Яқупниң чоң аилиси

ҚАРАҢ, бу чоң бир аилә кишилиригә! Улар Яқуп пәйғәмбәрниң 12 оғуллири. Униң қизлириму бар еди. Бу балиларниң арисидики бирәрсиниң исмини биләмсиз? Уларниң бир қанчиси билән тонушуп чиқайли.

Леяһ Рубен, Шимон, Лавий, Йәһудаларни туғди. Амма, Раһилә өзиниң туғмиғанлиғи үчүн көп һәсрәт чәкти. Шуңа, Раһилә өзиниң хизмәткари Билһани Яқупқа кичик аяллиққа бәрди. Билһа Дан вә Нафтали дегән икки оғулни туғди. Кейин, Леяһму өз хизмәткари Зилпани Яқупқа кичик аяллиққа бәрди. Зилпа Гад билән Ашерни туғди. Леяһ әң ахири, йәнә Иссакар вә Зәбулун дегән икки оғулни туғди.

Ахири, Раһиләму бир оғул туғди. У оғлиға Йүсүп, дәп исим қойди. Кейинирәк, биз Йүсүп тоғрисида көпирәк үгинимиз. Чүнки, у муһим бир шәхс болған еди. Әшу 11 оғул Яқуп Раһиләниң дадиси Лабан билән биллә яшиған вақитта туғулған еди.

Яқуп пәйғәмбәрниң йәнә қизлириму бар еди. Лекин, Муқәддәс Китап шуларниң арисидики пәқәт бириниң исмини тилға алған болуп, униң исми Дина еди.

Кейин, Яқуп Лабандин айрилип, жути Қананға қайтип кетишни қарар қилди. Шуңа, у өзиниң қой, кала падилирини жиғип, аилисидикиләр билән узун сәпәргә атланди.

Яқуп пәйғәмбәр вә униң аилисидикиләр Қанан зиминиға қайтип маңғанда, узун өтмәй Раһилә сәпәр үстидә йәнә бир оғул туғди. Раһилә туғутида наһайити қийнилип, ахири Раһилә туғут үстидә өлүп кәтти. Лекин, у оғул бовақ сағлам еди. Яқуп униңға Бинямин, дәп исим қойди.

Биз Яқуп пәйғәмбәрниң 12 оғлиниң исимлирини есимиздә тутувелишимиз керәк, сәвәви улар барлиқ Исраил хәлқиниң ата-бовилири болған еди. Әмәлиятта, Исраилниң 12 қәбилисиниң нами, Яқупниң 10 оғли вә Йүсүпниң икки оғлиниң исми билән аталған. Яқупниң оғуллири туғулуп узун жиллардин кейин, Исһақ өлүп кәткән еди. У һаят чеғида, шунчә көп нәврилик болғини үчүн, чоқум бәкму хошал болғанду, һә! Бирақ, һазир униң нәврә қизи Динаға немә болғанлиғини көрүп бақайли.