Жифтахниң вәдиси

ИЛГИРИ бирсигә вәдә берип, кейин шу вәдиңиздә туруш қийинға тохтиған чағлириңиз болуп баққанму? Рәсимдики бу кишигә қараң! У шундақ ишқа дуч кәлгәч, наһайити қайғурған. Бу киши исраилларниң батур һакими Жифтах.

Жифтах, исраиллар Алла Йәһваға ибадәт қилишни йәнә ташлиған бир заманда яшиған еди. Исраиллар давамлиқ яман ишларни қилғач, Йәһва аммонлуқларниң уларға зулум қилишиға йол қойған еди. Шуңлашқа, исраиллар Йәһваға: “Биз гуна қилдуқ. Бизни қутқузуп қалғайсән!”, дәп йелинип ялвурди.

Улар қилған ишлириға өкүнүп һәсрәт чекишти. Улар қайта Пәрвәрдигар Йәһваға ибадәт қилиш арқилиқ өзлириниң хаталиғи үчүн қайғурғанлиғини көрсәтти. Шуңа, Йәһва уларға йәнә ярдәм бәрди.

Исраил хәлқи аммонлуқларға қарши уруш қилиш үчүн Жифтахни қошунға башчи болушқа таллиди. Жифтах Йәһваниң җәңдә өзигә ярдәм беришини бәкму арзу қилатти. Шуңлашқа, У Йәһваға: “Әгәр сән мени аммонлуқлар үстидин ғалибигә ериштүрсәң, мән ғалибә билән өйгә қайтқанда, алдимға чиққан тунҗа кишини саңа беримән”, дәп вәдә қилди.

Пәрвәрдигар Йәһва Жифтахниң вәдисини аңлап, җәңдә униңға ярдәм берип ғалибигә ериштүрди. Жифтах өйигә қайтқанда, кимниң тунҗа болуп униң алдиға чиққанлиғини биләмсиз? Униң бирдин-бир ялғуз қизи! Жифтах: “Аһ, қизим, сән мени ғәм-қайғуға салдиңғу! Мән Йәһваға вәдә қилған едим, вәдәмдин йенивалалмаймән”, дәп жиғлиди.

Жифтахниң қизи дадисиниң бәргән вәдисини билгәндә, дәсләптә уму һәсрәт чәкти. Сәвәви, у дадиси вә достлиридин айрилиши керәк еди. Бирақ, у қалған өмридә, Шилоһтики Пәрвәрдигар Йәһваниң ибадәт чедирида, униңға хизмәт қилатти. Шуңа, у дадисиға: “Әгәр сиз Йәһваға вәдә қилған болсиңиз, чоқум вәдиңиздә турушиңиз керәк”, деди.

Шуңа, Жифтахниң қизи өмүр бойи Йәһваниң ибадәт чедирида, униңға хизмәт қилиш үчүн Шилоһқа барди. Һәр жили төрт күн исраил аяллар униң билән көрүшкили у йәргә берип, бирликтә хошал-хорам ойнап күлүшәтти. Кишиләр Жифтахниң қизини яхши көрәтти. Чүнки, у Йәһваниң әң яхши хизмәтчиси еди.