Бурадәрләр, ақсақал болуш мәхситиңлар барму?

1, 2. Ақсақал қандақ ишларни қилиду?

ӘГӘР сиз хизмәт ярдәмчиси болсиңиз, бәлким ақсақал болуш үчүн керәк болған пәзиләтләрни риваҗландуруватқансиз. Ақсақаллар башқиларға ярдәм бериш үчүн көп әмгәк қилиду. Сизму уларға охшаш «яхши ишни» қилишни халаттиңизму? (Тим. 1-х. 3:1)

² Ақсақал қандақ ишларни қилиду? У җамаәттики бурадәр-қериндашлар билән биллә қизғинлиқ билән вәз қилиду. Йәһваниң қойлириға ғәмхорлуқ қилип, уларни үгитишкә көп күч чиқириду. Шундақла өзиниң гәп-сөзлири вә иш-һәрикити арқилиқ бурадәр-қериндашларниң етиқадини мустәһкәмләйду. Мана шу сәвәптин, уларни Муқәддәс китапта «һәдийәләр» дәп атайду (Әфәс. 4:8).

3. Бурадәр ақсақал болуп хизмәт қилишқа лаяқәтлик болуши үчүн немә қилалайду? (Тимотийға 1-хәт 3:1—7; Титқа 1:5—9)

³ Ақсақал болуп хизмәт қилиш үчүн немә қилсиңиз болиду? Әслидә, ақсақал болуп хизмәт қилишни қандақту бир ишқа кириш билән селиштурушқа болмайду. Адәттә, керәклик қабилийәтлириңиз болса, сизни ишқа алиду. Лекин ақсақал болуш үчүн пәқәт қабилийәтләр йетәрлик әмәс. Вәз қилиш вә тәлим бериш қабилийәтлиридин башқа, сизгә Тимотийға 1-хәт 3:1—7 вә Титқа 1:5—9 айәтләрдә (оқуң) йезилған тәләпләргә лайиқ болуш керәк. Бу мақалидә ақсақалларға қойилидиған үч тәләпни көрүп чиқимиз: етиқатдашларниң вә Йәһва гувачи әмәсләрниң арисида яхши нам-абройға егә болуш, аилисигә яхши ғәмхорлуқ қилиш вә җамаәттикиләргә тәйярлиқ билән хизмәт қилиш.

ЯХШИ НАМ-АБРОЙҒА ЕРИШИҢ

4. «Әйипсиз» нам-абройға егә болуш немини билдүриду?

⁴ Ақсақал болуп хизмәт қилғуси кәлгәнләр «әйипсиз» болуши муһим. Башқичә ейтқанда, у җамаәттә үлгилик жүрүш-туруши билән мәлум болуши керәк. Униңдин ташқири, «сирттикиләрниң яхши гувалиғиға сазавәр болуши керәк». Әлвәттә, Йәһва Худаға ишәнмигәнләр, етиқадиңиз тоғрилиқ яман ейтиши мүмкин. Бирақ улар сизниң яхши адәм вә растчил екәнлигиңизгә һәргизму гуманланмаслиғи керәк (Дан. 6:4, 5). Өзүңиздин: «Һәм етиқатдашларниң, һәм Йәһва гувачи әмәсләрниң арисида яхши нам-аброюм барму?» дәп сораң.

5. Сиз «һиммәтликни сөйүдиған» киши екәнлигиңизни қандақ көрситәләйсиз?

⁵ Әгәр «һиммәтликни сөйүдиған» болсиңиз, башқиларниң яхши тәрәплирини байқап, шуниң үчүн уларни махтап жүрисиз. Йәнә башқиларға хошаллиқ билән ярдәм берип, һәтта тәләп қилинғандинму көпирәк ишларни қилишқа тәйяр болисиз (Сал. 1-х. 2:8;). Немә үчүн бу хисләт ақсақаллар үчүн шунчилик муһим? Чүнки улар Худаниң қойлириға ғәмхорлуқ қилип, тапшуруқлирини орунлаш үчүн көп вақит чиқириши керәк (Пет. 1-х. 5:1—3). Буниң үчүн көп тәр төкүш керәк болсиму, улар башқиларға ярдәм бериштин хошаллиққа еришиду (Әлч. 20:35).

6. Меһмандостлуқ көрситишниң қандақ йоллири бар? (Ибранийларға 13:2, 16; рәсимгиму қараң.)

⁶ «Меһмандост» болуш дегинимиз — йеқин достлиримиздин башқа, анчә қоюқ арилашмайдиған адәмләргә яхшилиқ қилиш (Пет. 1-х. 4:9). Бир қамуста меһмандост адәм тоғрилиқ мундақ дәйду: «Униң өйиниң ишиги натонуш адәмләр үчүн дайим очуқ болуши керәк». Шуңа сиз әнди мундақ ойлинип көрүң: «Мени җамаәткә кәлгән меһманларға көңүл бөлидиған адәм дәп тонамду?» (Ибранийларға 13:2, 16ни оқуң) Меһмандост адәм меһманларниң һәммисигә, шундақла шараити начар, еғир әмгәк қиливатқан етиқатдашларға, районға җавапкар ақсақаллар вә җамаәткә нутуқ билән кәлгән бурадәрләргә яхшилиқ қилип, қолидин келишичә ярдәм бериду (Ярит. 18:2—8; Пәнд н. 3:27; Луқа 14:13, 14; Әлч. 16:15; Рим. 12:13).

7. Ақсақал өзиниң «пулға амрақ әмәс» екәнлигини қандақ көрситиду?

⁷ «Пулға амрақ әмәс» дегән немини билдүриду? Бу пул вә мал-дуния һаятиңизда биринчи орунда болмаслиғини билдүриду. Бай вә кәмбәғәл болушиңиздин қәтъийнәзәр, Йәһваға хизмәт қилиш һаятиңизда әң муһим нәрсә болуши керәк (Мәт. 6:33). Вақтиңиз, күчиңиз вә қолуңизда бар һәммә нәрсиләрни Йәһва Худаға ибадәт қилиш, аилиңизни беқиш һәм җамаәттә хизмәт қилиш үчүн қоллиниватқансиз (Мәт. 6:24; Йоһ. 1-х. 2:15—17). Өзүңизни мундақ тәкшүрүп көрүң: «Мениң үчүн пул әң муһимму? Қолумда бар нәрсиләргә шүкүр қилимәнму? Йә болмиса, мән көп пул тепишни яки байлиқ жиғишни ойлаймәнму?» (Тим. 1-х. 6:6, 17—19).

8. Өзиниң «чекини билидиған» вә «өзини туталайдиған» адәм қандақ болиду?

⁸ Адәтлиридә «чекини билидиған» вә «өзини туталайдиған» адәм һаятида тәмкин болиду. Мәсилән, у нәпси яманлиқтин, һарақкәшликтин жирақ болуп, кийгән кийими вә ташқи көрүнүши әдәплик болиду. Шундақла оюн-тамашиларни таллиғанда чекидин чиқип кәтмәйду вә модиниң кәйнидин қоғлимайду (Луқа 21:34; Яқуп 4:4). Башқилар уни териктүргәндә, өзини тутуп сәвир-тақәтлик болиду. Буниңдин сирт, ақсақал болушни халайдиғанлар «һарақ-шарапқа амрақ» болмай, йәни һарақ-шарапни көп ичидиған адәм дегән атаққа егә болмаслиғи керәк. Шуңа мундақ ойлинип көрүң: Мени адәтлиримдә «чекини билидиған» вә «өзини туталайдиған» адәм дәп биләмду?

9. «Сағлам пикирлик» вә «жиғинчақ» болуш немиләрни өз-ичигә алиду?

⁹ «Сағлам пикирлик» адәм қарар чиқарғанда, Муқәддәс китап принциплириға әмәл қилиду. У Муқәддәс китап принциплири үстидин чоңқур ойлинип, чүшәнчиси мол болуп, зерәкликкә интилиду. У өз мәсилигә мунасивәтлик барлиқ керәклик мәлуматларни жиғип, алдирақсанлиқ билән қарар чиқармайду (Пәнд н. 18:13). Нәтиҗидә, у Йәһва Худани хуш қилидиған қарарларни чиқириду. «Жиғинчақ», йәни диққитини бир йәргә мәркәзләштүргән киши ишлирини планлап, һәммини өз вақтида қилиду. Шундақ адәм ишәнч қилидиған вә көрсәтмиләргә риайә қилидиған адәм дәп тонулиду. Мошундақ адәм болушқа тиришсиңиз, яхши нам-атаққа еришәләйсиз. Әнди аилиңизгә яхши ғәмхорлуқ қилиш үчүн немә қилишқа болидиғанлиғини көрүп чиқайли.

ҮЛГИЛИК АИЛӘ БЕШИ БОЛУҢ

10. Бурадәр аилә әзалирини яхши башқуруш үчүн немини қилиши керәк?

¹⁰ Әгәр сиз аилә беши болсиңиз вә ақсақал болуш хаһишиңиз болса, аилиңизму үлгилик болуши муһим. «Аилә әзалирини яхши башқуралайдиған» адәм аилисигә меһир-муһәббәт билән ғәмхорлуқ қилип, яхши қарарларни чиқириду. Демәк, у аиләвий ибадәтни өткүзиду вә аяли билән балилириниң җамаәт учришишлириға һәм вәз хизмитигә қатнишип турушиға ярдәм бериду. Бу немә үчүн шунчә муһим? Әлчи Паул: «Әгәр бир киши өз аилисини башқурушни билмисә, у қандақларчә Худаниң җамаити тоғрилиқ ғәмхорлуқ қилалайду?»— дәп язған (Тим. 1-х. 3:5).

11, 12. Аилә әзалириниң жүрүш-туруши бурадәрниң ақсақал болуп хизмәт қилишиға қандақ тәсир қилиду? (Рәсимгиму қараң.)

¹¹ Әгәр сизниң 18 яшқа толмиған вә сиз билән биллә туридиған балилириңиз болса, уларни «җиддийлиқ билән беқиништа туталайдиған» болушиңиз зөрүр. Башқичә ейтқанда, балилириңиз сизгә қулақ селип, бойсунуши керәк. Сизниң вәзипиңиз — уларни меһрибанлиқ билән тәрбийиләш. Әлвәттә, пәрзәнтлириңизниң башқа балиларға охшаш ойнап-күлүп, шат-хорам һаят кәчүрүшини халайсиз. Бирақ сиз балилириңизни өзүңизгә бойсунуп, башқиларни һөрмәтләйдиған инсаплиқ адәм болушқа тәрбийилишиңиз лазим. Шундақла уларни Йәһва Худа билән болған зич мунасивитини йетилдүрүшкә, Муқәддәс китаптики принципларға мас һаят кәчүрүшкә вә чөмдүрүштин өтүшкә мәхсәт қоюшқа ярдәм беришиңиз зөрүр.

¹² «Балилири етиқатчи болуп, әхлақсизлиқта вә итаәтсизликтә әйипләнмигән» дегән ибарә немини билдүриду? Әгәр чөмдүрүштин өткән яки чөмдүрүштин өтүшкә интиливатқан бала еғир гуна қилса, бу дадисиниң җамаәттики хизмитигә қандақ тәсир қилиду? Әгәр дадиси балисини тәрбийиләш үчүн һечқандақ һәрикәт қилмиса, у ақсақал болуп хизмәт қилишқа лаяқәтлик болмаслиғи мүмкин (1996 жилниң «Күзитиш мунари» (рус) 15-октябрь ейиниң саниға қараң 21-б., 6, 7-абз.).

ҖАМАӘТКӘ ЯХШИ ҒӘМХОРЛУҚ ҚИЛИҢ

13. Өзүңизниң өзбешимчи әмәс вә «әқил-парасәтлик» екәнлигиңизни қандақ көрситәләйсиз?

¹³ Яхши хисләтләрни йетилдүридиған бурадәрләр җамаәттә көп ишларни атқуриду. Мәсилән, «әқил-парасәтлик» бурадәр башқилар билән инақ болуп, башқиларғиму инақлиқни сақлашқа ярдәм бериду. Сизму әқил-парасәтлик болғуңиз кәлсә, башқиларни тиңшап, уларниң пикирлиригә қулақ селишқа тәйяр болуң. Мәсилән, ақсақаллар билән бир мәсилини музакирә қиливатқанда, уларниң чиқарған қарари сизгә яқмиса, лекин Муқәддәс китаптики принципларға зит кәлмисә, уларни қолламсиз? Ақсақал болушни халайдиған бурадәр өзбешимчи яки тәрса болмаслиғи керәк. Бу — «мениң раст» дәп өз сөзидә чиң туривалмаслиқни билдүриду. Әксинчә, у башқиларниң ой-пикри муһим екәнлигини етирап қилиду (Ярит. 13:8, 9; Пәнд н. 15:22). Униңдин сирт, у «терикмәйдиған» болуши керәк. Шуниң үчүн қопал сөзлимәй, талаш-тартиш қилмай, силиқ-сипайә болиду. Әң еғир вәзийәттиму тинчлиқни сақлаш үчүн бар күчиңизни чиқиришиңиз зөрүр (Яқуп 3:17, 18). Иллиқ вә силиқ-сипайилиқ билән сөзлисиңиз, бу башқиларға, һәтта қарши чиққучиларға яхши тәсир қилип, уларму биз билән аччиқланмай, сәвирлик билән сөзлиши мүмкин (Һак. 8:1—3; Пәнд н. 20:3; 25:15; Мәт. 5:23, 24).

14. «Йеқинда етиқатни қобул қилған» болмаслиғи керәк вә «вападар» болуш дегән немиләрни билдүриду?

¹⁴ Ақсақал болушни халиған адәм «йеқинда етиқатни қобул қилған» болмаслиғи керәк. Бу чөмдүрүштин өткәндин кейин көп жил өтүши керәк дегәнни билдүрмәйду. Йәһва Худа билән болған мунасивитиңизни мустәһкәмләш үчүн вә Муқәддәс китаптики принципларни ишлитип дана қарарларни чиқиришни үгиниш үчүн вақит керәк. Сизни ақсақал сүпитидә дәрһал тәйинлимисә, сәвир-тақәтлик болуң. Әйсаға охшаш кәмтәрлик билән һәрқандақ хизмәтни атқурушқа тәйяр болсиңиз, Йәһва Худа сизни бәрикәтләйду (Мәт. 20:23; Флп. 2:5—8). Әгәр Йәһваниң һәққаний өлчәмлири бойичә яшап, тәшкилат бериватқан көрсәтмилиригә риайә қилсиңиз, Униңға «вападар» екәнлигиңизни көрситәләйсиз (Тим. 1-х. 4:15).

15. Ақсақалға чечән натиқ болуши шәртму?

¹⁵ Муқәддәс китапта ақсақалларниң «тәлим беришкә қабилийәтлик» болуш керәклиги йезилған. Бу сизниң әҗайип нутуқларни ейтишиңиз керәклигини билдүрәмду? Яқ. Ақсақалларниң һәммиси сөзгә чечән натиқ болмисиму, улар вәз ейтқанда вә падичилиқ сәпәр қилғанда Муқәддәс китапни маһир ишлитип, етиқатдашларға илһам бериду (Коринтлиқларға 1-хәт 12:28, 29; Әфәсликләргә 4:11). Шундақ болсиму, тәлим бериш қабилийитиңизни риваҗландурушни тохтатмаң. Сизгә яхши тәлим бәргүчи болушқа немә ярдәм бериду?

16. Яхши тәлим бәргүчи болуш үчүн немә қилалайсиз? (Рәсимгиму қараң.)

¹⁶ «Садиқ сөзни мәккәм тутуши керәк». Яхши тәлим бәргүчи болуш үчүн ейтқан нутуғиңлар вә бәргән нәсиһитиңлар Худаниң Сөзигә асаслансун. Буниң үчүн Муқәддәс китапни вә әдәбиятлиримизни пухта тәтқиқ қилиң (Пәнд н. 15:28; 16:23). Қайси айәтни қандақ қоллинишни билиш үчүн әдәбиятлиримизда уларни қандақ чүшәндүргәнлигигә диққәт қилиң. Тәлим бәргәндә, етиқатдашларға Йәһвани техиму көпирәк яхши көрүшкә ярдәм бериң вә үгәнгәнлирини һаятида қоллинишқа дәвәт қилиң. Яхши тәлим бәргүчи болушниң йәнә бир йоли — тәҗрибиси мол ақсақаллардин мәслиһәт сорап, уларға қулақ селиш (Тим. 1-х. 5:17). Ақсақаллар бурадәр-қериндашларға илһам берәләйдиған адәм болуши лазим. Бәзи вақитларда болса, уларға нәсиһәт берип, һәтта «хаталиқлирини паш қилалиши» керәк. Қандақ вәзийәт болмисун, ақсақал һәрдайим меһрибан болуп, силиқ-сипайилиқ билән сөзлишиши керәк. Әгәр меһрибан болсиңиз, һөрмәт билән сөзләшсиңиз вә Худа Сөзигә асаслинип тәлим бәрсиңиз, Улуқ Устазимиз Әйсаға охшаш болалайсиз (Мәт. 11:28—30; Тим. 2-х. 2:24).

МӘХСИТИҢИЗГӘ ДАВАМЛИҚ ИНТИЛИҢ

17. а) Хизмәт ярдәмчилиригә ақсақал болушқа немә ярдәм берәләйду? ә) Ақсақаллар бурадәрләрни ақсақал болушқа тәвсийә қилғанда, немиләрни әстин чиқармаслиғи керәк? («Ақсақаллар, әқил-парасәтлик болуңлар» дегән рамкиға қараң)

¹⁷ Бәзи хизмәт ярдәмчилири, ақсақалларға қоюлған тәләпләрни көрүп, «мән һечқачан ақсақал болалмаймән» дәп ойлиши мүмкин. Бирақ Йәһва Худаму, Униң тәшкилатиму сиздин жуқурида тилға елинған хисләтләрниң һәммисини мукәммәл түридә көрситишни күтмәйду (Пет. 1-х. 2:21). Йәнә Йәһва Худа муқәддәс роһи арқилиқ керәклик хисләтләрни риваҗландурушқа ярдәм бериду (Флп. 2:13). Мошу мақалидә ейтилған хисләтләрниң қайсисини яхшилитишни халайсиз? Мошу тоғрилиқ Йәһва Худаға дуа қилиң. Шу хисләт тоғрисида тәтқиқ қилиң вә ақсақаллардин уни қандақ яхшилитишқа болидиғанлиғини сорап көрүң.

18. Хизмәт ярдәмчилири қандақ мәхсәткә интилалайду?

¹⁸ Мәйли ақсақал болайли яки болмайли, һәммимиз бу мақалидә ейтилған хисләтләрни риваҗландурушқа давамлиқ күч чиқирайли (Флп. 3:16). Әгәр сиз хизмәт ярдәмчиси болсиңиз, ақсақал болушқа бәл бағлаң! Йәһва Худаға вә бурадәр-қериндашларға көпирәк хизмәт қилиш үчүн, Улуқ тәлим бәргүчи Йәһвадин сизни үгитишини сораң (Йәшая 64:8). Ақсақал болушқа интилип жүрсиңиз, Йәһва Худа сизни чоқум бәрикәтләйду!