12-دەرس
پادىشاھلىق ۋەز ئېيتىش خىزمىتىمىز قانداق تەشكىللەنگەن؟
ئىسپانىيە
بېلارۇسىيە
شياڭگاڭ
پېرۇ
ئەيسا مەسىھ ئۆز ئۆلۈمىدىن بۇرۇن: «خۇدانىڭ پادىشاھلىقى ھەققىدىكى بۇ خۇش خەۋەرنىڭ بارلىق مىللەتلەرگە ئاڭلىتىلىشى ئۈچۈن، ئۇ پۈتۈن دۇنياغا تارقىتىلىدۇ، ئاندىن زامان ئاخىرى كېلىدۇ» دەپ جاكارلىغان ئىدى (مەتتا 24:14). ئۇنداقتا، يەر شارىنى قاپلايدىغان بۇ خۇش خەۋەر ئېيتىش خىزمىتى قانداق ئورۇندىلىدۇ؟ ئەيسا يەر يۈزىدە بولغاندا قالدۇرغان ئۈلگىلەرگە ئەگىشىش ئارقىلىق. — لۇقا 8:1.
كىشىلەرنىڭ ئۆيلىرىگە بارىمىز. ئەيسا مەسىھ ئۆز شاگىرتلىرىنى ئۆيمۇ-ئۆي خۇش خەۋەرنى ۋەز ئېيتىش ئۈچۈن تەربىيىلىگەن (مەتتا 10:11–13؛ ئەلچىلەر 5:42؛ 20:20). ئاشۇ بىرىنچى ئەسىردىكى ۋەز ئېيتقۇچىلارغا خۇش خەۋەر يەتكۈزۈش ئۈچۈن ئېنىق دائىرە بۆلۈپ بېرىلگەن (مەتتا 10:5، 6؛ 2-كورىنتلىقلارغا 10:13). شۇنىڭغا ئوخشاش، بۈگۈنكى كۈندە بىزنىڭ ۋەز ئېيتىش خىزمىتىمىزمۇ ياخشى تەشكىللەنگەن بولۇپ، ھەربىر جامائەت ئۈچۈن بىر دائىرە بەلگىلەپ بېرىلگەن. بۇنداق ئورۇنلاشتۇرۇش، مەسىھنىڭ خۇش خەۋەرنى ‹خەلققە جاكارلاڭلار› دېگەن بۇيرۇقىنى كەڭ كۆلەمدە ئورۇندىشىمىزغا ياردەم بېرىدۇ. — ئەلچىلەر 10:42.
قەيەردە ئادەم بولسا، شۇ يەردە تىرىشىپ خۇش خەۋەر يەتكۈزىمىز. ئەيسا مەسىھ يەنە دېڭىز بويلىرى ۋە مەھەللە قۇدۇقى بېشى دېگەندەك خالايىق يىغىلىدىغان جايلاردا ۋەز ئېيتىپ ئۈلگە قالدۇرغان (ماركۇس 4:1؛ يۇھاننا 4:5–15). بىزمۇ قەيەردە ئادەم بولسا، مەسىلەن كوچىلاردا، تىجارەت ئورۇنلىرىدا ۋە باغچىلاردا ياكى تېلېفوندا كىشىلەر بىلەن مۇقەددەس كىتاب ھەققىدە سۆزلىشىمىز. ئۇنىڭدىن باشقا، پۇرسەت تۇغۇلغاندا خىزمەتداش، ساۋاقداش، قوشنا-قولۇم ۋە ئورۇق-تۇغقانلىرىمىزغىمۇ خۇش خەۋەر ئېيتىمىز. مۇشۇ بارلىق تىرىشچانلىقلار، دۇنيانىڭ جاي-جايلىرىدىكى مىليونلىغان كىشىلەرنىڭ قۇتقۇزۇلۇش خۇش خەۋىرىنى ئاڭلىشىغا ئىمكانىيەت يارىتىپ بېرىدۇ. — زەبۇر 96:2.
سىز خۇدا پادىشاھلىقى ھەققىدىكى خۇش خەۋەرنى كىملەر بىلەن ئورتاقلىشىپ، ئۇلارنىڭ كەلگۈسى بىلەن شۇ خۇش خەۋەرنىڭ قانداق زىچ باغلىنىشى بارلىقىنى ئېيتماقچى بولۇۋاتىسىز؟ كىشىگە ئۈمىد بېغىشلايدىغان بۇ خەۋەرنى كېچىكتۈرمەي ئۇلارغا يەتكۈزۈڭ!
قانداق «خۇش خەۋەر» چوقۇم ئاڭلىتىلىشى كېرەك؟
يەھۋا گۇۋاھچىلىرى ۋەز ئېيتىشتا مەسىھنى قانداق ئۈلگە قىلماقتا؟