Немә үчүн мәслиһәт соришимиз керәк?

1. Дана қарарларни чиқириш үчүн немә қилалаймиз? (Пәнд-нәсиһәтләр 13:10; 15:22)

ҺӘММИМИЗ дана қарарларни чиқиришни халаймиз. Шундақла планлиримизниң утуқлуқ болушиниму арзу қилимиз. Худаниң Сөзидә йезилғандәк, буниң үчүн биз башқилардин мәслиһәт соришимиз керәк (Пәнд-нәсиһәтләр 13:10; 15:22ни оқуң).

2. Йәһва Худа немә қилишқа вәдә бәргән?

² Әлвәттә, Атимиз Йәһва бизгә әң яхши мәслиһәтни берәләйду. Шуңа биз дуа қилип, Униңдин даналиқ соришимиз керәк. У бизгә ярдәм беришни вәдә қилип, мундақ дегән: «Саңа нәзәр селип, мәслиһәт беримән» (Зәб. 32:8, ЙД). Бу айәттә Йәһва Худа дәл бизгә керәк болған мәслиһәтни берип, уни һаятимизда қоллинишқа ярдәм беридиғанлиғини вәдә қилған.

3. Бу мақалидә қайси төрт соалға җавап алимиз?

³ Бу мақалидә Муқәддәс китапниң ярдими билән биз мошу төрт соалға җавап алимиз: 1) мәслиһәттин пайда елишимға қайси хисләтләр ярдәм бериду? 2) Маңа ким яхши мәслиһәт берәләйду? 3) Мәслиһәтни қобул қилишқа тәйяр екәнлигимни қандақ көрситәләймән? 4) Немә үчүн башқиларниң мән үчүн қарар қилишини соримаслиғим керәк?

ҚАНДАҚ ХИСЛИТИМ БОЛУШИ КЕРӘК?

4. Берилгән мәслиһәтниң пайдисини көрүш үчүн биздә қандақ хисләт болуши керәк?

⁴ Мәслиһәтниң пайдисини көрүш үчүн биз кәмтәр болушимиз муһим. Биз өзүмиз болуп бақмиған бир вәзийәттә дана қарар чиқириш үчүн башқиларниң мәслиһитигә муһтаҗ екәнлигимизни етирап қилишимиз керәк. Шундақла биз һәммини билмәйдиғанлиғимизни чүшинишимиз лазим. Әгәр биз кәмтәр болмисақ, Йәһва Худа бизгә ярдәм берәлмәйду. Нәтиҗидә, биз Муқәддәс китапни оқуғанда, униңдики мәслиһәтләр тамға ейтилғандәк болиду (Мика 6:8; Пет. 1-х. 5:5). Лекин биз кәмтәр болсақ, Муқәддәс китаптики мәслиһәтләрни қоллинишқа тәйяр болимиз вә буниң пайдисини көримиз.

5. Давут падиша қайси утуқлар сәвәвидин һакавур болуп кетиши мүмкин еди?

⁵ Давут падишаниң мисалидин немигә үгинәләймиз? У көп яхши ишларни қилған болсиму, тәкәббур болуп кәтмигән. Падиша болуштин нурғун жиллар авал һәммиси уни қабилийәтлик музыкант дәп билгән. У һәтта падишаниң алдида саз чалған (Сам. 1-яз. 16:18, 19). Давут падиша болушқа майланғанда, Йәһва Худа униңға Өз муқәддәс роһини бәргән (Сам. 1-яз. 16:11—13). У хәлиқниң арисида атақлиқ болуп, адәмләр уни Ғолиятни вә Худа хәлқиниң башқа дүшмәнлирини йәңгәнлиги үчүн мәдһийилигән (Сам. 1-яз. 17:37, 50; 18:7). Қол йәткүзгән утуқлири сәвәвидин һакавур болуп кәткән болса, Давут «мән башқиларниң мәслиһитигә муһтаҗ әмәс» дәп ойлатти. Лекин Давут ундақ ойлимиған.

6. Давутниң мәслиһәтни қобул қилишқа тәйяр болғанлиғи немидин көрүнгән? (Рәсимгиму қараң.)

⁶ Падиша болғандин кейин, Давут өзигә яхши мәслиһәтләрни берәләйдиған достларни таллиған (Тар. 1-яз. 27:32—34). Бу һәйран қаларлиқ әмәс, чүнки Давут падиша болуштин авалму башқиларниң мәслиһитигә қулақ салған. У әр кишиләрниңла әмәс, Абигал дегән аялниңму мәслиһитини қобул қилған. Абигал Набал дегән һакавур, миннәтдарлиқни билмәйдиған вә башқиларни һөрмәтлимәйдиған каж адәмниң аяли болған. Давут Абигалниң мәслиһитигә кәмтәрлик билән қулақ селип, чоң бир хаталиқтин нери турған (Сам. 1-яз. 25:2, 3, 21—25, 32—34).

7. Давутниң үлгисидин қандақ савақ алалаймиз? (Вәз 4:13) (Рәсимләргиму қараң.)

⁷ Биз Давутниң үлгисидин көп нәрсиләрни үгинәләймиз. Мәсилән, бир нәрсә қолумиздин яхши келиши яки башқиларниң үстидин һоқуққа егә болушимиз мүмкин. Шундақ болсиму, өзүмизниң һәммини билмәйдиғанлиғимизни вә башқиларниң мәслиһитигә муһтаҗ екәнлигимизни унтумайли. Давутқа охшаш бизму, яхши мәслиһәтни ким беришидин қәтъийнәзәр, уни қобул қилишқа тәйяр болушимиз керәк (Вәз 4:13ни оқуң). Шундақ қилсақ, биз өзүмизниң яки башқиларниң һаятини қийинлаштуридиған чоң хаталиқлардин нери туримиз.

ЯХШИ МӘСЛИҺӘТНИ КИМ БЕРӘЛӘЙДУ?

8. Йонатан немә үчүн Давутқа яхши мәслиһәт берәлигән?

⁸ Биз Давутниң үлгисидин алалайдиған йәнә бир савақни көрүп чиқайли. У һәм Йәһва Худа билән яхши мунасивәттә болған, һәм вәзийәтни яхши билгән адәмләрниң мәслиһитигә қулақ салған. Мәсилән, Саул падиша билән яришивелиш үчүн Давут униң оғли Йонатандин мәслиһәт сориған. Йонатан немишкә яхши мәслиһәт берәлигән? Чүнки у Йәһва Худа билән яхши мунасивәттә болған, шундақла дадисиниму бәш қолдәк яхши билгән (Сам. 1-яз. 20:9—13). Биз буниңдин немини үгинәләймиз?

9. Кимдин мәслиһәт сорисақ яхши? Чүшәндүрүп бериң (Пәнд-нәсиһәтләр 13:20)

⁹ Биз мәслиһәткә муһтаҗ болғанда һәм Йәһва Худа билән яхши мунасивәттә болған, һәм бу мәсилидә тәҗрибиси бар адәмдин ярдәм сорисақ яхшиa (Пәнд-нәсиһәтләр 13:20ни оқуң). Мәсилән, бир яш бурадәр өйләнмәкчи дәйли. Әгәр у бойдақ достидин мәслиһәт сориса, бәлким, у Муқәддәс китапқа асасланған яхши мәслиһәтни бериши мүмкин. Лекин яш бурадиримиз Йәһваға бираз вақит биллә хизмәт қилип кәлгән әр-аялдин ярдәм сориса, улар униңға техиму пайдилиқ мәслиһәтни берәләйду. Чүнки улар бурадәргә пәқәт Муқәддәс китаптики принципларни қоллиниш тоғрилиқ әмәс, өз һаятида үгәнгәнлирини ейтип берәләйду.

10. Һазир биз немини муһакимә қилимиз?

¹⁰ Биз мәслиһәтни қобул қилиш үчүн қайси хисләткә егә болушимиз керәклигини вә кимниң яхши мәслиһәт берәләйдиғанлиғини көрүп чиқтуқ. Әнди немә үчүн мәслиһәткә қулақ селишқа тәйяр болушимиз керәклигини вә башқиларни биз үчүн қарар қилишни соримаслиқниң муһимлиғини муһакимә қилайли.

МӘСЛИҺӘТНИ ҚОБУЛ ҚИЛИШҚА ТӘЙЯРМӘНМУ?

11, 12. а) Бәзидә биз немә қилишимиз мүмкин? ә) Муһим қарар чиқириш керәк болғанда, Реһабам падиша немә қилған?

¹¹ Бәзи вақитларда бирси башқилардин мәслиһәт сориши мүмкин, лекин у өзигә яқидиған қарар чиқирип қоюп, башқиларниң униң шу қарари билән келишишини халайду. Әгәр шундақ болса, униңға һәқиқәтән мәслиһәт керәк әмәс. Шундақ киши үчүн Реһабам падишаниң вақиәси әскәртмә болалайду.

¹² Сулайман падиша өлгәндин кейин, униң оғли Реһабам падиша болған. Реһабам падиша болғанда, Исраил хәлқи гүлләп яшниған. Лекин исраиллар Сулайман уларға еғир иш жүкләп қойған дәп ойлиған. Улар Реһабамға келип, жүклирини азирақ йеникләштүрүшни сориған. Реһабам қарар чиқириш үчүн униңға вақит керәклигини ейтқан. Авал у тоғра йол тутуп, Сулайман падишаға ярдәм бәргән яшанған әр кишиләрдин мәслиһәт сориған (Пад. 1-яз. 12:2—7). Лекин у уларниң нәсиһитини қобул қилмиған. Немә үчүн? Бәлким, у алдин-ала қарар чиқирип болуп, яшанған әр кишиләрниң униң билән келишиду дәп үмүт қилғанду? Шуңа кейин у яш достлиридин мәслиһәт сорап, улар униң билән келишкәндә, уларниң мәслиһити Реһабамниң қулиғиға хуш яққан (Пад. 1-яз. 12:8—14). Реһабам хәлиққә достлири ейтқандәк җавап бәргән. Нәтиҗидә, хәлиқ униңға қарши чиқип, башқа падишани таллиған. Буниңдин кейин Реһабам кәйни-кәйнидин қийинчилиқларға дуч кәлгән (Пад. 1-яз. 12:16—19).

13. Мәслиһәткә қулақ селишқа тәйяр екәнлигиңиз немидин көрүниду?

¹³ Реһабамниң вақиәсидин қандақ савақ алалаймиз? Биз техи қарар қилмай туруп, башқилардин мәслиһәт соришимиз керәк. Шундақла биз уларни зәң қоюп тиңшап, мәслиһитигә қулақ селишқа тәйяр болушимиз муһим. Шуңа өзүмиздин мундақ сорисақ болиду: «Мән бирсидин мәслиһәт сорап, у маңа яқмиса, уни бирдин рәт қилимәнму?» Бир мисални көрүп чиқайли.

14. Бизгә мәслиһәт берилгәндә, немини әстә тутушимиз керәк? Мисал кәлтүрүң. (Рәсимгиму қараң.)

¹⁴ Бир бурадәргә мааши жуқури яхши ишни тәғдим қилди дәйли. Униңға келишиштин авал, у ақсақалдин мәслиһәт сорайду. Бурадәр бу ишқа келишсә, аилисидин узақ вақитқа жираққа кетиш керәклигини ейтқанда, ақсақал униңға у аилисиниң роһий еһтияҗлириға ғәмхорлуқ қилиши керәклиги тоғрилиқ принципни әслитиду (Әфәс. 6:4; Тим. 1-х. 5:8). Бурадәр ақсақалниң сөзлири билән келишмәй, қулиғиға хуш яқидиған мәслиһәтни аңлиғичә, башқа қериндашлардин сорайду. Бу мисалдики бурадәр һәқиқәтән мәслиһәт издәватамду яки қарар чиқирип болуп, бирсиниң униң тоғра екәнлигини ейтишни күтүватамду? Жүригимиз алдамчи екәнлигини унтумайли (Йәр. 17:9). Бәзидә бизгә яқмайдиған мәслиһәт бизгә дәл муһтаҗ болған мәслиһәт болуши мүмкин.

БАШҚИЛАРДИН МЕНИҢ ҮЧҮН ҚАРАР ЧИҚИРИШНИ СОРИСАМ БОЛАМДУ?

15. Биз немә қилиштин пәхәс болушимиз керәк вә немә үчүн?

¹⁵ Һәрбиримиз чиқарған қарарлиримиз үчүн җавапкар (Гал. 6:4, 5). Дана адәм қарар чиқириштин авал, Муқәддәс китаптин вә Йәһва Худаға жиллар давамида садиқ хизмәт қиливатқанлардин мәслиһәт сориши муһим екәнлигини чүшәндуқ. Лекин башқилардин биз үчүн қарар чиқиришни сораштин пәхәс болушимиз керәк. Бәзиләр өзлири һөрмәт қилидиған бирсидин: «Мениң орнумда болсиңиз, бу мәсилини қандақ һәл қилалаттиңиз?»— дәп удул сориши мүмкин. Йәнә бәзилири болса, ойланмайла башқиларға охшаш қарар чиқириду.

16. Коринттики җамаәттә қандақ мәсилә пәйда болди вә қарарни ким чиқириши керәк еди? (Коринтлиқларға 1-хәт 8:7; 10:25, 26)

¹⁶ Биринчи әсирдә Коринт җамаитидә йүз бәргән бир вақиәни көрүп чиқайли. Бу җамаәттә бутларға қурбанлиқ қилинған гөшни йейиш тоғрилиқ мәсилә көтирилгән. Әлчи Паул бу җамаәттики қериндашларға: «Бут һечнәрсә әмәс һәм пәқәт бир Худадин башқа һечбир Илаһ йоқ»,— дәп язған (Кор. 1-х. 8:4). Паулниң бу сөзлирини аңлиған бәзи қериндашлар улар базарда сетивалған гөшни, һәтта у бутларға қурбанлиқ қилинған болсиму, йейишни қарар қилған. Башқа қериндашлар болса, бу уларниң вижданини азаплиғанлиқтин, шундақ гөшни йейишни рәт қилған (Коринтлиқларға 1-хәт 8:7; 10:25, 26ни оқуң). Бу һәрбир қериндашниң шәхсий қарари болған. Паул етиқатдашларни башқилар үчүн қарар чиқиришқа яки ойлимастин башқиларни дорашқа дәвәт қилмиған. У: «Һәрбиримиз Худа алдида өзүмиз үчүн һесават беримиз»,— дегән (Рим. 14:10—12).

17. Өзүмиз ойланмай, башқиларниң қарарини дорисақ, немә болиду? Мисал кәлтүрүң. (Рәсимләргиму қараң.)

¹⁷ Бүгүнму охшаш вәзийәт болуши мүмкин. Мәсилән, қан фракцияларға тегишлик мәсилини алайли. Һәрбир қериндаш қан фракциялирини қобул қилиш яки рәт қилиш тоғрилиқ өзи қарар чиқириши керәкb. Қан мәсилисини толуқ чүшиниш қийин болуши мүмкин, лекин һәрбиримиз шәхсий қарар чиқиришимиз интайин муһим (Рим. 14:4). Әгәр биз пәқәт башқа бирси чиқарған қарарни дорисақ, һечқачан дана болалмаймиз. Муқәддәс китапқа асасланған шәхсий қарар чиқарсақла, дана болалаймиз (Ибр. 5:14). Ундақта роһий йетилгән қериндаштин қачан мәслиһәт сорисақ тоғра болиду? Бу мавзу тоғрилиқ шәхсий тәтқиқ қилип, лекин техичә Муқәддәс китап принциплирини қандақ қоллинишни чүшәнмисәк, шу чағда ярдәм сорисақ болиду.

МӘСЛИҺӘТ СОРАШНИ ТОХТАТМАҢ

18. Йәһва Худа бизгә қандақ соғиларни бәргән?

¹⁸ Йәһва Худаниң өз алдимизға қарар чиқиришқа йол қойғанлиғидин, Униң бизгә ишинидиғанлиғи көрүниду. У бизгә Өз Сөзи болған Муқәддәс китапни соға қилған. Шундақла Муқәддәс китап принциплирини қандақ қоллинишни чүшинишимизгә ярдәм беридиған дана достларни бәргән. Шундақ қилип, көйүмчан Худайимиз бизгә ғәмхорлуқ қилип, Атилиқ борчини орунлиди (Пәнд н. 3:21—23). Униңға миннәтдар екәнлигимизни қандақ көрситәләймиз?

19. Биз қандақларчә Йәһва Худаниң көңлини хошал қилалаймиз?

¹⁹ Балисиниң чоң болуп, дана вә башқиларға ярдәм беришкә тәйяр садиқ Худа хизмәтчилириниң қатариға қошулғанлиғини көргәндә, ата-аниси интайин хошал болиду. Дәл шуниңға охшаш, роһий җәһәттин йетилип, башқилардин мәслиһәт сорайдиғанлиғимизни вә Уни яхши көридиғанлиғимизни көрситидиған қарар чиқиридиғанлиғимизни көргәндә, Йәһва Худаниң көңли хошал болиду.