Павлусниң йеңи ярдәмчиси — Тимотий

БУ РӘСИМДӘ, әлчи Павлус билән биллә турған бу яш жигит, Тимотий. У аилисидикиләр билән биллә Листра шәһиридә туратти. Униң аписиниң исми Әвники, вә момисиниң болса Лои еди.

Бу Павлусниң Листраға үчинчи қетим келиши еди. Еһтимал бир жил яки униңдин бурун, Павлус билән Барнаба бу йәргә хуш хәвәр йәткүзүшкә тунҗа қетим кәлгән еди. Бу қетим Павлус дости Силас билән биргә бу йәргә қайта кәлди.

Павлусниң Тимотийға немә дәватқанлиғини биләмсиз? У Тимотийдин: “Сән бизниң ярдәмчимиз болуп, жирақлардики хәлиқләргә хуш хәвәр йәткүзүш үчүн Силас билән маңа қошулушни халамсән?” дәп сораватиду.

Тимотий: “Мақул, беришни халаймән”, деди. Шуниң билән, узун өтмәй Тимотий аилисидин айрилип, Павлус вә Силас билән сәпәргә чиқти. Бирақ, уларниң сәпири тоғрисида үгиништин авал, Павлусқа немә иш болған, көрүп бақайли. Павлус Дәмәшққә сәпәр қилип маңғанда, Әйса Мәсиһ униңға көрүнгән, шу вақиттин таки һазирғичә 17 жил өтүп кәткән еди.

Есиңиздә барму, Павлус Әйсаниң әгәшкүчилиригә зиянкәшлик қилиш үчүн Дәмәшққә маңған еди. Мана әнди у өзи Әйсаниң шагирти болди! Кейин, бәзи дүшмәнләр Павлусниң Әйса һәққидә бәргән тәлимлирини өч көргәч, Павлусни өлтүрмәкчи болушти. Лекин, шагиртлар Павлусниң қечип кетишигә ярдәм бәрди. Улар Павлусни бир севәткә селип, шәһәр сепил теминиң сиртиға чүширип қойди.

Андин кейин, Павлус Антакийәгә берип хуш хәвәр йәткүзди. Бу тунҗа болуп Әйсаниң әгәшкүчилири “мәсиһ муртлири”, дәп аталған җай еди. Арқидин, Павлус билән Барнаба Антакийәдин башқа жирақ җайлардики дөләтләргә хуш хәвәр йәткүзүшкә әвәтилди. Улар барған шәһәрләрниң арисидики бири, Тимотийниң жути Листра еди.

Бир жилчә вақит өтүп кәтти. Һазир Павлус иккинчи қетимлиқ хуш хәвәр йәткүзүш сәпиридә қайта Листраға кәлди. Тимотий Павлус вә Силас билән биргә маңди, уларниң қәйәргә баридиғанлиғини биләмсиз? Бу хәритигә қараң, бирликтә бир нәччә җай билән тонушуп бақайли.

Авал, улар йеқин хошна шәһәр Конийәгә, кейин иккинчи бир Антакийәгә дәп аталған шәһәргә барди. Андин кейин, улар Троасқа берип, андин Филипи, Салоника вә Берияға барди. Хәритидин Афинани көрдиңизму? Павлус у йәрдә хуш хәвәр тарқатти. Шуниңдин кейин, улар Коринт шәһиридә бир йерим жил туруп, хуш хәвәр ейтти. Әң ахирида, улар Әфәс шәһиридә азирақла тохтап, андин кемә арқилиқ Қәйсәрийәгә қайтип кәлди. У йәрдин қайта Антакяға барди. Павлус у җайда туруп қалди.

Тимотий нәччә миң чақирим сәпәр қилип, Павлусқа ярдәмлишип “хуш хәвәр” тарқатти вә нурғун етиқатчилар җамаәтчилигини қурди. Сиз чоң болғанда, Тимотийға охшаш Худаниң садақәтмән хизмәтчиси боламсиз?