Тәйярлиқ роһуңиз Йәһвани мәдһийилисун!

1, 2. а) Елифаз билән Билдадниң ейтишичә, Худа хизмитимизгә қандақ қарайду? ә) Йәһва бу һәққидә немә ейтти?

ҮЧ МИҢ жил илгири үч киши Худаниң садақәтмән хизмәтчиси Аюпқа келип, униң билән сөзләшкән. Уларниң бири, теманлиқ Елифаз, униңға келәрки қизиқарлиқ соалларни қоюду: «Адәм Худаға қандақму пайда кәлтүрәлисун? Дана адәмләрму униңға немә пайда кәлтүрәлисун? Сән һәққаний болсаң, Һәммидин қадирға немә хурсәнчилик берәләттиң? Йоллириң әйипсиз болса, униңға немә ғенимәт келиду?» (Аюп 22:1—3). Елифазниң өзи бу соалларға «һечнемә» дәп җавап берәтти. Шу кишиләрниң йәнә бири, шивақлиқ Билдад, адәмләрниң Худаниң көз алдида адил болалмайдиғанлиғини ейтти (Аюп 25:4ни оқуң).

² Елифаз билән Билдад Аюпни Йәһваға тиришип хизмәт қиливатқанлиғи бекар болғанлиғиға ишәндүргиси кәлди. Улар Аюпни адәмләр Худаниң көз алдида пәрванә, қурут яки сазаңға охшаш бир тийин турмайду дегән ойға кәлтүрмәкчи болди (Аюп 4:19; 25:6). Мошундақ сөзләрни улар кәмтәр болғанлиқтин ейттиму? (Аюп 22:29). Йәһваниң биздин нәқәдәр улуқ екәнлиги сөзсиз вә биз униң алдида чаң-топидәк. Тағниң чоққиси яки самолетниң деризисидин төвәнгә қарисақ, адәм балисиниң қанчилик кичик вә мәнасиз болғанлиғини һис қилимиз. Бирақ бизниң қиливатқан хизмитимиз билән Падишалиқ иши үчүн тәр төкүватқанлиғимизға Йәһва мошундақ қарамду? Яқ! Йәһва Елифаз, Билдад вә үчинчи киши, Зопарға, сөзлириниң ялған екәнлигини ейтти. Андин Худа Аюпқа разилиғини билдүрүп, уни «қулум Аюп» дәп атиған (Аюп 42:7, 8). Демәк, биз мукәммәлсиз болсақму, «Худаға пайда кәлтүрәләймиз».

«УНИҢҒА НЕМӘ БӘРДИҢ?»

3. Елихуниң ейтишичә, Йәһва хизмитимизгә қандақ қарайду? Бу немини билдүриду?

³ Елиху дегән бир жигит Аюп билән һелиқи үч кишиниң сөһбитини тиңшап турди. Улар сөһбәтлишип болғандин кейин у Аюптин Йәһва һәққидә: «Сән адил болсаң, Униңға немә бәрдиң? Яки У қолуңдин немә алди?»— дәп сориди (Аюп 35:7). Елихуму Худаға хизмәт қилип жүргинимиз бекар дәп ейтқуси кәлдиму? Яқ. Йәһва һелиқи үч кишини түзәткәндәк, Елихуни түзәтмиди. Чүнки Елихуниң көзқариши башқа болған. Униң ейтқини бойичә, Йәһва Худа бизниң униңға ибадәт қилишимизға муһтаҗ әмәс. Униңға һечкимдин һечнемә керәк әмәс: қандақту бир иш арқилиқ униң қудритини йә байлиғини көпәйтишкә мүмкин әмәс. Әмәлийәттә, һәммә яхши хисләтләр билән қабилийәтлиримиз Худадин вә уларни қандақ қоллинип жүргинимиз униң нәзәридин сирт қалмайду.

4. Башқиларға яхшилиқ қилғинимизда, Йәһва немини һис қилиду?

⁴ Хизмәтчилиригә меһир-шәпқәт көрсәтсәк, Йәһва бу һәрикәтләрни өзигә қаритилған дәп санайду. Пәнд-нәсиһәтләр 19:17дә: «Кәмбәғәлләргә рәһимдиллиқ қилған, Пәрвәрдигарға қәриз бәргән билән баравәрдур, униң шәпқитини Пәрвәрдигар қайтурар»,— дәп йезилған. Йәһва бизниң рәһимдиллик билән қилған һәрбир ишимизни байқайду. У каинатниң Яратқучиси болсиму, шундақ ишлиримиз үчүн өзини бизниң алдимизда қәриздар дәп һесаплап, қәрзини мол қайтуриду. Буни Худаниң Оғли Әйсаму тәстиқлигән (Луқа 14:13, 14ни оқуң).

5. Қандақ соалларни қараштуримиз?

⁵ Қедимда Йәһва Йәшая пәйғәмбәргә өзиниң вәкили болуп, алаһидә хизмәт қилишқа тәғдим қилған (Йәшая 6:8—10). Йәшая бу тәғдимни хошаллиқ билән қобул қилип: «Мана мән! Әвәткәйсән мени!» — деди. Бүгүнки күндиму Йәһва садақәтмән хизмәтчилирини өзи билән хизмәтдаш болушқа тәклип қилиду. Улар Йәшаяниң роһиға охшаш роһни көрситиду. Миңлиған қериндашлар һәр түрлүк йоллар билән, һәр түрлүк җайларда хизмәт қилип, қийин вәзийәтләргә қаримастин, өзлиригә тапшурулған ишни орунлашқа тәйяр. Лекин бирлири мундақ ойлиши мүмкин: «Йәһваниң ишиға һәссә қошуш мүмкинчилиги үчүн миннәтдармән, амма қилған әмгигимниң һәқиқәтән пайдиси барму? Мән хизмәт қилсамму, қилмисамму — Йәһва өз ишини бәри бир әмәлгә ашуридиғу?» Сизниму мошундақ соаллар қизиқтурғанму? Йәһваниң қедимки икки хизмәтчисиниң, Дебора билән Барақниң, баштин өткүзгән вәзийитини қараштуруп, мошу соалларниң җававини тепишқа тиришайли.

ХУДА ҚОРҚУНУЧНИ ҖАСУРЛУҚҚА АЙЛАНДУРИДУ

6. Немишкә Ябинниң әскәрлири исраиллиқларни оңайла йеңивалалайдиғандәк көрүнгән?

⁶ Барақ исраиллиқ җәңчи, Дебора болса, аял пәйғәмбәр болған. 20 жил давамида Қананниң падишаси Ябин исраиллиқларға «тола зулум қилип турған еди» (Һакимлар 4:1—3, 13; 5:6—8). Ябин падишаниң әскәрлири шунчилик зулум вә рәһимсиз болғанки, йезиларда яшиған исраиллиқлар һәтта өйлиридинму чиқиштин қорққан. Уларниң уруш қилидиған ярақ-қураллириму, һимайә қилидиған савутиму болмиған, Ябинниң болса, төмүр чалғилири бар 900 җәң һарвуси болған (Һакимлар 4:1—3, 13; 5:6—8)a (Изаһәткә қараң.).

7, 8. а) Йәһва алди билән Бараққа немә қилишни тапшурди? ә) Исраиллиқлар Ябинниң әскәрлирини қандақ йеңивалди? (Мақалиниң бешидики рәсимгә қараң.)

⁷ Ябинниң әскәрлири билән селиштурғанда, исраиллиқлар аҗиз вә оңай йеңивелишқа болидиғандәк көрүнгән. Лекин Йәһва Худа Дебора аял пәйғәмбәр арқилиқ Бараққа: «Нафтали қәбилиси билән Зәбулун қәбилисидин он миң кишини өзүң билән биллә елип, Табор теғиға чиққин. Мән болсам, Ябин қошун сәрдари болған Сисерани өз һарву қошунлири билән Қишон дегән еқинниң бойиға қешиңға елип келип, қолуңға тапшуримән»,— деди (Һакимлар 4:4—7).

⁸ Мошу тәләпкә 10000 пидаий әр киши инкас қайтуруп, Табор теғиға кәлди. Шуниңдин кейин Барақ вә адәмлири Таанақ дегән җайда дүшмәнлири билән урушти (Һакимлар 4:14—16ни оқуң). Йәһва исраиллиқларға ярдәм қилдиму? Һә. Туюқсиз шақрап яққан ямғур башланғанда, уруш мәйдани патқақчилиққа айланди. Бу исраиллиқларға дүшмән әскәрлирини йеңивелишқа мүмкинчилик бәрди. Андин Барақ Сисераниң әскәрлирини Шорошәт дегән йәргичә 24 километр қоғлап барди. Қечиватқанда Сисераниң җәң һарвуси патқаққа петип қалди. У һарвусидин сәкрәп чүшүп, Қадешниң йенидики Заананим дегән җайға қачти. Шу йәрдә Сисера Яәл исимлиқ аялниң чедирида йошурунди. Һерип кәткән Сисера өлүктәк ухлап қалди. Шу чағда Яәл ухлаватқан Сисерани җасурлуқ билән өлтүрүвәтти (Һакимлар 4:17—21). Шундақ қилип, Йәһва исраиллиқларни ғәлибигә ериштүрди!b (Изаһәткә қараң.)

ПИДАИЙ ХИЗМӘТКӘ ТЕГИШЛИК ИККИ ТҮРЛҮК КӨЗҚАРАШ

9. Һакимлар 5:20, 21дин Сисераға қарши уруш һәққидә немә билимиз?

⁹ Һакимлар китавиниң 4-бабида тәсвирләнгән вақиәләр һәққидә 5-баптин көпирәк билимиз. Һакимлар 5:20, 21дә: «Асман тәрипидинму уруш болуп, юлтузлар болса өз җайидин чүшүп, Сисераға қарши урушти. Қишон дәрияси уларни еқитип кәтти»,— дәп йезилған. Бу сөзләр җәң вақтида исраиллиқларға пәриштиләр ярдәм бәргәнлигини яки асмандин таш яққанлиғини билдүрәмду? Муқәддәс китапта бу һәққидә һечнәрсә ейтилмиған. Лекин келәрки хуласә мәнтиқий: Йәһва Худа дүшмәнниң 900 җәң һарвуси асан маңалмаслиғи үчүн ениқ йәр билән ениқ вақитта ямғур яғдуруп, хәлқини аман елип қалди. Һакимлар 4:14, 15тә исраиллиқларниң ғәлибиси Йәһваниң ярдими арқилиқ болғанлиғи үч қетим йезилған. Һәқиқәтән, җәңгә қатнашқан 10000 пидаий әскәр ғәлибигә өз күчи билән еришмигән.

10, 11. Мероз дегән немә? У немә сәвәптин ләнәт қилинди?

¹⁰ Әнди интайин қизиқарлиқ нәрсигә көңүл бөләйли. Исраиллиқлар дүшмәнләрни йеңивалғандин кейин, Дебора билән Барақ мундақ дәп нахша ейтти: «“Силәр Мерозға ләнәт қилип, Худавәндиниң ярдимигә, дәрвәқә залимларға қарши Худавәндигә ярдәм бәрмигини үчүн уларниң олтарғучилириға қаттиқ ләнәт қилиңлар”,— дәп Худавәндиниң пәриштиси ейтти» (Һакимлар 5:23).

¹¹ Мероз дегән немә? Буни кесип ейтиш қийин. Мерозға ейтилған ләнәт орунлинип, униң изиму қалмиди. Бу турғунлири Барақ билән җәңгә беришни халимиған шәһәрниң нами болуши еһтимал. Қананийлиқлар билән урушқа 10000 пидаий әскәр жиғилғанлиғини мерозлиқларму аңлиғанду. Сисера қачқанда Мероз шәһири арқилиқ өткән болушиму мүмкин. Шәһәр турғунлирида уни тутувелиш мүмкинчилиги болсиму, улар уни пайдиланмиғанду. Залим җәңчиниң алди-кәйнигә қаримай шәһәр кочилирида қечип кетиватқанлиғини көргән мерозлиқларни тәсәввур қилиң. Уларда Йәһваниң ирадисиниң орунлинишиға һәссә қошуш мүмкинчилиги бар еди. Әгәр уни пайдиланған болса, Йәһва уларни мукапатлатти. Лекин улар Йәһва үчүн яхшилиқ қилмай, қарап туривәрди. Җасур һәрикәт қилған Яәл билән мерозлиқларниң пәрқи асман билән йәрдәк болди (Һакимлар 5:24—27).

12. Һакимлар 5:9, 10да қандақ икки топ тәсвирләнгән вә бу бизни немә қилишқа дәвәт қилиду?

¹² Һакимлар 5:9, 10дин көргинимиздәк, 10000 пидаий әскәрләр вә урушқа бармиғанлар мутләқ охшиматти. Дебора билән Барақ «хәлиқ ичидин хушлуқ билән» чиққан «Исраилниң һакимлирини» махтиди. Пидаий хизмәткә бармай, ғораздәк ғадийип, «ақ ешәкләргә мингәнләрниң» роһи мутләқ башқичә болған. Улар «нәпис зилчиләрниң үстидә олтарғанлар» вә «йолда меңип», қолайлиқ һаят кәчүрүватқанлар сүпитидә тәсвирләнгән. Өз ихтияри билән Бараққа әгәшкәнләр болса, әксичә, Табор теғиниң қорам ташлириниң егизлигидә җәң қилип, Қишон вадисиниң сазлиғини кечип жүрди. Шуңа раһәтлик һаятни издәп жүргәнләргә «Ойлиниңлар!» дегән агаһландуруш берилгән. Улар Йәһваниң ишиға һәссә қошушниң мүмкинчилигини йоқитип қойғанлиғи һәққидә ойлиниши керәк еди. Бизму Худаға хизмәт қилишқа қанчилик диққәтчан екәнлигимизни тәкшүрүп турушимиз керәк.

13. Рубән, Дан вә Ашәр билән Зәбулун вә Нафтали қәбилилири қандақ икки түрлүк көзқарашта болған?

¹³ Он миң пидаий әскәр Йәһваниң Аләмниң һөкүмрани сүпитидә һәрикәт қилғанлиғини өз көзлири билән көрди. Улар «Худавәндиниң адалитини даңлиғанда», башқиларға мошу һәққидә ейтқанду (Һакимлар 5:11). Рубән, Дан вә Ашәр қәбилилирини алсақ, улар Йәһваға хизмәт қилиш һәққидә ойлашниң орниға, мал-мүлки, кемилири вә деңиз портлири һәққидә көпирәк ғәм қилған (Һакимлар 5:15—17). Лекин һәммә қәбилә мундақ болмиған. Зәбулун вә Нафтали қәбилилири Дебора билән Барақни қоллаш үчүн «өзини өлүмгә тутуп бәрди» (Һакимлар 5:18). Мошундақ охшимайдиған көзқарашта болған адәмләрдин тәйярлиқ билән хизмәт қилишқа тегишлик муһим савақ алалаймиз.

ЙӘҺВАНИ МӘДҺИЙИЛӘҢЛАР!

14. Йәһваниң Һөкүмранлиғини қоллайдиғанлиғимизни қандақ көрситәләймиз?

¹⁴ Бүгүн биз Йәһваниң һакимийитини қоллайдиғанлиғимизни көрситиш үчүн удул мәнада урушқа қатнашмаймиз. Буниң орниға, биз җасур вә қизғин вәз қилимиз. Һазир Йәһваниң хизмитини қилиш үчүн пидаийлар һаҗәт болған дәл пәйтидур. Миллионлиған қериндашлиримиз, шу җүмлидин көплигән яшларму, толуқ вақитлиқ хизмәтниң һәрқандақ түрлиригә қатнашмақта. Мәсилән, улар пешқәдәм сүпитидә яки Бәйтәлдә хизмәт қилиду, Ибадәт өйлирини қурушқа қатнишиду вә конгрессларда ярдәм бериду. Бәзи ақсақаллар Дохтурханилар билән алақилишиш комитетлирида хизмәт қилип, конгрессларни уюштуриду. Йәһва бизниң һаҗәтлик йәрдә хизмәт қилишқа ихтияримизни баһалайду вә әмгигимизни һечқачан унтумайду (Ибранийларға 6:10).

15. Йәһваниң ишиға болған қизғинлиғимизниң совумиғанлиғиға қандақ көз йәткүзишимиз мүмкин?

¹⁵ Һәммимиз пидаий хизмәткә тегишлик көзқаришимизни тәкшүрүшимиз муһим. Өзүмиздин мундақ сорисақ болиду: ишниң көпинчисини башқилар қилсун дәп жүримәнму? Мени Йәһваға хизмәт қилиштин пул тепиш көпирәк қизиқтурамду? Барақ, Дебора, Яәл вә 10000 пидаий әскәрниң ишәнчисигә тәқлит қилип, Йәһваға хизмәт қилиш үчүн қолумдин кәлгәнниң һәммисини қилимәнму? Пул тепип, шараитимни яхшилитиш үчүн башқа шәһәргә яки дөләткә көчүп баримәнму? Шундақ оюм болса, бу аиләм билән җамаәткә қандақ тәсир қилидиғанлиғи һәққидә яхши ойлинип, дуа қилдимму?c (Изаһәткә қараң.)

16. Йәһва һечнәрсигә муһтаҗ болмисиму, биз униңға немә берәләймиз?

¹⁶ Һөкүмранлиғини қоллаш мүмкинчилигини бериш арқилиқ Йәһва бизгә һөрмәт көрситиду. Адәм ата билән Һава аниниң заманидин бери Шәйтан бизни униң тәрипидә болуп, Йәһваға қарши турушимизни халайду. Лекин Йәһваниң һөкүмранлиғини қоллисақ, Шәйтанға кимниң тәрипидә екәнлигимизни ениқ көрситимиз. Ишәнчимиз билән садиқлиғимиз бизни Йәһваға пидаий хизмәт қилишқа дәвәт қилип, униң жүригини хурсән қилиду (Пәнд-нәсиһәтләр 23:15, 16). Худайимизни садақәтмәнлик билән қоллап, итаәт қилғанлиғимиз униң Шәйтанниң заңлиқ қилғиниға җавап беришкә асас болиду (Пәнд-нәсиһәтләр 27:11). Шундақ қилип, итаәтчанлиғимиз Йәһва үчүн интайин баһалиқ болуп, уни бәк хошал қилиду.

17. Һакимлар 5:31дин келәчәктики вақиәләр һәққидә немә билимиз?

¹⁷ Йеқин арида йәрдики һәрбир турғун Йәһваниң тәрипигә туруп, униң һөкүмранлиғини қоллайду. Биз шу вақитни тақәтсизлик билән күтимиз! Һәммимиз Барақ билән Дебораға қошулуп: «Әй Худавәндә, сениң һәммә дүшмәнлириң болса шундақ тәриқидә йоқ болуп кетип, сени дост тутқанларниң өзи чүш вақтидики аптаптәк болсун»,— дәп нахша ейтқумиз келиду (Һакимлар 5:31). Бу сөзләр Шәйтанниң зулум дунияси йоқ қилинғанда әмәлгә ашиду. Һар-Магедон уруши башланғанда, Йәһва дүшмәнлирини һалак қилиш үчүн пидаий хизмәтчиләрниң ярдимигә муһтаҗ болмайду. Униң орниға биз «пут тирәп туруп», «Худавәндә беридиған ниҗатқа қарап» туримиз (Тарихнамә 2-язма 20:17). Мошу вақит кәлгичә Йәһваниң һөкүмранлиғини җасарәт вә қизғинлиқ билән қоллаш мүмкинчилигини қолдин чиқармайли.

18. Сизниң Йәһваға пидаий хизмәт қилғанлиғиңиз башқиларға қандақ пайда әкелиши мүмкин?

¹⁸ Дебора билән Барақ ғәлибә нахшисини адәмләрни әмәс, Йәһвани мәдһийиләштин башлиди. Улар: «Хәлиқ өзи көңүл хуши билән уларға әгәшмәк үчүн Худавәндигә һәмдусана ейтиңлар»,— дегән (Һакимлар 5:1, 2). Келиңлар, тәйярлиқ роһини көрситип, башқиларни Йәһваға «һәмдусана ейтишқа» дәвәт қилайли!