Икки җасур аял

ИСРАИЛ хәлқиниң бешиға еғир күнләр кәлгәндә, улар Йәһваға налә-пәрият қилишти. Пәрвәрдигар Йәһва уларға җавап берип, хәлиққә ярдәм беридиған батур башламчиларни тайинлиди. Муқәддәс Китапта бу башламчилар һакимлар, дәп аталған. Йәшу биринчи һаким болған болуп, униңдин кейин һаким болған бәзиләрниң исимлири Осниел, Иһуд вә Шәмгар еди. Униңдин башқа, исраил хәлқигә ярдәм бәргәнләр арисида икки аял бар болуп, исимлири Дебора вә Яел еди.

Дебора бир аял пәйғәмбәр болуп, Худа Йәһва униңға кәлгүси һәққидә хәвәр берәтти. У Йәһваниң ейтқанлирини хәлиққә йәткүзәтти. Дебора йәнә һакимлиқму қилатти. У тағлиқ жуттики мәлум бир хорма дәриғиниң астида олтиратти. Қийинчилиққа учриған кишиләр болса униң қешиға ярдәм сорап келәтти.

Шу вақитта, Ябин Қананниң падишаси болуп, униң 900 җәң һарвуси бар еди. Униң қошунлири күчлүк болуп, исраил хәлқи Ябинға қул болушқа мәҗбурланған еди. Падиша Ябинниң қошуниниң сәркәрдиси Сисера еди.

Бир күни Дебора, Барақ дегән һакимни чақиртип келип, Йәһваниң сөзини униңға йәткүзди. Йәһва мундақ дегән еди: “Сән 10000 кишини елип, уларни Табор теғиға башлап бар. Мән Сисерани қешиңға әвәтимән. Сени Сисера вә униң қошунлири үстидин ғалибигә ериштүримән”.

Барақ Дебораға: “Әгәр сәнму мән билән барсаң, мән баримән”, деди. Дебора униң билән барди. Амма, у Бараққа: “Сән ғалибә шан-шәрипигә шерик болмайсән, чүнки Йәһва Сисерани бир аялниң қолиға тапшуриду”, деди. Һәммә ишлар дегәндәк болуп чиқти.

Барақ Сисераниң әскәрлири билән җәң қилиш үчүн Табор теғидин чүшти. Уштумтут Йәһва бир кәлкүн сүйи пәйда қилди, көплигән дүшмән әскәрлири суға ғәриқ болди. Амма, Сисера җәң һарвусидин чүшүп, қечип кәтти.

Бир аздин кейин, Сисера Яелниң чедириға кәлди. Яел уни чедирға тәклип қилип, униңға сүт бәрди. Сүт униң уйқисини кәлтүрүп, узун өтмәй у тезла ухлап кәтти. Шуниң билән, Яел чедирниң бир қозуғини елип, у яман адәмниң бешиға қақти. Кейин Барақ кәлгәндә, Яел өлүк Сисерани униңға көрсәтти! Дебораниң ейтқан сөзлириниң әмәлгә ашқанлиғини әндиғу көрүп йәткәнсиз?!

Ахирида, падиша Ябинму өлтүрүлди. Исраил хәлқи бир мәзгил қайта теч-аманлиққа еришти.