Йәһва Худаниң кәчүрүми биз үчүн немини билдүриду?

1. Бирсиниң «мән сизни кәчүрдүм» дегән сөзлириниң мәнасини чүшиниш немишкә қийин болуши мүмкин?

БИРСИНИ сөзлиримиз яки иш-һәрикитимиз билән рәнҗитип қойсақ, «мән сизни кәчүрдүм» дегән сөзләргә зар болуп кетимиз. Бу сөзләрни аңлапла, йениклишип қалимиз. Бирақ бирсиниң «мән сизни кәчүрдүм» дегән сөзлириниң мәнасини чүшиниш қийин болуши мүмкин. Немә үчүн? Чүнки бирси кәчүрдүм дегәндин кейин бурунқидәк дост болуп қалиду. Йәнә бирси болса, кәчүрдүм дәп ейтқини билән, сиздин қечип жүриду. Көргинимиздәк, кәчүрүш дегәнни һәрким һәр түрлүк чүшиниду.

2. Муқәддәс китапта Йәһваниң кәчүрүми қандақ тәсвирлиниду? (Изаһәткиму қараң.)

² Амма Йәһваниң кәчүрүм қилиши адәмләрниңкидин мутләқ башқичә. Зәбур язғучиси Йәһва Худа тоғрисида мундақ дегән: «Сән инсанни чин дилдин кәчүрүм қилисән»a (Зәб. 130:4, ЙД). Һә, Йәһва Худа кәчүргәндә, чин дилидин кәчүриду. Һечким У кәчүргәндәк кәчүрәлмәйду. Ибраний язмиларни язған бәзи кишиләр Йәһваниң кәчүрүмини тәсвирләш үчүн һәтта айрим бир сөзни қолланған вә бу сөзни һечқачан адәмләргә қарита ишләтмигән.

3. Йәһваниң кәчүрүми бизниңкидин қандақ пәриқлиниду? (Йәшая 55:6, 7)

³ Йәһва Худа кишини кәчүргәндә, униң гуналирини пүтүнләй өчүрүп ташлайду. Шундақ қилип, шу адәм билән мунасивити әслигә келиду. Йәһва бизни қайта-қайта чин дилидин кәчүргәнлиги үчүн Униңға бәк миннәтдармиз (Йәшая 55:6, 7ни оқуң).

4. Йәһва Худа һәқиқәтән кәчүрүшниң немә екәнлигини чүшинишимизгә қандақ ярдәм бериду?

⁴ Йәһва Худаниң кәчүрүми бизниңкидин тамамән башқа болса, биз һәқиқий кәчүрүшниң мәнасини чүшинәләймизму? Йәһва Худа Өзиниң қандақ кәчүридиғанлиғини чүшәндүрүш үчүн Муқәддәс китапта бизгә тонуш вә чүшинишкә оңай болидиған селиштурмиларни яздурған. Уларниң бәзилирини көрүп чиқайли. Улардин Йәһваниң гуналиримизни қандақ кәчүрүп, бизни Өзи билән қандақ яраштуридиғанлиғини билимиз. Бу мисаллар рәһим-шәпқәтлик вә көйүмчан Атимизға болған миннәтдарлиғимизни техиму ашуриду.

ЙӘҺВА ГУНАНИ ЕЛИП ТАШЛАЙДУ

5. Йәһва Худаниң гуналиримизни кәчүрүшини немә билән селиштурса болиду?

⁵ Муқәддәс китапта гуна еғир жүккә охшитилиду. Давут падиша мундақ дегән: «Гуналирим боюмдин ташти; улар көтирәлмигүсиз еғир жүктәк мени бесивалди» (Зәб. 38:4, КТ). Бирақ Йәһва Худа товва қилған кишиләрниң гуналирини кәчүриду (Зәб. 25:18; 32:5). Бу айәтләрдики «кәчүрүш» дәп тәрҗимә қилинған ибраний сөз «көтириш» яки «еливетиш» дегәнләрни билдүриду. Йәһва гуналиримизни кәчүргәндә, У худди мүримиздин еғир бир жүкни елип ташлиғандәк болиду.

6. Йәһва Худа гуналиримизни қанчилик жираққа елип ташлайду?

⁶ Йәһва Худаниң гуналиримизни биздин қанчилик жираққа елип ташлайдиғанлиғини башқа бир мисал тәсвирләйду. Зәбур 103:12-айәттә мундақ йезилған: «Шәриқ ғәриптин қанчә жирақ, шундақ У биздин қилмишларни жирақ қилди». Шәриқтин әң жирақ бир җай — ғәрип вә улар һечқачан учрашмайду. Башқичә ейтқанда, Йәһва Худа бизни кәчүргәндә, гуналиримизни биз тәсәввур қилалмайдиған жирақ бир йәргә елип ташлайду. Бу селиштурмидин Йәһваниң бизни пүтүнләй кәчүридиғанлиғини көрүмиз.

7. Муқәддәс китапта Йәһваниң гуналиримиз билән немә қилидиғанлиғи йезилған? (Мика 7:18, 19)

⁷ Йәһва Худа гуналиримизни көчмә мәнада жираққа елип ташлиғандин кейин, уларни сақламду? Әлвәттә, яқ! Хизқия падиша Йәһва тоғрисида мундақ язған: «Гуналиримни елип, кәйниңгә ташлидиң» (Йәшая 38:9, 17). Демәк, Йәһва Худа товва қилған гунакарниң гуналирини ташлиғандин кейин, уларға қайта қаримайду. Хизқияниң сөзлирини башқичә мундақ тәрҗимә қилса болиду: «Сән гуналиримни пүтүнләй йоқ қилип, мени һечқачан гуна қилмиғандәк қилдиң». Бу ойни тәкитләйдиған йәнә бир селиштурма Мика 7:18, 19-айәтләрдә (оқуң) йезилған. Бу айәтләрдә Йәһва Худа гуналиримизни деңиз тегигә ташлайду дейилгән. Қедимий заманларда деңиз тегигә ташланған бир нәрсини елип чиқириш мүмкин әмәс еди.

8. Мақалиниң биринчи қисмидин немиләрни биливалдуқ?

⁸ Бу селиштурмилардин көргинимиздәк, Йәһва Худа бизни кәчүргәндә, мүримизни зилдәк басқан жүкни елип ташлап, өзүмизни әйиплик һис қилмаймиз. Давут ейтқандәк, «қанунсизлиқлири кәчүрүлгән һәм гуналири йепилған кишиләр бәхитлик, Йәһва гунайини дақимайдиған киши нәқәдәр бәхитликтур» (Рим. 4:6—8). Растинла, Йәһва Худа бизни чин дилидин кәчүриду!

ЙӘҺВА ХУДА ГУНАНИ ЖУЮП ӨЧҮРИВЕТИДУ

9. Йәһва Худа Өзиниң қанчилик кәчүрүмчан екәнлигини қандақ селиштурма билән чүшәндүргән?

⁹ Йәһва Худа төләм арқилиқ товва қилған адәмниң гуналирини өчүрәләйду. Муқәддәс китапта буни тәсвирләйдиған башқиму селиштурмилар бар. Көчмә мәнада, Йәһва адәмниң гуналирини жуюп-тазилап, уни пак қилалайду (Зәб. 51:7; Йәшая 4:4; Йәр. 33:8). Йәһва Өзи буни мундақ чүшәндүргән: «Әгәр гуналириңлар қизил рәхттәк болса, улар қардәк ақ болиду. Әгәр әйивиңлар қениқ қизил болса, улар ақ жуңдәк болиду» (Йәшая 1:18). Адәттә кийимни қип-қизил дағдин тазилап жуюш асанға чүшмәйду. Лекин бу селиштурма арқилиқ Йәһва Худа бизни гуналиримиздин паклап, уларниң һәтта изиму қалмайдиғанлиғиға ишәндүриду.

10. Йәһваниң бизни пүтүнләй кәчүридиғанлиғини қандақ мисал чүшәндүрүп бериду?

¹⁰ Алдинқи мақалидин билгинимиздәк, гунани қәризгә охшитишқа болиду (Мәт. 6:12; Луқа 11:4). Шуңа биз һәр қетим гуна қилғанда, қәризниң үстигә қәриз қошулуп, униңға бешимиз билән петип кетимиз. Лекин Йәһва Худа бизни кәчүргәндә, У шу қәрзимизни пүтүнләй кәчүриду. Уларни қайтидин төләп бәр дәп тәләп қилмайду. Қәрзи кәчүрүлгән киши йениклишип қалиду. Гуналиримиз кәчүрүлгәндә, бизму йениклишип, хошал болуп қалимиз.

11. Муқәддәс китапта Йәһва Худаниң гуналиримизни қайси мәнада өчүридиғанлиғи йезилған? (Әлчиләр 3:19)

¹¹ Йәһва Худа қәрзимизни яки гунайимизни кәчүрүпла қоймай, уни жуюп-тазилап, пүтүнләй өчүрүветиду (Әлчиләр 3:19ни оқуң). Мәсилән, бирси қәрзиңизни кәчүрүп, уни сизивәтти дәйли. Бирақ сизиқниң астидин қанчә қәриз болғанлиғиңиз техичә көрүнүп туриду. Лекин Йәһваниң қәризни өчүрүши тамамән башқичә. Қедимда күл, сеғиз вә судин ясалған сияни нәм лата билән жуюп өчүрүветишкә болатти. Қәризни шундақ «өчүргәндә», у йоқ болуп, көрүнмигән еди. Шуңа адәм қәризни һечқачан алмиғандәк болатти. Гуналиримизни кәчүргәндә, уларни өчүрүп йоқ қилидиғанлиғи үчүн Йәһва Худаға интайин миннәтдармиз (Зәб. 51:9).

12. Булут тоғрисидики мисалдин немини үгинимиз?

¹² Йәһва гуналиримизни пүтүнләй кәчүридиғанлиғини көрситиш үчүн йәнә бир селиштурмини ишләткән: «Қилмишлириңни булут билән япимән вә сениң гуналириңни туман билән тораймән» (Йәшая 44:22). Мундақ ейтқанда, Йәһва Худа бизни кәчүргәндә, гуналиримизни қелин булут билән йепип, көзгә көрүнмәйдиған қилиду.

13. Йәһва Худа гуналиримизни кәчүргәндә, қандақ һис-туйғуда болумиз?

¹³ Буниңдин үгәнгинимиз, Йәһва кәчүргәндә, гуналиримизни тамамән жуюп өчүрүветиду. Шу сәвәптин, хаталиғимиз үчүн өмүр бойи өз гөшимизни өзүмиз йейишниң кериги йоқ. Әйса Мәсиһниң төләм қурбанлиғи гуналиримизни, йәни Худаниң алдидики қәрзимизни, пүтүнләй япиду. Биз худди һечқачан гуна қилмиғандәк болуп қалимиз. Һә, гуналиримизға товва қилсақ, Йәһва Худа бизни дәл шундақ кәчүриду.

ЙӘҺВА ДОСТЛУҒИМИЗНИ ӘСЛИГӘ КӘЛТҮРИДУ

14. Немә үчүн Йәһва Худаниң бизни пүтүнләй кәчүридиғанлиғиға ишәнч қилалаймиз? (Рәсимләргиму қараң.)

¹⁴ Йәһва Худа бизни кәчүргәндә, биз Униң билән қайтидин дост болалаймиз. Буниңдин башқа, гуналиримиз сәвәвидин өз гөшимизни өзүмиз йәп, қийналмаймиз. Йәһва адавәт сақлап, бизни җазалаш пурситини издәватиду дәпму қорқмаймиз. У һәргизму мундақ қилмайду. Немә үчүн Йәһва Худа бизни чин жүрәктин кәчүргәнлигигә ишәнчимиз камил? Чүнки У Йәрәмия пәйғәмбәр арқилиқ: «Мән уларниң гуналирини һәм қанунсизлиғини кәчүрүп, башқа әскә алмаймән»,— дегән (Йәр. 31:34). Әлчи Паулму Йәһваниң бу сөзлирини қайтилиған (Ибр. 8:12). Йәһва Худа қайси мәнада гуналиримизни әскә алмайду?

15. Йәһва Худаниң гуналиримизни әскә алмайдиғанлиғи немини билдүриду?

¹⁵ Муқәддәс китаптики «әскә елиш» дегән сөз-ибарә өтмүштики бир ишни әсләшни яки шу тоғрилиқ ойлашнила билдүрмәйду. Адәттә бу бирәр һәрикәтни билдүриду. Мәсилән, Әйсаниң йенида түврүккә миқланған җинайәтчи: «Әйса, Падишалиғиңға кәлгәндә, мени әскә алғина»,— дегән (Луқа 23:42, 43). Бу җинайәтчи Әйсадин уни әсләшнила әмәс, һәрикәт қилишни, йәни уни тирилдүрүшни сориған. Демәк, Йәһва Худаниң гунайимизни әскә алмайдиғанлиғи Униң бизгә қарши һәрикәт қилмай, кәчүрүлгән гуналиримиз үчүн кейин җазалимайдиғанлиғини билдүриду.

16. Муқәддәс китапта гуналиримизниң кәчүрүлүши немә билән селиштурулған?

¹⁶ Муқәддәс китапта Йәһва Худаниң кәчүрүми қуллуқтин азат қилиш биләнму селиштурулған. Гунакар болғанлиқтин, биз «гунаниң қуллири». Бирақ Йәһва Худа бизни кәчүргәнликтин, биз «гуналиримиздин азат» қилиндуқ (Рим. 6:17, 18; Вәһ. 1:5). Йәһваниң бизни кәчүргәнлигини билгәндә, әркинликкә еришкән қулға охшаш хошал болумиз.

17. Йәһва бизни кәчүргәндә, биз қайси мәнада сақийип кетимиз? (Йәшая 53:5)

¹⁷ Йәшая 53:5ни оқуң. Муқәддәс китаптики йәнә бир селиштурмидин көргинимиздәк, биз даваси йоқ кесәлгә гириптар болған кишигә охшаймиз. Лекин Йәһва Худа Өз Оғлини төләм сүпитидә берип, бизни сақайтти (Пет. 1-х. 2:24). Гуна сәвәвидин Йәһва Худа билән болған мунасивитимиз бузулиду. Лекин У төләм асасида бизни кәчүргәндә, достлуқ мунасивитимиз әслигә келиду. Еғир кесилидин сақийип кәткән адәмгә охшаш, бизму роһий җәһәттин сақийип, қайтидин Йәһва билән дост болғанда, интайин хошал болумиз.

ЙӘҺВАНИҢ КӘЧҮРҮМ ҚИЛИШИ БИЗ ҮЧҮН НЕМИНИ БИЛДҮРИДУ?

18. Муқәддәс китаптики селиштурмилардин Йәһва Худаниң кәчүрүми тоғрилиқ немини биливалдуқ? («Йәһва бизни қандақ кәчүриду?» намлиқ рамкиғиму қараң.)

¹⁸ Бу селиштурмилардин Йәһва Худаниң кәчүрүми тоғрилиқ немини үгәндуқ? У гуналиримизни кәчүргәндә, пүтүнләй кәчүриду вә келәчәктә шу гуналиримиз үчүн бизни җазалимайду. Шу сәвәптин, биз асмандики Атимиз билән йеқин дост болалаймиз. Бирақ шуни әстин чиқармайли, Йәһва Худаниң кәчүрүми — Униң бизгә бәргән соғиси. Биз бу соғиға лайиқ болғанлиқтин әмәс, Йәһва бизгә сөйгү-муһәббәт вә рәһим-шәпқәт көрсәткәнликтин ериштуқ (Рим. 3:24).

19. а) Биз Йәһва Худаға немә үчүн миннәтдар? (Римлиқларға 4:8) ә) Кейинки мақалидин немини биливалимиз?

¹⁹ Римлиқларға 4:8ни оқуң. Йәһва Худаға Униң гуналиримизни кәчүргәнлиги үчүн бәк миннәтдармиз! (Зәб. 130:4) Әлвәттә, Йәһваниң кәчүрүмигә еришишни халисақ, биз муһим бир ишни қилишимиз керәк. Әйса Мәсиһ мундақ дегән: «Башқиларниң хаталиқлирини кәчүрмисәңлар, асмандики Атаңларму силәрни кәчүрмәйду» (Мәт. 6:14, 15, ЙД). Демәк, биз Худайимиз Йәһвани үлгә қилип, башқиларни кәчүрүшимиз керәк. Бу тоғрилиқ кейинки мақалидин көпирәк биливалимиз.