40-ДӘРИС
Худаниң нәзәридә пак болуш үчүн немә қилалаймиз?
Меһрибан ана оғлини мәктәпкә әвәтиш алдида балисини қандақ тәйярлиғанлиғини тәсәввур қилип беқиң. У оғлини жуюндуруп, пакиз, рәтлик кийиндүриду. Бу балиниң саламәтлиги үчүн пайдилиқ вә башқиларға ата-анисиниң оғлиға яхши көңүл бөлидиғанлиғини көрситиду. Шуниңға охшаш, көйүмчан Атимиз Йәһва бизниң җисманий вә әхлақий җәһәттин пак болушимизни халайду. Пакиз болсақ, өзүмиз үчүн пайдилиқ вә Яратқучимизға шан-шәрәп кәлтүримиз.
1. Җисманий җәһәттин қандақ пак болалаймиз?
Йәһва Худа бизгә: «Пак [муқәддәс, ЙД] болуңлар»,— дәйду (Петрусниң 1-хети 1:16). Муқәддәслик җисманий вә әхлақий паклиқ билән бағлинишлиқ. Биз дайим жуюнуш вә кийим-кечәк, өй вә машинини пакиз, рәтлик тутуш арқилиқ җисманий җәһәттин пакиз болалаймиз. Биз йәнә Ибадәт өйлирини тазилап, пакиз тутушқа ярдәм берәләймиз. Җисманий җәһәттин пак болсақ, Йәһваға шан-шәрәп кәлтүримиз (Коринтлиқларға 2-хәт 6:3, 4).
2. Пак-пакиз болуш үчүн, қайси адәтләрдин жирақ турушимиз керәк?
Муқәддәс китапта шундақ дейилгән: «Тән билән роһни булғайдиған һәммә нәрсидин өзүмизни тазилайли» (Коринтлиқларға 2-хәт 7:1). Шуңа биз бәдинимизгә яки әқлимизгә зиян йәткүзидиған һәрқандақ нәрсидин нери турушқа тиришимиз. Ой-пикирлиримиз Йәһвани хурсән қилиши керәк, шуңа биз пүтүн күчимиз билән намувапиқ ой-пикирләрни рәт қилимиз (Зәбур 104:34). Биз йәнә әдәпсиз гәп-сөзләрни ишләтмәсликкә тиришимиз (Колосилиқларға 3:8ни оқуң).
Йәнә немә бизни җисманий вә әхлақий җәһәттин напак қилиду? Тенимизни булғайдиған бәзи маддилар бар. Шуңлашқа, биз тамака, насвай, нәшә вә зәһәрлик чекимлик вә башқа мәсхуш қилидиған дорилардин жирақ туримиз. Булардин сақлиниш арқилиқ тән-сағламлиғимиз яхширақ болиду вә һаятлиқ соғисиға һөрмәт көрситимиз. Биз йәнә мастурбацияa вә порнография көрүштәк напак қилмишларға қарши туруш арқилиқ әхлақий җәһәттин пак болушқа тиришимиз (Зәбур 119:37; Әфәсликләргә 5:5). Бу яман адәтләрни йеңиш қийин, шундақтиму Йәһва бизгә уларни ташлашқа ярдәм берәләйду (Йәшая 41:13ни оқуң).
ЧОҢҚУРИРАҚ ҚЕЗИҢ
Җисманий җәһәттин пак болушниң Йәһва Худаға қандақ шан-шәрәп елип келидиғанлиғини ойлаң вә напак адәтләрни қандақ ташлашни үгиниң.
3. Җисманий пакизлиқ Йәһваға шан-шәрәп кәлтүриду
Йәһва Худаниң қедимқи Исраил хәлқигә бәргән буйруқлирини тәтқиқ қилип үгиниш арқилиқ Униң пакизлиққа болған көзқаришини биләләймиз. Чиқиш 19:10 вә 30:17—19ни оқуң, кейин төвәндики соалларға җавап бериң:
Бу айәтләр Яратқучи Йәһваниң җисманий пакизлиққа болған көзқариши һәққидә немиләрни ашкарилайду?
Қайси яхши адәтләр җисманий җәһәттин пак болушиңизға ярдәм бериду?
Җисманий җәһәттин пакиз болуш үчүн вақит вә күч чиқиришқа тоғра келиду. Амма қәйәрдә яшишимиздин вә ихтисадий әһвалимиз қандақ болушидин қәтъийнәзәр, биз тамамән шундақ қилалаймиз. ВИДЕОНИ көрүң, кейин төвәндики соал үстидә ойлинип көрүң.
Вәз хизмитимиздә өз нәрсә-керәклиримизни пакиз вә рәтлик тутуш арқилиқ Йәһваға қандақ шан-шәрәп кәлтүрәләймиз?
4. Яман адәтләрни ташлаң
Йәһва Худа бизгә һәрқандақ яман адәттин айрилишқа ярдәм бериду
Әгәр тамака яки көңүл ечиш үчүн зәһәрлик чекимлик чәксиңиз, бу адәтни ташлашниң қанчилик қийин екәнлигини билисиз. Амма сизгә немә ярдәм берәләйду? Шу адәтниң сизгә қандақ тәсир қилидиғанлиғини ойлап көрүң. Мәтта 22:37—39ни оқуп, төвәндики соалларни муһакимә қилиң. Тамака яки зәһәрлик чекимлик...
кишиниң Йәһва билән болған достлуғиға қандақ тәсир қилиду?
кишиниң аилә әзалири вә башқилар билән болған мунасивитигә қандақ тәсир қилиду?
Яман адәтни ташлаш үчүн план түзүңb. ВИДЕОНИ көрүң.
Филипиликләргә 4:13ни оқуң, кейин төвәндики соалға җавап бериң:
Дуа қилиш, Муқәддәс китапни тәтқиқ қилиш вә ибадәт жиғилишлириға қатнишишни адәткә айландуруш яман адәтни ташлашқа қандақ күч берәләйду?
5. Напак ой-пикирләр вә иш-һәрикәтләргә қарши күрәш қилиң
Колосилиқларға 3:5ни оқуң, кейин төвәндики соалларға җавап бериң:
Порнографияни көрүш, шәһваний мәзмундики учурларни әвәтиш (секстинг) вә мастурбация Йәһваниң нәзәридә напак екәнлигини қәйәрдин билимиз?
Сизниңчә, Йәһва Худаниң биздин әхлақий җәһәттин пак-пакиз болушни тәләп қилиши әқилгә мувапиқму? Немә үчүн?
Напак ой-хиялларға қарши қандақ күрәш қилишни биливелиң. ВИДЕОНИ көрүң.
Әйса Мәсиһ бир тәмсилни ишлитип, әхлақий җәһәттә пак-пакиз болуш үчүн чоқум қәтъий һәрикәт қилишимиз керәклигини көрсәткән. Мәтта 5:29, 30ни оқуң, кейин төвәндики соалға җавап бериң:
Бу айәттә Әйса Мәсиһ өзүмизгә җисманий җәһәттин зиян йәткүзүшимиз керәклигини ейтмиған. Әксинчә, напак ой-пикирләрдин жирақ туруш үчүн қәтъий ирадә билән һәрикәт қилишимиз керәклигини көрсәткән. Буни қандақ қилалаймиз?c
Напак ой-пикирләрдин қутулуш үчүн күрәш қилсиңиз, Йәһва Худа көрсәткән тиришчанлиғиңизни қәдирләйду. Зәбур 103:13, 14ни оқуң, кейин төвәндики соалға җавап бериң:
Әгәр напак адәт билән күрәш қиливатқан болсиңиз, бу айәт сизни давамлиқ күрәш қилишқа қандақ дәвәт қилиду?
Жиқилип чүшсиңиз, қайта дәс туруң!
Бир адәм яман ишни қайта қилип қойғинида: «Мән яман адитимни ташлалмайдекәнмән, болди, ваз кечәйла»,— дәп ойлиши мүмкин. Амма ойлап көрүңа: узунға жүгрәйдиған тәнһәрикәтчи мусабиқидә жиқилип чүшсә, бу униң мәғлуп болғанлиғини яки болмиса, баш пәллигә қайтип, қайта жүгүрүши керәклигини билдүрмәйду. Худди шуниңдәк, бир ишни тәкрар қилип қоюш, бу яман адәтләргә қарши күрәштә мәғлуп болғанлиғиңизни билдүрмәйду. Шуниңдәк, бу һәргизму аллиқачан қолға кәлтүргән нәтиҗилириңиз бекар болди дегәнлик әмәс. Бир ишни қайта қилип қоюш — нормал әһвал, ғәлибә қилиш үчүн бесиш керәк йолниң бир қисми. Һәргиз бәл қоювәтмәң! Йәһваниң ярдимидә чоқум яман адәтни ташлалайсиз.
БӘЗИЛӘР МУНДАҚ ДӘЙДУ: «Мән хумар болуп қалдим. Әнди ташлалмаймән».
Бир кишигә өзиниң яман адитини Йәһваниң ярдимидә ташлалайдиғанлиғини көрситиш үчүн Муқәддәс китаптики қайси айәтни қоллиналайсиз?
ХУЛАСӘ
Тенимиз, зеһнимиз вә иш-һәрикитимизни пак-пакиз тутуш арқилиқ Йәһва Худани хурсән қилимиз.
Тәкрарлаш
Немә үчүн пак-пакиз болуш шунчә муһим?
Җисманий җәһәттин пакиз болуш үчүн немә қилалайсиз?
Ой-пикирлириңиз вә иш-һәрикәтлириңизни қандақ пак туталайсиз?
ИЗДИНИП КӨРҮҢ
Турмуш шараитиңиз анчә яхши болмисиму, җисманий җәһәттин пакиз болуш үчүн қандақ аддий ишларни қилалайсиз?
Тамака хумаридин қутулушниң әмәлий қәдәмлирини көрүң.
«Тамакини ташлаш» («Ойғиниш!» 2010-жил, май)
Шәһваний мәзмундики нәрсиләрни (порнография) көрүшниң тәсири һәққидә биливелиң.
«Порнография — зиянлиқму яки зиянсизму?» («Күзитиш мунари» 2013-жил, 1-август)
Бир адәм шәһваний мәзмундики нәрсиләрни көрүш хумаридин қандақ қутулғанлиғини биливелиң.
«Мән ғәлибә қазиништин бурун, нурғун қетим мәғлуп болдум» («Күзитиш мунари» 2016-жил, 4-сан)
a Мастурбация (онанизм) яки қолда ләззәтлиниш — өзиниң җинсий әзалирини силаш яки сүркәш арқилиқ адәттә җинсий һиссиятини жуқури пәллигә көтиридиған начар адәттур.
b Бу дәрисниң «Издинип көрүң» дегән бөлүгидә «Тамакини ташлаш» намлиқ мақалә тәвсийә қилинған. Униңда тамака хумаридин қутулушниң әмәлий қәдәмлири чүшәндүрүлгән.
c Мастурбация (онанизм) адитини йеңиш үчүн «Яшларниң соаллири. Әмәлий мәслиһәтләр» китавиниң (рус) 1-қисмидики «Мастурбация адитини қандақ йеңәләймән?» намлиқ 25-бабиға қараң.