ЯШЛАРНИҢ СОАЛЛИРИ
Муқәддәс китап маңа қандақ ярдәм берәләйду? 2-қисим. Муқәддәс китапни қизиқарлиқ усулда оқуң
«Муқәддәс китапни қандақ усулда оқуш керәклигини билмисиңиз, у зерикишлик болуп туюлиши мүмкин»,— дәйду Уилл исимлиқ өсмүр.
Муқәддәс китапни қизиқарлиқ усулда оқушниң сирини билгүңиз келәмду? Бу мақалә сизгә ярдәм бериду.
Тәсәввур қилиш қабилийитини ишлитиң
Оқуғанлириңизни тәсәввур қилиң. Төвәндики мәслиһәтләргә әмәл қилиң:
Муқәддәс китапниң бир үзүндисини таллап, тәтқиқ қилиң. Үзүндини Тәврат яки Инҗилдин таллисиңиз болиду. Яки болмиса, jw.org торбетимиздин драма шәкилдики Муқәддәс китап оқушлуғи дегән авазлиқ язмини таллап, тиңшисиңизму болиду.
Бу үзүндини оқуң. Уни өзүңиз ялғуз яки достлириңиз, аилиңиз билән үнлүк оқуп чиқсиңиз болиду. Бирси авторниң ролини, қалғанлар болса, башқа шәхсләрниң рольлирини оқуса болиду.
Төвәндики мәслиһәтләрниң биригә яки бирқанчисигә әмәл қилип оқуң:
Оқуғанлириңизни тәсәввур қилиш үчүн рәсимләрни сизиң. Мәсилән вақиәләрниң қандақ йүз бәргәнлигини көз алдиңизға кәлтүрүш үчүн бирнәччә аддий рәсимләрни сизиң. Һәрбир рәсимдә тәсвирләнгән вақиәни йезип қоюң.
Схемиларни сизиң. Мәсилән бирәр садиқ хизмәтчи һәққидә оқуғиниңизда, схема сизиш арқилиқ у кишиниң пәзиләтлири вә иш-һәрикәтлирини униң еришкән бәрикәтлири билән бағлаштуруң.
Йеңилиқларни йәткүзидиған мухбирдәк болуң. Йүз бәргән вақиәләрни бирнәччә шәхсниң орнида туруп ейтип бериң. Шу вақиәләрни баштин кәчүргән гувачилардин «сөһбәт» елиң.
Әгәр бу үзүндидә бирәр шәхс натоғра қарар чиқарған болса, у башқичә һәрикәт қилған болса, немә иш йүз бериши мүмкинлигини ейтип бериң. Мәсилән Әйсадин тенип кәткән әлчи Петрус һәққидики вақиәләрни ойлинип көрүң (Марк 14:66—72). Қандақ қилған болса, Петрус бу бесимға қарши туралатти?
Өзүңиз һекайә тоқуң. Әгәр илһам кәлгәндә, Муқәддәс китаптики бирәр һекайә асасида өзүңиз һекайә тоқуп беқиң. Бу үзүндидин алған савақлар тоғрисида ейтип өтүң (Римлиқларға 15:4).
Муқәддәс китаптики вақиәләрни җанландуралайсиз!
Чоңқурирақ қезиң!
Тапсилатларға диққәт қилсиңиз, йошурун гөһәрләрни тапалайсиз. Бәзидә Муқәддәс китаптики бир яки икки сөз муһим роль ойниши мүмкин.
Мәсилән, Мәтта 28:7-ни Марк 16:7 билән селиштуруң.
Немә үчүн Әйса шагиртлири вә «Петрусқа» көрүнүши керәклигини тилға алиду?
Ярдәм: Марк әшу вақиәләрниң гувачиси болмиған. Амма, ениқки Петрус шулар һәққидә Маркқа ейтип бәргән.
Йошурун мәрвайит: Әйсаниң өзи билән көрүшмәкчи болғанлиғини билгәндә, Петрус немә үчүн чоқум хошал болған? (Марк 14:66—72) Әйса әлчи Петрусни һәқиқий дост екәнлигини қандақ испатлиған? Сизму Әйсаға охшаш башқиларниң һәқиқий дост тутқанлиғиңизни қандақ көрситәләйсиз?
Тәсәввур қилиш қабилийитиңизни ишлитип, тәпсилатларни яхширақ издисиңиз, Муқәддәс китапни оқуш техиму қизиқарлиқ болиду!