Алтун мозай

ПАһ! Қараңа бу хәлиқ немә иш қиливатиду, әнди? Улар бир мозай бутқа чоқунушиветипту! Улар немә үчүн шундақ қилиду?

Муса пәйғәмбәр тағда узун вақит туруп қалғач, хәлиқ: “Мусаниң немә болуп кәткәнлигини билмәймиз. Шуңа, бизгә йол башлап, бу йәрдин елип чиқидиған бир илаһ ясайли”, дейишкән еди.

Муса пәйғәмбәрниң акиси Һарун: “Болиду, алтун һалқилириңларни елип маңа әкелип бериңлар”, деди. Хәлиқ шундақ қилди. Һарун уларни отта еритип бир алтун мозай ясиди. Шуниң билән, исраил хәлқи: “Мана бу, бизни Мисирдин елип чиққан илаһимиз!”, дәп чоң бир зияпәт өткүзүп, алтун мозайға ибадәт қилди.

Йәһва буни көрүп, қаттиқ аччиқланди. Шуңа, У Мусаға: “Дәрһал тағдин чүш. Хәлиқ еғир гунаға патти. Улар Мениң қанун-пәрманлиримни унтуп, алтун мозайға чоқунушмақта”, деди.

Муса пәйғәмбәр дәрһал тағдин чүшти. Йеқин кәлгәндә, мана бу болуватқан ишларни көрди. Көпчилик алтун мозайни чөрәдәп нахша ейтип, уссул ойнавататти! Муса қаттиқ ғәзәплинип, қанун-пәрман йезилған икки таш тахтини йәргә ташлавәтти. Улар чеқилип парә-парә болуп кәтти. Андин у, алтун мозайни отқа ташлап еритип, уни талқандәк қиливәтти.

Хәлиқ наһайити еғир гуна өткүзгән еди. Шуңа, Муса пәйғәмбәр бәзи әрләрни қолиға қилич елишқа буйруп: “Алтун мозайға чоқунған кишиләр чоқум өлүши керәк”, деди. Шуниң билән, улар 3000 кишини өлтүрүвәтти! Мошу вақиә, бизгә ялған илаһларға әмәс, бәлки еһтиятчанлиқ билән пәқәт Йәһваға ибадәт қилишимиз керәклигини көрсәтмәмду?