Немишкә Худа һәққидә билим елишни тохтатмаслиқ керәк?

1. Немишкә Муқәддәс китапни үгинишни давамлаштуруш керәк?

Муқәддәс китапниң асасий тәлиматлирини қисқичә үгиниш Йәһваға болған сөйүмиңизни мустәһкәм қилған болуши керәк. Бу сөйүмиңизниң совуп кетишигә йол қоймаң (Петрусниң 1-хети 2:2). Әгәр Худа һәққидә билим елишни тохтатмай, Униң Сөзини үгинишни давамлаштурсиңиз, мәңгү яшаш үмүтигә егә болалайсиз (Йоһан 17:3; Тимотийға 1-хәт 2:3, 4 оқуп чиқиң).

Худа һәққидә көпирәк билим алғансири етиқадиңиз мустәһкәмлишиду. Етиқат Худаниң разилиғини елишқа ярдәм қилиду (Ибранийларға 11:1, 6). У сизни товва қилишқа вә һаятиңиздики керәклик өзгиришләрни вуҗутқа кәлтүрүшни үндәйду (Әлчиләр 3:19 оқуп чиқиң).

2. Худа һәққидики билимлириңиз башқиларға қандақ пайда әкелиши мүмкин?

Алған билимлириңизни башқилар билән бөлүшүш — бу тәбиий иш, чүнки яхши хәвәрни бирсигә ейтиш һәммисигә яқиду. Худа һәққидә билим елишни давамлаштурсиңиз көзқаришиңизни Муқәддәс китап арқилиқ чүшәндурушни үгинәләйсиз (Римлиқларға 10:13—15 оқуп чиқиң).

Көплири хуш хәвәрни достлириға һәм уруқ-туққанлириға ейтиду. Силиқ-сипайә болуң. Башқиларниң дегини хата демәң. Тоғриси уларға Худаниң вәдилири һәққидә ейтип бериң. Шуни унтумаңки, адәмләр сөзлириңизгә әмәс, бәлки совап ишлириңизға қарап көпирәк етивар қилиду (Тимотийға 2-хәт 2:24, 25 оқуп чиқиң).

3. Сизниң Муқәддәс китапни үгинишиңиз Худаға болған мунасивитиңизгә қандақ тәсир қилиду?

Худа Сөзини үгиниш сизгә роһий өсүшкә ярдәм бериду. Барғансири сизниң Худа билән алақиңиз алаһидә болиду. Сизниң һәтта Униң аилисигә әза болушқа мүмкинчилигиңиз болиду (Коринтлиқларға 2-хәт 6:18 оқуп чиқиң).

4. Роһий өсүш үчүн қандақ қәдәмләрни қилиш керәк?

Роһий өсүшни халисиңиз Худа Сөзини үгинишни давамлаштуруң (Ибранийларға 5:13, 14). Йәһва гувачилириниң бирсигә «Муқәддәс китапта немә ейтилиду?» дегән китапниң ярдими арқилиқ үгинишни илтимас қилиң. Худа Сөзидин қанчә көп билим алсиңиз, һаятиңиз техиму мәналиқ вә бәхитлик болиду (Зәбур 1:1—3; 73:27, 28 оқуп чиқиң).

Бу хуш хәвәр бәхитлик Худа Йәһвадин. Униң хәлқигә қошулсиңиз, Униң билән йеқин мунасивәттә болалайсиз (Ибранийларға 10:24, 25). Йәһва Худани хурсән қилишни давамлаштуруш арқилиқ сиз һәқиқий мәңгү һаятқа еришисиз. Худа билән достлуқта болуштин артуқ немә болсун! (Тимотийға 1-хәт 1:11; 6:19 оқуп чикиң).