Худа дегән ким?

1. Немишкә Худаға ибадәт қилиш керәк?

Һәқиқий Худа — барлиқ нәрсиләрни бәрпа қилған Яратқучи. Униң башлиниши болмиған вә ахириниң чеки болмайду (Зәбур 90:2). Нәқ шу Худа бизгә Муқәддәс китапта хуш хәвәрни ейтти (Тимотийға 1-хәт 1:11). Худа бизгә һаятни соға қилғанлиқтин, биз пәқәт Униңғила ибадәт қилишимиз керәк (Вәһий 4:11 оқуп чиқиң).

2. Худа тоғрисида немә мәлум?

Инсанларниң һечқайсиси Худани һечқачан көрмигән, чүнки У Роһ. Роһ — бизниң һаятимиздин хелила жуқури туридиған һаятниң шәкли (Йоһан 1:18; 4:24). Гәрчә Худани көрүш мүмкин болмисиму, Худани яратмилири арқилиқ биләләймиз. Мәсилән, мевиләрниң, гүлләрниң түр-түри Униң меһир-муһәббити вә даналиғи һәққидә ейтиду. Аләмниң чәксизлиги Униң қудрити һәққидә гувалиқ қилиду (Римлиқларға 1:20 оқуп чиқиң).

Муқәддәс китапни оқуп, Худа һәққидә техиму көп билишкә болиду. Униңда Худа немини яхши көридиғини вә немини өч көридиғини, адәмләргә қандақ муамилә қилишни вә һәрқандақ вәзийәтләрдә немә қилидиғини тоғрисида ейтилиду (Зәбур 103:7—10 оқуп чиқиң).

3. Худаниң исми барму?

Әйса: «Әй асмандики Атимиз, Сениң намиң улуқланғай»,— дегән (Мәтта 6:9). Худаниң унванлири нурғун, бирақ Униң бирла исми бар. Түрлүк тилларда у исим пәриқлиниду. Уйғур тилида бу исим «Йәһва» дәп ейтилиду (Яритилиш 22:14 оқуп чиқиң).

Муқәддәс китапниң нурғун тәрҗимилиридә бу исим Худа вә Алла дегән сөзләргә өзгәртилгән. Амма Муқәддәс китапниң түп нусхисида Худа исми тәхминән 7000 қетим учрайду. Қедимда Худаниң садиқ хизмәтчилири күндилик һаятида вә ибадәт қилғанда Худаниң исмини қолланған (Йоһан 17:26 оқуп чиқиң).

«Худаниң исми барму?» дегән видеони көрүң

4. Йәһва Худа бизни сөйәмду?

Бүгүн дуния йүзидә қайғу-һәсрәт наһайити көп. Лекин булар Худаниң бизни сөймәслиги яки бизгә бепәрвалиғини билдүрәмду? Бәзилири Худа бизни синаш үчүн қайғу-һәсрәтләрни әвәтиду дәп ойлайду. Лекин бу натоғра (Яқуп 1:13 оқуп чиқиң).

Йәһва Худа инсанға таллаш әркинлигини бәргән. Биз мошу таллаш әркинлигини Униңға хизмәт қилиш үчүн пайдилиналаймиз (Йәшуа 24:15). Бирақ нурғунлири башқа йолни таллаватиду. Улар башқиларға зулумлуқ қиливатиду. Шу сәвәптин дунияда қайғу-һәсрәт көп. Йәһваниң мошу адаләтсизликкә қаришиниң өзи җениға петиватиду (Яритилиш 6:5, 6 оқуп чиқиң).

Йәһва бизни сөйиду. Һаятимизда хошал болушимизни халайду. Йеқин арида У зулумни вә зулумлуқ қилғучиларни йоқ қилиду. Гәрчә Йәһва қайғу-һәсрәтләргә йол қоюватсиму, бу вақитлиқ. Буниңға асаслиқ сәвәп бар. Қандақ? Бу тоғрисида 8-чи савақтин билимиз (Петрусниң 2-хети 2:9; 3:7, 13 оқуп чиқиң).

5. Худаға қандақ йеқинлашсақ болиду?

Йәһва бизни Униңға йеқинлишишимизни халайду. Буниңда бизгә дуа ярдәм қилиду, биз Худа билән сөһбәтлишишимиз керәк. У һәр бир адәмгә көңүл бөлиду (Зәбур 65:2; 145:18). Йәһва кәчүрүшкә тәйяр. Һәтта бәзидә қамлаштуралмисақму Уни хурсән қилишқа тиришишимизни У баһалайду. Буниң һәммиси камилсизлиғимизға қаримастин биз Униң билән йеқин болалайдиғинимизни көрситиду (Зәбур 103:12—14; Яқуп 4:8 оқуп чиқиң).

Йәһва Худа бизгә һаятни соға қилғанлиқтин, биз Уни һәммидин артуқ сөйүшимиз керәк (Марк 12:30). Худаға болған сөйгүмизни көрситиш үчүн, биз Униң тоғрисида билим елишни вә вәсийәтлирини орунлашни давамлаштурушимиз муһим. Шундақ қилип сиз Йәһваға йеқинлишалайсиз (Тимотийға 1-хәт 2:4; Йоһанниң 1-хети 5:3 оқуп чиқиң).