Тунҗа һасан-һүсән

НУҺ пәйғәмбәр вә униң аилисидикиләр кемидин чиқип, тунҗа қилған ишиниң немә екәнлигини биләмсиз? Худаға қурванлиқ кәлтүргән, йәни соғат бәргән. Төвәндики рәсимдә, Нуһниң немә қиливатқанлиғини көрәләйсиз. Нуһ өз аилисидикиләрни топан сүйидин қутқузуп қалғанлиғи үчүн Аллаға рәхмәт ейтип, бир қанчә һайванларни қурванлиқ қилди.

Сизчә, Пәрвәрдигар Нуһниң соғитини яхши көргәнмиду? Шундақ, у яхши көргән. Шуңа, Яратқучи Худа топан сүйи билән бу дунияни қайта вәйран қилмайдиғанлиғи һәққидә Нуһ пәйғәмбәргә вәдә бәргән.

Узун өтмәй, йәр йүзи қуруп, Нуһ вә униң аилисидикиләр кеминиң сиртида йеңи турмушини башлиди. Пәрвәрдигар уларни бәрикәтлиди вә уларға: “Силәр көп пәрзәнтлик болуңлар, адәмләр дунияниң һәр қайси җайлириға тарқилип маканлашқичә көпийиңлар”, дәп буйриди.

Амма, кейин кишиләр топан сүйи һәққидә аңлиғанда, улар бәлким йәнә шундақ топан сүйиниң келишидин қорққан болуши мүмкин. Шуңа, Худа уларға бир нәрсә бәрди. Шу нәрсә арқилиқ Пәрвәрдигар өзиниң топан сүйи билән йәр йүзини қайта вәйран қилмайдиғанлиғи һәққидики вәдисини инсанларниң есигә селип турди. Худа инсанларниң есигә селиш үчүн, қандақ нәрсә бәргәнлигини биләмсиз? Униң бәргини һасан-һүсәндур.

Ямғур йеғип тохтиғандин кейин, қуяш чиққанда, асманда һемишәм һасан-һүсән пәйда болиду. Һасан-һүсәндә һәр хил рәңләр бар, бәкму чирайлиқ. Сиз һасан-һүсәнни көрүп баққанму? Сүрәттики һасан-һүсәнни көрдиңизму?

Худа: “Мән шундақ вәдә беримәнки, һәргизму барлиқ инсанлар вә җан-җаниварларни қайта топан сүйи билән йоқ қиливәтмәймән. Мән һасан-һүсәнләрни булутлар арисиға қойдум. Һәр қетим һасан-һүсәнни көргинимдә, өзәмниң вәдисини есимгә алимән”, деди.

Шуңа, һәр қетим һасан-һүсәнни көргиниңиздә, немини әскә елишиңиз керәк? Шуни әстә сақлаңки, Яратқучи Егимиз һәргизму дунияни қайта топан сүйи билән харап қилмайдиғанлиғини вәдә қилған.