Һарунниң һасисида гүлләрниң чечәклиши

БУ ТАЯҚ, йәни һасида гүлләрниң ечилип, пишқан бадамниң өсүп чиққанлиғиға қараңа! Бу Һарунниң һасиси. Бир кечидила һасидин бу гүлләр чечәкләп, бадам мевиси өсүп чиққан еди! Немә үчүн? Қени көрүп бақайли.

Исраиллар нәччә вақиттин бери чөлләрни кезип жүргән еди. Бәзи адәмләр Муса йолбашчи, Һарун алий роһаний болмаслиғи керәк, дәп ойлашти. Кораһ шундақ ойлиғанларниң бири болуп, Датан вә Абирам вә хәлиққә йетәкчилик қилидиған 250 кишиму шундақ ойлашқан еди. Улар һәммиси келип, Муса пәйғәмбәргә: “Немә үчүн өзәңни биздин жуқури орунға қойисән?”, деди.

Муса Кораһ вә униңға әгәшкәнләргә: “Әтә әтигәндә отданлириңларни елип келип, хуш пурақ исриқни селиңлар. Андин Йәһваниң ибадәт чедириға келиңлар. Йәһва кимни таллайдикин көримиз”, деди.

Әтиси Кораһ вә униңға әгәшкән 250 киши ибадәт чедириға кәлди. Башқа нурғун кишиләрму уларни қоллаш үчүн Кораһ, Датан вә Абирамларниң чедириға кәлгән еди. Йәһва қаттиқ ғәзәпләнди. Муса: “Гунакарларниң чедирлиридин жирақ кетиңлар, уларниң һеч нәрсисигә тәгмәңлар”, деди. Хәлиқ униң сөзигә қулақ селип Кораһ, Датан вә Абирамларниң чедирлиридин нери кәтти.

Андин Муса пәйғәмбәр сөзләп: “Мошу иш арқилиқ Худаниң кимни таллиғанлиғини билисиләр. Йәр өз еғизини ечип бу гунакар кишиләрни жутуп кетиду”, деди.

Муса сөзләп тохтишиға, йәр йерилип ечилди. Кораһниң чедири вә униңға тәәллуқ нәрсиләр, Датан вә Абирам һәм уларниң барлиқ тәәллуқатлириму қошулуп йәр астиға чүшүп кетип, йәр уларниң үстигә йепилди. Йәр астиға чүшүп кетиватқанларниң вақираш-җақирашлирини аңлиған хәлиқ: “Қечиңлар! Бизниму йәр жутуп кәтмисун!”, дәп товлашти.

Кораһ вә униң 250 әгәшкүчилири йәнила ибадәт чедириниң йенида турғинида, Йәһва от чүшәрди, уларниң һәммиси көйүп кәтти. Андин Йәһва Һарунниң оғли Әлиазарни өлгәнләрниң отданлирини елип, непиз соқуп қурванлиқ суписини қаплашқа буйриди. Қурванлиқ суписини қаплаш—агаһландурушниң бир бәлгүси болуп, Һарун вә униң оғуллиридин башқиларниң роһанийлар болуп Йәһваға хизмәт қилмаслиғи керәклигини Исраил хәлқигә әскәртип туратти.

Шундақтиму, Йәһва Худа, Һарун вә униң оғуллирини роһанийлар болушқа талланғанлиғини ениқ көрситишни халиди. Шуңа, У Мусаға: “Исраилниң һәр бир қәбилисиниң йетәкчиси өз һасисини елип кәлсун. Лавий қәбилиси үчүн Һарун һасисини елип кәлсун. Андин һәр бир һаса ибадәт чедиридики әһдә сандуғиниң алдиға қоюлсун. Мән роһаний болушқа таллиған кишиниң һасисида гүлләр чечәкләйду”, деди.

Әтиси әтигәндә, Муса пәйғәмбәр келип Һарунниң һасисида гүлләрниң ечилип, пишқан бадам мевилириниң турғанлиғини көрди! Әндиғу Йәһваниң немә үчүн Һарунниң һасисида гүлләрни ечилдурғанлиғини чүшәнгәнсиз?!