Худаниң ярдимигә ишәнч қилиш

НӘЧЧӘ миңлиған киши Бабилондин Йерусалимға қайтиш үчүн узун сәпәргә атланди. Бирақ, улар Йерусалимға йетип кәлгәндә, пәқәт бир чоң харабилиқ қалған болуп, адәм яшиматти. Исраиллар барлиқ нәрсиләрни қайтидин ясап чиқиши керәк еди.

Уларниң тунҗа болуп ясиғини бир қурванлиқ суписи болди. Улар бу супини Йәһваға тәғдим қилип, йәни җан-җаниварларни қурван қилиш үчүн ишләтмәкчи еди. Бир қанчә айдин кейин, исраиллар ибадәтхана қурулушини башлиди. Амма, йеқин әтрапта олтирақлашқан дүшмәнләр, исраилларниң ибадәтхана селишини халимиди. Шуңа, улар исраилларни қорқутуп, уларниң қурулуш ишини тохтитишқа урунди. Ахирида, бу дүшмәнләр Персияниң йеңи падишасини қурулуш ишини тохтитиш қануни чиқиришқа қайил қилди.

Жиллар бир-бирини қоғлишип өтүп кәтти. Мана исраиллар Бабилондин қайтип кәлгинигә 17 жил болған еди. Йәһва өз пәйғәмбәрлиридин Һәҗи вә Зәкәрияни, хәлиққә қурулуш ишини қайта башлашни ейтишқа әвәтти. Хәлиқ Худаниң ярдимигә ишәнч қилип, пәйғәмбәрләрниң сөзлиригә итаәт қилди. Гәрчә ибадәтхана салмаслиқ тоғрисида қанун чиқирилған болсиму, улар қайта қурулуш ишини башлиди.

Шуңа, Таттинай исимлиқ бир Персия әмәлдари келип, исраиллардин ибадәтхана селишқа қандақ һоқуқи барлиғини сориди. Улар Таттинайға: ‘Исраиллар Бабилондики вақтида, падиша Курс: “Һазир, Йерусалимға берип Худайиңлар болған Йәһваниң ибадәтханисини ясаңлар”, дегән еди’, дәп җавап бәрди.

Таттинай Бабилонға хәт әвәтип, Курсниң илгири растинла шундақ дегән яки демигәнлигини билип бақмақчи болди. Узун өтмәй, Персия йеңи падишасидин җавап хәт кәлди. У хәттә, Курсниң һәқиқәтән шундақ буйруқ бәргәнлиги ейтилған еди. Һәм падиша: “Исраилларни өз Худасиниң ибадәтханисини селишиға йол қоюңлар. Һәм силәр уларға ярдәм бериңлар дәп буйруқ қилимән”, дәп язған еди. Ибадәтхана қурулуши 4 жилчә вақит ичидә пүтти. Исраиллар наһайити хошал болушти.

Йәнә нурғун жиллар арқа-арқидин өтүп кәтти. Мана һазир ибадәтхана пүткинигә 48 жилчә болған еди. Йерусалим хәлқи намратлишип кәтти. У шәһәр вә Худаниң ибадәтханиси наһайити вәйранә көрүнәтти. Шу вақитта, Бабилонда туруватқан исраил киши Әзра, Худаниң ибадәтханисини түзәп оңшашниң зөрүр болуватқанлиғини аңлиған еди. Ундақта, униң қандақ қилғанлиғини биләмсиз?

Әзра Персия падишаси Артаһшашта билән көрүшкили барди. Бу яхши падиша униң Йерусалимға елип бериши үчүн көп соғатларни бәрди. Әзра Бабилондики исраиллардин униңға ярдәмлишип, бу соғатларни Йерусалимға апирип беришни сориди. Тәхминән 6 000 киши биргә беришқа мақул болди. Улар нурғун алтун-күмүч вә башқа қиммәтлик нәрсиләрни биллә елип меңиши керәк еди.

Әзра бәк әнсириди. Чүнки, бу узун сәпәрдә, йол үстидә яман адәмләр көп еди. Бу адәмләр алтун-күмүчләрни елип кетип, уларни өлтүрүветиши мүмкин еди. Шуңа, Әзра худди сиз бу рәсимдә көрүп турғандәк, көпчиликни жиғилип җәм болушқа чақирди. Андин кейин, улар Йәһваға дуга қилип, Йерусалимға қайтиш узун сәпиридә өзлирини қоғдашни өтүнди.

Пәрвәрдигар Йәһва һәқиқәтән уларни қоғдиди. Тәхминән төрт ай йол жүргәндин кейин, улар тинич-аман Йерусалимға йетип кәлди. Бу Йәһваниң ярдимигә ишәнч қилғанларни, униң қоғдашқа қадир екәнлигини көрситиду, шундақ әмәсму?