолэ малпаськомы, кыӵе пайда со милемлы ваёз. Со милемлы юрттоз Инмарен кусыпъёсмес юнматыны но лэсьтыны ваньзэ, мае быгатӥськомы, сое шумпоттон понна (2 Пётр 3:11, 12).
7. Мае ми тодӥськомы?
7 Ойдолэ малпаськомы со сярысь, мае ми тодӥськомы. Библиысь азьпалзэ ивортонъёсъя 1914-тӥ арын берпум нуналъёс кутскизы. Библия пыр-поч вераз, кыӵе югдур луоз музъем вылын со дырысен. Соин ик ми оскиськомы, «Кузё-Инмарлэн быдӟым нуналыз» туж матын ини шуыса (Соф. 1:14). Озьы ик ми тодӥськомы, Иегова милемыз Эксэйлык сярысь ӟеч иворез адямиослы тодытыны куриз шуыса (Матф. 24:14). Та ивор 1000-лэсь но тросгес кылъёсын 240 пала шаеръёсын но интыосын тодытӥське. Та кулэ луись ужез ӟырдыт мылкыдын быдэстон понна, милемлы одно ик тодоно ӧвӧл, кыӵе нуналэ но часэ та дуннелы пум вуоз.
МИ ПЫР-ПОЧ УМ ТОДӤСЬКЕ, КЫЗЬЫ ИЕГОВА МИЛЕМЛЫ ЮРТТОЗ
8. Инмарлэн кыӵе ужъёсыз сярысь вераське Екклесиастын 11:5?
8 Ми «Инмарлэсь ужзэ» котьку ик ум тодӥське. (Лыдӟе Екклесиастэз 11:5.) Кыӵе ужъёс сярысь татын вераське? Аслэсьтыз эриксэ быдэстон понна, Иегова мае ке но ачиз лэсьтэ, нош малы ке но луыны лэзе. Ми ум тодӥське вань мугъёсты, малы Иегова малы ке но луыны лэзе. Озьы ик ми пыр-поч ум тодӥське, кызьы со милемлы юрттоз (Пс. 36:5). Кылсярысь, тодосчиос пумозяз уг валало, кызьы нуны анайлэн кӧт пушказ будэ. Ӵапак озьы ик ми но Инмарлэсь ужъёссэ пумозяз ум валаське.
9. Кыӵе шуг-секытъёс кылдыны быгато, куке ми ум тодӥське, кызьы Иегова милемлы юрттоз?
9 Ми пыр-поч ум тодӥське бере, кызьы Иегова милемлы юрттоз, куддыръя ми ум дӥсьтӥське куд-ог ужъёсты быдэстыны. Милемлы секыт луэ мае ке но кельтыны, кылсярысь, кутскыны огшорыгес улыны яке кошкыны отчы, кытын ивортӥсьёс уг тырмо. Яке милям осконмы лябӟе, ми Иеговалы ярамонэсь шуыса. Сыӵе югдур кылдэ, куке ми пуктэм ужпумъёсмес быдэстыны ум быгатӥське, тодытэммылэсь пайдазэ ум адӟиське яке организацилэн ужез, кудаз ми пыриськиськомы, секытэн мынэ.
10. Кыӵе кулэ луись сямъёс ми будэтыны быгатӥськомы, пумозяз ум валаське ке но, кызьы Иегова милемлы юрттоз?
10 Ми пумозяз ум валаське ке но, кызьы Иегова милемлы юрттоз, ми быгатӥськомы кулэ луись сямъёсты будэтыны, кылсярысь, зӥбыт-востэм сяммес. Ми умойгес валаськомы, милемын ӵошатыса, Инмарлэн малпанъёсыз но сюресъёсыз вылӥынгес шуыса (Ис. 55:8, 9). Озьы ик ми дышетскиськомы эшшо но золгес Иегова вылэ оскиськыса улыны, малы ке шуоно со котькыӵе ужын азинскон сётэ. Куке ми ужан-тыршонмылэсь пайдазэ адӟиськомы яке милемлы сётэм ужез быдэстыны быгатӥськомы, ми ваньмыз понна инмысь Атаймес данъяськомы (Пс. 126:1; 1 Кор. 3:7). Соку но, куке ужъёсмы малпаммылэсь мукет сямен мыно, милемлы тодамы возёно, Инмар ваньзэ чакла шуыса (Ис. 26:12). Ми лэсьтӥськомы ваньзэ, мае быгатӥськомы, но оскиськомы, кылемзэ Иегова быдэстоз шуыса. Вашкала дыръя Иегова ужась-тыршисьёсыз понна паймымон ужъёс лэсьтылӥз ке но, ми ум возьмаське Инмар ми понна но паймымон ужъёс лэсьтоз шуыса. Но ми оскиськомы, со милемлы шонер кивалтэт сётоз шуыса (Ап. уж. 16:6—10).
11. Мае ми тодӥськомы Иегова сярысь?
11 Ми тодӥськомы, Иегова яратӥсь, шонерлыко но визьлыко шуыса. Ми тодӥськомы, со туж дунъя ваньзэ, мае ми лэсьтӥськомы со понна, озьы ик агайёсмы но сузэръёсмы понна. Со сяна, ми тодӥськомы, Иегова солы оскымон адямиосты котьку но бакель каре шуыса (Евр. 11:6).
МИ УМ ТОДӤСЬКЕ, МАР ӴУКАЗЕ ЛУОЗ
12. Мае ми ум тодӥське, Иаковлэсь 4:13, 14 гожтэмъя?
12 Лыдӟе Иаковлэсь 4:13, 14. Ми ум тодӥське, мар милемын ӵуказе луоз. Та дуннеын малпамтэ шорысь мар ке но луыны быгатэ (Екк. 9:11, ВД). Соин ик ми ум тодӥське, малпам ужъёсмес быдэстыны быгатомы-а, ум-а, яке улэп луомы-а, ум-а шуыса.
13. Кызьы ми асьмеды шӧдыны быгатӥськомы, куке ум тодӥське, мар милемыз азьланяз возьма?
13 Куке ми ум тодӥське, мар милемын ӵуказе луоз, милемлы секыт луэ. Малы? Азьпал улон сярысь сюлмаськонъёс ӵем дыръя шумпотонмес лушкало. Малпамтэ шорысь кылдэм шугадӟонъёсын сэрен ми кайгыриськомы. Нош куке малпанъёсмы уг быдэсмо, ми куректӥськомы (Мад. 13:12).
14. Ку ми шудо луомы? (Озьы ик учке суредъёсты.)
14 Шуг-секытъёс дыръя оскымон кыльыса, ми возьматӥськомы, Иеговалы, пайда басьтон понна гинэ, ужаса-тыршыса ум улӥське шуыса. Ми инмысь Атаймылы ужаськомы-тыршиськомы, малы ке шуоно сое яратӥськомы. Библия возьматэ, Иегова милемыз вань шуг-секытъёслэсь уг утьы но азьло ик уг вера шуыса, мар милемын азьланяз луоз. Со тодэ, шудо луон понна, милемлы одно ик сое тодоно ӧвӧл шуыса. Ми шудо луомы, куке Иеговалэсь визь-кенеш куромы но солэсь кылзӥськомы (Иер. 10:23). Ужпум кутыкумы, ми солэсь юрттэт куримы ке, вераны луоз, ми шуиськомы: «Кузё-Инмарлы кулэ ке луиз, улэп ке луимы, сое яке тае лэсьтомы» (Иак. 4:15).
Ми Иеговалэсь визь-кенеш куримы ке но солэсь кылзӥськимы ке, Иегова милемыз утёз. (Учке 14-тӥ но 15-тӥ абзацъёсты.)b
15. Мае ми тодӥськомы азьпал улон сярысь?
15 Ми ум тодӥське ке но, мар милемын ӵуказе луоз, ми тодӥськомы, Иегова милемлы пырак улон кузьмалоз шуыса. Кин ке но инмын улоз, нош кин ке но — музъем вылын. Ми тодӥськомы, Инмар уг пӧяськы но сётэм кылзэ быдэстыны солы номыр люкетыны уг быгаты шуыса (Тит. 1:2). Со гинэ кутсконысеныз ик вера, мар пумаз луоз. Ваньмыз, мар вашкала дыръя быдэсмыны кулэ вал, быдэсмиз. Ӵапак озьы ик быдэсмоз ваньмыз, мае Инмар вераз азьпал улон сярысь (Ис. 46:10). Ми тодӥськомы, Инмар милемыз яратэмысь ноку уз дугды шуыса (Рим. 8:35—39). Со милемыз буйгатоз, милемлы визьлык но кужым сётоз, ми котькыӵе шуг-секыт пыр потыны мед быгатомы шуыса. Иегова котьку милемлы юрттоз но милемыз бакель кароз (Иер. 17:7, 8).
МИ ПУМОЗЯЗ УМ ВАЛАЛЭ, МАКЕМ УМОЙ ТОДЭ МИЛЕМЫЗ ИЕГОВА
16. Мае тодэ Иегова котькуд адями сярысь но кыӵе шӧдонъёсты тӥляд кылдо, со сярысь малпаськыса? (Псалтирь 138:1—6).
16 Лыдӟе Псалтирез 138:1—6. Кылдытӥсьмы ми сярысь ваньзэ тодэ. Самой кутсконысеныз ик со адӟиз, кызьы ми будӥмы. Со милемын котьку но тунсыкъяське. Со тодэ, мае ми вераськомы яке лэсьтӥськомы но малы. Давид эксэй гожтӥз, Иегова ми сярысь туж сюлмаське но милемлы юрттыны котьку дась шуыса. Малпалэ гинэ: макем тӥледын тунсыкъяське инмез но музъемез Кылдытӥсь! Та сярысь малпаськыса, тӥ асьтэды, Давид сямен, шӧдӥськоды, дыр. Со шуиз: «Тодонэд мон понна паймымон — вылӥ! Сое валаны мон уг быгатӥськы!» (Пс. 138:6).
17. Малы куддыръя милемлы секыт оскыны, Иегова милемыз яратэ но умой вала шуыса?
17 Будэммы, калык сям-йылолъёсмы яке азьвыл осконмы сэрен секыт луэ оскыны, Иегова — яратӥсь но сюлмаськись Атаймы шуыса. Яке ми азьвыл янгышаммес тодамы вайылӥськомы но малпаськомы: «Мон сокем бадӟым янгышъёс лэсьтылӥ, Иеговалэн монэн эшъяськемез уз поты, дыр». Та выллем шӧдонъёсыз куддыръя Давидлэн но кылдылӥзы (Пс. 37:19, 22). Нош куд-огъёсызлы, Инмарез шумпоттон понна, воштӥськыны секыт. Соин ик соос малпасько: «Инмар монэ зэмзэ ик вала ке, малы со монэ воштӥськыны куре, со мыным секытэн сётӥське ке но?»
18. Малы осконо, Иегова милемыз асьмеды асьмелэсь но умойгес тодэ шуыса? (Озьы ик учке суредъёсты.)
18 Оскыны кулэ, Иегова милемыз асьмеды асьмелэсь но умойгес тодэ шуыса. Милемлы асьмелэсь умой сямъёсмес адӟыны секыт ке но, Иегова соосты адӟе. Инмар янгышъёсмес но адӟе. Озьы ке но со милемыз яратэ, малы ке шуоно вала, малы ми кыӵе ке ужъёс лэсьтӥськомы яке малы кыӵе ке шӧдонъёсмы кылдо (Рим. 7:15). Иегова адӟе, кыӵе адями ми луыны быгатӥськомы. Та сярысь тодамы возимы ке, ми быгатомы шумпотыса Иеговалы ужаны-тыршыны.
Иегова осконмес юнматэ, выль дуннеын милемыз туж умой улон возьма шуыса. Со сярысь малпаськимы ке, милемлы капчигес луоз малпамтэ шорысь кылдэм шуг-секытъёсты чиданы. (Учке 18-тӥ но 19-тӥ абзацъёсты.)c
19. Мае ми тодӥськомы Иегова сярысь?
19 Ми тодӥськомы, Иегова — со яратон шуыса. Ми талы быдэсак оскиськомы (1 Иоанн 4:8). Инмар милемыз мае ке лэсьтыны куре яке мае ке лэсьтыны уг лэзьы, малы ке шуоно со милемыз яратэ но милемлы самой умойзэ гинэ сӥзе. Ми тодӥськомы, Иеговалэн потэ, ми пырак мед уломы шуыса. Со понна со дун тыриз. Иисус Христослэн курбонэз милемыз оскытэ, ми тырбыдэстэмесь ке но, ми Иеговаез ужан-тыршонэнымы шумпоттыны быгатӥськомы шуыса (Рим. 7:24, 25). Ми тодӥськомы, «Инмар асьмелэн сюлэммылэсь бадӟымгес, Со ваньзэ тодэ» шуыса (1 Иоанн 3:19, 20). Иегова вань малпанъёсмес но шӧдонъёсмес вала. Со оске, ми солэсь эриксэ быдэсъяны быгатомы шуыса.
20. Мар милемлы юрттоз мултэс сюлмаськытэк улыны со сярысь, мае ми ум тодӥське?
20 Иегова ужась-тыршисьёсызлы усьтэ ваньзэ, мае соослы тодыны кулэ. Соин ик сюлмаськоно ӧвӧл со сярысь, мае ми ум тодӥське. Со интые малпаськоно тужгес но кулэез сярысь. Озьы ми возьматомы, быдэсак оскиськомы шуыса Иеговалы, кудӥз ваньзэ тодэ (Иов 36:4). Али ми мае ке ум валаське ке но, ми тодӥськомы, пырак дауръёс ӵоже Иеговалэсь дышетскомы шуыса. Ми туж возьмаськомы со дырез, малы ке шуоно паймымон Инмармы сярысь ялан мае ке выльзэ тодомы (Екк. 3:11).
104-ТӤ КЫРӞАН Святой дух — Инмарлэн кузьымез
a Иисус Шайтанлэн дуннеезлы пумит ожмаськонэз нуоз. Соин ик валамон, али со тодэ ини шуыса, ку Армагеддон кутскоз но ку со вормон басьтоз (Усьт. 6:2; 19:11—16).
b СУРЕДЫН. Атай пиеныз ӵош шимучырлы сумка дася, малпамтэ шорысь кылдэм шуг-секытъёслы дась луон понна.
c СУРЕДЫН. Агай, кудӥзлэн шуг-секытъёсыз кылдӥзы, малпаське выль дуннеын умой улон сярысь.