Әйса үчүн Худа Падишалиғи әң муһим болған

Алдинқи мақалидә тилға елинғандәк, һәзрити Әйса һаятида «Худаниң Падишалиғи һәққидики хуш хәвәрни» вәз қилишни биринчи орунға қойған (Луқа 8:1). У кишиләргә Худа Падишалиғи һәққидә вәз қилиш үчүн бар күчни чиқирип, Исраил зиминида йүзлигән километрларчә йол жүргән. Инҗилда Әйса пәйғәмбәрниң хизмити тоғрилиқ йезилған болсиму, униң үзүндилиридә Худа Падишалиғи 100 қетимдин көпирәк тилға елиниду. Бу үзүндиләрниң көпинчисидә һәзрити Әйсаниң бу Падишалиқ һәққидики сөзлирини тапалаймиз. Бирақ бу униң Худа Падишалиғи һәққидә ейтқанлириниң пәқәт бир қисми (Йоһан 21:25).

Немә үчүн һәзрити Әйса үчүн Падишалиқ әң муһим болған? Сәвәплиридин бири шуки, Әйса Мәсиһ өзиниң Атиси Худа тәрипидин бу Падишалиқниң Падишаси сүпитидә тәйинләнгәнлигини билгән (Йәшая 9:6; Луқа 22:28—30). Амма һәзрити Әйса өз диққитини нам-аброй вә шан-шөһрәткә еришишкә мәркәзләштүрмигән (Мәтта 11:29; Марк 10:17, 18). У өзиниң пайда-мәнпәитини көзләш үчүн Падишалиқни илгири сүрмигән. Әксинчә, илгирикидәк бүгүнки күндә Худа Падишалиғи Әйса пәйғәмбәр үчүн чоң әһмийәткә егә, сәвәви бу һөкүмәт униң сөйүмлүк әрштики Атиси вә садиқ әгәшкүчилири үчүн көп ишларни қилиду.

ПАДИШАЛИҚ ХУДА ҮЧҮН НЕМИЛӘРНИ ҚИЛИДУ?

Әйса пәйғәмбәр Худани қаттиқ сөйиду (Пәнд-нәсиһәтләр 8:30; Йоһан 14:31). Әйса Мәсиһ Худаниң сөйгү-муһәббити, рәһим-шәпқити вә адалитидәк есил пәзиләтлиридин һаяҗанлиниду (Қанун шәрһи 32:4; Йәшая 49:15; Йоһанниң 1-хети 4:8). Шуңа Алла адәмләр дуч кәлгән азап-оқубәтләргә пәрвасиз вә азап чекишимизни халайду дегән кәң тарқалған ялғанчилиқлардин Әйса Мәсиһ нәпрәтлиниду. Бу һәзрити Әйсаниң «Падишалиқ һәққидики хуш хәвәрни» вәз қилиш истиги барлиғиниң сәвәплиридин бири еди. Әйса пәйғәмбәр Падишалиқниң Тәңри Худаниң исмини өз вақтида ақлайдиғанлиғини билгән (Мәтта 4:23; 6:9, 10). Хош, бу қандақ әмәлгә ашиду?

Пәрвәрдигар Йәһва Падишалиқ арқилиқ пүтүн инсанийәткә пайда әкелидиған зор бир өзгәртишләрни қилиду. Алла садақәтмән хизмәтчилириниң «көзидики һәрқандақ яшни сүртиду». Шуниңдәк, Йәһва Худа: «Өлүм әнди болмайду йә қайғу, йә жиға-зар, йә ағриқ башқа болмайду»,— дәп көз яшлириниң сәвәплирини йоқ қилиду (Вәһий 21:3, 4). Тәңри Йәһва Өз Падишалиғи арқилиқ барчә азап-оқубәтләрни йоқ қилиду.

Шуңа Әйса пәйғәмбәр адәмләргә Падишалиқ һәққидә вәз қилиш үчүн шунчә көп күч чиқарғанлиғи һәйран қиларлиқ әмәс! Чүнки у Падишалиқниң утуқлири Йәһваниң нәқәдәр күч-қудрәтлик вә меһир-шәпқәтлик Худа екәнлигини ашкарә қилидиғанлиғини билгән (Яқуп 5:11). Униңдин башқа, һәзрити Әйса Падишалиқниң садақәтмән кишиләргә бәрикәт төкүдиғанлиғини билгән.

ПАДИШАЛИҚ САДАҚӘТМӘН КИШИЛӘР ҮЧҮН НЕМИЛӘРНИ ҚИЛИДУ?

Әйса Мәсиһ йәргә келишидин илгири узун вақит асманда Атиси Худа билән биргә яшиған. Алла һәммә нәрсини, йәни каинатни, униңдики сан­санақсиз юлтузлар вә галактикларни, әҗайип сәйяримизни вә униңдики мәвҗудатларни «униң васитиси билән» яратқан (Колосилиқларға 1:15, 16). Униңдин ташқири, инсанлар яритилғанда, Әйса Мәсиһ бәкму хурсән болған (Пәнд-нәсиһәтләр 8:31).

Әйса пәйғәмбәрниң йәрдики хизмити адәмләргә болған сөйгү-муһәббитигә толған еди. У баштин һәммә муһтаҗларға хуш хәвәрни җакалаш үчүн йәргә кәлгәнлигини ениқ көрсәткән (Луқа 4:18). Бирақ адәмләргә пәқәт ярдәм бериш керәклиги һәққидә гәп қилипла қоймай, бәлки уларға сөйгү-муһәббәтни қайта-қайта көрсәткән. Мәсилән, нурғун адәмләр униң гәплирини аңлаш үчүн жиғилғанда, у уларға ич ағритип, уларниң кесәллирини сақайтқан (Мәтта 14:14). Бир күни еғир кесәлгә гириптар болған бир киши һәзрити Әйсаға: «Әгәр халисиңиз, мени кесилимдин сақайтип пак қилғайсиз!»— дәп ялвуруп сориған. Әйса униңға өз сөйидиғанлиғини көрситип, униңға: «Халаймән, пак болғин!»— дәп, уни сақайтти (Луқа 5:12, 13, ЙД). Башқа бир күни Мәрийәмниң акиси Лазарниң өлүшидин қайғуруватқанлиғини көргәндә, һәзрити Әйсаниң роһидин налә қилип, көз яш қилған (Йоһан 11:32—36). Кейин у һәйран қаларлиқ бир мөҗүзә көрситип, төрт күн өлүк болуп ятқан Лазарни тирилдүргән (Йоһан 11:32—36).

Әлвәттә, Әйса пәйғәмбәр бериватқан ярдәмниң вақитлиқ болғанлиғини билгән. У сақайтқан барчә адәмләрниң қайта кесәл болидиғанлиғини һәмдә тирилдүргән барчә адәмләрниң йәнә қайтидин өлидиғанлиғини чүшәнгән. Бирақ һәзрити Әйса Худа Падишалиғиниң бундақ вақитлиқ қийинчилиқларни пүтүнләй йоқ қилидиғанлиғиниму билгән. Шуңа у мөҗүзиләрни көрситипла қоймай, йәнә қизғинлиқ билән «Падишалиқ һәққидә хуш хәвәрни» вәз қилған (Мәтта 9:35). Униң мөҗүзилири Худа Падишалиғиниң келәчәктә пүтүн йәр йүзидә немә ишларни қилалайдиғанлиғини көрсәткән. Келиң, әшу вақит һәққидә Муқәддәс китапта немә йезилғанлиғини көрүп бақайли.

• Кесәлликләр башқа болмайду

  «Шу чағда қарғуларниң көзлири ечилип, паңларниң қулақлири аңлайду. Току буғидәк сәкрәйду вә кекәчниң тили хошаллиқта мәдһийә ейтиду». Униңдин башқа, «бирму пухра: “Мән ағриқ”,— демәйду» (Йәшая 33:24; 35:5, 6).

• 

  Өлүм башқа болмайду

  «Һәққанийлар йәрни мирасқа елип, Униңда әбәдил-әбәт яшайду» (Зәбур 37:29)

  «У өлүмни мәңгүгә жутуветиду, Алий Һөкүмран Йәһва һәммисиниң көзлиридин йешини сүртиду» (Йәшая 25:8, ЙД).

• Өлгәнләр тирилиду

  «Қәбриләрдә болғанларниң һәммиси униң авазини аңлап чиқидиған вақит келиватиду» (Йоһан 5:28, 29, ЙД).

  «Өлүмдин тирилиши болиду» (Әлчиләр 24:15, КТ).

• 

  Башпанасиз яки ишсиз жүргән адәмләрни болмайду

  «Инсанлар өй-маканларни селип, уларда яшайду, үзүмзарлиқларни тикип, уларниң мевилирини йәйду. Һечким башқиси үчүн өйләрни қурмайду, башқиси үчүн дәрәқләрни тикмәйду... Мениң талланғанлирим әмгигиниң һосулини пүтүнләй истимал қилиду» (Йәшая 65:21, 22).



• Уруш башқа болмайду

  «У йәр йүзиниң у четидин бу четигичә урушларни тохтитиду» (Зәбур 46:9, ЙД).

  «Хәлиқ хәлиқкә қилич көтәрмәйду вә улар һәтта урушишни үгәнмәйду» (Йәшая 2:4).

• 

  Ачарчилиқ башқа болмайду

  «Зимин өз һосулини бериду; бизниң Тәңримиз бизни бәрикәтләйду» (Зәбур 67:6, ЙД).

  «Йәр йүзидә зираәтләр мол болар, тағ чоқилириғичә толуп ташар» (Зәбур 72:16, ЙД).

• Кәмбәғәллик башқа болмайду

  «Мәңгүгә намрат унтулмайду» (Зәбур 9:18).

  «У қутқузар налә-пәряд қилғанларни, ярдәмчиси йоқларни вә бечарә аҗизларни. У бечарә вә кәмбәғәлләргә ич ағритар, У йоқсулларниң җанлирини қутқузар» (Зәбур 72:12, 13, ЙД).

Бу вәдиләрни көрүп чиққанда, немишкә Падишалиқ Әйса пәйғәмбәр үчүн әң муһим болғанлиғини чүшиниватамсиз? Йәр йүзидә болғанда, һәзрити Әйса Худа Падишалиғи һәққидә тиңшашқа майил болған һәрбир кишигә хуш хәвәрни ейтиш үчүн бар күчни чиқарған. Сәвәви у Падишалиқниң бүгүнки күндә инсанлар дуч келидиған барчә қийинчилиқларни йоқ қилидиғанлиғини билгән.

Хош, Худа Падишалиғи һәққидики вәдиләр сизниң қәлбиңизгә тәсир қиливатамду? Һә-ә десиңиз, бу Падишалиқ һәққидә көпирәк биливелишни халамсиз? Падишалиқ төкидиған бәрикәтләрдин чоқум һузурлиналайдиғанлиғиңизға көз йәткүзүш үчүн немә қилсиңиз болиду? Бу бир қатар мақалиләрниң ахирқиси бу соалларға җавап бериду.