Йәһваниң кәчүрүми үчүн чәксиз миннәтдармиз

1, 2. Адәмзатниң әһвали қайси мәнада мисалдики яш жигитниң әһвалиға охшаш?

АТА-АНИСИ бай яш бир жигитни тәсәввур қилип көрүң. Бир күни ата-аниси паҗиәлик вақиәдә вапат болиду. Бу хәвәр униң жүригигә пичақ санчилғандәк болуп, гаңгиритип қойиду. Буниңдин башқа, у йәнә бир шум хәвәр аңлайду. Ата-аниси байлиғини чиртиң-пиртиң қилип, қәризгә петип кетипту. Шундақ қилип, байлиқни мирас елишниң орниға, жигитниң бойниға қәриз артилип, қәриз бәргүчиләр пулни тез қайтурушни тәләп қилиду. Лекин у қәризни һечқачан берип болалмайду.

² Әһвалимизни шу жигитниң әһвалиға охшатсақ болиду. Әҗдатлиримиз Адәм ата билән Һава ана мукәммәл болуп, гөзәл җәннәттә яшиған (Ярит. 1:27; 2:7—9). Улар мәңгү шат-хорам яшаш пурситигә егә болған. Ечинарлиғи, улар гуна қилип, җәннәттә мәңгү яшаш пурситидин айрилип қалған. Туңҗа әр-аял әвлатлириға қандақ мирас қалдурған? Муқәддәс китапта мундақ йезилған: «Бир адәм [Адәм ата] һәм гуна арқилиқ өлүм дунияға кирди һәм шундақларчә өлүм барлиқ адәмләргә өтти, чүнки һәммиси гуна қилған болди» (Рим. 5:12). Адәм ата бизгә гунани вә шуниң билән биргә өлүмни мирас қалдурған. Гуна худди биз һечқачан төләп болалмайдиған қәризгә охшаш (Зәб. 49:8).

3. Немә үчүн бизниң гуналиримиз «қәризгә» охшайду?

³ Һәзрити Әйсаму гуналиримизни «қәризгә» охшатқан (Мәт. 6:12; Луқа 11:4). Гуна қилғанда, биз худди Йәһва Худаға қәриздар болғандәк болумиз. У бизниң гуналиримиз үчүн һәқ төлишимизни тәләп қилалатти. Бу қәрзимиз пәқәт биз өлгәндила кәчүрүлүп, қайта яшаш үмүтимиз болматти (Рим. 6:7, 23).

4. а) Худаниң ярдимисиз һәммә гунакар адәмләр билән немә болатти? (Зәбур 49:7—9) ә) Муқәддәс китаптики «гуна» дегән сөз немини билдүриду? («Гуна» намлиқ рамкиға қараң.)

⁴ Биз Адәм ата билән Һава ана йоқитип қойғанни өз күчимиз билән қайтуралмаймиз (Зәбур 49:7—9ни оқуң). Йәһва Худаниң ярдимисиз келәчәктә яшашқа яки тирилишкә үмүтимиз йоқ болатти. Демәк, бизниң һайванатлардин һечқандақ пәрқимиз болматти (Вәз 3:19; Пет. 2-х. 2:12).

5. Көйүмчан Атимиз Йәһва Адәм атидин қалған гунани кәчүрүш үчүн немә қилған? (Рәсимгә қараң.)

⁵ Мақалиниң бешидики жигиткә бир бай киши келип, һәммә қәризлирини төләп бәргән болса, у немә қилатти? Шәк-шүбһисизки, у мошу сехийлиқ билән берилгән соғини қобул қилип, шу адәмгә чин қәлбидин миннәтдар болатти. Шуниңға охшаш, асмандики Атимиз Йәһва Адәм атидин қалған гунани кәчүрүш үчүн бизгә бир соғини бәргән. Әйса Мәсиһ буни мундақ чүшәндүргән: «Худа дунияни шу қәдәр сөйдики, Өзи яратқан йеганә Оғлиға етиқат билдүрүватқан һәрбир киши һалак болмай, мәңгүлүк һаятқа еришиши үчүн, Оғлини қурванлиққа бәрди» (Йоһ. 3:16). Буниңдин башқа, бу соға Йәһва Худа билән дост болушимизға йол ачти.

6. Бу мақалидә биз немини көрүп чиқимиз вә немә үчүн?

⁶ «Қәризлиримиз» яки гуналиримизниң кәчүрүлүши үчүн немә қилалаймиз? Мошу соалға җавап тепиш үчүн Муқәддәс китаптики һәрхил сөзләр вә уларниң мәнасини көрүп чиқайли. Йәһва Худаниң бизни кәчүрүш үчүн қилғанлири тоғрисида чоңқур ойланғансири, Униңға болған миннәтдарлиғимиз техиму ашиду.

МӘХСӘТ: ЯРИШИВЕЛИШ

7. а) Адәм ата билән Һава ана йәнә немидин айрилған? ә) Адәм ата билән Һава аниниң әвлатлири болғачқа, биз немигә муһтаҗ? (Римлиқларға 5:10, 11)

⁷ Адәм ата билән Һава ана гуна қилғанда, мәңгү яшаш пурситидин айрилған. Улар Йәһва Худаниң дүшмәнлиригә айланған. Гуна қилиштин бурун улар Худа аилисиниң әзалири болған (Луқа 3:38). Лекин улар Йәһваға бойсунмиғанда, Униң аилисидин қоғлинип чиқирилған. Шу чағда улар техи балилиқ болмиған (Ярит. 3:23, 24; 4:1). Шуңа уларниң әвлатлириму Йәһва Худаниң дүшмәнлири болди. Демәк, Худа билән дост болуш үчүн, биз Униң билән яришивелишимиз керәк (Римлиқларға 5:10, 11ни оқуң). Бир китапта йезилғандәк, «яришивелиш» дәп тәрҗимә қилинған грек сөзи «дүшмәнни достқа айландуруш» дегәнни билдүрүши мүмкин. Һәйран қаларлиғи, Йәһва Худа биз билән яришивелиш үчүн Өзи биринчи қәдәм ташлиған. Қандақ қилип?

ЧАРӘ: ГУНАЛАРНИ КӘЧҮРҮШ

8. Гуналарниң кәчүрүлүшиниң биз үчүн қандақ пайдиси бар?

⁸ Гуналарни кәчүрүш — Йәһваниң гунакар инсанлар билән мунасивитини әслигә кәлтүрүш үчүн қилған чариси. Бу сөз-ибарә бирәр нәрсиниң орниға қәдир-қиммити тәң башқа нәрсини беришни билдүриду. Шундақ қилип, йоқитилған яки бузулуп кәткән нәрсә әслигә келиду. Гуналиримиз кәчүрүлгәнликтин, биз Йәһва Худа билән яришалаймиз (Рим. 3:25).

9. Исраиллар кәчүрүмгә еришәлиши үчүн Йәһва Худа қандақ чарини орунлаштурған?

⁹ Исраилларниң гуналири кәчүрүлүп, улар Йәһва Худа билән йеқин мунасивәттә болалиши үчүн, У вақитчә бир чарә орунлаштурған. Исраил хәлқи һәр жили Гуналарниң кәчүрүм қилиниш күнини нишанлиған. Шу күни баш роһаний хәлиқниң гуналири үчүн һайванатларни қурбанлиқ қилатти. Әлвәттә, бу қурбанлиқ һечкимни гунадин толуғи билән азат қилалматти. Чүнки адәм һайванатлардин үстүн туриду. Лекин исраиллар товва қилип, Худа тәләп қилған қурбанлиқларни әкәлгәндә, У уларни кәчүргән (Ибр. 10:1—4). Буниңдин башқа, шу күни вә башқа вәзийәтләрдә әкелингән қурбанлиқлар уларниң гунакар болуп, гунадин қутулуш үчүн башқа бир қурбанлиққа муһтаҗ екәнлигини әслитип туратти.

10. Инсанийәтниң гуналири кәчүрүлүши үчүн Йәһва Худа немә қилған?

¹⁰ Бирақ Йәһва Худа инсанларниң гуналири вақитчә әмәс, мәңгү кәчүрүлүшини халиған. Шуңа У сөйүмлүк Оғлини «нурғунлириниң гуналирини көтириш үчүн, бир қетим. . . қурбанлиққа» әкәлгән (Ибр. 9:28). Әйса йәргә келип, «нурғунлар үчүн өз җенини төләм сүпитидә» бәргән (Мәт. 20:28, ЙД). Төләм дегән немә?

ҺӘҚ: ТӨЛӘМ

11. а) Муқәддәс китапқа бенаән, төләм дегән немә? ә) Төләмни қандақ адәм төләлигән?

¹¹ Муқәддәс китапқа бенаән, төләм — гунани кәчүрүш үчүн төлинидиған һәқ. Йәһва Худа гуналиримизни кәчүрүп, биз билән яришивелиш үчүн қандақту бир һәқниң төлинишини тәләп қилған. Адәм ата йоқатқанниң һәққи қанчә? Адәм ата билән Һава ана мукәммәл һаяттинла әмәс, мәңгү яшаш пурситидинму айрилған. Демәк, төләм мошу йоқитилған нәрсиләргә тәң-баравәр болуши керәк еди (Тим. 1-х. 2:6). Шуңа бу һәқни пәқәт 1) мукәммәл, 2) йәрдә мәңгү яшаш пурситигә егә болған вә 3) биз үчүн өз җенини пида қилишқа тәйяр болған адәм төләләтти. Шундақ қилғандила у Адәм ата йоқитип қойған нәрсиләрниң орнини толтуралатти.

12. Немә үчүн Әйса Мәсиһ керәк болған һәқни төләлигән?

¹² Әйса мошу үч тәләпкә лайиқ болғачқа, керәк болған һәқни төләлигән. 1) Әйса мукәммәл болған. «У гуна қилмиған» (Пет. 1-х. 2:22). 2) Гуна қилмиғанлиқтин, униң йәрдә мәңгү яшаш мүмкинчилиги болған. 3) У өз һаятини биз үчүн қурбанлиқ қилип, өлүшкә тәйяр болған (Ибр. 10:9, 10). Адәм ата гуна қилиштин бурун мукәммәл болғандәк, Әйсаму мукәммәл болған (Кор. 1-х. 15:45). Шу сәвәптин, Әйса җенини пида қилғанда бизни Адәм атиниң гунасидин азат қилип, йоқитилған нәрсиләрни қайтуруп бәргән (Рим. 5:19). Шундақ қилип, Әйса Мәсиһ «ахирқи Адәм ата» болған. Әнди башқа мукәммәл адәмниң келип, һәқ төлишиниң һаҗити йоқ еди. Чүнки Әйса «бир қетим. . . өзини қурбанлиқ» қилған (Ибр. 7:27; 10:12).

13. Гунаниң кәчүрүлүши билән төләмниң қандақ пәрқи бар?

¹³ Ундақта, гунаниң кәчүрүлүши билән төләмниң қандақ пәрқи бар? Гунани кәчүрүш дегән — Худаниң инсанлар билән болған мунасивитини қайта әслигә кәлтүрүш үчүн қилған иш-һәрикити. Төләм болса — гунакар инсанларниң гунасини кәчүрүш үчүн төләнгән һәқ. Әйса Мәсиһ өзиниң қенини биз үчүн төкүп, шу һәқни төлигән (Әфәс. 1:7; Ибр. 9:14).

НӘТИҖӘ: АЗАТ ҚИЛИНИШ ВӘ ҺӘҚҚАНИЙ ДӘП ҖАКАЛИНИШ

14. Биз һазир немини муһакимә қилимиз вә немә үчүн?

¹⁴ Йәһваниң биз үчүн қилған бу яхшилиғидин қандақ пайда алимиз? Бу соалға җавап тепиш үчүн Муқәддәс китаптики икки сөз-ибариниң мәнасини муһакимә қилайли. Улар Йәһва Худаниң кәчүрүмчанлиғи немигә йол ачқанлиғини чүшинишкә ярдәм бериду.

15, 16. а) Муқәддәс китапқа асасланғанда, «азатлиққа чиқиш» дегән немә? ә) Гуна вә өлүмниң қуллиғидин азат болушимиз бизгә қандақ тәсир қилиду?

¹⁵ Муқәддәс китапта төләм берилгәнликтин, бизниң азатлиққа чиққанлиғимиз йезилған. Әлчи Петрус буни мундақ чүшәндүргән: «Өзәңлар билисиләрки, ата-бовилириңлардин қалған мевисиз һаят тәрзиниң қуллуғидин әркин болдуңлар, бу қиммитини йоқитидиған нәрсиләр — күмүч яки алтун билән әмәс, бәлки нуқсансиз һәм булғанмиған Қоза болған Мәсиһниң бебаһа қени арқилиқ азат қилиндиңлар» (Пет. 1-х. 1:18, 19).

¹⁶ Әйсаниң төләм қурбанлиғи бизни гуна вә өлүмниң қуллиғидин азат қилалайду (Рим. 5:21). Оғлиниң қиммәтбаһа қени билән гуналиримизни кәчүргәнлиги үчүн Йәһваға қанчилик миннәтдармиз дәңа! Биз Худаға вә Әйса Мәсиһкә өмүр бойи қәриздармиз (Кор. 1-х. 15:22).

17, 18. а) Һәққаний дәп җакалиниш немини билдүриду? ә) Һәққаний дәп җакалинишниң қандақ пайдиси бар?

¹⁷ Һәққаний дәп җакалиниш дегинимиз — бизгә танған әйипниң ақлиниши вә гуналиримизниң өчүрүлүшини билдүриду. Лекин Йәһва Худа бизни һәққаний дәп җакалиғини У Өзиниң адил өлчәмлирини атлап кәткәнлигини билдүрмәйду. Немә үчүн? Чүнки У лайиқ болғанлиғимиз яки гуналиримизға көз жумғанлиқтин әмәс, гунани кәчүрүш орунлаштурушиға вә төләмгә ишәнгәнлигимиз үчүн бизни кәчүриду (Рим. 3:24; Гал. 2:16).

¹⁸ Һәққаний дәп җакалинишниң қандақ пайдиси бар? Әйса Мәсиһ билән асманда һөкүмранлиқ қилишқа талланғанлар һәққаний дәп җакалинип, һазирниң өзидә «Худаниң балилири» дәп атилиду (Тит. 3:7; Йоһ. 1-х. 3:1). Уларниң гуналири кәчүрүлүп, тамамән өчүрүлгәнликтин, улар Падишалиқта һөкүмранлиқ қилишқа лайиқ (Рим. 8:1, 2, 30). Йәрдә яшаш үмити бар кишиләрму Худаниң достлири сүпитидә һәққаний дәп җакаланған вә уларниңму гуналири кәчүрүлгән (Яқуп 2:21—23). Армагедонда аман қалидиған зор бир топ халайиқ һечқачан өлмәй, мәңгү яшашқа үмүт қилалайду (Йоһ. 11:26). Өлүм уйқисида ятқан һәққанийлар вә һәққаний әмәсләр тирилдүрүлиду (Әлч. 24:15; Йоһ. 5:28, 29). Ахирида Йәһваниң йәрдики барчә садиқ хизмәтчилири «Худа пәрзәнтлириниң шәрәплик әркинлигигә еришиду» (Рим. 8:21). Биз Атимиз Йәһва билән яришивалидиған вақитни тәқәзалиқ билән күтиватимиз!

19. Йәһва Худа билән Әйса Мәсиһниң қилғанлири сәвәплик әһвалимиз қандақ өзгәрди? («Бу биз үчүн немини билдүриду?» намлиқ рамкиға қараң.)

¹⁹ Бизму мақалиниң бешидики жигитниң әһвалиға охшаш әһвалда болған едуқ. Бәхиткә яриша, Йәһва Худа бизгә ярдәм қолини бәргән. У гуналиримизни кәчүрүп, биз үчүн төләм бәргәнликтин, әһвалимиз тамамән өзгәргән. Әгәр биз Әйса Мәсиһкә ишәнсәк, «қәрзимиз» төлинип, биз гуна вә өлүмдин азат болумиз. Шундақла гуналиримиз пүтүнләй өчүрүлүп, биз Йәһваниң кәчүрүмигә еришәләймиз. Әң муһими, һазирниң өзидә асмандики Атимиз Йәһва билән дост болалаймиз.

20. Биз келәрки мақалидә немиләрни муһакимә қилимиз?

²⁰ Йәһва Худа билән Әйса Мәсиһниң биз үчүн қилғанлири үстидин чоңқур ойлансақ, қәлбимиз миннәтдарлиққа толиду (Кор. 2-х. 5:15). Уларниң ярдимисиз бизниң һеч үмүтимиз болматти. Бирақ һәрқайсимиз үчүн Йәһваниң кәчүрүми немини билдүриду? Биз буни келәрки мақалидә муһакимә қилимиз.