Мүҗәз-хулқи охшимайдиған қош гезәк оғул

СИЗЧӘ, бу икки оғул балиниң қандақ пәрқи бар? Сиз уларниң исмини биләмсиз? Әву очи болса Әсав. Қойлардин хәвәр еливатқини Яқуп.

Әсав вә Яқуп, Исһақ билән Рибәқаниң қош гезәк оғуллири еди. Атиси Исһақ Әсавни бәкму яхши көрәтти, сәвәви Әсав яхши бир очи болуп, аилидикиләр үчүн йемәкликләрни олап келәтти. Бирақ, Рибәқа Яқупни толиму яхши көрәтти. Чүнки, у жугач-юмшақ, убдан бала еди.

Уларниң бовиси Ибраһим һаят вақтида, бовисиниң Йәһва тоғрисида ейтип бәргәнлирини, Яқупниң қанчилик яқтуруп аңлиғанлиғини хиял қилип беқиңа. Ахири, Ибраһим 175 йешида өлүп кәтти. Шу чағда, шу қош гезәк оғуллар 15 яшта еди.

Әсав 40 яшта, қананлиқ икки қиз билән той қилди. Бу Исһақ билән Рибәқаниң көңлини наһайити беарам қилди. Сәвәви, у икки аял Пәрвәрдигар Йәһваға ибадәт қилматти.

Кейин бир күни, бир иш йүз берип, Әсав өз инисиға қаттиқ аччиқланди. Шу чағда Исһақ тунҗа оғлиға хәйирлик дуга қилмақчи болған еди. Әсав Яқуптин чоң болғач, атисиниң хәйирлик дугасиға Әсавниң еришиши тәбиий иш еди. Бирақ, Әсав хәйирлик дугаға еришиш һоқуқини илгири Яқупқа сетивәткән. Униңдин башқа, Худа у икки оғул туғулғандила, Яқупниң бәрикәтләшкә еришидиғанлиғини ейтқан еди. Ишлар һәқиқәтән шундақ йүз бәрди. Йәни Исһақ хәйирлик дугасини оғли Яқуп үчүн қилди.

Кейин, Әсав бу ишларни билип, Яқупқа қаттиқ аччиқланди. У наһайити ғәзәплинип, һәтта Яқупни өлтүрмәкчи болған еди. Рибәқа бу ишларни аңлап, бәкму әнсириди. Шуңа, у ери Исһаққа: “Әгәр Яқупму қананлиқ қизларни аяллиққа алса, бу бәкму қорқунчлуқ иш болиду”, деди.

Шуңлашқа, Исһақ Яқупни чақиритип келип, униңға: “Қананлиқ қиз билән той қилма. Һарандики боваң Бетуелниң өйигә бар. У йәрдә униң оғли Лабанниң қизлиридин бири билән той қил”, деди.

Яқуп атисиниң тапшуруғини аңлап, Һарандики туққанлириниң қешиға бериш үчүн дәрһал узун сәпәргә атланди.