5-БӨЛҮМ

Уруқ-туққанлар билән инақлиқни сақлаңлар

«Меһриванлиқ, әқил мөмүнлигиниң, мулайимлиқ һәм узақ сәвирликниң назук сезимлиригә пүркүнәйли» (Колосилиқларға 3:12).

Нека қийилғанда, йеңи аилиниң һули қурулиду. Гәрчә сиз ата-аниңизни һәрдайим һөрмәтләп, яхши көрсиңизму, әнди сиз үчүн дуниядики әң йеқин адәм — өмүрлүк йолдишиңиздур. Бәлким, уруқ-туққанлириңизниң бәзибирлиригә бу пикир билән келишиш асан болмайду. Бу мәсилидә тоғра көзқарашта болушқа сизгә Муқәддәс китаптики принциплар ярдәм берәләйду. Улар арқилиқ уруқ-туққанлириңиз билән инақлиқта болуп, некариңизни мустәһкәм қилалайсиз.

1. УРУҚ-ТУҚҚАНЛИРИҢИЗҒА НИСБӘТӘН ТОҒРА КӨЗҚАРАШНИ САҚЛАҢЛАР

Әр-аял ата-анилири билән вақит өткүзмәктә

МУҚӘДДӘС КИТАПТА НЕМӘ ЙЕЗИЛҒАН? «Ата-анаңни һөрмәтлә» (Әфәсликләргә 6:2). Нәччә яшта болушиңиздин қәтъийнәзәр, ата-аниңизни һөрмәтлишиңиз керәк. Өмүрлүк җүптиңизму бирлириниң әзизлик оғли яки қизи, шуниң үчүн ата-анисиға көңүл бөлүш — униң пәрзи. «Меһир-муһәббәт қизғанмайду», шуңа өмүрлүк җүптиңизни униң атисиға яки анисиға қизғиниш наданлиқтур (Коринтлиқларға 1-хәт 13:4; Галатилиқларға 5:26).

ПАЙДИЛИҚ МӘСЛИҺӘТЛӘР

«Ата-анаң маңа дайим чепилиду» яки «Сениң апаң һечқачан рази болмайду» дегән ашурма гәп-сөзләрдин нери болуң.
Һәммә нәрсиләргә йолдишиңизниң нуқтәий нәзәридин қарашқа тиришиң.

2. АИЛИҢИЗ ҮЧҮН ПӘҚӘТ ӨЗҮҢИЗ ҖАВАПКӘР

МУҚӘДДӘС КИТАПТА НЕМӘ ЙЕЗИЛҒАН? «Әр киши ата-анисидин айрилип, өз аялиға чаплишиду вә улар бир тән болиду» (Яритилиш 2:24). Өй-отақлиқ болғандин кейин, ата-анаңлар өзлирини бурунқидәкла силәр үчүн җавапкәр дәп ойлап, аиләвий ишлириңларға һәддидин ташқири арилишиши мүмкин.

Аиләвий ишлириңларға ата-анаңларниң қанчилик дәриҗидә арилишалайдиғанлиғини өмүрлүк йолдишиңиз билән келишивалсиңиз болиду. Андин буни ата-аниңизға иззәт-һөрмәт көрситип, очуқ һәм удул ейтсиңиз болиду (Пәнд-нәсиһәтләр 15:1). Кичик пейиллиқ, мулайимлиқ вә узақ сәвирлик уруқ-туққанлар билән яхши муамилидә болушқа вә «меһир-муһәббәтлик билән бир-бириңларға кәң қосақлиқ» болушқа ярдәм бериду (Әфәсликләргә 4:2).

Әр-аял параңлашмақта. Әр-аял ата-анисиға совғат бәрмәктә

ПАЙДИЛИҚ МӘСЛИҺӘТЛӘР

Уруқ-туққанлириңиз аилиңизгә һәддидин зиядә арилишиватқандәк көрүнсә, өмүрлүк йолдишиңиз билән бу һәқтә хатирҗәм шараитта сөһбәтлишиң.
Немә иш қилидиғанлиғиңларни вә өзүңларни қандақ тутидиғанлиғиңларни келишивелиңлар.

УЛАРНИ ЧҮШИНИШКӘ ТИРИШИҢ

Ата-аниңизниң һис-туйғулири билән көзқаришини чүшинишкә тиришиң. Улар сизгә пәқәтла яхшилиқ тиләйду вә сизгә сәмимий һалда ғәмхорлуқ қилиду. Бәлким, уларға силәрни алайтән аилә сүпитидә қобул қилиш қийин болуши мүмкин. Улар өзлирини чәткә қеқилғандәк һис қилиши мүмкин. Лекин Муқәддәс китаптики принципларға риайә қилиш вә җүптиңиз һәм ата-аниңиз билән очуқ-ашкарә муамилә қилиш — өмүрлүк йолдишиңизниң көңлини ағритмай, ата-аниңизға иззәт-һөрмәт көрситишни давамлаштурушқа ярдәм бериду.