Худаниң йәр шари үчүн қандақ мәхсити бар?

ХУДА йәр шарини инсанлар үчүн гөзәл макан қилип яритип бәргән. Муқәддәс Язмилар: «Асманлар Йәһваниң асманлири, У инсанларға йәр йүзини бәрди»,— дәп баян қилиду (Зәбур 115:16, ЙД).

Тунҗа инсан Адәм атини яритиштин авал Худа йәр йүзидики Ерәм дегән бир парчә йәрни таллап, гөзәл бағ бәрпа қилған еди. Муқәддәс Язмилар Фират вә Диҗлә дәриялири шу Ерәм дегән җайдин еқип келидиғанлиғини ейтидуa. Мошу сәвәп, кишиләр җәннәтни һазирқи Түркия зимининиң шәрқий райониға җайлашқан дәп қаришиду. Дәрвәқә, Ерәм бағ йәр йүзидә болған!

Пәрвәрдигар Адәм атини яритип, «Ерәм беғини пәрвиш қилип, бағдин хәвәр елишқа орунлаштурди» (Яритилиш 2:15). Кейин Худа Адәм атиниң аяли Һава анини яратқан. У мошу бир җүп инсанға: «Әвлат көрүп көпийиңлар, йәр йүзини толтуруңлар, уни асраңлар»,— дәп әмир-пәрман чүшәргән (Яритилиш 1:28). Наһайити ениқки, Худа «йәрни бекарға әмәс, инсанларниң яшиши үчүн яратқан» (Йәшая 45:18, ЙД).

Амма Адәм ата билән Һава ана Пәрвәрдигарниң қанунини бузуш арқилиқ Яратқучиға қарши исиян көтәргән. Шуңа Йәһва Худа уларни җәннәттин қоғлап чиқарған. Уларниң җәннәттә яшаш пурсити йоқалған. Һәтта Адәм атиниң гунаси сәвәплик, техиму яман ақивәт пәйда болған. Қандақ яман ақивәт? Муқәддәс Язмилар: «Бир инсан арқилиқ дунияда гуна пәйда болди вә гуна арқилиқ өлүм пәйда болди. Шуниң билән өлүм һәммә инсанлар арисиға тарқалди, чүнки уларниң һәммиси гуна қилған»,— дәйду (Римлиқларға 5:12, ЙД).

Йәр йүзи шат-хорамлиққа чөмгән кишиләр билән толуп, инсанларниң җәннәт маканиға айлиниши керәк. Йәһва Өзиниң бу дәсләпки мәхситидин ваз кәчтиму? Әлвәттә, яқ! Худа шундақ дәйду: «Мениң ағзимдин чиққан сөз-каламим шундақтур. Өз көңлүмдикини әмәлгә ашурмиғичә, уни әвәтиш мәхситимгә толуқ йәтмигичә, у Өзүмгә бекардин-бекар қайтмайду» (Йәшая 55:11, КТ). Җәннәт йәр йүзидә қайтидин бәрпа қилиниду!

Җәннәттики турмуш қандақ болиду? Төвәндә Худаниң вәдилирини көрүп өтүмиз.