Йәһваниң қанун чүшириши

МИСИРДИН чиқип икки айчә болғанда, исраиллар Синай теғиға (бу тағ Һориб дәпму аталған) йетип кәлди. Бу йәр, илгири көйүватқан тикәнлик арисидин Йәһва Мусаға сөз қилған җай еди. Исраиллар бу йәрдә чедир тикип бир мәзгил туруп қалди.

Муса пәйғәмбәр таққа чиқип кәткәндә, кишиләр уни пәстә сақлап турди. У тағ чоққисиға йетип барғанда, Йәһва Мусаға сөз қилип: ‘Әгәр исраиллар маңа итаәт қилса, уларни өзәмгә алаһидә хәлиқ қилип таллаймән’, дәп ейтти. Муса тағдин чүшүп, исраилларға Йәһваниң сөзлирини ейтип бәрди. Шуниң билән, кишиләр Йәһваға итаәт қилип, өзлириниң униң хәлқи болушни халайдиғанлиғини ейтишти.

Бу вақитта, Йәһва әҗайип бир иш қилди. Йәни, тағ чоққисидин ис-түтәк көтирилип, қаттиқ гүлдүрмома авази аңланди. У йәнә хәлиқләргә сөзләп: “Мән силәрни Мисирдин елип чиққан Худайиңлар Йәһва”, деди. Андин кейин, У: “Мәндин башқа һәр қандақ илаһларға ибадәт қилмаңлар”, дәп буйруқ қилди.

Худа исраилларға йәнә тоққуз әмир-пәрман, йәни қанун чүшәрди. Хәлиқ наһайити қорқушуп кәтти. Шуңа, улар Мусаға: “Бизгә сән сөз қилғайсән, чүнки Худа бизгә өзи беваситә сөз қилса, өлүп кетидиған охшаймиз”, деди.

Кейин, Йәһва Мусаға сөз қилип: “Таққа чиқип, қешимға кәл. Мән хәлиқләрниң бойсунуши үчүн чүширилгән қанунлар йезилған икки таш тахтини саңа беримән”, деди. Шуңа, Муса қайта таққа чиқип, 40 кечә-күндүз у йәрдә турди.

Йәһва өз хәлқигә нурғунлиған қанун-пәрманларни бәрди. Муса шуларниң һәммисини йезип хатирилиди. Худа йәнә Мусаға икки таш тахтини бәрди. Пәрвәрдигар пүткүл хәлиққә қилған сөзлирини, йәни 10 әмир-пәрманлирини шу таш тахтиларға өзи язған еди. Улар он пәриз яки қанун дәп аталди.

Шу он пәриз наһайити муһим қанун-пәрманлар. Бирақ, Алла Йәһва исраилларға чүшәргән башқа нурғун қанунларму бәк муһим. Шуларниң арисидики бири: “Пәрвәрдигариң болған Йәһвани пүтүн қәлбиң, пүтүн зеһниң, пүтүн җениң вә пүтүн күчиң билән сөйгин”, йәнә бири болса: “Хошнаңни өзәңни сөйгәндәк сөй”. Әйса пәйғәмбәр Пәрвәрдигар Йәһваниң өз хәлқи исраилларға бәргән мошу икки әң муһим әмир-пәрманни алаһидә тәкитлигән еди. Кейинирәк Әйса вә униң бәргән тәлимлири һәққидә нурғун нәрсиләрни үгинимиз.