6-قىسم
يەھۋا نېمە ئۈچۈن بىزنى ياراتتى؟
سۇلايمان پادىشاھ ھاياتلىقنىڭ ئەھمىيىتى توغرىسىدىكى سوئال ئۈستىدە چوڭقۇر ئىزدەنگەن
يەھۋانى تونۇشنىڭ سىز ئۈچۈن نېمە ئەھمىيىتى بار؟ ئەھمىيىتى ناھايىتى كۆپ. بۇلارنىڭ ئارىسىدىكى بىرى، مىليونلىغان كىشىلەرنى گاڭگىرىتىپ قويغان بىر سوئالنىڭ جاۋابىنى تېپىش: «مەن نېمە ئۈچۈن بۇ دۇنياغا كەلدىم؟» بەلكىم، سىز ھەم مۇشۇ سوئالنى ئۆز-ئۆزىڭىزدىن سوراپ باققانسىز؟ قەدىمدە بىر دانا پادىشاھ بولۇپ، ئۇنىڭ مال-دۇنياسى ئۆز زامانىدىكى «يەر يۈزىدىكى ھەممە پادىشاھلاردىن ئاشۇر ئىدى» ھەمدە ئۇ ھاياتلىقنىڭ ئەھمىيىتى توغرىسىدىكى سوئال ئۈستىدە چوڭقۇر ئىزدەنگەن (2-تارىخنامە 9:22؛ ۋەز 2:1–13). بۇ پادىشاھ ئۆز ھۆكۈمرانلىقىدا ئۇلۇغ كۈچ-قۇدرەت، ھەددى-ھېسابسىز مال-دۇنيا ۋە تەڭداشسىز ئەقىل-پاراسەتكە ئىگە سۇلايمان پادىشاھتۇر. ئۇنىڭ ئىزدىنىشىنىڭ نەتىجىسى قانداق بولغان؟ ئۇ: «بۇ ھەممە سۆزلەرنىڭ نەتىجىسىنى ئاڭلاپ خۇدادىن قورقۇپ ئۇنىڭ ئەمىرلىرىنى تۇتقىن چۈنكى بۇ ئۆزى ھەممە ئادەملەرنىڭ پەرزىدۇر» دەپ خۇلاسە قىلغان (ۋەز 12:13). چۈنكى سۇلايماننىڭ كۆرگەن-بىلگەنلىرى نۇرغۇن ئادەملەردىن كۆپ بولغاچ، ئۇنىڭ چىقارغان خۇلاسىسىنى ئەستايىدىل مۇلاھىزە قىلشقا ئەرزىيدۇ. — ۋەز 2:12.
2 سۇلايمان تىلغا ئالغان خۇدادىن قورقۇش، نامەلۇم بىر روھدىن قاتتىق ۋەھىمە ئىچىدە قورقۇشنى ئەمەس. ئەكسىچە، ئۇ ئۆزى سۆيىدىغان بىر كىشىنى رەنجىتىپ قويۇشتىن ئەيمىنىپ قورقۇشنى كۆرسىتىدۇ. ئەگەر سىز بىرسىنى ئىنتايىن ياخشى كۆرسىڭىز، ئەلۋەتتە سىز ھەمىشە ئۇنى خۇرسەن قىلىشنى خالايسىز ۋە ئۇنىڭ كۆڭلىنى رەنجىتىدىغان ئىشلارنى قىلىشتىن خالىي بولىسىز. سىزنىڭ يەھۋاغا بولغان مۇھەببىتىڭىزگە كەلسەك، سىز ھەم شۇنداق ھېسسىياتتا بولىسىز.
3 مۇقەددەس كىتاب ئوقۇش ئارقىلىق سىز ياراتقۇچىمىزنىڭ نېمىنى ياخشى كۆرىدىغانلىقى، نېمىنى ياخشى كۆرمەيدىغانلىقى ۋە يەرشارىنى يارىتىش مەقسىتى توغرىسىدا ئۆگىنەلەيسىز. يەھۋا «يەرنى سۈرەتكە كەلتۈرۈپ ئۇنى ياساپ» مەيدانغا كەلتۈرگۈچى دەپ تەسۋىرلەنگەن بولۇپ، مۇقەددەس كىتاب ھەمدە خۇدا يەرنى «مۇقەررەر قىلىپ ئۆزى ئۇنى بىكار ياراتماي بەلكى ئولتۇرماق ئۈچۈن ئۇنى ياراتقان» دەيدۇ (يەشايا 45:18). يەھۋا يەرشارىنى ئىنسانلارنىڭ ئۇنىڭدا ئولتۇرۇپ، يەرشارىدىن ۋە يەريۈزىدىكى بارلىق جان-جانىۋارلاردىن خەۋەر ئېلىشى ئۈچۈن تەييار قىلغان (يارىتىلىش 1:28). بىراق، يەھۋانىڭ ئىنسانلارنى يارىتىش مەقسىتى ئۇلارنى پەقەتلا خەۋەر ئالغۇچى قىلىشمۇ؟
ئادەم-ئاتا بىلەن ھاۋا-ئانا بولسا خۇدا بىلەن ئۆزگىچە مۇناسىۋەتتە بولغان
4 ياق، ناھايىتى ئۇلۇغۋار مەقسەت بار بولغان. بىرىنچى ئىنسان ئادەم-ئاتىنىڭ يەھۋا بىلەن ئۆزگىچە مۇناسىۋەتى بار ئىدى. ئادەم-ئاتا ياراتقۇچى بىلەن بىۋاستە ئالاقە قىلىشاتتى. ئۇ خۇدا ئۇنىڭغا ئېيتقان سۆزنى ئاڭلىيالاتتى ۋە ئۆز ئوي-پىكىرلىرىنى ھەم يەھۋاغا ئاشكارا ئېيتالايتتى (يارىتىلىش 1:28–30؛ 3:8–13، 16–19؛ ئەلچىلەر 17:26–28). شۇڭا، ئادەم-ئاتا ۋە ئۇنىڭ ئايالى ھاۋا-ئانىنىڭ يەھۋانى ياخشىراق تونۇشى ۋە ئۇنىڭ بىلەن چوڭقۇر مۇناسىۋەتنى راۋاجلاندۇرۇشى ئۈچۈن ئەڭ ياخشى بىر پۇرسەت بار ئىدى. يەھۋا ئۇ «شاد-خۇرام خۇدا»، ئۇنى تونۇش ۋە ئۇنى ئۈلگە قىلىپ ياشاش ئارقىلىق ئۇلار تۇرمۇشىدىن رازى بولۇپ قانائەت ھاسىل قىلىپ ياشىيالاتتى (1-تىموتىي 1:11، ھ.ز.). يەھۋا ئۇ «ئىشلىتىپ سۆيۈنمىكىز ئۈچۈن بىزگە بېرىلگەن ھەر نېمەتنى كەڭرىچىلىك بىلەن بەرگەن» خۇدادۇر. يەھۋا بىرىنچى ئىنساننى مەڭگۈ ياشاش ئۈمىدى بىلەن ئېرەم باغ دەپ ئاتالغان جەننەتكە ئورۇنلاشتۇرغان. — 1-تىموتىي 6:17؛ يارىتىلىش 2:8، 9، 16، 17.
ئادەم ھۈجەيرىسى توغرىسىدا يېقىنقى بايقاش نېمىنى ئاشكارا قىلىدۇ؟
5 مەڭگۈ ياشاش؟ سىز بەلكىم مەڭگۈ ياشاش ئوي-خىيالى بىمەنىلىك دەپ رەت قىلىشىڭىز مۇمكىن. ئەمما، ئۇ راستىنلا بىمەنە ئوي-خىيالمۇ؟ تەتقىقاتچى ئالىملار ھازىر ھۈجەيرىنىڭ قېرىشىنىڭ سەۋەبىنى تېخىمۇ ئىلگىرلىگەن ھالدا چۈشىنىپ يەتتۇق دەپ قارىماقتا. ئۇلار ھۈجەيرىنىڭ خروموسۇمىنىڭ ھەر ئىككى ئۇچ قىسىمىدا ئېرسىيەت ماددىسى تېلومېرنى بايقىغان. ھۈجەيرە ھەر قېتىم بۆلۈنگەندە، تېلومېر بىرئاز قىسقىرايدىكەن. ھۈجەيرە 50 دىن 100 قېتىمغىچە بۆلۈنگەندىن كېيىن، تېلومېر تۈگەپ كېتىپ ھۈجەيرە بۆلۈنىشىمۇ توختايدىكەن. بىراق، ئەڭ يېقىنقى ئىلىم-پەن بايقاش نەتىجىسى شۇنى كۆرسەتتىكى، تېلومېر ئېنزىمىنىڭ ياردىمىدە ئادەمنىڭ ھۈجەيرىسى توختىماستىن بۆلۈنەلەيدىكەن. گەرچە بۇ بايقاش يەھۋا خۇدا ئاشۇ ئالاھىدە ئېنزىم ئارقىلىق ئىنسانلارنى مەڭگۈلۈك ھاياتقا ئېرىشتۈرىدۇ دېگەن مەنىنى بىلدۈرمىسىمۇ، ئەمما مۇشۇ بىر نەرسىنى ئاشكارا قىلىدۇ: مەڭگۈ ياشاش ئوي-خىيالى بىمەنلىك ئەمەس.
6 خۇدانىڭ بىرىنچى بىر جۈپ ئىنساننى مەڭگۈ ياشاش ئۈچۈن ياراتقانلىقىنى مۇقەددەس كىتاب ئاشكارا قىلىدۇ. مۇقەددەس كىتابتىكى بۇ خاتىرىلەر ناھايىتى ئىشەنچىلىك. ئىنسانلار ئۆزلىرىنىڭ يەھۋا بىلەن بولغان مۇناسىۋىتىنى مەڭگۈ راۋاجلاندۇرالايتتى. ئۇلار ئاسماندىكى ئاتىسى بىلەن كۈچلۈك رىشتە باغلاپ، ئۇنىڭ ئىنسانلار ۋە يەرشارىنى يارىتىش مەقسىتىدىن خەۋەردار بولالايتتى ۋە ئۇنى ئورۇندۇيالايتتى. ئۇلارنىڭ تۇرمۇشى جاپا-مۇشەققەتلىك بولمايتتى. ئەكسىچە، ئادەم-ئاتا ۋە ھاۋا-ئانىنىڭ يەرشارىنى بەخت-سائادەتكە تولدۇرۇپ، مۇكەممەل پەرزەنتلىك بولۇشتەك پارلاق كەلگۈسى بولغان ئىدى. ئۇلار مەڭگۈ قانائەت ھاسىل قىلالىغان ۋە ئەھمىيەتلىك خىزمەتنى قىلالىغان بولاتتى. بۇ دەل كىشىنى مەمنۇن قىلىدىغان بەختلىك تۇرمۇش! — يارىتىلىش 1:28.