Худа хәлқиниң Бабилондин айрилиши

МЕДИЯЛИҚЛАР билән персиялиқлар Бабилонни бойсундурғандин кейин, 2 жилчә вақит өтүп кәткән еди. Әнди немә иш йүз бериватқанлиғиға қараң! Худаниң хәлқи Бабилондин айрилип кетип бариду. Улар қандақ әркин болди? Уларниң кетишигә ким рухсәт қилди?

Уларниң кетишигә Персия падишаси Курс буйруқ чүшәргән еди. Курс туғулуштин узун заманлар илгири, Йәһваниң пәйғәмбири Йәшая, Курс тоғрисида сөзләп мундақ дегән: “Сән, дәл мән сениң қилишиңни арзу қилған ишни қилисән. Шәһәрни ишғал қилишиң үчүн шәһәрниң дәрвазилири сән үчүн очуқ қалиду”. Дәрвәқә, Курс қошунға башчилиқ қилип, Бабилонға һуҗум қилди. Медиялиқлар билән персияликләр кечидә келип, очуқ қалған дәрвазидин шәһәргә кирди.

Бирақ, Йәһваниң пәйғәмбири Йәшая, Курсниң Йерусалим вә униң ибадәтханисини қайта ясаш үчүн буйруқ беридиғанлиғиниму ейтқан еди. Курс шундақ буйруқ бәрдиму? Дәрвәқә шундақ қилди. Курс исраилларға: “Һазир Йерусалимға берип, Худайиңлар болған Йәһваниң ибадәтханисини ясаңлар”, деди. Булар дәл Йерусалимға қайтиш үчүн сәпәргә атланған исраиллардур.

Бирақ, Бабилондики барлиқ исраиллар Йерусалимға қайтиш үчүн узун сәпәр қилалматти. Чүнки, бу сәпәр тәхминән 800 километрчә болуп, көпинчә қерип кәткән яки кесәл кишиләр ундақ узун йол жүрәлмәтти. Униңдин башқа, бәзи кишиләрниң қайтип кетәлмәслигидә башқа сәвәпләрму бар еди. Бирақ, Курс Йерусалимға кетәлмәйдиған кишиләргә буйруқ қилип: “Қайтип Йерусалим вә униң ибадәтханисини ясайдиған кишиләргә алтун-күмүч вә башқа соғатларни бериңлар”, деди.

Шуңа, нурғун кишиләр соғатларни елип келип, Йерусалимға қайтмақчи болған исраилларға бәрди. Курс һәм уларниң падишаси Нәбуқәднәсәр Йерусалимни вәйран қилғанда, Йәһваниң ибадәтханисидин елип кәткән җам вә қача-қомучларни бәрди. Шуңа, исраиллар нурғун нәрсиләрни елип қайтти.

Төрт ай сәпәр қилғандин кейин, исраиллар Йерусалимға вақтида қайтип кәлди. Бу вақит дәл шәһәр вәйран қилғандин кейинки 70-жили еди. Жут чөл-қақас ташлинип, адәм олтармиған еди. Гәрчә исраиллар өз жутиға қайтип кәлгән болсиму, амма уларниң бәзи қийинчилиқларға дуч келидиғанлиғи һәққидә давамлиқ көрүп өтимиз.