Әйсаниң Падиша сүпитидә келиши

ӘЙСА Мәсиһ икки қарғу кишини сақайтқандин кейин, узун өтмәй Йерусалимға йеқин бир кичик йезиға кәлди. У шагиртлиридин иккисигә: “Силәр йезиға бериңлар. У йәрдә бир тәхәйни көрисиләр. Уни йешип алдимға йетиләп келиңлар”, деди.

Тәхәйни елип кәлгәндә, һәзрити Әйса униң үстидә олтарди. Андин, Йерусалимға тәхәйни минип сәпәр қилди. У шәһәргә йеқинлашқанда, чоң бир топ кишиләр уни көргили чиқишти. Көпчилик кишиләр чапанлирини йолға паяндаз қилип салди. Бәзилири хорма дәрәқлириниң шахлирини кәсти. Уларниму йолға селип, жуқури авазда: “Йәһваниң исми билән кәлгән Падишани Худа бәрикәтлисун!”, дәп товлашти.

Узун заманлар илгири, Исраилға йеңидин падиша болғанларниң ешәк минип Йерусалимға кирип, хәлиқ алдида өзини ашкарә қилиш урпи-адити бар еди. Һазир дәл Әйса шундақ қиливататти. Кишиләр Әйсани өзлириниң падишаси болушини халайдиғанлиғини көрсәтти. Бирақ, һәммила кишиләр Әйсани қарши алған әмәс. Буни биз кейин Әйса Мәсиһ ибадәтханиға барғанда, йүз бәргән ишлардин ениқ көрәләймиз.

Һәзрити Әйса ибадәтханида қарғу вә мәйип кишиләрни сақайтти. Кичик балилар буни көргәндә, улар уни мәдһийиләп товлашти. Бирақ, бу роһанийларниң аччиғини кәлтүрди, улар һәзрити Әйсадин: “Бу балиларниң немә дәватқанлиғини аңлаватамсән”, дәп сориди.

Әйса пәйғәмбәр җавап берип: “Шундақ, аңлаватимән. Силәр Муқәддәс Китаптики: “Худа кичик балиларниң тиллири арқилиқ мәдһийиләр кәлтүрүр”, дегән сөзләрни зади оқумиғанму?”, деди. Шуниң билән, балилар Худа тайинлиған Падиша Әйсани тохтимай мәдһийиләшти.

Бизму шу кичик балилардәк болушни халаймиз, шундақму?! Бәзи кишиләр бәлким бизни Худаниң Падишалиғи һәққидә сөзләштин тохтитишқа урунуп һәрикәт қилиши мүмкин. Бирақ, Әйса Мәсиһниң кәлгүсидә инсанлар үчүн қандақ әҗайип ишларни қилидиғанлиғи һәққидә башқиларға давамлиқ хуш хәвәр ейтишимиз керәк.

Һәзрити Әйса йәр йүзидә болғанда, Падиша болуп һөкүмранлиқ қилидиған вақит техи кәлмигән еди. Ундақта, шу вақит қачан келиду? Мәсиһ Әйсаниң шагиртлири буни билишни бәкму халиған еди. Мошу тоғрисида кейинки парчида оқуймиз.