Яқуп
2 Бурадәрләр, әгәр силәр үзгә қарап иш қилсаңлар, у чағда бизниң шөһритимиз, Һакимдаримиз Әйса Мәсиһкә болған етиқатни тутқан боламсиләр? 2 Ейтайли, әгәр силәрниң учришишиңларға қоллириға алтун үзүкләрни тақиған, есил кийингән бир бай билән шундақла конирап кәткән кийимдә бир кәмбәғәл кәлди. 3 Силәр бай кийингәнни әтивалап: «Сиз мону йәрдики яхши орунға олтириң» — дәп, кәмбәғәлгә: «Сән өрә тур», яки: «Әву йәрдә, айиғим бәлдиңиниң йенида олтар» — десәңлар, 4 у вақитта бир-бириңларни дәриҗигә қарап бөлгәнләр болуп, бурмиланған қарарларни қобул қиливатқан һөкүмчиләр болуватмамсиләр?
5 Қулақ селиңлар, қәдирлик қериндашлирим: Худа бу дунияниң көзидики кәмбәғәлләрни етиқатта бай болуши үчүн таллавалди. Һәм уларни — Өзини сөйгәнләрни Падишалиғиниң мирасхорлири болушқа вәдә қилди. 6 Силәр болсаңлар, кәмбәғәлләрни пәсәйтиватисиләр. Силәрни езиватқан вә сотларға сөрәватқан байлар әмәсму? 7 Силәргә берилгән алий намни һақарәтләватқанлар әшулар әмәсму? 8 Әгәр силәр Муқәддәс Язмиларда йезилған: «Йениңдики кишини өзәңни сөйгәндәк, сөйгин», дегән падишалиқ қанунға әмәл қилсаңлар, яхши иш қилған болисиләр. 9 Лекин үз-хәтир қилсаңлар, гуна қилған болисиләр вә Қанун силәрни җинайәтчиләрдәк паш қилиду.
10 Ким пүтүн Тәврат қануниға әмәл қилип, бирақ униң вәсийәтлиридин бирисини бузса, у уларниң һәммисини бузғанлиғида әйипкар болиду. 11 Чүнки «вапасизлиқ қилма» Дегүчи, шундақла «өлтүрмә», дегән еди. Шуңа, әгәр сән вапасизлиқ қилмиғиниң билән, қатиллиқ қилсаң, бәрибир Қанунға хилаплиқ қилған болисән. 12 Әркин хәлиқниң қануни бойичә һөкүм қилинидиғанлардәк, гәп қилиңлар һәм иш тутуңлар. 13 Рәһимлик көрсәтмәйватқан рәһимсиз һөкүм қилиниду. Рәһим-шәпқәт һөкүм үстидин тәнтәнә қилмақта.
14 Қериндашлирим, әгәр бирси етиқатим бар дәп, лекин униң әмәли болмиса, буниңдин немә пайда? Мундақ етиқат уни қутқузуламду? 15 Әгәр бурадәр яки қериндаш ялиңач болса һәм уларниң бир күнлүк йемәклиги йетишмисә, 16 силәрниң бириңлар: «Аман болуңлар, иссинип, тойғичә тамақлиниңлар», дәп қоюпла, лекин уларға яшаш үчүн һаҗәтлик нәрсини бәрмисә, буниңдин немә пайда? 17 Шуниңдәкла, әгәр етиқатниң әмәлияти болмиса, у өлүк етиқаттур!
18 Саңа бирси: «Сениң етиқатиң бар, мениң болса ишлирим бар. Сән маңа ишларсиз етиқатиңни көрсәткинә, мән саңа етиқатимни ишлирим билән көрситимән»,— дәйду. 19 Сән бир Худаниң бар екәнлигигә ишинәмсән? Яхши қилисәнкән. Җинларму буниңға ишиниду һәм қорқуп титрәйду. 20 Һәй, әқилсиз инсан, әмәлиятсиз етиқат мевисиз болидиғинини билмәмсән? 21 Ибраһим атимиз өз оғли Исһақни қурбангаһқа ятқузғанда, әмәлияти асасида һәққаний дәп җакаланған әмәсму? 22 Сән көрүватисәнки, униң етиқати ишлири билән биллә болди һәм униң етиқати ишлири арқилиқ мукәммәлләшти. 23 Мошундақ қилип, Муқәддәс Язмиларниң: «Ибраһим Йәһваға етиқат бағлиди һәм буниң үчүн һәққаний дәп тонулди», дегән җайи орунланди вә у Йәһваниң дости дәп аталди.
24 Демәкчи, инсан пәқәт ялғуз етиқати асасидила әмәс, бәлки қошумчә ишлири асасида һәққаний дәп җакалиниду. 25 Нәқ шундақла паһишә Раһаб әвәтилгәнләрни меһмандостларчә қарши елип, андин башқа йол билән уларни узатқач, ишлири асасида һәққаний, дәп елан қилинған әмәсму? 26 Һә, тән роһсиз* өлүк болғинидәк, етиқатму әмәлиятсиз өлүктур.