Сөзләйдиған ешәк

ЕШӘКНИҢ сөзлигинини аңлап баққанмусиз? Бәлким сиз: “Яқ, һайванлар сөзләлмәйду”, дәп җавап беришиңиз мүмкин. Амма, Муқәддәс Китап бир ешәкниң сөзлигәнлиги һәққидә ейтиду. Ундақта, қандақларчә шундақ иш йүз бәргән? Бирликтә көрүп бақайли.

Исраиллар дәл Қанан зиминиға киришкә тәйяр болуп турған еди. Моабниң падишаси Балақ исраиллардин қорққачқа, у исраилларни қарғаш үчүн Билам исимлик һейлә-микири көп бир қув кишини чақирип келишкә адәм әвәтти. Балақ Биламға нурғун пул беридиғанлиғини вәдә қилған еди. Шуңа, Билам ешәккә минип, Балақ билән көрүшүш үчүн йолға чиқти.

Йәһва, Биламниң өз хәлқини қарғишини халимиғач, Биламни йолда тосаш үчүн узун бир қилич көтәргән периштәни әвәтти. Билам периштәни көрәлмиди, бирақ униң ешиги көргән еди. Шуңа, ешәк периштәдин өзини қачурушқа урунди, ахирида маңмай йәрдә йетивалди. Биламниң қаттиқ аччиғи келип, һасиси билән ешәкни урушқа башлиди.

Шуниң билән, Йәһва ешәкниң сөзлигән сөзини Биламға аңлатти. Ешәк: “Мени шунчә бәк урғидәк, мән саңа немә қилдим?”, дәп сориди.

Билам: “Сән мени ахмақ адәмгә охшитип қойдуң, әгәр мәндә қилич болған болса, сени өлтүрүвәткән болаттим!”, деди.

“Мән илгири мошундақ қилғанмедим?”, дәп сориди ешәк.

Билам: “Яқ”, дәп җавап бәрди.

Шу чағда, Йәһва Биламниң көзини ачқач, у йолда қилич көтирип турған периштәни көрди. Периштә: “Немә үчүн ешигиңни урисән? Мән сениң йолуңни тосиғили кәлгән. Чүнки, сән исраилларни қарғаш үчүн бармаслиғиң керәк. Әгәр сениң ешигиң мәндин өзини қачурмиған болса, сени өлтүрүветип, ешигиңни тирик қояттим”, деди.

Билам: “Мән гуна қилдим. Мән сениң йолни тосап турғанлиғиңни билмәптимән”, деди. Периштә Биламни маңғили қойди. Билам шуниң билән Балақ билән көрүшкили барди. Гәрчә у йәнила исраилларни қарғашқа урунған болсиму, әксичә Йәһва Биламни исраил хәлқини үч қетим мубарәкләйдиған қилип қойди.