Давутниң қечип кетиши

ДАВУТ Җолятни өлтүргәндин кейин, исраилларниң қошуниниң сәркәрдиси Абнер, Давутни Саулниң алдиға елип кәлди. Саул Давуттин наһайити хурсән болғач, уни өз қошунлириниң сәркәрдиси қилди. Һәм падиша уни өз өйидә турғузуш үчүн елип кәтти.

Кейин, қошунлар филистинликләр билән уруш қилип йенип кәлгәндә, аяллар: “Саул нәччә миңни өлтүрди, бирақ Давут нәччә он миңни өлтүрди”, дәп нахша ейтишти. Шуниң билән, Саулниң һәсәтхорлуғи башланди. Чүнки, Давут Саулдин көпирәк шан-шөһрәткә егә болған еди. Амма, Саулниң оғли Йонатан һәсәт қилматти. У Давутни бәкму яхши көрәтти. Давутму Йонатанни яхши көрәтти. Шуңа, улар бир-биригә мәңгүлүк дост болушқа вәдә беришти.

Давут чилтар челишқа бәк маһир еди. Саул униң чалған музыкисини аңлашқа амрақ еди. Бирақ, бир күни Саулниң һәсәтхорлуғи уни яман иш қилишқа қутратти. Давут чилтар челиватқинида, Саул қолиға нәйзисини елип, униңға қаритип етип: “Мән Давутни тамға қадап қойимән!”, деди. Бирақ, Давут өзини қачурди. Нәйзә униңға санчилмиди. Кейин, Саул Давутқа йәнә нәйзә атти. Бирақ, йәнә санчиялмиди. Шуниң билән, Давут әнди қаттиқ диққәт қилиши керәклигини билди.

Саулниң қилған вәдиси ядиңизда барму? У Җолятни өлтүргән кишигә қизини аяллиққа беридиғанлиғини ейтқан еди. Саул ахири қизи Микални Давутқа беридиғанлиғини ейтти. Бирақ, Давут чоқум 100 филистинлик дүшмәнни өлтүрүши шәрт еди. Ойлап көрсәк! Әмәлиятта Саул филистинликләрниң Давутни өлтүрүшини үмүт қилған еди. Амма, улар Давутни өлтүрәлмиди. Шуңа, Саул қизини Давутқа аялиққа бәрди.

Саул бир күни Йонатан вә барлиқ хизмәтчилиригә өзиниң Давутни өлтүрмәкчи екәнлигини ейтти. Амма, Йонатан дадисиға: “Давутқа яманлиқ қилмисун. У саңа гуна қилмиған. Әксичә, униң қилған ишлири саңа чоң ярдәм бәргән. У өз җенини алқиниға елип, Җолятни өлтүргәндә, сән уни көрүп наһайити хурсән болған едиң”, деди.

Саул оғлиниң сөзини аңлап, Давутқа яманлиқ қилмаслиққа вәдә бәрди. Йонатан Давутни қайтуруп кәлгәндә, у илгирикидәк Саулниң ханлиқ сарийида хизмәт қилди. Амма, бир күни саз челиватқанда, Саул йәнә нәйзисини Давутқа қаритип атти. Давут өзини қачурди. Нәйзә берип тамға қадилип қалди. Бу үчинчи қетим шундақ иш йүз бериши еди! Әнди Давут чоқум қечип кәтмисә болмайдиғанлиғини билип йәтти.

Шу кечиси Давут өз өйигә қайтип кәтти. Бирақ, Саул уни өлтүрүшкә адәм әвәтти. Микал дадисиниң шундақ қилмақчи болғанлиғини билгән еди. Шуңа өз еригә: “Әгәр бу кечә қечип кәтмисәң, әтә өлтүрүлисән”, деди. Шуниң билән, Микал Давутқа ярдәм қилип, уни деризидин қачурувәтти. Йәттә жилғичә, Давут у йәр, бу йәрдә мөкүп жүрди. Шуңа, Саул уни тапалмиди.