Рәһбәрлик кеңәшниң хети

Ибранийларға 5-бап 12-айәттә (ЙД), пүткүл каинаттики Әң Улуқ Устаз Йәһва: «Силәр муәллим болушуңлар керәк»,— дәйду. Ойлап көрүң, Йәһва бизни Өзи һәққидә башқиларға тәлим беришкә чақириватиду. Бу немә дегән чоң шан-шәрәп-һә! Мәйли аилидә, җамаәттә яки вәз хизмитидә болсун, биз башқиларға Йәһва һәққидики һәқиқәтни үгитишимиз керәк. Бу алаһидә имтияз вә чоң җавапкарлиқ. Бизгә тапшурулған мошу вәзипини қандақ яхши орунлалаймиз?

Бу соалға җавапни әлчи Паулниң Тимотийға язған хетидин тапалаймиз. Паул: «Өзүңни җамаәткә Муқәддәс Язмилар[ни] оқуп бериш, нәсиһәт қилиш вә тәлим беришкә беғишлиғин... шундақ қилсаң, өзүңму вә саңа қулақ салғанларму қутқузулиду»,— дегән (Тим. 1-х. 4:13, 16). Сиз ейтиватқан хәвәр инсанларниң һаятини сақлап қалалайду. Шуңа үнлүк оқуш вә тәлим бериш маһаритини өстүрүш муһим. Бу китапчә дәл мошу мәхсәт билән йезилған. Һазир буниң бирнәччә алаһидиликлирини көрүп бақайли.

Һәрбир бәттә айәтләр кәлтүрүлгән. Бу айәтләрдә дәрискә мунасивәтлик Муқәддәс китап принциплири яки мисаллар бар.

Йәһва Улуқ Устаздур (Йәшая 30:20). Бу китапчә сизниң үнлүк оқуш вә тәлим бериш маһаритиңизни өстүрүшкә ярдәм бериду. Бирақ биз ейтиватқан хәвәрниң Мәнбәси Йәһва екәнлигини вә У Өзи адәмләрни җәлип қилидиғанлиғини һәргиз унтумаң (Йоһ. 6:44). Шуңа һәрдайим Йәһвадин муқәддәс роһ сораң. Худаниң Сөзини көпирәк ишлитиң. Диққитиңизни өзүңизгә әмәс, Йәһваға қаритиң. Бизниң мәхситимиз болса, адәмләрниң Йәһва Худани чин қәлбидин сөйүшни үгинишигә ярдәм бериш.

Йәһва Худа сизни инсанийәт тарихидики әң муһим хәвәрни йәткүзүш хизмитигә тәклип қиливатиду. «Худа бәргән күчкә тайинип, хизмәт» қилсиңиз, Худа тапшурған вәзипини чоқум яхши орунлалайдиғанлиғиңизға ишәнчимиз камил (Пет. 1-х. 4:11).

Сизниң хизмәтдашлириңиз,

Йәһва гувачилириниң Рәһбәрлик кеңиши