Худаниң падиша һизикиягә ярдәм бериши

БУ АДӘМНИҢ немә үчүн Йәһваға дуга қиливатқанлиғини биләмсиз? У немә үчүн хәтләрни Йәһваниң қурванлиқ суписиниң алдиға қойди? Бу адәм Һизикия. У җәнубий икки қәбилә падишалиғиниң падишаси. У қийинчилиқларға дуч кәлгән еди. Немә үчүн?

Чүнки, Ассирия қошуни аллиқачан Исраилниң шималий 10 қәбилисини вәйран қилған еди. Ассирияликләр 10 қәбилә хәлқини вәйран қилғанда, Йәһва уларни тосимиди. Сәвәви, 10 қәбилә хәлқи наһайити рәзил ишларни қилған еди. Әндиликтә, Ассирия қошуни икки қәбилә падишалиғиға һуҗум қилип кәлди.

Ассирия падишаси Һизикия падишаға бир қанчә парчә хәтни әвәтти. Һизикияниң Худаниң алдиға қойғини дәл шу хәтләр. Бу хәтләрдә Йәһвани мазақ қилип, Һизикияни тәслим болушқа чақирған. Шу сәвәп, Һизикия Йәһва Худаға дуга қилған. У: “Әй Йәһва, бизни Ассирия падишасидин қутқузғайсән. Шундила, барчә падишалиқлар, сәнла ялғуз Худа екәнлигиңни билгәй”, деди. Йәһва падиша Һизикияниң дугасиға қулақ салдиму?

Һизикия яхши падиша еди. У Исраилниң 10 қәбилә падишалиғиниң падишалири вә өз атиси падиша Аһазға охшаш рәзил әмәс еди. Һизикия Йәһваниң барчә қанунлириға садақәтмәнлик билән итаәт қилатти. Шуңа, Һизикия дугасини түгәткәндин кейин, Йәшая пәйғәмбәр униңға Йәһвадин кәлгән мону хәвәрни йәткүзди: “Ассирия падишаси Йерусалимға кирмәс. Һәтта һеч бир әскәр йеқин кәлмәс. Улар шәһәргә қаритип бир тал оқ яму атмас”.

Бу бәттики рәсимгә қараң. Бу өлгән әскәрләр кимләр, биләмсиз? Улар ассирияликләр. Худа өз периштәсини әвәткән еди. У периштә бир кечидә 185 000 ассириялик әскәрләрни өлтүрди. Шуңа, Ассирия падишаси шәһәргә һуҗум қилиштин ваз кечип, дөлитигә қайтип кәтти.

Икки қәбилә падишалиғи қутулуп қалғандин кейин, хәлиқ бир мәзгил хатирҗәм турмуш кәчүрди. Амма, Һизикия өлгәндин кейин, униң оғли Манассә падиша болди. Манассә вә униңдин кейин падиша болған оғли Амон һәр иккиси рәзил падишалар еди. Шуңа, жут йәнә җинайәтләр билән зораванлиққа толуп кәтти. Падиша Амонни униң өз хизмәтчилири өлтүрүвәткәндин кейин, униң оғли Йошия икки қәбилә падишалиғиниң падишаси болди.