«Һаятимиз вә хизмитимиз. Иш дәптири» үчүн мәлумат мәнбәлири
© 2023 Watch Tower Bible and Tract Society of Pennsylvania
1—7 ЯНВАРЬ
ХУДА СӨЗИДИКИ ҒӘЗНӘ | АЮП 32, 33
Ғәм-тәшвишкә дуч келиватқанларға илһам-мәдәт бериң
it «Елиху»
Елиху
Елиху иккийүзлүк болмай, һечкимгә хошамәт сөзләрни ейтмиған. Өзини Аюпқа охшаш топидин яритилғанлиғини һәм Қудрәтлик Худа униң Яратқучиси екәнлигини чүшәнгән. Елиху Аюпни қорқитишни халимиған. У Елипаз, Билдад вә Зопарға охшаш болмай, әксичә Аюпқа сөз қилғанда уни исми билән атап, һәқиқий дост екәнлигини көрсәткән (Аюп 32:21, 22; 33:1, 6).
w14 6/15 25-б., 8—10 абз.
Һалсизлинип қалған адәмләргә Йәһва Худадәк қарамсиз?
8 Әгәр қәдирлик етиқатдашлиримизниң қандақту бир ағриқ, етиқади үчүн өй-ичидикилири билән келишмәсликлири болса яки депрессиядин қийниливатқанлиғини есимиздә тутсақ, уларға рәһимлик болалаймиз. Ким билиду, күнләрниң бир күнидә бизму шундақ вәзийәтләргә дуч келишимиз мүмкин. Исраил хәлқи вәдә қилинған зиминниң босуғисида турғанда, Йәһва Худа уларниң Мисирда аҗиз вә намрат болғанлиғини есиға селип мундақ дәп әскәртти: «Намрат қериндишиң болуп қалса, униңға қарита жүригиңни қатурма». Йәһва Худа уларниң намратлар һечнемигә яримас адәм дәп әмәс, ярдәмгә муһтаҗ дәп қаришини халиған (Қ. шәр. 15:7, 11; Лав. 25:35—38).
9 Әйипләш яки гуман қилишниң орниға, қийин вәзийәткә дуч кәлгәнләргә роһий җәһәттин ярдәм берәйли (Аюп 33:6, 7; Мәт. 7:1). Мәсилән, мотоцикилни мингән адәм йол апитигә дуч кәлгәндә, уни дохтурханиға елип кәлди дәйли. Дохтурлар бу апәттә ким әйиплик екәнлигини ениқлаш үчүн вақтини сәрип қиламду? Яқ. Улар шу адәмгә тез ярдәм беришкә алдирайду. Шуниңға охшаш, етиқатдашлиримиз қандақту бир қийинчилиқларға дуч кәлсә, уларға роһий җәһәттин ярдәм беришимиз лазим (Салоникилиқларға 1-хәт 5:14ни оқуң).
10 Бир аз тохтап, һалсиз болуп көрүнгән етиқатдашлиримизниң вәзийити тоғрисида ойлансақ, уларға башқа көзқараш билән қараймиз. Жиллар давамида аилисиниң қаршилиқлириға дуч келиватқан қериндашлиримиз һәққидә ойлинип көрүң. Балилирини беқиш үчүн җапалиқ ишләп, лекин буниңға қаримай җамаәт учришишлирини ташлимайдиған ялғуз ана тоғрисида немә дейишкә болиду? Мәктәптики бесимға қаримай, һәқиқәттә мәһкәм турған кичик етиқатдашлиримиз тоғрисида ойлинип көрүң. Уларниң һәр бириниң жүригидә Йәһва Худаға болған меһир-муһәббити бар вә шундақла улар садиқ болуп қелишини халайду. Йәһва Худаға хизмәт қилиш үчүн қиливатқан тағдәк ишлири тоғрисида ойлансақ, бир қариғанда улар аҗиз болуп көрүнсиму, улар һәқиқәтән «етиқатта бай» екәнлигини чүшинимиз (Яқуп 2:5).
w20.03 23-б., 17, 18-абз.
Қачан сөзлишимиз керәк?
17 Аюпниң йениға кәлгән төртинчи киши Ибраһимниң туққини Елиху болған. У Аюпниң вә башқа үч кишиниң сөзлирини диққәт билән тиңшиғачқа, Аюпқа көзқаришини өзгәртишкә ярдәм бәргән у меһрибанлиқ билән лекин удул нәсиһәт бәргән еди (Аюп 33:1, 6, 17). Елиху үчүн әң муһими өзигә яки башқа бир адәмгә әмәс, Йәһва Худаға шан-шәрәп кәлтүрүш еди (Аюп 32:21, 22; 37:23, 24). Елихуниң үлгисидин һәм сөзләшниң, һәм сөзлимәй сүкүт қилип турушниң өз вақти бар екәнлигини үгинимиз (Яқуп 1:19). Униңдин башқа, башқиларға нәсиһәт бәргәндә, әң муһим мәхситимиз — өзүмизгә әмәс, Йәһва Худаға шан-шәрәп кәлтүрүш.
18 Муқәддәс китаптики қачан вә қандақ сөзләш тоғрилиқ мәслиһәткә қулақ салсақ, сөзләш қабилийитимизни қәдирләйдиғанлиғимизни көрситәләймиз. Сулайман падиша мундақ язған: «Күмүч қачилардики алтун алмилар — бу өз вақтида ейтилған тоғра сөздур» (Пәнд н. 25:11). Башқиларни диққәт билән тиңшисақ вә ойлинип сөзлисәк, сөзлиримиз алтун алмилардәк қәдир-қиммәтлик вә чирайлиқ болиду. Шу чағда биз мәйли аз яки көп сөзләйли, сөзлиримиз башқиларға тәсәлли берип, Йәһва Худаниң қәлбини хошал қилиду (Пәнд н. 23:15; Әфәс. 4:29). Худа бәргән бу қабилийәт үчүн миннәтдарлиғимизни билдүрүшниң буниңдин артуқ йоли барму?
Роһий гөһәрләр
w13 1/15 19-б., 10-абз.
Йәһва Худаға йеқинлишиң
10 Шуниңға охшаш ташқи көрүнүшимиз һәққидә ойлишимиз керәк. Лекин йешимиз улғайғансири қерилиқниң һәммә бәлгүлири билән күришишимизниң һаҗити йоқ. Бундақ бәлгүләр адәмниң йәткән даналиғини вә ички дуниясини көрситиши мүмкин. Мәсилән, Муқәддәс китапта мундақ йезилған:«Чач ақириш — гөзәлликниң таҗиси вә У һәққанийлиқ йолида тепилиду» (Пәнд н. 16:31). Бу Йәһва Худаниң бизгә болған көзқаришини көрситиду вә биздиму шундақ көзқараш болуши керәк (Петрусниң 1-хети 3:3, 4ни оқуң). Шуңа чирайлиқ көрүнүшимиз үчүн керәксиз давалиниш яки хәтәрлик операцияларни қилишимиз әқиллиқ боламду? Йешимизға, саламәтлигимизгә қаримай һәрбиримиз Йәһва бәргән хошаллиқниң ярдимидә үзүмиздин нур йеғип, чирайлиқ болалаймиз (Нәһ. 8:10). Биз пәқәт йеңи дунияда сақ-саламәтлик болуп, қайта яш болалаймиз (Аюп 33:25; Йәшая 33:24). Шу вақит кәлгичә даналиқ билән иш қилсақ вә Йәһваға садиқ болуп, саламәтлигимизгә тәңпуңлуқ билән қарап, Йәһвадин жирақлишип кәтмәймиз (Тим. 1-х. 4:8).
8—14 ЯНВАРЬ
ХУДА СӨЗИДИКИ ҒӘЗНӘ | АЮП 34, 35
Һаят адаләтсиз болуп көрүнсә
wp19/1 8-б., 2-абз.
Худа, У қандақ?
Худа һәрдайим адаләтлик билән һәрикәт қилиду. Дәрһәқиқәт, «Худада наһәқлиқ йоқтур вә
Пәрвәрдигар адилсиз болмайду!» (Аюп 34:10). Униң һөкүмлири тоғридур. Зәбур язғучиси Йәһва тоғрилиқ мундақ дәп язған: «Сән хәлиқләрни адил сотлап, Уларға дурус йолни көрситисән» (Зәбур 67:4). Тәңри Йәһва «жүрәккә қарайду», шуңа сахтипәзлик қилип, Уни алдиғили болмайду вә Худа һемишәм һәқиқәтни ениқлап вә тоғра һөкүм чиқириду (Самуилниң 1-язмиси 16:7). Буниңдин башқа Яратқучимиз йәр йүзидә йүз бериватқан адаләтсизлик билән яманлиқни көрүп туриду. У пат-йеқинда «рәзилләр зиминдин үзүп ташлиниду» дәп вәдә бериду (Пәнд-нәсиһәтләр 2:22).
w17.04 10-б., 5-абз.
Худа Падишалиғи кәлгәндә немиләр йоқ болиду?
5 Йәһва Худа немә қилмақчи? Бүгүнки күндә Йәһва зулум адәмләргә өзгиришкә мүмкинчилик бериватиду (Йәшая 55:7). Гәрчә бу түзүмгә һөкүм чиқирилған болсиму, уларға ахирқи һөкүм техи чиқирилмиди. Бүйүк апәткичә бу дунияниң тәрәпдари болуп, өзгәргүси кәлмигән адәмләрни немә күтиватиду? Йәһва йәрни зулумлардин тазилайдиғанлиғини вәдә қилди (Зәбур 37:10ни оқуң). Һазир нурғун адәмләр яман ишларни йошурун қилғанлиқтин, пат-пат җазадин қутулуп қалиду (Аюп 21:7, 9). Лекин Муқәддәс китапта мундақ әскәртиш бар: «Униң нәзәри адәмниң йоллириниң үстидә туриду вә У инсанниң һәммә қәдәмлирини көрүп жүриду. Шуңа әскилик қилғучиларға йошурунғидәк һеч қараңғулуқ йоқтур, һәтта өлүмниң сайисидиму улар йошуруналмайду» (Аюп 34:21, 22). Демәк, Йәһвадин йошурунуш мүмкин әмәс. Худа зулумларниң һәммә ишлирини көрүп туриду. Һар-Магедондин кейин зулумларниң орниға қарап, һечкимни тапалмаймиз. Улар тамамән йоқ қилиниду (Зәбур 37:12—15).
w21.05 7-б., 19, 20-абз.
Сиз путлишип Әйсани рәт қиламсиз?
19 Бүгүнки күндә адәмләр охшаш көзқараштиму? Шундақ. Бизниң сәясий бетәрәпликни сақлишимиз нурғун адәмләргә путликашаң болиду. Улар бизди сайламда аваз беришимизни күтиду. Амма Йәһваниң көзқариши бойичә, биз инсанни һөкүмран сүпитидә таллисақ, Уни рәт қилған болумиз (Сам. 1-яз. 8:4—7). Кишиләр йәнә бизни мәктәпләрни, дохтурханиларни селип, башқиларға хәйир-сахавәт көрситиши керәк, дәп ойлайду. Биз бу дунияниң һазирқи қийинчилиқлирини һәл қилишқа әмәс, хуш хәвәрни вәз қилишқа күчимизни чиқарғач, уларға путликашаң болумиз.
20 Биз путлишип кетиштин өзүмизни қандақ сақлалаймиз? (Мәтта 7:21—23ни оқуң) Әң муһими, диққитимизни Әйса буйриған ишни қилишқа қаритишимиз керәк (Мәт. 28:19, 20). Шуңа бу дунияниң сәясий вә иҗтимаий ишлири диққитимизни бөлүвәтмәслиги керәк. Биз башқиларни яхши көрүмиз вә уларниң қийинчилиқлириға көңүл бөлүмиз. Амма шуниму яхши билимизки, хошнилиримизға ярдәм беришниң әң яхши усули — Худа Падишалиғи һәққидә уларға үгитип, Худа билән дост болушиға ярдәм бериш.
Роһий гөһәрләрни издәйли
w17.04 29-б., 3-абз.
Тәйярлиқ роһуңиз Йәһвани мәдһийилисун!
3 Елиху дегән бир жигит Аюп билән һелиқи үч кишиниң сөһбитини тиңшап турди. Улар сөһбәтлишип болғандин кейин у Аюптин Йәһва һәққидә: «Сән адил болсаң, Униңға немә бәрдиң? Яки У қолуңдин немә алди?»— дәп сориди (Аюп 35:7). Елихуму Худаға хизмәт қилип жүргинимиз бекар дәп ейтқуси кәлдиму? Яқ. Йәһва һелиқи үч кишини түзәткәндәк, Елихуни түзәтмиди. Чүнки Елихуниң көзқариши башқа болған. Униң ейтқини бойичә, Йәһва Худа бизниң униңға ибадәт қилишимизға муһтаҗ әмәс. Униңға һечкимдин һечнемә керәк әмәс: қандақту бир иш арқилиқ униң қудритини йә байлиғини көпәйтишкә мүмкин әмәс. Әмәлийәттә, һәммә яхши хисләтләр билән қабилийәтлиримиз Худадин вә уларни қандақ қоллинип жүргинимиз униң нәзәридин сирт қалмайду.
15—21 ЯНВАРЬ
ХУДА СӨЗИДИКИ ҒӘЗНӘ | АЮП 36, 37
Немә үчүн Йәһва Худаниң мәңгү һаят беримән дегән вәдисигә ишинишкә болиду?
w15 10/1 13-б., 1, 2-абз.
Худани тонуш мүмкинму?
ХУДА МӘҢГҮ ЯШАЙДУ. Муқәддәс китапта Яратқучимиз мәңгүлүк Худа дәп аталған (Зәбур 90:2). Башқа сөз билән ейтқанда, Худа дайим мәвҗут болған һәм мәңгү болиду. Адәмләрниң қөзқариши бойичә Худаниң жиллирини һесаплап саниғили болмайду (Аюп 36:26).
Мошу билимниң пайдиси. Әгәр Худани һәқиқәтән тонушни халисиңиз, У сизгә мәңгү һаятни соға қилимән дәп вәдә бериватиду (Йоһан 17:3). Әгәр Худа мәңгү мәвҗут болмиса, Униң бу вәдисигә ишинишкә боламду? Пәқәт «мәңгүлүкниң Падишаси» бу вәдини әмәлгә ашуралайду (Тимотийға 1-хәт 1:17).
w20.05 22-б., 6-абз.
Худа бәргән соғиларни қәдирләмсиз?
6 Йәр шарида су суюқ һаләттә мәвҗут, чүнки бу сәйярә Қуяштин мукәммәл жирақ арилиқта җайлашқан. Әгәр Йәр шари Қуяшқа азирақ йеқин җайлашқан болса, униңдики суниң һәммиси қайнап, һолинип йәр йүзи чидиғусиз иссиқ вә қурғақ болуп, униңда яшаш мүмкин әмәс болатти. Әксинчә, әгәр у Қуяштин азирақ жирағирақ җайлашқан болса, униңдики су тоңлап, Йәр йоған бир муз шарға айлинатти. Йәһва Худа Йәр шарини Қуяштин әң мувапиқ җирақлиқта җайлаштурған. Шу сәвәптин, йәр йүзидики су айлиниши мәвҗудатларниң яшишиға пурсәт яритиду. Қуяш нури океанлардики су билән йәр йүзидики суни исситқачқа, су һолинип, булутлар пәйда болиду. Һәр жили Қуяш 500000 куб километр суни һоға айландуриду. Бу сулар йәргә ямғур яки қар болуп чүшүштин авал, атмосферида тәхминән он күндәк туриду. Су ахирида океан яки башқа су мәнбәлиригә қайтип, су айлиниши давамлиқ қайтилинип туривериду. Йәр йүзидә һәрқачан суниң болуши үчүн Йәһва Худа бу айлинишни яратқан. Бу Униң дана вә күч-қудрәтлик екәнлигини испатлайду (Аюп 36:27, 28; Вәз 1:7).
w22.10 28-б., 16-абз.
Үмүтиңиз күчлүк болсун
16 Мәңгүлүк һаят үмүтимиз Худадин кәлгән қиммәтлик соғаттур. Биз келәчәккә болған бу гөзәл үмүт әмәлгә ашидиған күнни интизарлиқ билән күтиватимиз вә бир күни әшу күн чоқум келидиғанлиғиға ишинимиз. Худди кемә ләңгиригә охшаш үмүтимиз синақлар, зиянкәшликләр вә һәтта өлүмгә дуч кәлгәндә, бәрдашлиқ берип, Йәһвадин жирақлап кәтмәслигимиз үчүн бизни мустәһкәмләйду. Униңдин башқа, үмүт дубулға кәби, зеһнимизни қоғдайду. Шу арқилиқ хата ой-пикирләрни рәт қилип, тоғра ишни қилишта чиң туралаймиз. Муқәддәс китапқа асасланған үмүтимиз бизни Худаға йеқинлаштуриду вә Униң бизгә болған сөйгү-муһәббитиниң қанчилик чоңқурлиғини чүшинишимизгә ярдәм бериду. Әгәр үмүтимизни күчләндүрсәк, буниң көп пайдисини көримиз.
Роһий гөһәрләрни издәйли
it «Алақилишиш»
Алақилишиш
Қедимий заманда йеңилиқлар билән әхбаратлар адәмләргә һәртүрлүк йоллар билән йәткүзүлгән. Йәрлик яки башқа йәрдики йеңилиқлар көпинчә вақитларда еғиздин-еғизға тарқитилатти (С2я 3:17, 19; Ап 37:20). Карванлар маңидиған йолларда йолувчилар пат-пат тамақлиниш, су ичиш яки башқа керәклик нәрсиләр билән тәминлиши үчүн тохтиғанда, улар йеңилиқлар билән бөлүшәтти. Нурғун карван йоллири Палестина арқилиқ өтәтти. Палестина қолайлиқ йәргә җайлашқанлиқтин, у Азия, Африка билән Европини бириктүрүп туратти. Шуңа Палестина турғунлири чәт әл йеңилиқлири билән йәрлик вақиәләрдин хәвәрдар болатти. Йәрлик хәлиқләр чәт әл йеңилиқлирини көпинчә базарлардин аңлиған болуши мүмкин.
22—28 ЯНВАРЬ
ХУДА СӨЗИДИКИ ҒӘЗНӘ | АЮП 38, 39
Яратмилар үстидин ойлинишқа вақит чиқирамсиз?
w21.08 9-б., 7-абз.
Сиз Йәһвани күтүшкә тәйярму?
7 Муқәддәс китапта йәр шарини яратқанда, Йәһва зиминниң «чоң кичиклиги» вә «астини» бәлгүләп, «һулини» салғанлиғи тәсвирләнгән (Аюп 38:5, 6). У һәтта Өзиниң ишлирини тәкшүрүшкә вақит чиқарған (Ярит. 1:10, 12). Йәһваниң қәдәмму қәдәм йеңи бир нәрсини яратқанлиғини көргән пәриштиләрниң қандақ һис-туйғуда болғанлиғини тәсәввур қилаламсиз? Улар чоқум һаяҗанға толған. Шу сәвәп, улар нахша ейтип «хошаллиққа чөмгән еди» (Аюп 38:7). Буниңдин немигә үгинәләймиз? Йәһва яритиш ишини тамамлаш үчүн нурғун жилларни сәрип қилған. Бирақ Йәһва яратқан барлиқ мәвҗудатларни көрүп чиққанда, У һәммисиниң «наһайити яхши» екәнлигини көргән (Ярит. 1:31).
w20.08 14-б., 2-абз.
Тирилиш Худаниң меһир-муһәббити, даналиғи вә сәвирчанлиғини көрситиду
2 Дәсләптә Йәһва Худа тунҗа оғли Әйсани яратқан еди. Кейин Худа Әйса арқилиқ миллионлиған пәриштиләрни өз ичигә алған каинаттики барлиқ мәвҗудатларни яратқан (Кол. 1:16). Әйса Атиси билән хизмәтдаш болуп, шат-хорамлиққа чөмгән (Пәнд н. 8:30). Пәриштиләрму хошал-хорам болған. Йәһва Худа вә уста һүнәрвән Әйса асман вә йәрни яратқанда, Улар биринчи рәттә олтуруп, көрүп турғандәк еди. Пәриштиләр өзиниң хошаллиғини қандақ көрсәтти? Йәр яритилип болғандин кейин, Худаниң оғуллири хошаллиқтин тәнтәнә қилишқан. Улар һәммини яритилип болғанни көргәндә, болупму адәмләрниң яритилғанлиғини көргәндә, Худани мәдһийиләшни давамлаштурғанлиғи шәк-шүбһисиздур (Аюп 38:7; Пәнд н. 8:31). Йәһваниң һәрбир яратмиси Униң меһир-муһәббити вә даналиғини нәмаян қилған (Зәб. 104:24; Рим. 1:20).
w23.03 17-б., 8-абз.
Яратмиларни күзитиш арқилиқ Яратқучини яхширақ тонуп-билиң
8 Йәһва Униңға ишәнч қилишимизға әрзийду. Йәһва Аюпниң Униңға болған ишәнчисини ашурушиға ярдәм бәргән (Аюп 32:2; 40:6—8). Аюп билән өткүзгән сөһбитидә, Худа Өзи яратқан нурғун нәрсиләрни тилға алған. Уларниң ичидә юлтузлар, булутлар, чақмақлар бар еди. Йәһва йәнә явайи кала вә атлар қатарлиқ башқа һайванлар һәққидиму сөзлигән (Аюп 38:32—35; 39:9, 19, 20). Уларниң һәммиси Худаниң әҗайип күч-қудритинила әмәс, бәлки Униң сөйгү-муһәббити вә чәксиз әқил-параситиниму испатлап бәргән. Бу сөһбәтниң нәтиҗисидә, Аюп илгирикигә қариғанда, техиму бәкирәк Йәһваға ишәнч бағлиған (Аюп 42:1—6). Худди шуниңға охшаш, бизму яратмилар тоғрилиқ тәтқиқ қилип үгәнгәндә, Йәһваниң биздин нәқәдәр чәксиз әқиллиқ вә күч-қудрәтлик екәнлигини есимизгә алимиз. У йәнә барлиқ қийинчилиқлиримизни йоқ қилалайду вә пат арида йоқ қилиду. Бу һәқиқәт Униңға болған ишәнчимизни күчәйтишкә ярдәм берәләйду.
Роһий гөһәрләрни издәйли
it «Қанун бәргүчи»
Қанун бәргүчи
Йәһва Худа Қанун бәргүчи. Яратқучи Йәһва пүткүл Каинатта йеганә һәқиқий Қанун бәргүчи. Униң орнатқан физикилиқ қанунлириға җансиз яратмилар (Ап 38:4—38; Зб 104:5—19) вә һайванатлар дунияси беқиниду (Ап 39:1—30). Инсанму Худаниң яратмиси болғанлиқтин, Униң физикилиқ қанунлириғиму беқиниду. Шундақла инсан Худаниң әхлақий қанунлириғиму бойсунуши керәк. Инсанниң әқил-парасәт, өзигә хас әхлақий хисләт, ойлаш қабилийити вә роһий нәрсиләрни қобул қилиш иқтидари болғанлиқтин, у Худаниң әхлақий қанунлириға бойсуналайду (Рм 12:1; К1х 2:14—16). Һәтта, роһий мәвҗудатларму, йәни пәриштиләр Худаниң қанунлириға бойсуниду (Зб 103:20; Пт2х 2:4, 11).
Яратқучи Йәһваниң физикилиқ қанунлири һәргизму өзгәрмәйду (Йр 33:20, 21). Көзгә көрүнидиған каинаттики қанунниң өзгәрмәйдиғанлиғи шуки, һәтта алимлар ечилған қанунларға асаслинип Ай, планета вә башқиму асман җисимлириниң қозғилиши дәлму-дәл болуп, һәтта секундлириғичә ениқлалайду. Қандақту бир инсан физикилиқ қанунға қарши һәрикәт қилса, униң ақиветини бирдин көриду. Шундақла Худаниң әхлақий қанунлири һәргиз өзгәрмәйду. Биз уларни айлинип өтәлмәймиз, униңға әмәл қилмисақ җазасиз қалмаймиз. Әхлақий қанунларму физикилиқ қанунларға охшаш, бирақ әхлақий қанунларниң бир алаһидилиги униңға әмәл қилмисақ ақиветини бирдин көрмәслигимиз мүмкин. «Худа мәсхирә қилинидиған Шәхс әмәс. Инсан немә терисә, шунила жиғиду» (Гл 6:7; Т1х 5:24).
29 ЯНВАРЬ—4 ФЕВРАЛЬ
ХУДА СӨЗИДИКИ ҒӘЗНӘ | АЮП 40—42
Аюпниң тәҗрибисидин қандақ савақ алимиз?
w10 10/15 3, 4-б., 4—6 абз.
«Йәһва Худаниң әқлини ким тонуп-билипту?»
4 Йәһва Худаниң ишлири үстидин чоңқур ойланғинимизда, уларға өзүмизниң өлчәмлири бойичә һөкүм қилиштин сақлинишимиз керәк. Инсанниң бундақ майиллиғи һәққидә Зәбур 50:21-айәттә мундақ йезилған: «Сән мени өзәңдәк, дәп ойлидиң». Бир Муқәддәс китап тәтқиқатчиси 175 жил бурун мундақ дәп язған: «Инсан өз өлчәмлири бойичә Худаниң ишлирини һөкүм қилишқа майил. Шуңа улар биз бойсунушқа зөрүр болған қанунларға Худаму бойсунуши керәк дәп ойлайду».
5 Яратқучи Йәһва тоғрилиқ чүшәнчимиз өзүмизниң өлчәм вә арзу-истәклиримизгә асасланмаслиғи керәк. Немә үчүн бу муһим? Муқәддәс китапни тәтқиқ қилғинимизда, бизниң мукәммәлсиз вә чәкләнгән көзқаришимиз сәвәвидин, Йәһва Худаниң бәзи бир иш-һәрикити тоғра әмәстәк көрүнүши мүмкин. Қедимқи исраиллар нәқ шундақ ойлап, Тәңри Йәһваниң өзлиригә қандақ муамилә қилғанлиғиға қарита натоғра хуласигә кәлгән. Худаниң уларға немә дегәнлигигә диққәт қилиң: «Лекин силәр дәйдиғансиләр: “Йәһва адил иш қилмайду”. Мени тиңшап көрүңлар, Исраил өйи! Мениң йолум һәққаний әмәсму? Яки силәр адаләтсизлик қилмайватамсиләр» (Әзәк. 18:25).
6 Өз әқлимизгә тайинип, Яратқучи Йәһваниң иш-һәрикәтлиригә баһа бериштин нери болуш үчүн, әң муһими көзқаришимизниң чәклик екәнлигигә вә бәзидә хаталишидиғанлиғимизни етирап қилишимиз керәк. Аюп пәйғәмбәр мошу иш-һәрикәтни чүшиниши керәк еди. У қаттиқ азап-оқубәтләрни чәккәнликтин, чүшкүнлүккә чүшүп, диққитини өзигә мәркәзләштүргән. Шуңа Аюпниң нәзәридә бир муһим нәрсә сиртта қалған еди. Бирақ Йәһва Худа меһрибанлиқ билән Аюпниң көзқаришини түзитиш үчүн униңдин 70 соал сориған. Лекин Аюп бу соалларниң биригиму җавап берәлмигән. Шундақ қилип, Худа Аюпниң чүшәнчиси чәклик екәнлигини көрсәткән. Аюп пәйғәмбәр болса, кәмтәрлик билән өз көзқаришини өзгәрткән (Аюп 42:1—6ни оқуң).
w17.06 25-б., 12-абз.
Көзүңизни асасий мәсилигә тикиң
12 Йәһва Худаниң тазиму җапа чәккән Аюпқа мошундақ удул мәслиһәт бәргини рәһимсиз болдиму? Әлвәттә, яқ. Аюпму шундақ ойлимиған. Аюп Алланиң мәслиһәтлирини чүшинип, уларни баһалиди. У һәтта: «Мән өзүмдин-өзүм нәпрәтлинимән, шуниң билән мән топа-чаңлар вә күлләр арисида товва қилдим»,—деди (Аюп 42:1—6). Буниңдин авал Елиху исимлиқ яш жигитму униң көзқаришини өзгәртишигә ярдәмләшкән (Аюп 32:5—10). Аюп Худаниң меһир-муһәббәт билән бәргән мәслиһитини қобул қилип, көзқаришини өзгәрткәндин кейин, Йәһва Худа башқиларға униң синақ вақтида садақәтмән қалғанлиғиға рази болғанлиғини билдүрди (Аюп 42:7, 8).
w22.06 25-б., 17, 18-абз.
Йәһва Худаға үмүт бағлаң!
17 Худаниң нурғун хизмәтчилири җасарәт вә батурлуқ билән еғир синақларға бәрдашлиқ бәргән. Аюп шуларниң арисидики бири. Әлчи Паул Ибранийларға язған хетидә бу хизмәтчиләрни чоң бир гувачилар булути дәп атиған (Ибр. 12:1). Уларниң һәммиси қаттиқ синақлардин өткән вә өмүр бойи Худаға садиқ болуп қалған (Ибр. 11:36—40). Уларниң көрсәткән сәвир-тақити вә әҗир-меһнити бекарға кәткәнму? Наһайити ениқки, яқ! Гәрчә улар Худаниң вәдилириниң әмәлгә ешишини өз көзи билән көрмигән болсиму, Йәһваға давамлиқ үмүт бағлиған. Улар Йәһваниң улардин хурсән екәнлигини билгән. Шуңа вәдиләрниң әмәлгә ашурилидиғанлиғиға қәтъий ишәнгән (Ибр. 11:4, 5). Бизму уларни үлгә қилип, давамлиқ Йәһваға мәһкәм үмүт бағлайли.
18 Дуния барғансири техиму рәзиллишип кетиватиду (Тим. 2-х. 3:13). Шәйтан болса Худаға хизмәт қилидиған кишиләрни синашни давамлаштуриватиду. Келәчәктә қандақ синақларни баштин өткүзүшимиздин қәтъийнәзәр, тирик Худаға мәһкәм үмүт бағлап, Униңға хизмәт қилишқа бар күчимизни чиқиришқа қәтъий бәл бағлайли (Тим. 1-х. 4:10). Есиңиздә болсунки, Йәһва Аюп пәйғәмбәргә Өзиниң «меһир-шәпқәтлик вә рәһимдил Худа» екәнлигини испатлиған (Яқуп 5:11, ЙД). Ундақта, бизму Аюптәк «Уни [Йәһвани] әстаидил издигәнләрни У мукапатлайдиғиниға» ишәнч қилип, Яратқучимизға садиқ болуп қалайли (Ибранийларға 11:6ни оқуң).
Роһий гөһәрләрни издәйли
it «Мәсхирә»
Мәсхирә
Аюп пәйғәмбәр мәсхиригә қаримастин нуқсансизлиғини сақлап қалған садиқ киши еди. Амма у кәчүрмишлиригә натоғра көзқарашта болуп, хаталиқ өткүзгән. Кейин униң көзқариши түзитилгән еди. Елиху Аюп пәйғәмбәр тоғрисида мундақ дегән: «Қәйәрдә Аюптәк адәм бар? Күпүрлүкни судәк ичи[ду]» (Ап 34:7). Аюп Худаниң һәққанийлиғиға әмәс, өзиниң һәққанийлиғиға бәк көңүл бөлүп, өзиниң һәққанийлиғини Худаниңкидинму жуқурирақ қоюшқа майил болған (Ап 35:2; 36:24). У сахта достлириниң азар беридиған мәсхирә қилиши Худаға әмәс, маңа қаритилған еди дәп ойлиған. Қаримаққа, худди киши су ичиштин һузур алғанға охшаш, у аңлиған мәсхирисидин һузур алған. Бирақ Йәһва Худа Аюпқа әшу мәсхирә қилғучилар әслидә Худа тоғрисида яман дегәнлигини чүшәндүрүп берип, хизмәтчисиниң көзқаришини түзәткән (Ап 42:7). Шуниңға охшаш, исраиллар өзлириниң үстидин бир падиша қоюшни тәләп қилғанда, Худа Самуил пәйғәмбәргә: «Улар сени әмәс, бәлки Мән уларниң үстидин падишалиқ қилишимни рәт қилди»,— дегән (С1я 8:7). Әйса Мәсиһму өз шагиртлириға: «Барлиқ хәлиқләр мениң исмим үчүн силәрни өч көриду»,— дегән (Лқ 6:22, 23). Буларниң һәммисини әстә тутқан Мәсиһ әгәшкүчиси башқиларниң мәсхирә қилишиға тоғра қарап, униң үстидин ғәлибә қазиналайду. Нәтиҗидә садиқлиғи үчүн мукапатқа еришәләйду (Лқ 6:22, 23).
5—11 ФЕВРАЛЬ
ХУДА СӨЗИДИКИ ҒӘЗНӘ | ЗӘБУР 1—4
Худа Падишалиғи тәрипидә туруң
w21.09 15-б., 8-абз.
«Мән пүткүл әлләрни зил-зилигә кәлтүримән»
8 Бу хәвәргә адәмләр қандақ инкас қайтурди? Көпинчиси рәт қилди (Зәбур 2:1—3ни оқуң). Нурғун әлләрниң хәлқи буниңдин беарам болди. Улар Йәһва Худа тәйинлигән һөкүмранни қобул қилишни рәт қилиду. Биз йәткүзүватқан Падишалиқ хәвирини улар хуш хәвәр дәп қаримайду. Демәк, бәзи һөкүмәтләр вәз хизмитини мәнъий қиливатиду. Һәтта нурғун әлләрниң һөкүмранлири өзини Худаға хизмәт қиливатимиз дәп җакалисиму, улар өзлириниң тәсир күчи вә һоқуқидин ваз кечишни халимайду. Шуңа Әйсаниң заманидики һөкүмранларға охшаш, улар бүгүнки күндиму Худа тәйинлигән Мәсиһкә қарши чиқип, униң әгәшкүчилиригә зиянкәшлик қилиду (Әлч. 4:25—28).
w16.04 29-б., 11-абз.
Бөлүнгән дунияда бетәрәпликни сақлаң
11 Мал-дунияни яхши көрүш. Әгәр биз маддий нәрсилиримизни һәддидин зиядә яхши көрсәк, келәчәктә дуч келидиған синақларда, бетәрәпликни сақлап қалалмаслиғимиз мүмкин. Малавида яшайдиған Рут исимлиқ қериндишимиз 1970-жилларда етиқатдашлиримизниң шундақ әһвалға чүшүп қалғанлиғини көргән. У мундақ дәйду: «Улар үчүн баяшат һаяттин ваз кечиш қийин болған. Гәрчә һәммимиз өз жутимизни ташлап кетишкә тоғра кәлсиму, бәзибирлири сәясий партияға қошулуп, өз жутиға қайтип кәткән. Чүнки улар қачақлар лагеридики қолайсиз турмушқа көнәлмигән». Етиқатдашлиримизниң көпинчиси ихтисадий қийинчилиқларға вә мал-мүлүклидин айрилғанлиғиға қаримастин, бетәрәпликни сақлап қалған (Ибр. 10:34)
Роһий гөһәрләрни издәйли
it «Топан»
Топан
Топан — арпа, буғдайға охшаш ашлиқниң денини сақлайдиған непиз шакили (яки қасириғи). У ашлиқни соруп тазилиғанда чиқидиған қалдуқ. Топан дегән сөз Муқәддәс китапта образлиқ мәнада қоллансиму, буниңдин қедимий заманда ашлиқни қандақ тазилиғанлиғини билишкә болиду. Топан әмәс, ичидики дан баһалиқ болған. Шуңа топанни тамақ сүпитидә истимал қилмиғанлиқтин, ашлиқ жиғидиған вақитта униң һечқандақ пайдиси болматти. Шуңа топан керәксиз, салмақсиз, яхши нәрсидин айрип елинип, йоқ қилинидиған яман нәрсиләрни тәсвирләйду.
Ашлиқни түгмәндә тартиштин авал, данни топандин айривалатти. Андин ашлиқни соруп тазилиғанда, топан ғазаңға охшаш учуп кетәтти. Бу вәзийәт Йәһва Худа Өз хәлқини һәқиқәттин чәтнәп кәткәнләрдин қандақ тазилайдиғанлиғини вә зулум адәмләр билән дүшмәнлирини қандақ йоқ қилидиғанлиғини яхши испатлайду (Ап 21:18; Зб 1:4; 35:5; Йша 17:13; 29:5; 41:15; Һш 13:3). Худа Падишалиғиниң дүшмәнлири шу қәдәр «кукум-талқан» болудики, улар йеник топандәк шамал билән учуп кетиду (Дн 2:35).
Әхләткә айланған топанни жиғип, көйдүрүветиду. Шу чағда у қайтип учуп келип, догиланған ашлиққа арилишип кәтмәйду. Йәһия Чөмдүргүчи сахта динларниң йоқ қилинишини көйдүривәткән топан билән селиштурған. У Әйса Мәсиһниң буғдайни амбарға жиғивелип, андин «топан-саманни болса,... отта көйдүрүветиду»,— дәп ейтқан (Мт 3:7—12; Лқ 3:17) (Мт 3:7—12; Лқ 3:17).
12—18 ФЕВРАЛЬ
ХУДА СӨЗИДИКИ ҒӘЗНӘ | ЗӘБУР 5—7
Башқиларниң иш-һәрикәтлири сизгә тосалғу болмисун
w21.03 15-б., 7, 8-абз.
Муқәддәс китапни оқуш қийинчилиқларға бәрдашлиқ беришкә қандақ ярдәм бериду?
7 Достуңиз яки аилиңиздики бири сизгә хаинлиқ қилғанлиғи көңлүңизни ағриттиму? Шундақ болса, Давут падишаниң оғли Абшалом һәққидики вақиә сизгә ярдәм бериду. У өз дадисиға хаинлиқ қилип, униңдин падишалиғини тартивелишқа һәрикәт қилған (Сам. 2-яз. 15:5—14, 31; 18:6—14).
8 1) Дуа қилиш. Мошу вақиәни әстә тутуп, башқиларниң сизгә қилған рәһимсиз муамилиси һәққидә Худаға ейтип бериң (Зәб. 6:6—9). Униңға һис-туйғулириңизни ениқ ейтиң. Кейин Йәһвадин мошу қийин мәсилини бир тәрәп қилишқа йол көрситидиған принципларни тепишиңизға ярдәм беришни сораң.
w20.07 8, 9-б., 3, 4-абз.
Һәқиқәт йолини тапқиниңизға көз йәткүзүң!
3 Бизниң иман-етиқадимиз пәқәт Худа хизмәтчилириниң арисидики өз-ара меһир-муһәббәткила асаслинип қалмаслиғи керәк. Немә үчүн? Етиқатдашларниң бири, һәтта ақсақал яки пионер болсун, еғир гуна қилип яки сизни рәнҗитип қойди дәйли. Йә болмиса, һәқиқәттин чәтнәп кәткән киши силәрдә һәқиқәт йоқ дәп көңлиңизгә гуман салидиғанду. Шундақ вәзийәттә путлишип, Йәһва Худаға хизмәт қилишни тохтитамсиз? Буниңдин мундақ хуласә чиқарсақ болиду: әгәр етиқадимиз Худа билән болған мунасивитимизгә әмәс, пәқәт адәмләрниң ишлириға асасланса, ишәнчимиз аҗиз болиду. Өйни юмшақ материаллар билән салмиғандәк, ишәнчимизни һис-туйғуларға охшаш нәрсиләрдин әмәс, қаттиқ материаллар кәби әқилгә мувапиқ дәлил-испатлар билән тикләп турғузумиз. Муқәддәс китапниң Йәһва Худа һәққидә һәқиқәтни үгитидиғанлиғиға өзүңиз көз йәткүзүшиңиз керәк (Рим. 12:2).
4 Әйса Мәсиһ бәзиләр Худаниң сөзини аңлап, хошаллиқ билән қобул қилсиму, синақларға дуч кәлгәндә, етиқади вәйран болидиғанлиғини ейтқан (Мәтта 13:3—6, 20, 21ни оқуң). Бәлким, улар Әйсаға әгишип жүрсә, қийинчилиқларға дучар болидиғанлиғини чүшәнмигән (Мәт. 16:24). Еһтимал, улар Мәсиһниң әгәшкүчиси болуп, һечқачан қийинчилиқларға дучар болмай, бәхитлик һаят кәчүриду дәп ойлиған. Бирақ мошу рәзил дуния қийинчилиқларға толған. Вәзийәтләр өзгәргәндә, биз хошаллиқни вақитлиқ йоқитишимиз мүмкин (Зәб. 6:6; Вәз 9:11).
Роһий гөһәрләрни издәйли
it «Қәбир»
Қәбир
Римлиқларға 3:13-айәттә әлчи Паул Зәбур 5:9-айәттики сөзләрни кәлтүрүп, рәзил ялған сөзләйдиған адәмләрниң гекитигини «очуқ қәбир» билән селиштурған. Очуқ турған қәбирниң ичи чириған җәсәткә толғандәк, уларниң гекитәклири очуқ қәбирдәк сесиқтур (Мәт. 15:18—20ни селиштуруң).
19—25 ФЕВРАЛЬ
ХУДА СӨЗИДИКИ ҒӘЗНӘ | ЗӘБУР 8—10
«Аһ, Йәһва, пүтүн жүригимдин Сени махтаймән!»
w21.08 3-б., 6-абз.
Йәһваниң аилисидики орниңизни қәдирләң
6 Йәһва биз үчүн алаһидә бир маканни һазирлиған. Тунҗа инсанни яритиштин бурун, Яратқучи инсанлар үчүн йәр йүзини тәйярлиған (Аюп 38:4—6; Йәр. 10:12). У хошал болушимиз үчүн сехийлиқ вә меһрибанлиқ билән нурғун нәрсиләрни яратқан еди (Зәб. 104:14, 15, 24). Йәһва яратқанлири үстидә ойлинип, уларниң «яхши екәнлигини көрди» (Ярит. 1:10, 12, 31). У инсанларни яратмилар үстидин башқурушқа қоюп, уларни шан-шәрәпкә ериштүргән (Зәб. 8:6). Худа бизниң Өзи яратқан гөзәл яратмилиридин хәвәр елип, мәңгү хошаллиқ тепишимизни мәхсәт қилған. Сиз Йәһваниң әшу гөзәл вәдилири үчүн һәрдайим миннәтдарлиқ билдүрәмсиз?
w20.05 23-б., 10-абз.
Худа бәргән соғиларни қәдирләмсиз?
10 Сөзләш қабилийитини қәдирләйдиғанлиғимизни көрситишниң бир йоли — һәммә нәрсини Худа яратқанлиғини тәдриҗий тәрәққиятқа ишинидиған адәмләргә ейтип чүшәндүрүп бериш (Зәб. 9:1; Пет. 1-х. 3:15). Тәдриҗий тәрәққиятқа ишинидиған адәмләр Йәр шарини вә униңдики һаятлиқ өз-өзидин туюқсизла пәйда болған дегән нәзәрийини қоллайду. Биз Муқәддәс китап вә бу мақалидики бәзи ой-пикирләрниң ярдими билән әрштики Атимизни қоғдалаймиз. Шуниңдәк йәнә биз Йәһваниң йәр вә асманниң Яратқучиси екәнлигигә немә үчүн ишәнгәнлигимиз һәққидә аңлап беқишни халайдиғанларға чүшәндүрәләймиз (Зб 102:25; Йша 40:25, 26).
w22.04 7-б., 13-абз.
Сөзлириңиздә үлгә боламсиз?
13 Чин жүрәктин нахша ейтиң. Мәдһийә нахшилирини ейтқанда, диққитимизни Йәһвани улуқлашқа қаритишимиз керәк. Сара исимлиқ қериндаш өзини яхши нахшичи дәп қаримиған. Буниңға қаримай, у Йәһвани мәдһийиләп, нахша ейтишни халайду. У жиғилиштики башқа қисимларға тәйярлиқ қилғанда, нахша ейтишқиму тәйярлиқ қилиду. Сара өзи нахшиларни ейтишни мәшиқ қилип, нахшилардики асасий ой-пикир билән муһакимә қилинидиған мавзу оттурисида қандақ бағлиниш бар екәнлигини ениқлашқа тиришиду. Сара мундақ дәйду: «Бу мениң диққитимни қандақ нахша ейтишқа әмәс, нахша текстниң мәзмуниға көпирәк мәркәзләштүрүшүмгә ярдәм бериду».
Роһий гөһәрләрни издәйли
w23.03 19-б., 14-абз.
Яратмиларни күзитиш арқилиқ
Яратқучини яхширақ тонуп-билиң
14 Давут пәйғәмбәр Йәһваниң яратқанлири һәққидә чоңқур ойланған. У Йәһваға мундақ дегән: «Асманлириңға, бармақлириңниң ишиға, Сән орнатқан ай билән юлтузларға қариғанда, мундақ ойлаймән: у чағда адәм балиси у ким? Сән уни есиңға алидиған инсан оғли у ким?» (Зәб. 8:3, 4). Дәрвәқә, Давут кечә асминиға нәзәр салғанда, пәқәтла юлтузларға қарап һузурланмиған, у йәнә юлтузлар униңға Яратқучи Худа һәққидә немиләрни ашкарилайдиғанлиғини чоңқур ойлиған. У Йәһваниң нәқәдәр улуқ екәнлигини үгәнгән. Башқа вақитларда Давут анисиниң қосиғида өз тениниң қандақ тәрәққий қилип шәкилләнгәнлиги үстидә ойланған. У мошу әҗайип тәпсилатлар үстидә ойланғинида, Йәһваниң әқил-параситигә болған миннәтдарлиғи техиму ашқан (Зәб. 139:14—17).
26 ФЕВРАЛЬ—3 МАРТ
ХУДА СӨЗИДИКИ ҒӘЗНӘ | ЗӘБУР 11—15
Өзүңизни Йәһваниң течлиқ йеңи дуниясида екәнлигиңизни көз алдиңизға кәлтүрүң
w06 5/15 18-б., 3-абз.
Зәбур китавидики пайдилиқ ой-пикирләр
Қайси һул-асаслар вәйран қилинған? Бу инсанийәт җәмийитиниң таянч күчи болған асасий қанунни, тәртип вә адаләтликни билдүриду. Әгәр улар күчини йоқатса, дунияда қалаймиқанчилиқ башлинип, тәртипсизлик вә адаләтсизлик һөкүм сүриду. Шундақ шараитларда һәққаний адәм пүтүнләй Худаға тайиниши зөрүр (Зәбур 10:4—7).
wp16.4 11-б.
Зораванлиқ болмайдиған вақит келәмду?
Муқәддәс китапта Худаниң пат йеқинда зораванлиқ болмайдиған вақит келиду дегән вәдиси бар. Бүгүнки күндики «рәзил инсанлар[ни] һалак қилинидиған қиямәт күни» күтиду (Петрусниң 2-хети 3:5—7). Әнди һечким җинайәтчиләрниң қилмишлиридин азапланмайду. Худа зораванлиқни түп йилтизидин йоқ қилишни халайдиғанлиғиға немә үчүн ишинәләймиз?
Муқәддәс китапта: «Рәзил билән Зомигәрни Униң [Худаниң] җени өч көриду» дәп йезилған (Зәбур 11:5). Яратқучи Худайимиз течлиқ вә адаләтни яхши көриду (Зәбур 33:5; 37:28). Шуниң үчүн Худа зулум адәмләрниң мәңгү мәвҗут болушиға йол қоймайду.
w17.08 6-б., 15-абз.
Сиз сәвир-тақәт билән күтүшкә тәйярму?
15 Давут немишкә сәвир-тақәт билән күтүшкә тәйяр болған? Буниң җававини у «Қачанғичә?» дәп төрт қетим сориған Зәбурниң 13-бабида язған. Давут мундақ дегән: «Мән болсам, Сениң өзгәрмәс муһәббитиңгә өзүмни тапшурдум, жүригим Сениң ниҗатиңда шатлиниду, мән Пәрвәрдигарға нахша ейтимән, чүнки У маңа зор меһрибанлиқни көрсәтти» (Зәбур 13:5, 6). Давут Йәһваниң уни яхши көридиғанлиғини вә униңға садиқ болидиғанлиғини билгән. У Йәһваниң бурун өзигә қандақларчә ярдәм қолини бәргини һәққидә мулаһизә қилған һәм қийинчилиқлирини йоқ қилидиған вақтини тақәтсизлик билән күткән. Давут Йәһваниң бәрикәтлири һәқиқәтән күтүшкә әрзидийғанлиғини чүшәнгән.
kr 236-б., 16-абз.
Падишалиқ Худаниң ирадисини йәрдә әмәлгә ашуриватиду
16 Бехәтәрлик. Жүрәккә тәсир қилидиған Йәшая 11:6—9дики пәйғәмбәрлик сөзләрниң удул мәнада әмәлгә ашидиғанлиғини өз көзүмиз билән көрүмиз. Мәйли әр яки аял вә бала болайли, қәйәрдә яшишимиздин қәтъийнәзәр, һәммимиз бехәтәрликтә яшаймиз. Һәрқандақ мәвҗудат, йәни адәмләр, һайванлар һечкимгә зиян кәлтүрмәйду. Пүткүл йәр йүзи бойичә өзүңизни худди өйүңиздә болғандәк бехәтәр һис қилидиғанлиғиңизни тәсәввур қилип көрүң. Һечкимдин вә һечнемидин қорқмай, дәрия, деңиз вә океанларда чөмүлүп, тағларға чиқип, чимәнзарлиқта сәйлә қилалайсиз. Қараңғу чүшкән вақитта әнсирмәйсиз. Әзәкиял 34:25-айәттики сөзләр әмәлгә ашиду вә Худа хизмәтчилири «далада бехәтәр яшайду вә орманларда хатирҗәм ухлайду».
Роһий гөһәрләрни издәйли
w13 9/15 19-б., 12-абз.
Әқлиңизни йеңилап, өзгириватамсиз?
12 Бәк әпсуски, әтрапимиздики адәмләрниң көпинчиси әлчи Паул тилға алған яман хисләтләрни көрситиду. Улар мәлум бир өлчәм яки принциплар бойичә яшаш замандин қалған яки башқиларни буларға әмәл қилишқа мәҗбурлимаслиқ керәк дәп ойлиши мүмкин. Көпинчә муәллимләр билән ата-анилар балиларға немә халисаң, шуни қил дәйду. Улар неминиң тоғра яки хаталиғини һәрбир инсан өзи ениқлиши керәк дәп үгитиду. Һәтта Худаға ишинидиған нурғун кишиләр Худаниң қаидилиригә әмәл қилиш шәрт әмәс дәп һесаплайду (Зәб. 14:1). Шундақ көзқараш һәқиқий Мәсиһ әгәшкүчилиригиму яман тәсир қилиши еһтимал. Еһтиятчан болмиғанлар, Худаниң тәшкилати арқилиқ берилгән көрсәтмиләрни көзгә илмай, һәтта наразилиқ билдүрүши мүмкин. Яки оюн-тамашә, интернет вә алий билим тоғрисида Муқәддәс китапқа асасланған нәсиһәтләргә сәл қариши мүмкин.