Киришмиси
БУ КИТАПТА йезилғанниң һәммиси һәқиқий яшап өткән адәмләр вә йүз бәргән вақиәләр. Бу китап дуниядики әң улуқ Язмиларға асасән йезилған. Бу һекайиләр Алланиң яритишни башлишидин таки бизниң күнимизгичә болған дуния тарихини ейтип бериду. Һәм, Худаниң кәлгүсидә немә ишларни қилидиғанлиғи һәққидә бәргән вәдилирини бизгә баян қилиду.
Бу китап — Муқәддәс Китапниң мәзмуни һәққидә сизгә чүшәнчә бериду. Йәнә Муқәддәс Китаптики адәмләр һәққидила әмәс, бәлки уларниң немә ишларни қилғанлиғи тоғрисида һәм сөзләйду. Униңдин башқа, йәр йүзи җәннәттики мәңгүлүк һаятлиқтин ибарәт Худаниң инсанийәткә бәргән әҗайип үмүтини ашкарә қилиду.
Бу китапта 116 парчә һекайә бар болуп, сәккиз қисимға бөлүнгән. Һәр бир қисим башлиништин бурун, шу қисимниң мәзмуни һәққидә қисқичә бир бәт чүшәндүрүш берилгән. Барлиқ һекайиләр тарихий вақиәләрниң йүз бериш вақит тәртиви бойичә тизилған. Иш-вақиәләрниң бир-бири билән болған зич бағлинишлиғи, шуларниң тарихта қайси вақитта йүз бәргәнлигини ениқ көрүп йетәлишиңиз үчүн ярдәм бериду.
Һекайиләр аддий сөз-ибариләр билән йезилған болуп, көплигән кичик балилар һекайиләрни өзлири оқалайду. Ата-ана болғучилар, кичик балилириңларниң бирәйләнниң һекайиләрни оқуп беришни бәкму яхши көридиғанлиғини, һәтта нәччә рәт қайта-қайта аңлашни халайдиғанлиғини байқайсиләр. Әмәлиятта, бу чоң-кичик, қери-яш һәммә иштияқ билән оқуйдиған китап екәнлигини көрүп йетәләйсиз.
Һәр бир һекайиниң ахирида Муқәддәс Китаптики бәзи айәтләр тилға елинған. Биз сизни шу айәтләрни оқушқа үндәймиз, чүнки һәр бир һекайә шу тилға елинған айәтләр асасида йезилған. 116-һекайидин кейинки бәтләрдә, һәр бир һекайә үчүн тәкрарлаш соаллири берилгән. Һәр бир һекайини оқуғандин кейин, шу соаллар асасида һекайидин немиләрни үгәнгәнлигиңизни әсләп беқиң.