Худа Падишалиғи һөкүмранлиқ қилишни қачан башлиған? 2-қисим

НЕБУҚАДНИСАР ПАДИШАНИҢ ЧҮШИ (ҚИСҚИЧӘ МУҺАКИМӘ)

Қудрәт: Әссаламу әләйкүм Җамал ака, сизни көргинимгә интайин хошалмән. Қандақ әһвалиңиз, һәммиси яхшиму? Сиз билән һәр һәптә Муқәддәс китап тоғрилиқ сөһбәтлишишни яхши көримәнa.

Җамал: Ваәләйкүм әссалам, Худаға шүкри, яхши рәхмәт.

Қудрәт: Ярайсиз, сиз үчүн хошалмән. Сиз билән һәр һәптә Муқәддәс китапни тәтқиқ қилиш маңа бәк яқиду. Өткән қетим биз немә үчүн Йәһва гувачилири Худа Падишалиғи 1914-жили һөкүмранлиқ қилишқа башлиғанлиғи тоғрилиқ сөһбәтләшкәнb. Шундақла Даниял китавидики бәшарәтни көрүп чиққан едуқ. Есиңиздиму, у йәрдә немә йезилған?

Җамал: Һә есимдә. У йәрдә Небуқаднисар падиша чүшидә бир чоң дәрәқни көргәнлиги йезилған.

Қудрәт: Һә тоғра дәйсиз. Небуқаднисар чүшидә учи асманға йетидиған чоң бир дәрәқни көриду. Шундақла у Худаниң хәвәрчисиниң «дәрәқни чепип йоқитиңлар, лекин униң көтигини йәрдә қоюп қойиңлар» дегән буйруғини аңлайду. Йәттә дәвир өткәндин кейин бу дәрәқ йәнә өсүши керәк едиc. Бу бәшарәт икки қетим әмәлгә ешиши керәклигини қараштурған едуқ. Биринчи қетим бу бәшарәт кимгә тегишлик әмәлгә ашқан еди?

Җамал: Бу Небуқаднисар падишаниң өзигә тегишлик еди һә?! У йәттә жилға әқлини йоқатқан еди.

Қудрәт:Һә тоғра ейттиңиз. Небуқаднисар падиша әқлини вақтинчә йоқитип қойди вә шу сәвәплик униң һөкүмранлиғи тохтитилди. Худаниң һөкүмранлиқ қилиши йәттә дәвир җәриянида тохтитилған чағда бу бәшарәт техиму чоң көләмдә әмәлгә ешиши керәк еди. Өткән қетим көргинимиздәк, йәттә дәвир Йерусалим миладидин илгирики 607-жили вәйран болғанда башланған. Шуниңдин башлап, йәр йүзидә Йәһва Худа өз хәлқини башқурушта вәкиллик қилидиған падишалар йоқ болди. Лекин йәттә дәвир ахирлашқанда, Худа өз хәлқи үстидин йеңи бир һөкүмранни тәйинләйду. Башқичә ейтқанда, йәттә дәвир түгигәндин кейин Худаниң асмандики Падишалиғи башқурушни башлайду. Һазир биз йәттә дәвир қачан башланғанлиғини мулаһизә қилдуқ. Әгәр биз бу йәттә дәвир қанчә вақит давамлишидиғанлиғини ениқлисақ, шу чағда Худаниң Падишалиғи қачан башқурушни башлиғанлиғиниму биләләймиз. Һазир ейтқанлирим чүшинишлик болдиму?

Җамал:Һә қайта тәкралиғанлиғимиз өткән мавзуни әслишимгә ярдәм бәрди.

Қудрәт: Ярайсиз. Келиң һазир болса йәттә дәвир қанчә вақит давамлишидиғанлиғини көрүп чиқимиз. Муһим ой-пикирләрни есимгә селиш үчүн бу мавзу тоғрилиқ издиниш жүргүздим. Һазир мән уларни имканқәдәр чүшәндүрүшкә тиришимән.

Җамал:Мақул

ЙӘТТӘ ДӘВИРНИҢ ТҮГИШИ, АХИР ЗАМАННИҢ БАШЛИНИШИ

Қудрәт: Бу бәшарәт биринчи қетим Небуқаднисар падишаға мунасивәтлик әмәлгә ашқан. Шу чағда йәттә дәвир йәттә жилни билдүргән. Амма бу бәшарәт Худа Падишалиғиға мунасивәтлик иккинчи қетим әмәлгә ашқанда йәттә дәвир удул мәнадики йәттә жилдинму көпирәк вақитни өз ичигә елиши керәк еди.

Җамал: Буни қәйәрдин билисиз?

Қудрәт: Биринчидин, йәттә дәвир б.м.и 607-жили Йерусалим вәйран болғанда башланған. Әгәр биз шу жилдин башлап һесаплашни башлисақ, удул мәнадики йәттә жил б. м. и 600-жили түгигән. Амма шу жили Худаниң һөкүмранлиғиға қарита һечқандақ муһим иш йүз бәрмигән. Буниңдин башқа, өткән қетим қараштурғинимиздәк, әсирләр өткәндин кейин Әйса Мәсиһ йәр йүзидә болғанда, шу йәттә дәвир техи ахирлашмиғанлиғини ейтқан.

Җамал: Һә тоғра һазир есимгә чүшти.

Қудрәт: Демәк, йәттә дәвир удул мәнадики йәттә жилни әмәс, бәлки техиму узун вақитни өз ичигә елиши керәк еди.

Җамал: Қанчә вақитни?

Қудрәт: Биләмсиз Вәһий китави Даниял китавини чүшинишкә ярдәм бериду. Йәттә дәвир қанчә давамлишидиғанлиғи Вәһий китавида ениқ чүшәндүрүлгән. У йәрдә үч йерим һәссә вақит 1260 күнгә тәң екәнлиги һәққидә ейтилған d. Шуңа үч йерим һәссә вақитни иккигә көпәйтирсәк, йәттә дәвир чиқиду. Бу 2520 күнгә тәң болиду. Ейтқанлирим чүшинишлик болдиму?

Җамал: Һә чүшәндим. Лекин бу Худаниң Падишалиғи 1914-жили башқурушни башлиғанлиғи билән қандақ бағлиқ?

Қудрәт: Келиң буниң қандақ бағлиниши бар екәнлигини биллә көрүп чиқимиз. Бәзидә Муқәддәс китаптики бәшарәтлиридә бир күн бир жилға тәңe. Әгәр бир күн бир жилға тәң дәп һесаплисақ, демәк йәттә дәвир 2520 жилни билдүриду. Б.м.и 607-жилдин 2520 жилни алсақ, 1914-жилға келимизf. Шуниң үчүн йәттә дәвир 1914-жили түгидү дәп һесаплиниду. Шу жили Әйса Мәсиһ Худа Падишалиғиниң падишаси сүпитидә һөкүмранлиқ қилишқа башлиған. Шундақла 1914-жилдин башлап, дунияда чоң өзгиришләр йүз бәрди. Муқәддәс китапқа асасән бу заманниң ахири башланғанлиғини көрситиду.

Җамал: Хош қандақ өзгиришләр йүз бериши керәк екән?

Қудрәт: Әйса Мәсиһ Мәтта 24:7дә немә дегәнлиригә диққәт қилиң. У асмандин һөкүмранлиқ қилишқа башлайдиған вақитта қандақ вақиәләр йүз бериши һәққидә мундақ дегән: «Хәлиқ хәлиқкә қарши чиқиду, падишалиқ падишалиққа һәм бир җайдин кейин йәнә бир җайда ачарчилиқ вә йәр тәврәшләр йүз бериду». Шуниңға диққәт қилиңки, Әйса әшу мәзгилдә йемәклик йетишмәслик вә йәр тәврәшләр болидиғанлиғини алдин-ала ейтқан. Өткән әсирдин бери дунияда шундақ вақиәләр йүз берип келиватиду, шундақ әмәсму?

Җамал: Һә шундақ

Қудрәт: Бу айәттә Әйса йәнә Худа Падишалиғиниң падишаси болған мәзгилдә урушлар болидиғанлиғи тоғрисида ейтқан еди. Шундақла Вәһий китавида ахир заманда урушлар бир җайда әмәс, бәлки пүткүл йәр йүзи бойичә болидиғанлиғи тоғрилиқ алдин-ала ейтқанg. Биринчи Дуния Уруши қачан башланғанлиғи есиңиздиму?

Җамал: 1914-жили башланған. Әйса Мәсиһ һөкүмранлиқ қилишни шу жили башлиғанғу-һә?! Бу вақиәләр өз ара бағлиқ екәнлиги тоғрилиқ һечқачан ойлимиған екән.

Қудрәт: Йәттә дәвир вә Муқәддәс китаптики ахир заманға тегишлик башқа бәшарәтләрни бир йәргә топлисақ, буниң һәммиси һәқиқәтән әқилгә мувапиқ екәнлигини көрүшкә болиду. Йәһва гувачилири Әйсаниң 1914-жили Худа Падишалиғиниң падишаси болушқа башлиғанлиғиға вә ахирқи күнләрниң шу жили башланғанлиғиға ишиниду.

Җамал: Бу мәлуматларниң һәммисини бирдин чүшиниш оңай әмәс екән.

Қудрәт: Сизни яхши чүшинимән. Мәнму бу бәшарәтләрни дәрру чүшәнмигән. Гәрчә Муқәддәс китапта 1914-жил алаһидә тилға елинмиған болсиму, бүгүнки сөһбитимиздин Йәһва гувачилири шу жил тоғрисидики чүшәнчини Муқәддәс китапқа асаслайдиғанлиғини чүшинисиз дәп үмүт қилимән.

Җамал: Мән силәрниң һәрқачан шәхсән өз ой-пикирлириңизни әмәс, Муқәддәс китапқа асаслинип җавап беридиғанлиғиңизға һәйран қалимән. Бирақ немә үчүн буниң һәммиси шунчилик мурәккәп қилип йезилған? Немә үчүн Муқәддәс китапта Әйса 1914-жили асманда һөкүмранлиқ қилишқа башлиған дәп ениқ йезилмиған?

Қудрәт: Һммм...Қизиқ соал қойдиңиз Җамал. Һәқиқәтән Муқәддәс китапта нурғун нәрсиләр ениқ йезилмиған. Ундақта немишкә Худа Муқәддәс китапни кишиләрниң чүшиниши үчүн күч тәләп қилидиған шәкилдә язған? Келиң бу тоғрилиқ келәр қетим сөзлишимиз.

Җамал: Мақул